San Lucas 4 - Kaqchiquel Bible

Ri Jesús xtejtobex roma ri Itzel-Wineq

¹ Ri q'ij k'a toq xqasex ya' pa ruwi' ri Jesús, kan xnoj k'a ránima rik'in ri Loq'olej Espíritu. Xtzolin-pe pa raqen-ya' Jordán, y re Loq'olej Espíritu re' xuben chire chi xbe k'a pa tz'iran ruwach'ulew.

² Chiri' xk'oje-wi kawineq q'ij, y ri Itzel-Wineq nutejtobela' k'a. Y chupan ri janipe' q'ij xk'oje' ri Jesús chiri', man jun wey xutej. Roma ri' ninum nuna' rija'.

³ Kan jari' k'o-apo ri Itzel-Wineq, y xubij chire ri Jesús: Wi kan qitzij chi at ruk'ajol ri Dios tabana' chike re abej re' chi ye'ok kaxlan-wey, xcha'.

⁴ Ri Jesús xubij chire: Tz'ibatel kan chupan ri ruch'abel ri Dios, chi man xaxe ta rik'in wey yojk'ase-wi, xa kan rik'in chuqa' ri ruch'abel ri Dios, xcha'.*f7*

⁵ Kan jari' k'a toq ri Itzel-Wineq xuk'uaj ri Jesús pa ruwi' jun nimalej juyu', y pa jun ti ramaj xuk'ut ronojel ajawaren richin ri ruwach'ulew chuwech.

⁶ K'ari' ri Itzel-Wineq xubij chire: Yin ninjech pan aq'a' ri kiq'ij re nimalej taq ajawaren re', y ye'ok pan aq'a' richin naq'et-tzij pa kiwi', roma pa nuq'a' yin e jachon-wi kan, y yin ninya' ronojel re' chire xabachike ri ninwajo' yin.

⁷ Wi rat yaxuke' chinuwech y naya' nuq'ij, ronojel k'a re' xtok awichin, xcha' chire.

⁸ Jak'a ri Jesús xubij chire: Kinaya' kan, y man chik kinaneq rat, Itzel-Wineq. Roma chupan ri ruch'abel ri Dios ri tz'ibatel kan, nubij: Kan tiya' k'a ruq'ij ri Jehová ri qa-Dios y kan tisamajij xaxe rija', nicha', xcha' ri Jesús chire.

⁹ Kan jari' chuqa' toq ri Itzel-Wineq xuk'uaj ri Jesús k'a pa Jerusalem, y k'a ja ri más nej jotol-wi chikaj chire ri rachoch ri Dios, chiri' xberuya-wi. Toq ek'o chik chiri', xubij chire ri Jesús: Wi kan qitzij at ruk'ajol ri Dios, tak'aqa-qa-awi' wawe';

¹⁰ roma chupan ri ruch'abel ri Dios ri tz'ibatel kan, nubij:*f8* Ri Dios xkeruteq k'a pe ri ru-ángel chiqanaqaj, richin yojkichajij.

¹¹ Xqojkili'ej pa kiq'a'. Keri' roj man xtiqapajk'ij ta ri qaqen, nubij, xcha' ri Itzel-Wineq.

¹² Jak'a ri Jesús xubij chire ri Itzel-Wineq: Ri ruch'abel ri Dios nubij chi man tiqatejtobej ri qajaw Dios, xcha'.*f9*

¹³ Toq ri Itzel-Wineq man jun chik xril richin nuben chire ri Jesús, richin nimakun ta, xuya' kan ka'i-oxi' q'ij.

Toq ri Jesús xuchop rusamaj pa Galilea

¹⁴ Ri Jesús xtzolin pa ruwach'ulew Galilea, y nojineq ránima rik'in ri ruchuq'a' ri Loq'olej Espíritu. Y pa konojel k'a tinamit ri ek'o-pe chunaqaj ri Galilea, xapon rutzijol ri Jesús.

¹⁵ Rija' xtijon k'a pa taq jay ri akuchi nikimol-wi-ki' richin nikak'axaj ri ruch'abel ri Dios y konojel k'a nikiya' ruq'ij.

Ri aj-Nazaret man xkinimaj ta ri Jesús

¹⁶ Ri Jesús xbe pa Nazaret, ri tinamit ri xk'iy-wi. Chupan ri uxlanibel-q'ij, rija' xbe k'a chupan ri jay ri akuchi nikimol-wi-ki' richin nikak'axaj ri ruch'abel ri Dios, kan achi'el wi tuben. Toq k'o chik chiri', rija' xpa'e' k'a, richin nusik'ij ri ruch'abel ri Dios.

