Marcos 9 - Kaqchiquel Bible

¹ Chuqa' ri Jesús xubij chike ri ek'o rik'in: Kan ek'o k'a chiwe re ixk'o wawe' ri man xkixken ta k'a toq in itz'eton chik yin, toq xkipe richin nonq'ata-tzij rik'in uchuq'a', xcha'.

Ri Jesús xjalatej ruwech

² Toq ik'owineq chik waqi' q'ij, ri Jesús xucha' ri Pedro, ri Jacobo y ri Juan richin xeruk'uaj k'a pa ruwi' jun juyu'. Chiri' ri Jesús xjalatej k'a ruwech chikiwech ri e oxi' rutijoxela' ri'.

³ Ri rutziaq kan xok seq-seq achi'el ri saqil. Y man jun k'a ch'ajoy-tzieq ri nitikir ta nuben keri' chire jun tzieq.

⁴ Xkitz'et chi xbek'ulun-pe ri Moisés y ri Elías y yetzijon-apo rik'in.

⁵ K'ari' ri Pedro xubij-apo chire ri Jesús: Tijonel, wawe' kan ruk'amon richin yojk'oje-qa. Wi ta nawajo', niqaben oxi' taq jay rik'in ruq'a' taq che'; jun awichin rat, jun richin ri Moisés y jun richin ri Elías, xcha'.

⁶ Ri Pedro keri' xubij-apo roma man nril ta achike nuben, roma kan janila ruxibin-ri' y keri' chuqa' ri e rachibil.

⁷ Jari' k'a toq k'o jun sutz' ri xkuchu kichin. Y k'a chupan ri sutz' ri' xch'on-pe ri Dios y kere' xubij: Jare' ri nuk'ajol yin ri kan janila ninwajo'. Tiwak'axaj k'a ri nubij, xcha-pe.

⁸ Jak'a toq ri tijoxela' xetzu'un chik apo, xkitz'et chi xa man jun chik k'o rik'in ri Jesús. Xa ruyon chik k'o kan.

⁹ Rokik rije' xexule-pe chuwech ri juyu', ri Jesús xuchilabej chike chi man tikitzijoj ri xkitz'et k'a toq rija' k'astajineq chik na pe chikikojol ri kaminaqi'.

¹⁰ Rije' kan man xkitzijoj ta ri achike xkitz'et, jak'a xa nikik'utula' chikiwech achike ri xrajo' xubij ri Jesús rik'in ri ch'abel chi xtik'astej-pe chikikojol ri kaminaqi'.

¹¹ K'ari' ri e oxi' tijoxela' xkibij chire ri Jesús: ¿Achike roma toq ri etamanela' chirij ri pixa' nikibij chi k'atzinel chi nipe ri Elías pa nabey chuwech ri Cristo ri xtiqaqa-pe chiqakojol roj?, xecha'.

¹² Roma ri' ri Jesús xubij chike: Kan qitzij wi chi ri Elías k'o chi xtipe nabey y xtuben ruchojmilal ronojel ri k'o. ¿Man kami xtibanatej ta chuqa' ri tz'ibatel kan chirij ri Cristo ri xtiqaqa-pe chiqakojol chi k'o chi nuk'owisaj k'iy tijoj-poqonal, y kan man jun ruq'ij xtiban chire?

¹³ Jak'a yin ninbij chiwe chi ri Elías ri' xpe yan. Y kan janila xkiben-el ri winaqi' chire, achi'el ri xkajo' rije'. Kan achi'el ri tz'ibatajineq kan chirij, xcha' ri Jesús.

Ri Jesús xuk'achojirisaj jun ala' ri k'o jun itzel espíritu rik'in

¹⁴ Toq ri Jesús xapon kik'in ri ch'aqa' chik tijoxela', rija' xutz'et k'a chi janila e k'iy winaqi' ri kimolon-ki' chikij, y chikikojol rije' ek'o e ka'i-oxi' etamanela' chirij ri pixa' ri kichapon-ki' rik'in ch'abel.

¹⁵ Toq ri winaqi' xkitz'et ri Jesús, janila xkimey, y junanin xebe chuq'ejeloxik.

¹⁶ K'ari' ri Jesús xuk'utuj k'a chike ri rutijoxela': ¿Achoq pa ruwi' ichapon-wi-iwi' kik'in rije'?, xcha'.

¹⁷ Jak'a jun chike ri winaqi' xuchop-apo rubixik chire ri Jesús y xubij: Tijonel, yin nuk'amon-pe ri nuk'ajol, roma k'o jun itzel espíritu rik'in. Y re itzel espíritu re' rumemurisan.

