San Lucas 13 - Kaqchiquel Bible

Nik'atzin chi nitzolin-pe qak'u'x rik'in ri Dios

¹ Chupan ri q'ij ri' ek'o ka'i-oxi' winaqi' ri xe'apon rik'in ri Jesús, y xkitzijoj chire chi ek'o ka'i-oxi' achi'a' aj-Galilea ri xekamisex roma ri Pilato toq ek'o pa rachoch ri Dios, y ri kikik'el ri achi'a' xuxol-ri' rik'in ri kikik'el ri chikopi'.

² Jak'a ri Jesús xubij chike: ¿Rix nich'ob chi ri achi'a' aj-Galilea ri', keri' xkik'uluwachij roma más e aj-maki' chikiwech ri ch'aqa' chik aj-Galilea?

³ Man keri' ta, roma rix chuqa' xa xkixken wi man xtitzolin ta pe ik'u'x rik'in ri Dios.

⁴ Toqaqa chi'ik'u'x toq xeken ri waqxaqlajuj winaqi' toq xtzaq ri tz'aq richin Siloé pa kiwi'. ¿Nich'ob rix chi kan más e aj-maki' ke chikiwech konojel ri ch'aqa' chik winaqi' ri ek'o pa Jerusalem?

⁵ Man keri' ta. Jak'a rix wi man xtitzolin ta pe ik'u'x rik'in ri Dios, xa kan xkiken chuqa'.

Ri k'ambel-tzij chirij ri wíkix ri man jun ruwech

⁶ Ri Jesús xuchop k'a rubixik jun k'ambel-tzij chikiwech, y xubij: K'o k'a jun achin rutikon wíkix ri pa rulew ri akuchi nitik-wi uva, y k'ari' xapon chuxe' ri che' chutz'etik wi k'o ruwech. Jak'a xa man jun ti ruwech xril.

⁷ Roma ri' ri rajaw ri ulew xubij chire ri achin ri samajiy rulew: Oxi' yan k'a juna' re' ri kan juna-juna' nontz'eta' re che' re', y man jun bey nutz'eton chi ruya'on ta jun ti ruwech. Roma ri' más utz tachoyo-el, roma xa man jun ti ruwech nuya', y xaxe nuk'is ruchuq'a' ri ulew, xcha' ri rajaw.

⁸ Jak'a ri samajiy richin ri ulew xubij chire: Taya' na chik k'a kan re juna' re'. Tinbana' na chik rutzil chijun ruxe' ri akuchi tikil-wi, y tinwilij na chik juba'.

⁹ Rik'in juba' rik'in keri' xtuya' ruwech. Wi xa man nuya' ta ruwech, k'ari' k'a xtiqachoy-el, xcha' ri samajel, xcha' ri Jesús.

Ri Jesús xuk'achojirisaj jun ixoq lukulik

¹⁰ Pa jun chik uxlanibel-q'ij, ri Jesús yerutijoj k'a ri winaqi', pa jun jay ri akuchi ri winaqi' nikimol-ki' richin nikak'axaj ri ruch'abel ri Dios.

¹¹ Chikikojol ri winaqi' ri', k'o k'a jun ixoq ri k'o yan waqxaqlajuj juna' ruchapon-pe yabil. Re ixoq k'a re' lukulik rubanon roma jun itzel espíritu y kan man nitikir ta nipa'e' juba' choj.

¹² Jak'a toq ri Jesús xutz'et ri ixoq ri', xroyoj y xubij chire: Ixoq, wakami yakolotej chuwech ri yabil, xcha'.

¹³ Xuya' k'a ruq'a' pa ruwi'. Y ri ixoq kan jari' xchojmir, xpa'e' jebel. Y kan jari' k'a xuya' ruq'ij-ruk'ojlen ri Dios.

¹⁴ Jak'a ri aj-raqen chupan ri jay ri richin molojri'il, janila xoyower roma ri Jesús xuk'achojirisaj ri ixoq chupan ri uxlanibel-q'ij. Roma ri' xubij chike ri winaqi' ri kimolon-ki' chiri': K'o waqi' q'ij richin yojsamej y jun k'a chike ri q'ij ri', kixpe richin yixk'achojirisex, jak'a man ja ta re q'ij re', xcha'.

¹⁵ Jak'a ri Jesús xubij: Rat xa ka'i' apalej. ¿Man ye'isol ta kami el ri iwákix, y ri bur pa jun uxlanibel-q'ij, richin yebe'uk'ya'?

¹⁶ K'a ta la' chik k'a re jun ixoq re', ri kan rijatzul kan ri Abraham, ri k'o yan waqxaqlajuj juna' ri jitz'on-pe roma ri Itzel-Wineq. ¿Man ruk'amon ta kami chi nik'achojirisex chupan re uxlanibel-q'ij?, xcha'.

¹⁷ Rokik ri Jesús najin chubixik re tzij re', konojel ri ye'etzelan richin, xek'ixbitej-qa chuwech. Jak'a ri ch'aqa' chik winaqi' janila yekikot, roma ri meyel taq banobel ri xeruben ri Jesús.

Ri k'ambel-tzij chirij ri ija'tz richin ri mostaza

¹⁸ Ri Jesús xubij chik k'a: ¿Achike k'a xtinbij chirij ri rubanik ri rajawaren ri Dios? ¿Achoq ik'in ninjunamaj-wi?

