Wuj Richin ri Chojmirisabelri'il 8 - Kaqchiquel Bible

Toq ri Aarón y ri e ruk'ajol xe'ok pa samaj

¹ Ri Jehová Dios xch'on chik rik'in ri Moisés y xubij chire:

² Ke'ak'ama-pe ri Aarón y ri e ruk'ajol pa wachoch richin molojri'il. Y chuqa' tak'ama-pe ri kitziaq richin sacerdote; tak'ama-pe ri aceite richin cha'onri'il; y tak'ama-pe jun nima-alaj achij wákix richin jun kamelabel richin nikuyutej kimak. Tak'ama-pe chuqa' ri ka'i' achija' taq karne'l, y ri chakech ri ek'o kaxlan-wey chupan ri maneq ch'amilej-q'or kik'in; y ronojel re' nasuj toq jun nok pa samaj richin sacerdote.

³ Y chuqa' ye'amol konojel ri winaqi' chuchi' ri wachoch, xcha'.

⁴ Ri Moisés xuben k'a achi'el ri xbix chire roma ri Dios, y toq ri winaqi' xkimol-ki' chuchi' ri rachoch ri Dios,

⁵ k'ari' ri Moisés xch'on kik'in y xubij: Re niqaben wakami jare' ri rupixa' ri Jehová ri nrajo' chi niqaben, xcha'.

⁶ Xeri' ri Moisés xeroyoj-apo ri Aarón y ri e ruk'ajol y k'ari' xuben chike chi xe'atin, achi'el nikiben toq ye'ok kan chupan ri samaj.

⁷ Y k'ari' ri Moisés xuwiq ri Aarón rik'in ri nim raqen tzieq, xubetz' rupan rik'in ri ximibel, k'ari' xuya' chik jun rutziaq ri más ko'ol juba' raqen y chirij ri' xuya' chik qa ri efod, y re' kan xuxim jebel rik'in ri ruximibal.

⁸ Chirij ri' ri Moisés xuya' ri jun achi'el ti peqes chuwa-ruk'u'x ri Aarón y xeruya' ri Urim y ri Tumim*f1* chupan.

⁹ Xeri' xuya' chuqa' ri kuchubel-rujolon retal ri rusamaj y chuwech ri' xuya' ri tz'ajtz'ik q'anapueq, kan achi'el ri rubin ri Jehová chire chi tubana'.

¹⁰ K'ari' ri Moisés xuchop ri aceite richin ri cha'onri'il y xuya' chirij ri rachoch ri Dios y xuya' chuqa' chikij ronojel ri samajibel ri ek'o chupan y keri' xerujech pa rusamaj ri Dios.

¹¹ Y juba' chire ri aceite ri' xuchikaj wuqu' mul pa ruwi' ri porobel richin ri kamelabel. Kan xuya' k'a aceite chirij ri porobel ri' y chikij ri rusamajibal, chirij ri yakbel-ya' y chirij ri ruch'okolibal y keri' xerujech pa rusamaj ri Dios.

¹² Xeri' ri Moisés xuq'ej juba' chik chire ri aceite pa ruwi' ri Aarón y keri' xujech pa rusamaj ri Dios.

¹³ K'ari' ri Moisés xuben k'a chike ri e ruk'ajol ri Aarón chi kejel-apo, xuya' k'a chikij jujun nim raqen kitziaq, ri ximibel-kipan y ri kuchubel-kijolon ri retal kisamaj. Kan achi'el ri rubin ri Jehová chire chi tubana'.

¹⁴ Chirij re' ri Moisés xuk'en-apo ri nima-alaj achij wákix richin ri kuyubel-mak y ri Aarón y ri e ruk'ajol xkiya' k'a ri kiq'a' pa ruwi' ri rujolon ri chikop ri'.

¹⁵ K'ari' ri Moisés xuqupij ri ruqul ri chikop ri' y xuk'ul ri rukik'el y rik'in ri ruwi-ruq'a' xukil kik' chikij ri achi'el taq uk'a' ri ek'o pa taq rutza'n ri porobel. Y keri' ri xuben richin xuch'ajch'ojirisaj ri porobel; y ri ch'aqa' chik kik' xuya' chuxe' ri porobel. Y keri' k'a xkinaba' ri porobel richin chi pa ruwi' ri' nik'ul-wi ri kamelabel. Y keri' ri Dios utz xutz'et ri porobel.

¹⁶ Xeri' xrelesaj-pe ronojel ri q'en ri k'o chirij ri ixkolob, ri k'o chirij ri rusase', ri ka'i' rukinaq' y ri q'en ri k'o chikij. Ronojel re' xuporoj pa ruwi' ri porobel.

¹⁷ Ronojel ri xk'oje' kan chire ri nima-alaj achij wákix, ri rutz'umal, ri ruch'akul y chuqa' ri nupamaj, xuporoj k'a chirij-el ri akuchi ek'o-wi-qa, kan achi'el ri rubin ri Jehová chire chi tubana'.

¹⁸ Chirij ri' ri Moisés xuk'en-apo ri jun chike ri achij karne'l richin nusuj chire ri Dios richin jun poron kamelabel. Y ri Aarón y ri e ruk'ajol xkiya' kiq'a' pa ruwi' ri rujolon ri chikop ri'.

¹⁹ K'ari' ri Moisés xuqupij ri ruqul ri achij karne'l y ri rukik'el xuchikaj chi kaji' ruwech ri porobel y pa taq ruxikin.

