San Lucas 23 - Kaqchiquel Bible

Ri Jesús xuk'uex chuwech ri Pilato

¹ K'ari', konojel ri ek'o chiri' xeyakatej-el y xkik'uaj-el ri Jesús richin nibekijacha' pa ruq'a' ri Pilato ri q'atoy-tzij.

² Ri chiri' chuwech ri q'atoy-tzij, nikisujula' k'a apo y nikibij: Roj qetaman chi re Jesús k'iy rumak. Rija' nuya' kina'oj ri winaqi'. Rija' nubila' chuqa' chike chi man tikitoj ri k'o chi nitoj chire ri César. Chuqa' nubila' chi ja rija' ri Cristo, y re' kan nuq'alajirisaj k'a chi ja rija' ri rey, xecha'.

³ Ri Pilato xuk'utuj k'a chire ri Jesús: ¿Ja rat ri ki-rey ri judío?, xcha' chire. Y ri Jesús xubij chire: Kan ja rat ri xabin, xcha' rija'.

⁴ K'ari' ri Pilato xubij chike ri aj-raqen kichin ri sacerdote y chike ri winaqi': Yin man jun ch'a'oj ninwil chirij re jun achin re', xcha'.

⁵ Jak'a rije' man yetane' ta qa. Xa nikitej k'a kiq'ij chi nikibila-apo: Xa nusech kik'u'x ri winaqi' rik'in ri rutijonik pa ronojel tinamit richin re Judea. Kan k'a chila' pa Galilea ruchapon-pe. Y keri' nubanala' ri peteneq, y xoqaqa k'a wawe' pa Jerusalem, xecha-apo.

Toq ri Jesús xuk'uex-apo chuwech ri Herodes

⁶ Toq ri Pilato xrak'axaj ri xkibij-qa, xuk'utuj k'a chi wi aj-Galilea ri Jesús.

⁷ Toq xbix chire chi aj chiri', xuteq k'a el ri Jesús chire ri Herodes Antipas, ri q'atoy-tzij richin ri Galilea, roma k'o chiri' pa Jerusalem ri q'ij ri'.

⁸ Toq ri Herodes xutz'et ri Jesús, janila xkikot, roma kan k'iy yan k'a q'ij rurayin chi rutz'eton ta. Y k'iy k'a ri rak'axan chirij. Roma ri' kan royoben k'a chi k'o ta jun bey xtutz'et toq nuben jun meyel banobel.

⁹ Ri Herodes k'iy k'a ri xeruk'utula' chire ri Jesús, jak'a rija' man jun tzij xubij.

¹⁰ Kan ek'o k'a apo chuqa' ri aj-raqen kichin ri sacerdote y ri etamanela', richin nikisujuj ri Jesús. Rije' kan yesik'in k'a apo richin nikisujuj.

¹¹ Ri Herodes y ri aj-labal kan man jun ruq'ij xkiben chire ri Jesús y xkitze'ej. Xkiya' k'a jun tzieq chirij, kan achi'el ri yekikusala' ri rey, y k'ari' xutzolij chik el rik'in ri Pilato.

¹² Ri Herodes y ri Pilato k'o oyowalen chikikojol. Jak'a ri q'ij ri' xa xjunamatej-kiwech.

Ri Pilato xujech-el ri Jesús richin chi tikamisex chuwech cruz

¹³ K'ari' ri Pilato xeroyoj ri aj-raqen kichin ri sacerdote y ri e kachibil, ri pa komon yeq'aton-tzij. Y chuqa' xeroyoj ri winaqi' richin ri tinamit,

¹⁴ y xubij chike: Rix xo'iya' re Jesús pa nuq'a', y nisujuj chi nuyala' kina'oj ri winaqi'. Jak'a kan chiwech rix xink'utuj-wi chire, y yin nintz'et chi man e rubanalon ta ri ch'a'oj ri nibij rix richin yeruben.

¹⁵ Chuqa' ri Herodes man jun xril chirij, y roma ri' xutzolij chik pe pa nuq'a' yin. Xaxe rik'in ri' niqetamaj chi man jun ch'a'oj rubanon, richin keri' niqaqa ta ri kamik pa ruwi'.

¹⁶ Xtinteq k'a ruch'ayik, y k'ari' xtinwisq'opej-el, xcha' ri Pilato.

¹⁷ Ri q'atoy-tzij kan k'o k'a chi nukol-el jun, roma keri' niban ronojel juna' toq ninimaq'ijux ri q'ij toq ri Dios xuya' ri Solbelri'il.

¹⁸ Roma ri' konojel junan xech'on-apo rik'in uchuq'a' y xkibij: ¡Ja ri Barrabás takolo-el, y ri Jesús tikamisex!, xecha'.

¹⁹ Ri Barrabás qajineq k'a pa cárcel roma xyakatej chirij ri q'atbel-tzij ri chiri' pa tinamit, y rubanon chuqa' kamik.