¹⁹ Yin ninbij k'a chi junan rik'in ri ija'tz ri richin ri mostaza, ri xutik-qa jun achin ri pa rulew. Toq xk'iy-q'anej kan achi'el jun che' xuben, kan janila xnimer. Roma ri' ri aj-xik' taq chikopi', ye'apon chupan richin nikiben kisok ri pa taq ruq'a', xcha'.

K'ambel-tzij chirij ri ch'amilej-q'or

²⁰ Chuqa' ri Jesús xubij: ¿Achoq ik'in ta k'a ninjunamaj-wi ri rajawaren ri Dios?

²¹ Xa kan junan k'a rik'in ri ti juba' ch'amilej-q'or ri niberuk'ama-pe jun ixoq y nuya' kan chupan oxi' pajbel-k'ej, y nuch'amirisaj ronojel, xcha' ri Jesús.

Kixok chupan ri ruchi-jay ri janila latz'

²² Ri Jesús xuchop chik k'a el ri rubey pa Jerusalem. Rokik beneq xq'axilan-el pa taq nima'q y kokoj tinamit, y nutzijoj kan ri ruch'abel ri Dios.

²³ K'o k'a jun ri xk'utun chire, y xubij: Wajaw, ¿e k'iy kami ri xkekolotej?, xcha'. Jak'a ri Jesús xubij:

²⁴ Kan titija' k'a iq'ij richin yixok chupan ri latz' ruchi-jay, roma kan janila k'a e k'iy winaqi' ri kan xtikitej kiq'ij richin xke'ok chupan ri jay ri', jak'a man xketikir ta xke'ok.

²⁵ Roma toq ri rajaw jay xtiyakatej-pe y xtorutz'apej kan ri okibel ri', rix ri man jani ix okineq-apo rik'in, xkixoyon k'a apo y xtibij: Qajaw, qajaw, tajaqa' ri ruchi-jay chiqawech, xkixcha'. Jak'a rija' xtubij-pe chiwe: Man wetaman ta akuchi kixpe-wi, xticha'.

²⁶ Jak'a rix xtibila' k'a apo chire: Ja roj ri xojwa-xojuk'ya' awik'in. Y ja ri pa taq qabey richin ri qatinamit, chiri' xak'ut-wi ri ruch'abel ri Dios chiqawech, xkixcha'.

²⁷ Jak'a ri rajaw jay xtubij-pe chiwe: Xinbij yan chiwe chi man wetaman ta akuchi kixpe-wi. Kan tich'ara' k'a el iwi' wik'in yin, rix ri ix banoy-etzelal, xticha' ri ajaw.

²⁸ Y toq xke'itz'et ri Abraham, ri Isaac, ri Jacob y konojel ri achi'a' ri xeq'alajirisan ri ruch'abel ri Dios ojer kan, chi ek'o pa rajawaren ri Dios, jari' k'a toq xtok ri oq'ej iwik'in roma bis, y xtiqach'ach'ej iwey roma xixelesex kan.

²⁹ Xkepe k'a winaqi' kere' pa xaman, kere' pa xokon, kere' pa relebel-q'ij y kere' pa qajibel-q'ij. Y re winaqi' re' xke'ok pa rajawaren ri Dios y xketz'uye' k'a apo ri pa mesa richin xkewa'.

³⁰ Ri chiri' ek'o k'a xtik'oje' kiq'ij stape' wakami xa maneq ok kiq'ij. Chuqa' ek'o k'a ri janila kiq'ij re wakami, jak'a ri chikiwech-apo xa maneq ok kiq'ij xtiban chike, xcha' ri Jesús.

Ri Jesús xroq'ej ri Jerusalem

³¹ Chupan chuqa' ri q'ij ri', ek'o fariseo ri xe'apon rik'in ri Jesús, y xkibij chire: Ri Herodes Antipas nrajo' yarukamisaj. Roma ri' katel-el wawe' chi'anin, xecha' chire.

³² Jak'a ri Jesús xubij chike: Kixbiyin y tibij chire ri nowineq chubanik ri etzelal ri', chi yin kan k'a xkenwelesala' na itzel taq espíritu y kan k'a xkenk'achojirisala' na chuqa' ri e yawa'i'. Keri' re wakami y ri chua'q, y ri pa rox q'ij xtink'is k'a rubanikil re samaj re'.

³³ Jak'a yin xa kan k'o-wi chi ninchop-el nubey re wakami, ri chua'q y ri kabij, roma k'o chi yinapon yan ri pa Jerusalem. Roma ri e q'alajirisey ruch'abel ri Dios man jun bey ri xkekamisex ta pa jun chik tinamit, tibebij chire, xcha' ri Jesús.

³⁴ K'ari' ri Jesús xch'on chik, y xubij: Aj-Jerusalem, aj-Jerusalem, ¿achike k'a roma toq ye'ikamisala' ri achi'a' ri yeq'alajirisan ruch'abel ri Dios, y ye'ikamisala' chi abej ri yeruteq-pe ri Dios chi'ikojol? Yin kan janila k'a bey ri xinwajo' chi xixinmol ta wik'in, achi'el nuben ri kite-ek' chike ri taq ral, yerumol chuxe' ri ruxik'. Jak'a rix kan man jun bey xiwajo' ta.

³⁵ Roma ri', ri rachoch ri Dios ri k'o chiri' xa xtitole' kan. Y kan qitzij chuqa' ninbij chiwe chi man chik k'a xkinitz'et ta yin, kan k'a ja toq xtapon na ri q'ij chi xtibij: ¡Nimalej ruq'ij ri peteneq pa rubi' ri ajaw!, xkixcha', xcha' ri Jesús.