¹⁸ Toq más nuchop, xabakuchi k'o-wi nutorij pan ulew, niwoqo ruchi', nuqach'ach'ej rey y che-che' nuben. Xink'utuj yan k'a utzil chike re atijoxela' chi tikelesaj re itzel espíritu re' rik'in ri nuk'ajol, jak'a xa man xetikir ta, xcha' ri achin.

¹⁹ Ri Jesús xubij chike ri winaqi': Kan man jun chiwe rix ri kuqul ta ruk'u'x rik'in ri Dios. ¿Rix nich'ob chi yin kan jantape' yik'oje' iwik'in? ¿Chi kan jantape' k'o chi yixinkoch'? Tik'ama-pe ri ala', xcha'.

²⁰ Xk'an k'a pe ri ala' chuwech ri Jesús. Jak'a toq ri itzel espíritu xutz'et ri Jesús, rik'in ruchuq'a' xuyikikej ri ala' y xutorij pan ulew. Y ri ala' nubolqotila-ri' y niwoqo ruchi'.

²¹ K'ari' ri Jesús xuk'utuj k'a chire ri tata'aj chi janipe' ruk'uluwachin-pe kere' re ala'. Y ri tata'aj xubij: Kan k'a ko'ol toq ruchapon-pe.

²² K'iy k'a bey rutorin pa q'aq' o pa taq ya' richin ta niken. Jak'a re wakami, wi rat yatikir, tabana' jun utzil tajoyowaj qawech y qojato', xcha'.

²³ Ri Jesús xubij: Wi rat nakuquba' ak'u'x wik'in, kan xtibanatej-wi ri arayibel. Roma wi jun wineq kan nukuquba' ruk'u'x, kan nibanatej-wi ri achike nrajo', xcha' ri Jesús.

²⁴ Roma ri' ri rutata' ri ala' kan rik'in uchuq'a' xubij: Ninkuquba' nuk'u'x awik'in; kan kinato' richin chi más ta xtinkuquba' nuk'u'x awik'in, xcha'.

²⁵ Toq ri Jesús xutz'et chi xa e janila e k'iy winaqi' ri junanin nikimol-apo-ki', jari' toq xuch'olij ri itzel espíritu y xubij chire: Rat ri abanon chire re ala' re' chi man nak'ex ta y amemurisan; katel-el, y man chik katzolin-pe rik'in, xcha'.

²⁶ Jari' toq ri itzel espíritu nisik'in y xuyikikej kan. K'ari' xel-el rik'in ri ala'. Y rija' xk'oje' kan pan ulew, achi'el jun kamineq. Y roma ri' e k'iy winaqi' nikibij chi ri ala' xken.

²⁷ Jak'a ri Jesús xuchop ruq'a' ri ala' richin xuyek-q'anej. Y ri ala' kan jari' xbeyakatej-pe.

²⁸ K'ari' xe'ok-apo pa jun jay. Y chiri' ri tijoxela' xkik'utuj chire ri Jesús pa ruyonil y xkibij: ¿Achike roma roj man xojtikir ta xqelesaj-el ri itzel espíritu?, xecha'.

²⁹ Ri Jesús xubij: Re jun etzelal re' nel xaxe wi rix [yixmewayin y]*f10* yixch'on rik'in ri Dios, xcha'.

Ri Jesús xukamuluj rubixik ri rukamik

³⁰ Toq rije' e eleneq chik pe chiri', chikaqen e peteneq ri pa Galilea. Jak'a ri Jesús man xrajo' ta chi xnabex chi rija' niq'ax-pe chiri'.

³¹ Roma rija' kan najin chikitijoxik ri rutijoxela', y nubij chik chike: Yin, ri xiqaqa-pe achi'el wineq chi'ikojol, kan xkijach-wi pa kiq'a' ri winaqi'. Xkikamisex k'a; jak'a pa rox q'ij xkik'astej-pe, nicha' chike.

³² Jak'a ri tijoxela' xa man xq'ax ta chikiwech ri xbix chike roma ri Jesús. Y nikixibij ki' nikik'utuj chire ri nel chi tzij ri xubij chike.

Ri nuqasaj-ri' k'o ruq'ij

³³ Ri Jesús e rachibilan ri rutijoxela' xapon pa Capernaum. Toq ek'o chik ri pa jay, rija' xuk'utuj chike ri rutijoxela': ¿Achike k'a ri nibij chiwech toq qachapon-pe bey?, xcha'.