^20-21 Y xuben k'a peraj chire ri chikop ri', xuch'ej ri rixkolob y ri ra', y k'ari' xuporoj ri rujolon, ri peraj, ri ruq'anal ri ixkolob y ri ra', richin jun kamelabel ri niporox ronojel. Y re' jun kamelabel poron richin janila nijubulin chuwech ri Jehová, kan achi'el ri rubin ri Jehová chire chi tubana'.

²² Chirij ri' ri Moisés xuk'en-apo ri jun chik achij karne'l ri nik'atzin richin ri k'amoj samaj. Y ri Aarón y ri e ruk'ajol xkiya' k'a kiq'a' pa ruwi' ri rujolon ri chikop ri'.

²³ Y ri Moisés xuqupij k'a ri ruqul ri achij karne'l ri' y xuchop-el juba' rukik'el ri chikop y xuya' chutza'n-qa ri ruxikin ri Aarón, ri ruxikin ri k'o pa rijkiq'a'. Y chuqa' xuya' juba' kik' chirij ri nim rupan ruwi-ruq'a' y ri nim rupan ruwi-raqen ri ek'o pa rijkiq'a'.

²⁴ K'ari' xuben chi xejel-apo ri e ruk'ajol ri Aarón, chuqa' xuyala' juba' kik' pa taq rutza'n-qa ri kixikin ri k'o pa kijkiq'a' y chuqa' xuya' kik' chirij ri nim rupan ruwi-kiq'a' y ri nim rupan ruwi-kaqen ri ek'o pa kijkiq'a'. Y ri kik' ri xtotej kan xuchikaj chi kaji' ruxikin ri porobel.

²⁵ Xeri' ri Moisés xuben peraj chire ri chikop ri' y xeruch'er kan ri q'en ri k'o chirij ri rujey, ri k'o chirij ri ixkolob, ri k'o chirij ri rusase', ri rukinaq' y ri q'en ri k'o chikij, y ri ra' ri k'o pa rijkiq'a'.

²⁶ K'ari' xberuk'ama-pe oxi' kaxlan-wey ri maneq ch'amilej-q'or rik'in, ri ek'o chupan ri chakech richin ri sipanik ri richin k'amoj samaj ri k'o chuwech ri Jehová: Ri rubanik ri jun ruwech kaxlan-wey, ponon y xolon aceite rik'in y ri jun chik ruwech tz'ajin y yuquyik rubanik y su'un aceite chuwech y ri jun chik pim rubanik y jebel aceite k'o rik'in. Y xeruya' ri oxi' kaxlan-wey ri' pa ruwi' ri q'en y pa ruwi' ri ra' ri chikop ri'.

²⁷ K'ari' xeruya' ronojel re' pa kiq'a' ri Aarón y ri e ruk'ajol, y xuben chi rije' nikisiloj ri sipanik chuwech ri Jehová.

²⁸ Xeri' ri Moisés xuk'en chuwi-kiq'a' y xuya' pa ruwi' ri porobel y xuporoj. Re kamelabel re' jun sipanik richin k'amoj samaj y janila nijubulin chuwech ri Jehová.

²⁹ Chirij k'a re' ri Moisés xberuk'ama-pe ri ruwa-ruk'u'x ri achij karne'l ri' y xusiloj chuwech ri Jehová. Y ri juba' chire ri karne'l richin ri kamelabel richin ri k'amoj samaj xok k'a richin ri Moisés, kan achi'el ri rubin ri Jehová chire chi tubana'.

³⁰ Xeri' xuchop juba' aceite richin cha'onri'il y xuxol rik'in juba' kik' ri k'o pa ruwi' ri porobel, y xuchikaj chirij ri Aarón y chirij ri rutziaq, chikij ri e ruk'ajol y chikij ri kitziaq. Keri' k'a xban chire ri Aarón y ri rutziaq, ri e ruk'ajol y ri kitziaq, toq xech'ar richin xe'ok pa rusamaj ri Dios.

³¹ Y ri Moisés xubij chire ri Aarón y chike ri e ruk'ajol chi tikitzaka' ri ti'ij ri xtotej kan chire ri ruka'n karne'l, ri chiri' chuchi' ri rachoch ri Dios richin molojri'il, y tikitija' chiri'. Y xtikik'en k'a ri kaxlan-wey ri k'a ek'o na kan chupan ri chakech y chiri' tikitija-wi. Ronojel re' kan xtikiben k'a achi'el ri rupixa' ri Jehová.

³² K'ari' k'o chi nikiporoj ri ti'ij y ri kaxlan-wey wi ta k'o nitotej kan.

³³ Kan man k'a tikiya' kan ri ruchi' ri rachoch ri Dios, wuqu' k'a q'ij xkek'oje' chiri', kan k'a nitz'aqet na k'a ri q'ij richin ri k'amoj samaj.

³⁴ Re' xbanatej richin chi xk'an kiwech roma ri Jehová.

³⁵ Kan chuchi' k'a ri rachoch ri Dios richin molojri'il xkek'oje-wi, wuqu' q'ij chi paq'ij chi chi'aq'a'. Y kan tikinimaj k'a ri xubij ri Dios richin chi man yeken ta, roma jare' ri pixa' ri xya'ox pa kiwi' rije', xcha' ri Moisés.

³⁶ Y keri' ri Aarón y ri e ruk'ajol kan xkiben k'a ronojel ri pixa' ri xuya' ri Jehová chire ri Moisés chi tikibana' rije'.