Marcos 5 - Kaqchiquel Bible

Ri Jesús xerelesaj itzel taq espíritu rik'in jun aj-Gerasa

¹ Toq ri Jesús y ri rutijoxela' xe'apon k'a ri juk'an chik ruchi' ri choy, ri chiri' pa ruwach'ulew Gerasa,*f6*

² ri Jesús xqaqa kan chupan ri barco. Kan jari' k'a toq xapon jun achin rik'in, ri eleneq-pe akuchi e muqul-wi ri kaminaqi'. Ri achin ri' ek'o k'a itzel espíritu rik'in.

³ Kan ja k'a ri akuchi e muqun-wi ri kaminaqi', jari' ri okineq rachoch. Y man jun tikirineq ximiyon ta stape' kan rik'in cadena.

⁴ K'iy mul e ximon ruq'a-raqen rik'in cadena, jak'a xa e ruraq'ach'ilon kan, y nuq'ej ri ch'ich' ri sutin-rij ri raqen rik'in. Kan man jun tikirineq chirij.

⁵ Rija' kan jantape' k'a nibiyaj ri pa taq juyu' y ri chikikojol ri akuchi e muqun-wi kaminaqi'; nisik'in y nusokola-ri' rik'in abej. Kan chi paq'ij chi chaq'a' keri' nubanala'.

⁶ Toq rija' xutz'et-pe ri Jesús, k'a nej k'a k'o-wi, junanin xpe y xoxuke' chuwech.

⁷ Y kan rik'in k'a ruchuq'a' xch'on y xubij: Rat Jesús ri ruk'ajol ri nimalej Dios, ¿achike roma toq yinaneq? Pa rubi' ri Dios ninbij chawe, chi man kinach'ujerisaj, xcha'.

⁸ Ri achin xubij kere' roma ri Jesús najin chubixik chire ri espíritu ri k'o rik'in ri achin chi tel-el.

⁹ K'ari' ri Jesús xuk'utuj chire ri itzel espíritu chi achike rubi'. Y rija' xubij: Ri nubi' Oj K'iy, roma e janila wachibil ek'o, xcha'.

¹⁰ Kan janila k'a xuk'utuj utzil chire ri Jesús chi man trelesaj-el chiri'.

¹¹ Y k'a kela' k'a apo juba' chire ri akuchi k'o-wi rija', yeyuq'ux janila e k'iy aq.

¹² Ri itzel taq espíritu ri ek'o rik'in ri achin ri', xkik'utuj utzil chire ri Jesús. Y xkibij chire: Taya' q'ij chiqe richin yojok kik'in la q'ataj aq la ek'o chila', xecha'.

¹³ Ri Jesús xubij chike: Kixbiyin k'a, xcha'. Y ri itzel taq espíritu xe'el-el y xebe'ok kik'in ri aq. Konojel ri aq ri' xkichop anin pa xulan, chuwech jun juyu' pa'el-pa'el, y choj xebetzaq chupan ri choy y konojel ri aq ri' xeken. Ri kajlabal ri aq ri' ek'o la'eq jun 2,000.

¹⁴ Jak'a ri yeyuq'un kichin, kan xaxe k'a xkitz'et kan ri xbanatej, xe'animej. Xebe pa tinamit, y pa taq kokoj tinamit y xbekitaluj rutzijol ri xbanatej rik'in ri achin ri'. Y ri winaqi' aj chiri' xokitz'eta' ri xbanatej.

¹⁵ Toq xe'oqaqa rik'in ri Jesús, kan jari' toq xkitz'et chi ri achin ri xek'oje' itzel taq espíritu rik'in, tz'uyul, rukusan rutziaq y kan choj chik rubanik. Jak'a ri winaqi' ri' xa xkixibij-ki'.

¹⁶ Ri winaqi' ri xetz'eton ri xbanatej rik'in ri achin ri' y kik'in ri aq, xkitzijola' k'a chike ri winaqi' ri e peteneq chutz'etik ri xk'uluwachitej.

¹⁷ Roma ri' ri winaqi' aj chiri' xkik'utuj k'a utzil chire ri Jesús chi tel-el chiri'.

¹⁸ Chirij ri' ri Jesús xtzolin pa barco. Nok yan el chupan toq ri achin ri xek'oje' ri itzel taq espíritu rik'in xuk'utuj k'a utzil chire ri Jesús chi tuya' q'ij chire richin nibe rik'in.

¹⁹ Jak'a man xuya' ta q'ij, y xa xubij chire: Katzolin chi'awachoch, y tatzijoj chike ri e aj pan awachoch ri nima'q taq banobel y ri joyowanik ri xinben awik'in, xcha' chire.

²⁰ Ri achin ri' xbe k'a y xuchop rutzijoxik ri xuben ri Jesús rik'in. Xutzijoj chike konojel ri winaqi' ri ek'o chupan ri ruwach'ulew Decápolis. Y rije' kan janila xkimey ri xbanatej.

Ri Jesús xuben ka'i' meyel taq banobel

²¹ Ri Jesús y ri rutijoxela', xe'ok chik chupan ri barco richin xetzolin. Jak'a kan e janila e k'iy winaqi' ri xkimol-apo-ki' rik'in ri chiri' chuchi' ri choy richin Galilea.