³⁴ Jak'a ri tijoxela' man xeq'ajan ta apo, roma toq e peteneq ri pa bey, xa xkich'ojila' k'a chikiwech achike ri más nim ruq'ij chikikojol.

³⁵ Ri Jesús xtz'uye' k'a qa. K'ari' xeroyoj-apo rik'in chi kablajuj rutijoxela', y xubij k'a chike: Wi k'o jun nrajo' chi ja rija' ri nabey, ja rija' ri xtuk'isibej kan y xtok jun ilinel kichin konojel, xcha'.

³⁶ K'ari' ri Jesús xberuk'ama-pe jun ti ak'ual, y xuya' ri chiri' pa kinik'ajal. Xuch'elej, y xubij chike ri rutijoxela':

³⁷ Ri xtik'ulu jun ak'ual pa nubi', kan achi'el ja yin ri xkiruk'ul, y ri xtik'ulu wichin yin, man xaxe ta yin ri xkiruk'ul, chuqa' kan xtuk'ul ri in taqayon-pe, xcha'.

Ri man ye'etzelan ta qichin, qachibil-qi' kik'in

³⁸ K'o k'a jun q'ij chi ri Juan xubij chire ri Jesús: Tijonel, k'o jun achin man qachibil ta ri qatz'eton kan. Y re achin re', pan abi' rat yerelesala' itzel taq espíritu. Jak'a roma xa man qachibil ta, xqabij chire chi man chik tuben keri', xcha' rija'.

³⁹ Jak'a ri Jesús xubij: Man tiq'et. Roma man jun ri nuben ta nima'q taq banobel pa nubi' y k'ari' nich'on itzel chuwij.

⁴⁰ Roma ri man ye'etzelan ta qichin, kan qachibil-wi-qi' kik'in.

⁴¹ Xabachike k'a ri nuben utz iwik'in pa nubi' yin, stape' xa juba' iya' ri nuya', kan qitzij k'a chi kan k'o rajel-ruk'exel xtuk'ul roma ri', xcha'.

Toq'ex ruwech ri wineq ri nimakun

⁴² Ri Jesús xubij chik: Xabachike k'a wineq ri xtibanon chire ri más ruqasan-ri' chike ri yetzeqeliben wichin, chi nimakun; ri nibanon ri etzelal ri', más ta utz xa nixim-el chuqul jun nimalej abej richin ke'en y keri' nik'aq k'a chupan ri palou.

⁴³ Xa roma ri' wi jun aq'a' ri nibanon chawe chi yamakun, más ta utz nachoy-el y natorij-el. Roma más utz chi xaxe jun aq'a' k'o y yatok chupan ri k'aslen ri man k'isel ta, ke chuwech ka'i' aq'a' k'o y xa chi tz'aqet yabetorix kan chupan ri q'aq' ri man jun bey xtichup.

⁴⁴ [Ri akuchi ek'o jut richin ch'akulaj, ri xa kan man yeken ta, y chuqa' ri q'aq' ri xa kan man nichup ta.]*f11*

⁴⁵ Wi xa jun awaqen ri nibanon chawe chi yamakun, más ta utz chi nachoy-el. Roma más ta utz chi xaxe jun awaqen k'o y yatok chupan ri k'aslen ri man k'isel ta, ke chuwech ka'i' awaqen k'o y xa chi tz'aqet yabetorix kan chupan ri q'aq'.

⁴⁶ [Ri akuchi ek'o jut richin ch'akulaj, ri xa kan man yeken ta, y chuqa' ri q'aq' ri xa kan man nichup ta.]*f12*

⁴⁷ Wi ta jun chike ri runaq'-awech nibanon chawe chi yamakun, más utz nawelesaj. Roma más utz chi xaxe jun runaq'-awech k'o y yatapon pa rajawaren ri Dios, ke chuwech ka'i' runaq'-awech k'o y xa chi tz'aqet yabetorix kan chupan ri q'aq',

⁴⁸ ri akuchi ek'o jut richin ch'akulaj, ri xa kan man yeken ta, y chuqa' ri q'aq' ri xa kan man nichup ta.

⁴⁹ Konojel winaqi' xke'atz'amix, jak'a man rik'in ta chik atz'an, xa rik'in q'aq'.

⁵⁰ Ri atz'an yalan jebel. Jak'a wi ta re atz'an re' nik'is ta el ri ratz'amil, ¿achike chik ta k'a xtukusex richin natz'amix? Roma ri' utz tibana' chiwech rix richin yixk'ase' utz y tik'oje' uxlanibel-k'u'x chi'ikojol, xcha'.