¹⁷ Xjach k'a pa ruq'a' jun wuj ri rutz'iban kan ri Isaías. Y toq ri Jesús xurik'-qa ri wuj ri', xril k'a ri akuchi nubij-wi:*f10*

¹⁸ Ri uchuq'a' richin ri Jehová ri wajaw kan k'o pa nuwi' yin; Kan xiruteq k'a pe richin ninya' utzilej rutzijol chike ri e k'ayewatajineq, richin yetotej ri ek'o pa ximonri'il. Richin nonbij chike chi k'o kolotajik chike rije'. Xitaq-pe richin ninben chike ri moyi' chi yetzu'un y richin yenkol ri winaqi' ri janila nikitej poqon.

¹⁹ Chuqa' richin ninbij chike ri winaqi' chi ja q'ij re' toq ri ajaw Dios nuben ri utzil, nicha' ri Isaías, xcha' ri Jesús.

²⁰ Ri Jesús xubot k'a kan ri wuj ri xusik'ij chikiwech. K'ari' xuya' kan chire jun ri nisamej chiri', y chiri' xtz'uye-wi-qa. Ri winaqi' kan man nel ta ri runaq' taq kiwech chirij.

²¹ Rija' xch'on y xubij: Jare chiwech rix wakami, xbanatej-wi ri rubin kan ri Dios chupan re wuj re tz'ibatel kan, xcha'.

²² Konojel k'a ri winaqi', janila xqa' chikiwech ri Jesús, y kan janila xkimey ri utzilej taq ch'abel ri xerubij.Y ri winaqi' ri' nikibila' chuqa' chikiwech: ¿Man ja ta k'a re' ri ruk'ajol ri José?, yecha'.

²³ Jak'a ri Jesús xubij chike: Yin ninbij chi rix nich'ob-qa chuwij achi'el nubij ri jun k'ambel-tzij: Rat aq'omanel tawaq'omaj-qa-awi' ayon; roma qak'axan chi k'iy nima'q taq banobel abanon pa Capernaum, xa kan tabana' chuqa' wawe' pa qatinamit, yixcha'.

²⁴ Kan qitzij k'a ninbij chiwe, chi man jun q'alajirisey ruch'abel ri Dios ri ninimex ta pa rutinamit.

²⁵ Yin ninbij chi rix iwetaman ri xbanatej toq man xuben ta job oxi' juna' rik'in nik'aj, pa ruq'ijul ri Elías, q'alajirisey ruch'abel ri Dios. Kan qitzij wi chi janila e k'iy ri ixoqi' e malkani' wawe' pan Israel ri q'ij ri', toq janila wayjal xpe chuwech re qaruwach'ulew.

²⁶ Jak'a ri Dios man xuteq ta ri Elías chuto'ik jun malka'n-ixoq wawe' pan Israel. Xa xuteq ri Elías rik'in jun malka'n-ixoq k'a pa jun tinamit rubini'an Sarepta ri k'o chunaqaj ri tinamit Sidón.

²⁷ Kan keri' chuqa' xk'uluwachitej kik'in ri yawa'i' pa ruq'ijul ri Eliseo, ri q'alajirisey ruch'abel ri Dios. Roma pa ruq'ijul rija' kan e k'iy k'a yawa'i' rik'in ri jun yabil ri nutaluj-ri'. Jak'a man jun chike ri qawinaq ri xk'achojirisex ta, xaxe k'a ri Naamán ri xk'achojirisex, y rija' jun achin aj pa ruwach'ulew Siria, xcha'.

²⁸ Ri winaqi' ri kimolon-ki' chiri' pa jay richin molojri'il, toq xkak'axaj ri xubij ri Jesús chike, xyakatej koyowal.

²⁹ Xebeyakatej-pe, k'ari' xkelesaj-el chuchi' ri tinamit. Re jun tinamit re' chuwech jun juyu' k'o-wi. Roma ri' ri winaqi' xkik'uaj k'a ri Jesús k'a pa ruwi' ri juyu' richin nibekinima-pe.

³⁰ Jak'a toq xe'apon ri chiri', ri Jesús choj xel-pe chikikojol ri winaqi' y xbexule-pe.

Jun achin aj-Capernaum ri k'o jun itzel espíritu rik'in

³¹ K'ari' ri Jesús xbe-qa pa tinamit Capernaum, ri jun chik tinamit ri k'o pa Galilea. Y yerutijoj k'a ri winaqi' chupan ri uxlanibel-q'ij.

