San Mateo 19 - Kaqchiquel Bible

Ri Jesús xuya' tijonik pa ruwi' ri jachojri'il

¹ Y toq ri Jesús xtane' chubixik ri ch'abel ri', xuya' kan ri ruwach'ulew Galilea. Y xbe pa ruwach'ulew Judea, ri k'o juk'an apo chire ri raqen-ya' Jordán.

² Kan janila k'a e k'iy winaqi' ri xetzeqeliben richin, y ek'o k'a ri xeruk'achojirisaj ri chiri'.

³ Y ek'o k'a fariseo ri xe'apon rik'in, richin chi nikitejtobej, y xkik'utuj chire wi ruk'amon chi jun achin nujech-ri' rik'in ri rixjayil roma xabachike ok ri nibanatej.

⁴ Jak'a rija' xubij chike ri achi'a' ri': ¿Man itz'eton ta k'a rix chupan ri ruch'abel ri Dios ri nubij-wi chi rija' kan ja ri pa rutikeribel xuben ri achin y ri ixoq?

⁵ Roma ri' xubij: Xa roma ri' ri achin nuch'er-pe-ri' kik'in ri rute-rutata', y rik'in chik ri rixjayil xtuk'uaj-wi-ri', richin chi kan xtikich'akulaj-ki' chi e ka'i'. Keri' nubij ri ruch'abel ri Dios.

⁶ Roma ri' toq kik'uan chik ki', man chik e ka'i' ta, xa jun chik k'a ri kibanon. Roma ri' ri kan e tunun chik roma ri Dios, man yeruch'er ta ri wineq, xcha' ri Jesús.

⁷ Y ri fariseo xkik'utuj k'a chire: ¿Achike k'a roma toq ri Moisés xubij chi jun achin, xaxe tubana' jun wuj richin jachojri'il chire ri rixjayil y tuya' kan?, xecha'.

⁸ Ri Jesús xubij: Kan achi'el k'a kowirineq ri iwánima rix, kan keri' chuqa' xk'uluwachitej ojer kan, ri pa ruq'ijul ri Moisés. Xa roma ri' toq rija' xuya' q'ij chi tiban ri jachojri'il rik'in ri ixjayilonel, jak'a ri pa rutikeribel-pe, man keri' ta.

⁹ Yin ninbij chiwe chi xabachike achin ri nujech-ri' rik'in ri rixjayil y xa man roma ta chi ri ixoq xukanoj ta chik jun achin; ri achijlonel ri' kan nuben-wi k'a chire ri rixjayil chi nimakun, xcha' ri Jesús.

¹⁰ Ri tijoxela' xkibij k'a chire ri Jesús: Wi xa keri' ri rubanik, más ta utz chire ri achin chi man ta k'o rixjayil, xecha' rije'.

¹¹ K'ari' ri Jesús xubij: Man konojel ta k'a ri jebel ruk'ulik nikiben chire ri ch'abel ri xinbij, xa kan xaxe k'a ri nikajo' ri nikik'ul.

¹² Kan ek'o na wi achi'a' ri kan k'a pa kalaxik-pe rik'in ri kite', kan kik'amon-pe chi man xtikikanoj ta ixoq. Ek'o chuqa' achi'a' xa roma ri banon chike koma aq'omanela'. Y ek'o chuqa' achi'a' ri e keri', xa kik'in rije' xpe-wi chi man nikikanoj ta ixoq, richin chi yesamej jebel pa rusamaj ri Dios. Ri jun ri kan nuna' chi nitikir nik'oje' ruyon, kan man k'a tik'ule', xcha'.

Ri Jesús xerurtisaj ri ak'uala'

¹³ Y ek'o k'a ak'uala' ri xe'uk'uex-apo chuwech ri Jesús, richin chi rija' tuya' ruq'a' pa kiwi' y tich'on rik'in ri Dios pa kiwi'. Jak'a ri tijoxela' xa xekich'olij-el ri xe'uk'uan-apo ri ak'uala'.

¹⁴ K'ari' ri Jesús xubij chike: Tiya' q'ij chi ri ak'uala' yepe wik'in yin y man ke'q'et. Roma ri xke'ok chupan ri aj-chikajil ajawaren, xaxe ri e achi'el ri ak'uala', xcha'.

¹⁵ Toq ri Jesús xuya' kan urtisanik pa kiwi' ri ak'uala' ri', xel k'a el ri chiri'.