²² Ri chiri' xapon k'a chuqa' jun achin rubini'an Jairo. Rija' nisamej chupan ri jay richin molojri'il, akuchi nikak'axaj ri ruch'abel ri Dios. Y toq xutz'et-apo ri Jesús, kan jari' xxuke' k'a pan ulew chuwech.

²³ K'ari' xubij chire ri Jesús: Ri ti numi'al yawa' y niken yan. Tabana' k'a utzil tabeya' ri aq'a' pa ruwi' richin nikolotej chuwech ri kamik y nik'ase' kan, xcha'.

²⁴ Roma ri' ri Jesús kan xbe, y e k'iy chuqa' winaqi' ri xkimol-apo ki' chirij.

²⁵ Chikikojol ri janila chi winaqi' beneq jun ixoq yawa', ri k'o yan chik kablajuj juna' nibiyin rukik'el y man tanel ta.

²⁶ Rija' rutijon poqon roma beneq chik kik'in e k'iy aq'omanela', y xuk'is yan chuqa' ronojel ruméro. Jak'a pa ruk'exel chi utz ta juba', xa más rubanon.

²⁷ Re ixoq re' rak'axan-pe ri utzil ri yerubanala' ri Jesús. Roma ri' xjel-apo rik'in, y xberuchapa' kan juba' ri rutziaq.

²⁸ Roma ri ixoq ri' kan rubin pe pa ránima: Xa rik'in ta ninchop-el juba' rutziaq ri Jesús, yik'achoj chire re yabil re', chayineq-pe.

²⁹ Kan xaxe k'a xuchop ri rutziaq ri Jesús, kan jari' xk'achoj chire ri yabil ri ruk'uluwachin.

³⁰ Jak'a ri Jesús toq xunabej chi xel-el uchuq'a' rik'in, jari' toq xtzu'un chirij, y xubij chike ri winaqi': ¿Achike xchapo ri nutziaq?, xcha'.

³¹ Jak'a ri tijoxela' xkibij chire: Ye'atz'et chi ri winaqi' yatkipitz', y rat nak'utuj na chi achike xchapo ri atziaq, xecha' chire ri Jesús.

³² Jak'a ri Jesús yerutzula' ri winaqi' richin nretamaj richin achike xchapo ri rutziaq.

³³ Ri ixoq ruxibin-ri' y nibaybot, roma xa ja rija' ri xchapo ri rutziaq, y kan xk'achoj-wi chire ri yabil, xoxuke' chuwech ri Jesús y xuq'alajirisaj ri xuben.

³⁴ K'ari' ri Jesús xubij chire: Nána xakolotej, roma xakuquba' ak'u'x wik'in. Wakami k'a, katzolin rik'in uxlanibel-k'u'x roma xak'achoj-el chire ri yabil ri ak'uluwachin, xcha-el chire.

³⁵ K'a nich'on na k'a ri Jesús rik'in ri ixoq, toq xe'apon ri rusamajela' ri Jairo, y xkibij chire: Ri ti ami'al xa xken yan, y man nik'atzin ta chik richin nak'uaj-el ri tijonel, xecha' chire.

³⁶ Jak'a toq ri Jesús xrak'axaj ri xkibij ri samajela', xubij chire ri Jairo: Man taxibij-awi', rat xaxe takuquba' ak'u'x wik'in, xcha' chire.

³⁷ Ri Jesús xaxe ri Pedro, ri Jacobo y ri Juan ri kach'alal-ki' ri xeruk'uaj-el.

³⁸ Xbe chirachoch ri Jairo. Jak'a toq xapon, xerutz'et chi ri winaqi' yech'ujlan ri pa jay, kan janila ye'oq' y janila yejiq'ijo'x.

³⁹ Toq ri Jesús okineq chik apo, xubij chike ri winaqi': ¿Achike roma yixoq' y yixch'ujlan? La ti xten man kamineq ta; rija' xa niwer, xcha' chike.

⁴⁰ Jak'a rije' xa xetze'en chirij ri Jesús. K'ari' rija' xuben chike konojel chi xe'el-pe. Y xerukusaj-apo ri rute-rutata' ri ti xten y ri e oxi' ri e beneq chirij akuchi k'o-wi ri ti xten.

⁴¹ Rija' xuchop k'a ruq'a' ri ti kamineq y xch'on pa ch'abel arameo, y xubij: Talitá, kum, xcha'. Re ch'abel re' nel chi tzij: Ti xten, chawe rat ninbij-wi chi kayakatej.

⁴² Kan xaxe xubij kere' ri Jesús, kan jari' xyakatej ti xten, y roma xa kan kablajuj chik rujuna' xuchop xbiyin-el. Ri ek'o rik'in, kan janila k'a xkimey toq xkitz'et chi xk'oje' chik ruk'aslen ri ti xten.

⁴³ Jak'a ri Jesús janila xuchilabej chike chi man tikelesaj rutzijol, y chuqa' xubij chi tikisuju' ruway ri ti xten.