³² Konojel ri winaqi' ri kimolon-ki', kan xkimey ri tijonik ri xuya' ri Jesús chike, roma ri ruch'abel rija' kan nuk'ut chi ri nubij k'o chi niban.

³³ Chiri' pa jay ri akuchi nikimol-wi-ki' richin nikak'axaj ri ruch'abel ri Dios, k'o k'a apo jun achin ri k'o jun itzel espíritu rik'in. Y ri itzel espíritu ri', rik'in ronojel ruchuq'a' xch'on.

³⁴ Xubij k'a chire ri Jesús: ¿Achike nawajo' chiqe roj, Jesús aj-Nazaret? ¿Xape k'a richin chi yojak'is? Yin wetaman at achike rat; rat kan at loq'olej-wi y at peteneq rik'in ri Dios, xcha'.

³⁵ Jak'a ri Jesús xubij chire ri itzel espíritu chi man chik tich'on, xa tel-el. Y ri itzel espíritu ri' xuben k'a chire ri achin chi xtzaq pan ulew, chiri' chikikojol ri winaqi' ri kimolon-ki'. Y re itzel espíritu re', xel-el rik'in ri achin, y man jun chik xuben kan chire.

³⁶ Ri winaqi' xkimey ri xuben ri Jesús, y nikibila' k'a chikiwech: ¿Achike k'a ruchuq'a' ri ruch'abel re achin re'? Roma kan rik'in q'atbel-tzij y uchuq'a' nich'on kik'in ri itzel taq espíritu y kan nikinimaj rutzij y ye'el-el, yecha'.

³⁷ Y kan xbiyin rutzijol ri chiri' pa taq tinamit ri ek'o chunaqaj ri Capernaum.

Ri Jesús xuk'achojirisaj ri rujite' ri Simón

³⁸ K'ari' ri Jesús xel k'a pe chiri' y choj xbe k'a pa rachoch ri jun rutijoxel rubini'an Simón. Y chupan k'a ri q'ij ri' ri rujite' ri Simón yawa' rik'in jun nimalej k'aten. Xkik'utuj utzil chire ri Jesús pa ruwi' ri yawa'.

³⁹ Rija' xluke-qa rik'in ri yawa' y xubij chi tik'is-el ri k'aten chirij. Y kan xaxe k'a xubij keri', kan jari' xk'is-el ri k'aten chirij ri yawa'. Y ri ixoq ri', kan jari' xbeyakatej-pe y xuchop kilixik ri Jesús y ri e beneq rik'in.

Ri Jesús xeruk'achojirisaj k'a k'iy yawa'i'

⁴⁰ Toq xqaq'ij yan qa chupan ri jun q'ij ri', konojel k'a ri winaqi' richin ri tinamit ri ek'o yawa'i' kik'in ri k'o jalajoj ruwech yabil chike; xekik'uala-apo chuwech ri Jesús. Y ri Jesús xuya' ruq'a' pa kiwi' chikijujunal richin yeruk'achojirisaj.

⁴¹ Chuqa' e k'iy k'a chike re yawa'i' re' xa man choj ta yabil nok chike. Xa itzel taq espíritu ek'o kik'in y nikibij k'a: Ja rat ri at ruk'ajol ri Dios, yecha'. Jak'a ri Jesús xerelesaj-el y man xuya' ta q'ij chike richin xech'on, roma xa kan ketaman chi ja rija' ri Cristo.

Ri Jesús xuq'alajirisaj ruch'abel ri Dios pa Galilea

⁴² Toq xseqer-pe ruka'n q'ij, ri Jesús xel-el juba' pa tinamit. Y xbe pa tz'iran ruwach'ulew. Jak'a ri winaqi' xebe chukanoxik, y xbekila'. Re winaqi' re' man nikajo' ta chi nibe ri Jesús, rije' xkajo' ta xkiq'et-qa.

⁴³ Jak'a rija' xubij chike: Yin k'o chi yibe pa ch'aqa' chik tinamit, richin nintzijoj ri utzilej rutzijol ri nich'on chirij ri rajawaren ri Dios, roma xa kan roma ri' toq xitaq-pe, xcha' ri Jesús.

⁴⁴ Kan keri' xuben. Rija' kan nutzijoj k'a ri ruch'abel ri Dios ri pa taq jay ri akuchi nikak'axaj-wi ri ruch'abel ri Dios, chiri' pa Galilea.