San Mateo 14 - Kaqchiquel Bible

Ri rukamibal ri Juan ri q'alajirisanel

¹ Chupan k'a ri q'ij ri', ri Herodes Antipas, rey richin Galilea, xrak'axaj k'a chi ri Jesús janila rutzijol chikikojol ri winaqi'.

² Y rija' xubij k'a chike ri aj-raqen: Ri winaqi' nikibij chi ri Jesús xa jari' ri Juan ri q'alajirisey ruch'abel ri Dios ri xk'astej-pe chikikojol ri kaminaqi'. Roma ri' toq k'o uchuq'a' pa ruq'a' richin k'iy nitikir yerubanala', xcha' ri Herodes.

³ Y k'o yan k'a k'iy q'ij q'axineq kan chi ri rey Herodes xubij chi tibechap-pe ri Juan. Kan xuxim-wi k'a pa cadena y xuya' pa cárcel. Keri' xuben chire roma ri Herodías ri k'o qa rik'in ri Herodes xa rixjayil ri Felipe ri rach'alal.

⁴ Ri Juan tz'apen roma nubij chire ri Herodes chi man utz ta rubanon chi ruk'amon-qa ri Herodías.

⁵ Y roma ri' ri Herodes kan rajowan k'a rukamisan ta ri Juan, jak'a man rubanon ta roma kan nuxibij-ri' chikiwech ri winaqi', roma ri winaqi' kibanon chire ri Juan chi kan jun q'alajirisey ruch'abel ri Dios.

⁶ Jak'a chupan ri q'ij toq ri Herodes xutz'aqatisaj jun chik rujuna', xban k'a jun nimaq'ij, y chupan k'a ri nimaq'ij ri' ri xten ral ri Herodías xxajo' k'a chikiwech ri ek'o rik'in ri Herodes. Y ri Herodes kan janila xqa' chuwech ri xajoj ri xuben.

⁷ Y roma ri' ri Herodes kan xuya' k'a rutzij chire ri xten ri' chi xabachike k'a ri nrajo', kan xtuya-wi chire.

⁸ Jak'a toq ri xten kan ruk'ulun chik runa'oj rik'in ri rute', kan xubij k'a chire: Yin ninwajo' chi naya-pe chinuwech re wawe' pa jun leq, ri rujolon ri Juan, xcha'.

⁹ Ri Herodes xpe bis pa ránima roma ri', jak'a kan ruya'on chik rutzij chire ri xten y roma chuqa' kan chikiwech ri e rachibilan chiri' xubij-wi. Rija' xubij k'a chi tik'an-pe ri rujolon ri Juan chire ri xten ri'.

¹⁰ Roma ri' xuteq k'a rutzak'ixik ruqul ri Juan ri chiri' pa cárcel.

¹¹ Ri rujolon ri Juan xk'amer k'a pe pa jun leq chire ri xten, y ri xten xberujacha' pa ruq'a' ri rute'.

¹² Chirij ri' ri e rutijoxela' ri Juan xe'apon k'a chuk'amik ri ruch'akul y xbekimuqu' kan. Y rije' xbekibij k'a chuqa' chire ri Jesús ronojel ri xbanatej.

Ri Jesús xerutzuq más e 5,000 winaqi'

¹³ Ri Jesús kan xaxe k'a xrak'axaj-el ronojel ri banatajineq, xok-el pa jun barco e rachibilan-el ri rutijoxela', y xq'ax juk'an ruchi' ri choy richin Galilea, roma rija' nrajo' nik'oje' ruyon. Jak'a toq ri winaqi' xkak'axaj-el, chikaqen k'a xebe ri pa taq tinamit richin xe'apon k'a akuchi k'o chi napon-wi ri Jesús.

¹⁴ Y toq ri Jesús nel k'a kan chupan ri barco ri chiri' juk'an ruchi' ri choy, xutz'et k'a chi e janila chik e k'iy winaqi' ri e oyobeyon richin, y rija' janila k'a xujoyowaj kiwech ri winaqi' ri'. Roma ri' kan xeruk'achojirisaj-wi k'a ri yawa'i' ri ek'o chikikojol.

¹⁵ Y toq xqaq'ij-qa chupan ri jun q'ij ri', ri rutijoxela' xe'apon rik'in y xkibij chire: Re wawe' xa nej k'o kan chire ri tinamit. Chuqa' janila xqaq'ij yan. Ke'ataqa' k'a el re winaqi' re' richin chi yebe pa taq kokoj tinamit ri ek'o-pe naqaj y tikiloq'o' kiway chiri', xecha'.

¹⁶ Jak'a ri Jesús xubij chike ri rutijoxela': Man nik'atzin ta k'a richin yebe y k'a ta ri' nikil kiway; xa tiya' kiway rix, xcha' chike.

¹⁷ Jak'a ri rutijoxela' xkibij chi xaxe ok wo'o' kaxlan-wey y ka'i' ker k'o kik'in.

¹⁸ K'ari' ri Jesús xubij k'a chike: Tik'ama-pe wawe' wik'in yin, xcha'.