²⁰ Ri Pilato, roma kan nrajo-wi nukol-el ri Jesús, xch'on chik k'a jun bey chike ri winaqi'.

²¹ Jak'a ri winaqi' yech'on-apo rik'in kuchuq'a', y nikibila' ¡Tibajix chuwech cruz! ¡Tibajix chuwech cruz!, yecha'.

²² Pa rox bey ri Pilato xubij k'a chike: ¿Achike k'a mak rubanon chiwech re jun achin re'? Yin man jun ch'a'oj ninwil chirij, richin chi niqaqa ta ri kamik pa ruwi'. Xtinteq k'a ruch'ayik, y k'ari' xtinwisq'opej-el, xcha'.

²³ Jak'a ri winaqi' y ri aj-raqen kichin ri sacerdote, kan rik'in k'a uchuq'a' nikik'utuj-apo chi tikamisex ri Jesús chuwech cruz y kan xkipaba' k'a ki' chi jari' ri nikajo'.

²⁴ Jari' toq ri Pilato xubij chi tiban k'a achi'el ri nikik'utuj-apo rije'.

²⁵ Y xukol k'a el ri achin ri xa qajineq pa cárcel roma xyakatej chirij ri q'atbel-tzij y rubanon chuqa' kamik. Jak'a ri Jesús xa xujech-el richin chi tikamisex chuwech cruz, roma kan jari' ri xkajo' ri winaqi' chirij.

Toq ri Jesús xbajix chuwech cruz

²⁶ Toq ri aj-labal kik'uan el ri Jesús richin nibekibajij chuwa ri cruz, xkik'ul k'a jun achin peteneq pa juyu', jun achin aj-Cirene ri rubini'an Simón. Chirij k'a rija' xkiya-wi-el ri cruz y chirij ri Jesús beneq-wi.

²⁷ Kan janila k'a winaqi' ri e beneq chirij. Janila k'a chuqa' ixoqi' ri ye'oq'en ruwech ri Jesús, y nikibisoj janila.

²⁸ Ri Jesús xerutzu' k'a, y xubij chike: Ixoqi' aj-Jerusalem, man k'a kiniwoq'ej yin. Xa tiwoq'ej-iwi' rix, y tiwoq'ej chuqa' kiwech ri iwal.

²⁹ Roma kan ek'o k'a q'ij xke'oqaqa toq k'ayew ri xtibanatej. Roma ri' xtibitej chi jebel ruwa-ruq'ij ri ixoq ri man xalan ta, ni man jun bey xroyobej ta jun ak'ual, y man xuya' ta chuqa' rutz'um jun ak'ual.

³⁰ Roma jari' toq xtibanatej chi ri winaqi' kan xkech'owiyaj chike ri nima'q taq juyu' y xtikibila': Kixtzaq-pe chiqij. Y chike ri kokoj taq juyu' xtikibila' k'a: Qojiwewaj, xkecha'.

³¹ Roma wi chuwe yin ri achi'el jun che' rex, kan niban chi k'o chi nink'owisaj tijoj-poqonal, ¿achike ta k'a ri man ta xtiban chike ri e achi'el chaqi'j taq che'?, xcha' ri Jesús.

³² Ek'o k'a chuqa' e ka'i' eleq'oma' ri e uk'uan-el, richin yekamisex junan rik'in ri Jesús.

³³ Toq xe'apon k'a chupan ri jun juyu' rubini'an Baq Richin Jolomaj, xkibajij k'a ri Jesús chuwa ri ru-cruz, y keri' chuqa' ri e ka'i' eleq'oma'. Jun xpabex pa rijkiq'a', y ri jun chik pa rajxokon.

³⁴ Ri Jesús xubij k'a: Nata' Dios, takuyu' kimak, roma man ketaman ta achike ri ye'ajin chubanik, xcha'. Ri aj-labal kan xkiya' pan etz'anen ri rutziaq ri Jesús, richin xkitz'et ri achike ri nuk'uan-el.

³⁵ Ri Jesús tzuliben k'a apo koma janila winaqi' y koma chuqa' ri achi'a' ri kan yeq'aton-wi-tzij. Y konojel k'a re winaqi' re' nikitze'ej-apo, y nikibila': Rija' e k'iy xerukol. Wakami tukolo' k'a ri' ruyon, wi kan qitzij chi ja rija' ri Cristo ri cha'on roma ri Dios, yecha'.

³⁶ Kan keri' chuqa' nikiben ri aj-labal. Yetze'en-apo chirij ri Jesús. Y yejel-apo rik'in y nikisujula-apo ch'amilej vino chire.

³⁷ Y nikibila': Wi kan ja rat ri ki-rey ri judío, takolo' k'a awi' ayon, yecha' chire.