Ri janila k'ayew chuwech jun wineq beyom

¹⁶ K'o k'a jun ala' ri xapon rik'in ri Jesús y xubij chire: Rat ri utzilej tijonel tabij k'a chuwe: ¿Achike k'a utzilej banobel ri ruk'amon chi ninben yin richin nik'oje' nuk'aslen richin q'asen?, xcha'.

¹⁷ Rija' xubij chire: ¿Achike k'a roma toq nabij utz chuwe yin? Roma man jun wineq ri utz ta, xa kan xaxe k'a ri Dios ri utz. Jak'a wi rat kan nawajo' yatapon chupan ri k'aslen richin q'asen, kan ke'ataqej k'a ri pixa', xcha' chire.

¹⁸ Ri ala' ri' xuk'utuj k'a chire ri Jesús achike chi pixa' ri'. Y ri Jesús xubij: Man kakamisan; wi k'o awixjayil, man takanoj jun chik ixoq; man kateleq'; man tatz'uk-tzij.

¹⁹ Chuqa' taya' kiq'ij ri ate-atata'. Keri' chuqa' kan ke'awajo' ri awach'alal achi'el nawajo-qa awi' rat, xcha' ri Jesús.

²⁰ Ri ala' ri' xubij chi kan k'a ko'ol toq rubanon-pe ronojel ri', y achike ta k'a ri k'o chi nuben.

²¹ Y ri Jesús xubij k'a chire chi wi rija' nrajo' ruk'aslen tz'aqet, tiberuk'ayij kan ronojel ri k'o rik'in, y ri rajel tutaluj chikiwech ri winaqi' ri man jun k'o kik'in, richin keri' nik'oje' rubeyomel chila' chikaj. Y k'ari' tutzeqelibej ri Jesús.

²² Jak'a toq ri ala' xrak'axaj ri xubij ri Jesús, xtzolin k'a rik'in janila bis, roma rija' janila beyomel k'o rik'in.

²³ Kan jari' toq ri Jesús xubij chike ri rutijoxela': Kan qitzij wi k'a ninbij chiwe chi kan janila k'ayew nok jun beyom chupan ri aj-chikajil ajawaren.

²⁴ Ninbij k'a jun bey chik chiwe chi más la'eq man k'ayew ta niq'ax jun camello pa ti rujulil jun baq, ke chuwech jun beyom nok ta pa rajawaren ri Dios, xcha'.

²⁵ Y ri rutijoxela' toq xkak'axaj ri ch'abel ri', kan achike la xkak'axaj y xkibij k'a chikiwech, chi xa man jun k'a xtikolotej ri'.

²⁶ Jari' toq ri Jesús xerutzu-apo y xubij chike: Man tich'ob keri'. Ri janila k'ayew chikiwech ri winaqi', chuwech ri Dios xa man jun k'ayew, xcha'.

²⁷ Jari' toq ri Pedro xubij k'a chire ri Jesús: Roj qaya'on kan ronojel ri k'o qik'in, richin keri' at qatzeqeliben. ¿Y achike k'a ri xtiqak'ul roj roma ri'?, xcha'.

²⁸ Ri Jesús xubij: Kan qitzij k'a ninbij chiwe chi toq xtapon ri ruq'ijul toq ronojel k'ak'a' chik rubanik, y toq yin, ri xiqaqa-pe achi'el wineq chi'ikojol, k'o chik nuq'ij-nuk'ojlen y xkitz'uye' pa nutz'uyubal richin q'atoy-tzij, jari' toq rix ri xixtzeqeliben wichin, chi'ijujunal xkixtz'uye' pa tz'uyubel richin niq'et-tzij pa kiwi' ri kablajuj tzobaj richin ri qawinaq judío.

²⁹ Xabachike wineq ri woma yin ruya'on kan rachoch, rach'alal, rute-rutata', [rixjayil],*f27* ralk'ual o rulew, ri xtibanon keri' kan xtuk'ul pa ruk'iyal ri urtisanik y kan xtik'oje' ruk'aslen richin q'asen.

³⁰ Wakami e k'iy k'a ri janila kiq'ij, jak'a xa kan xtapon ri q'ij toq xa maneq chik kiq'ij xtiban chike. Chuqa' e k'iy ri xa maneq ok kiq'ij, y kan xtapon ri q'ij toq ja rije' ri xtiya'ox kiq'ij, xcha'.