Wuj Richin ri Chojmirisabelri'il 5 - Kaqchiquel Bible

Ri mak ri man e nojin ta

¹ Ja mak re' ri nik'atzin chi nisuj jun chikop richin nikuyutej rumak ri wineq: Wi jun ri nimakun ta roma noyox richin nubij ronojel ri xutz'et, richin nuq'alajirisaj ri achike xutz'et o xretamaj y man nrajo' ta nubij;

² wi ta jun chiwe rix nuchop ruch'akul jun chikop ri kamineq chik ri man e ch'ajch'oj ta: Jun chikop k'uxunel, ri ye'awajix, o ri e jepejeq, stape' man xunabej ta, toq xtunabej, ri wineq ri' man ch'ajch'oj ta chik;

³ wi k'o ta jun wineq nuchop ri man ch'ajch'oj ta richin jun wineq stape' man xunabej ta;

⁴ o wi ta jun kan chi'anin nuya' rutzij, y man xuna' ta ri xubij y k'ari' xq'ax chuwech chi ri xubij xa man utz ta. Ri wineq ri' kan xtrejqalej k'a ri rumak.

⁵ Toq k'o jun wineq ri xuben keri' kan ja rija' ri nejqalen ri rumak, y k'o chi nuk'utuj kuyubel rumak.

⁶ Y richin chi nikuyutej ri rumak roma jun ch'a'oj ri xuben, xtuk'en k'a pe jun ixoq karne'l o jun ixoq tzuntzun richin kamelabel richin nikuyutej rumak. Ri sacerdote xtusuj re kamelabel re' chinuwech, y k'ari' nink'en chik ruwech ri wineq ri'.

⁷ Wi man nitikir ta nuk'en-pe jun karne'l o jun tzuntzun roma maneq rik'in richin nuloq'bej, utz nuk'en-pe chinuwech ka'i' paloma e nima'q o e ka'i' taq kokoj, ri jun richin nikuyutej ri rumak, y ri jun chik richin niporox chijun.

⁸ Y yeruk'en-pe chuwech ri sacerdote richin ja rija' ri nisuju; ri nabey ri xtusuj ja ri richin nikuyutej rumak. Y nubolqotij ri ruqul chirij, jak'a man jumul ta nrelesaj-el ri rujolon.

⁹ Y nuchikaj juba' ri kik' chirij ri ruxikin ri porobel, y ri kik' ri nitotej kan nuyitz' chuxe' ri porobel: Re' jun kamelabel richin nikuyutej ri mak ri man e nojin ta.

¹⁰ Ri ruka'n aj-xik' chikop niporox chijun achi'el ri ruchojmilal; keri' xtuben ri sacerdote, y yin xtink'en chik ruwech ri wineq, y kan xtikuyutej-wi.

¹¹ Wi man nitikir ta yeruk'en-pe ri aj-xik' taq chikopi' ri' roma maneq rik'in richin nuloq'bej, utz nuk'en-pe pa ruk'exel ka'i' libra rik'in nik'aj k'ej ri chayun, richin nikuyutej rumak, y man nixol ta k'a aceite rik'in y man nuya' ta pom pa ruwi', roma re sipanik re' richin kuyubel-mak y man sipanik ta richin nijunamatej-wech.

¹² Nuk'en k'a pe chuwech ri sacerdote y rija' xtuchop jun moq' chire ri k'ej, y ri ti juba' ri' niporox pa ruwi' ri porobel, jare' ri retal richin ronojel. Re sipanik re' richin kuyubel-mak.

¹³ Keri' xtuben ri sacerdote, y yin xtink'en chik ruwech ri wineq, y kan xtikuyutej xabachike chike ri mak ri'. Ri xtitotej kan chire ri sipanik xtok kan richin ri sacerdote richin nutej, keri' chuqa' rik'in ri sipanik richin jalajoj ruwech ixin, xcha' ri Jehová.

¹⁴ Ri Jehová xch'on chik jun bey rik'in ri Moisés y xubij:

^15-16 Wi k'o jun chiwe rix ri xtumestaj ta chi k'o chi nuya' jun sipanik chuwe yin, y toq xtunabej chi xa xmestan, xtuk'en k'a pe jun achij karne'l o jun achij tzuntzun e tz'aqet, richin nok ruk'exel ri mestan. Y keri' ri rubanik richin xtitoj ri sipanik ri xtimestex. Y chiri' xtikiya' k'a jun rajel ri chikop richin ruk'exel. Y pa ruwi' ri chikop ri nuya', k'o chik chi nuya' juba' méro ri ruk'exewach ri ro' chire ri rajel ri xtz'et chirij ri chikop. Y re méro re' xtujech k'a pa ruq'a' ri sacerdote. Y ri chiri' pa wachoch, chiri' k'o-wi ri qitzij etabel richin ri k'o chi nutoj kan. K'ari' ri sacerdote xtusuj ri chikop richin jun kamelabel roma ri ch'a'oj ri'. Y kan xtikuyutej k'a ri rumak, y nink'en chik ruwech ri wineq.

¹⁷ Wi k'o jun chiwe rix nuq'ej ruwi' jun chike ri nupixa', stape' man retaman ta chi xa man utz ta ri banobel ri', rija' kan nimakun y kan nrejqalej-wi ri rumak.

¹⁸ Y roma ri' k'o chi nuk'en-pe jun achij karne'l o jun achij tzuntzun y kan e tz'aqet ri chikopi' richin kamelabel roma ri ch'a'oj. Y chiri' xtikiya' k'a jun rajel ri chikop, kan achi'el ri qitzij etabel ri k'o chiri' pa wachoch. Y ri sacerdote xtusuj k'a ri chikop richin kamelabel richin xtikuyutej ri rumak ri wineq ri', y keri' nink'en chik ruwech.

¹⁹ Re' jun k'a kamelabel roma jun ch'a'oj, y nisuj roma ri kan xuq'ej ruwi' ri nupixa' ri nuya'on chiwe, xcha' ri Jehová.