¹⁹ Y jari' chuqa' toq xubij chi ketz'uye' k'a konojel ri winaqi' pa ruwi' ri rex q'ayis. Y k'ari' rija' xeruli'ej pa ruq'a' ri wo'o' kaxlan-wey y ri ka'i' ker, xtzu'un chikaj y xumatioxij chire ri Dios. Rija' xeruper k'a el ri ker y ri kaxlan-wey, y xuya-el chike ri rutijoxela'; y rije' xbekijacha' kan chikiwech ri winaqi'.

²⁰ Kan konojel k'a jebel xnoj kipan. Y man jun k'a ri man ta jebel xwa'. Y k'a k'o na k'a kablajuj chakech ri xnoj kan rik'in ri wey y ri ker ri xmolotej kan, ri xa man xk'is ta.

²¹ Janila chi winaqi' ri xewa'. Ek'o la'eq e 5,000 xaxe ri achi'a', y man xe'ajlex ta ri ixoqi' y ri ak'uala'.

Ri xbanatej pa ruwi' ri choy richin Galilea

²² Xbanatej k'a chi ri Jesús xerukusaj-el ri rutijoxela' chupan ri barco y xubij chike chi kebe k'a ri juk'an chik ruchi' ri choy; y chuqa' xubij chike chi kan kenabeyej-el chuwech, roma rija' k'a yerutaqala' na kan ri winaqi' chi taq kachoch.

²³ Jak'a toq e rutaqon chik el ri winaqi' chi taq kachoch, ri Jesús ruyon k'a xjote-el pa ruwi' jun juyu' richin nich'on rik'in ri Dios. Y kan k'a chiri' k'a k'o-wi ruyon toq kan okineq chik ri aq'a'.

²⁴ Jak'a ri barco ri e beneq-wi ri tijoxela' kan xapon yan k'a pa runik'ajal ri choy, y ri ya' nibolqo't ruwi', y man nuya' ta q'ij chi nibiyin ri barco roma nupaxij-ri' ri kaq'iq' chuwech.

²⁵ Y toq niseqer yan pe y jubama niq'ax yan ri aq'a' ri', ri Jesús peteneq k'a chiraqen pa ruwi' ri ya', richin napon kik'in.

²⁶ Y toq ri rutijoxela' xkitz'et chi k'o jun peteneq chiraqen pa ruwi' ri ya', rije' xkik'en rukiy y nikibij: ¡La' jun xibinel!, yecha'. Y kan rik'in kuchuq'a' xkibila' keri' roma kixibinri'il.

²⁷ Jak'a ri Jesús chi'anin xch'on-pe chike, y xubij: Man tixibij-iwi', xa tikuquba' ik'u'x. Ja yin ri Jesús, xcha' chike.

²⁸ Y ri Pedro kan jari' k'a xch'on-apo chire ri Jesús ri k'a peteneq na pa ruwi' ri ya', y xubij: Wajaw, wi ja rat ri', tabana' k'a chuwe chi yibiyin pa ruwi' ri ya', richin yibe-apo awik'in, xcha'.

²⁹ Y ri ajaw xubij-pe chire chi tipe k'a. Ri Pedro kan jari' xqaqa-el ri pa barco y xuchop k'a nibiyin pa ruwi' ri ya' richin nibe-apo k'a rik'in ri Jesús.

³⁰ Xa jak'a toq xutz'et ri nuben ri nimalej kaq'iq', xpe chik xibinri'il rik'in. Y toq xuna' chi nibe-qa chuxe' ri ya', rik'in k'a uchuq'a' xubij: ¡Ajaw, kinakolo'!, xcha'.

³¹ Y ri Jesús kan jari' xuchop chi'anin chi ruq'a' y xubij chire: ¿Achike k'a roma juba' ok xakuquba' ak'u'x wik'in?, xcha' chire.

³² Toq rije' e jotol chik k'a el ri pa barco, ri kaq'iq' xtane-el.

³³ Y kan jari' toq konojel ri e beneq ri chiri' xkiya' k'a ruq'ij ri Jesús y xkibij chire: Wakami kan xqatz'et k'a chi kan qitzij ja wi rat ri at ruk'ajol ri Dios, xecha' chire.

Ri Jesús k'iy yawa'i' xeruk'achojirisala' pa Genesaret

³⁴ Y rije' xeq'ax k'a pa ruwi' ri ya' ri', y xe'apon k'a pa ruwach'ulew Genesaret.

³⁵ Toq xetamex ruwech ri Jesús chiri' koma ri winaqi', rije' xkitaluj k'a rutzijol chi'anin ri pa taq tinamit ri ek'o-pe chunaqaj ri kitinamit rije', y ri winaqi' xekik'amala' k'a pe ri yawa'i'.

³⁶ Y re yawa'i' re' kan nikik'utula' k'a utzil chire ri Jesús chi tuya' q'ij chike chi stape' xaxe ta ri ruchi-rutziaq nikichop richin yek'achoj. Y kan keri' wi k'a ri xbanatej. Konojel ri xechapo ri ruchi-rutziaq ri Jesús xek'achoj chire ri kiyabil.