³⁸ Pa ruwi' k'a el ri cruz k'o k'a jun tzij tz'iban chuwech jun tz'alem ri tz'ibatel pan oxi' ch'abel. Tz'iban pa kich'abel ri aj-Grecia, pa kich'abel ri aj-Roma y pa kich'abel ri judío. Y ri tzij ri' nubij: Jare' ri ki-rey ri judío.

³⁹ Jun k'a chike ri e ka'i' eleq'oma' ri ek'o chuqa' chuwech cruz, itzel xch'on-apo chire ri Jesús, roma xubij: Rat ri nabij chi ja rat ri Cristo, takolo' k'a awi' rat, y qoj akolo' chuqa' roj, xcha'.

⁴⁰ Jak'a ri jun chik eleq'om xubij chire ri rachibil: ¿Kan man naxibij ta awi' chuwech ri Dios chupan re ruk'ayewal re ojk'o-wi rik'in?

⁴¹ Roj kan utz wi rubanik chiqe, roma yojtajin chutojik ri itzel e qabanalon. Jak'a rija' man jun achike ta mak rubanon.

⁴² Y ri eleq'om ri' xubij k'a apo chire ri Jesús: Kinoqaqa k'a chi'ak'u'x, toq xkape y ja rat chik ri at rey, xcha'.

⁴³ Ri Jesús xubij k'a chire: Qitzij k'a ninbij chawe, chi kan ja re wakami xkabek'oje' wik'in ri akuchi k'o kikoten, xcha' ri Jesús chire.

Ri rukamik ri Jesús

⁴⁴ Xk'uluwachitej k'a chi pa nik'aj-q'ij la'eq ri', ri ruwach'ulew xq'equmer. Y ri q'equ'm ri' xk'is-el k'a toq xnik'ajer-el ri tiqaq'ij.

⁴⁵ Ri q'ij kan man xsaqirisan ta chik, y jari' xel k'a pa ka'i' ri tzieq ri achoq ik'in ch'aron-wi rupan ri rachoch ri Dios.

⁴⁶ Kan jari' toq ri Jesús rik'in k'a ruchuq'a' xubij: Nata' Dios, pan aq'a' k'a ninjech-wi ri wánima, xcha'. Y kan xaxe k'a xubij kere', kan jari' xken-qa.

⁴⁷ Toq ri aj-raqen pa kiwi' ri aj-labal xutz'et ri xbanatej, xuya' k'a ruq'ij-ruk'ojlen ri Dios, y xubij: Kan qitzij na wi chi re jun achin re' man jun na wi rumak, xcha'.

⁴⁸ Y janipe' ri winaqi' ri ek'o-apo y xkitz'et ri xbanatej, nikibajila' k'a ruwa-kik'u'x ri xetzolin roma ri q'axo'n k'o pa kánima.

⁴⁹ Ri e etamayon ruwech ri Jesús, y ri ixoqi' ri kan k'a pa Galilea e tzeqetel-pe chirij, k'a nej k'a ek'o-wi-el nikitzu-apo ri xbanatej.

Toq xmuq ri Jesús

⁵⁰ K'o k'a jun achin rubini'an José, aj pa tinamit Arimatea ri k'o pa Judea. Re jun utzilej y chojmilej achin re' kachibil ri achi'a' ri yeq'aton-tzij chikikojol ri judío.

⁵¹ Y ri José jun chike ri koyoben chi ri Dios xtoruq'ata-qa tzij; rija' man xqa' ta chuwech ri xkibij ri rachibil ri xban chire ri Jesús.

⁵² Rija' xbe k'a rik'in ri Pilato chuk'utuxik ri ruch'akul ri Jesús, richin numuq.

⁵³ Toq ruqasan chik k'a pe ri ruch'akul ri Jesús chuwa ri cruz, rija' xupis pa jun tzieq. K'ari' xberumuqu' kan pa jun jul richin kamineq, k'oton chuwech jun juyu' ri xa kan abej-wi. Y man jun k'a ukusayon ri jul ri'.

⁵⁴ Ri q'ij ri', ri winaqi' nikichojmirisala' chik k'a ki', roma niqaqa yan ri q'ij y nitiker yan qa ri uxlanibel-q'ij.

⁵⁵ Ri ixoqi' ri kan k'a pa Galilea kitzeqeliben-pe ri Jesús, xebe toq xbemuq kan, y roma ri' toq jebel ketaman ri akuchi xmuq-wi kan. Chuqa' xkitzu' jebel achike rubanik xban kan chire ri ruch'akul.

⁵⁶ Toq xetzolej ri ixoqi' ri', xekibanala' kutzil jubulej taq aq'om richin jari' nibekiya' kan chirij ri Jesús. Y xe'uxlan k'a chupan ri jun uxlanibel-q'ij ri', kan achi'el nubij chupan ri pixa' ri richin ri Moisés.