Wuj Richin ri Chojmirisabelri'il 4 - Kaqchiquel Bible

Kamelabel richin kuyubel mak

¹ Ri Jehová xch'on chik k'a rik'in ri Moisés y xubij chi

² tubij chike ri ruwinaq chi wi k'o ta jun wineq ri nuq'ej ruwi' ri pixa' richin jantape' y man ruch'obon ta richin keri' nuben; kan kere' k'a ri xtuben:

³ Wi ta ri nimakun ja ri nimalej sacerdote, ri mak ri' niqaqa pa ruwi' ri tinamit. Y roma ri' k'o chi nusuj jun nima-alaj achij wákix ri kan tz'aqet richin kuyubel-mak.

⁴ Nuk'uaj-apo ri wákix chuchi' ri wachoch, y chiri' xtuya' ri ruq'a' pa ruwi' ri rujolon, y k'ari' xtukamisaj chinuwech yin.

⁵ Chirij ri' ri sacerdote nuk'uaj juba' ri rukik'el ri wákix y nok pa wachoch,

⁶ y chiri' k'a nuju-qa ruwi-ruq'a' pa kik', y k'ari' nuchikaj wuqu' mul chinuwech yin ri akuchi k'o-wi ri tzieq ri nich'aron rupan ri jay.

⁷ Ri sacerdote xtusu' juba' ri kik' chikij ri uk'a' ri ek'o pa ruwi' ri porobel-pom ri k'o chupan ri wachoch, y re' xtuben chinuwech yin. Y ri ch'aqa' chik kik' nukaq'uj chuxe' ri porobel ri k'o pan okibel.

⁸ Y chuqa' nrelesaj ronojel ri ruq'anal ri chikop richin kamelabel ri kuyubel-mak, y nrelesaj-el ri q'en ri k'o chirij ri rixkolob y ri k'o chirij ri rupan.

⁹ Y k'ari' nrelesaj ri e ka'i' rukinaq' y ri q'en ri k'o chikij, y chuqa' ri q'en ri k'o chirij ri tzan-racheq, y ri rusase'.

¹⁰ Kere' niban chire ronojel ri nelesex kan chire ri wákix, y ri sacerdote, ja rija' ri niporon ronojel re' pa ruwi' ri porobel achi'el toq niporox ri sipanik richin nijunamatej-ruwech wik'in.

¹¹ Ri rutz'umal ri wákix, ronojel ri ruch'akul, ri rujolon, ri taq raqen, ri rixkolob y ri nupamaj.

¹² Ronojel ri nik'oje' kan chire ri wákix, nrelesaj-el chirij ri akuchi ek'o-wi-qa, ri akuchi cha'on-wi richin niya'ox ri chaj, y chiri' xtuporoj-wi.

¹³ Jak'a wi konojel ri winaqi' israelita xkiq'ej ruwi' ri nupixa' y man xkinabej ta chi man utz ta ri xkiben, re' kan xemakun k'a chinuwech.

¹⁴ Jak'a toq xtikinabej chi e makuwineq, k'o chi nikisuj jun nima-alaj achij wákix richin kuyubel-mak, y nikik'uaj pa wachoch.

¹⁵ Y jak'a ri achi'a' ri k'o kiq'ij nikiya' kiq'a' pa ruwi' ri rujolon ri wákix, y chiri' chinuwech yin xtikikamisaj-wi.

¹⁶ K'ari' ri nimalej sacerdote, nuk'uaj juba' rukik'el ri wákix y nok pa wachoch,

¹⁷ y chiri' k'a nuju-qa ruwi' ruq'a' pa kik', y k'ari' nuchikaj wuqu' mul chinuwech yin ri akuchi k'o-wi ri tzieq ri nich'aron rupan ri jay.

¹⁸ Ri sacerdote xtusu' juba' kik' chikij ri uk'a' ri ek'o pa ruwi' ri porobel-pom ri k'o chupan ri wachoch. Y re' xtuben chinuwech yin. Y ri ch'aqa' chik kik' nukaq'uj chuxe' ri porobel ri k'o pan okibel.

¹⁹ Chuqa' nrelesaj chijun ri ruq'anal ri wákix y niporox chuwech ri porobel.

²⁰ Ri nuben rik'in re wákix re', achi'el toq ri nimalej sacerdote nusuj ri kamelabel richin kuyubel-mak, y keri' xtikuyutej k'a ri kimak ri winaqi', y yin xtink'en chik kiwech.

²¹ Y ri nik'oje' kan chire ri wákix nrelesaj-el chirij ri akuchi ek'o-wi-qa, y chiri' xtikiporoj achi'el ri kiporon nabey. Rik'in ri' xtikuyutej ri kimak ri tinamit.

²² Wi k'o jun aj-raqen nuq'ej ruwi' jun chike ri nupixa', y man xunabej ta chi man utz ta ri xuben,

²³ toq xtunabej chi kan makuwineq, k'o chi nuk'uaj-apo chinuwech jun achij tzuntzun ri kan tz'aqet.

²⁴ Y nuya' ri ruq'a' pa ruwi' ri rujolon ri tzuntzun y nikamisex chinuwech yin ri akuchi yekamisex-wi ri chikopi' ri yeporox richin kuyubel-mak.

²⁵ K'ari' ri sacerdote nuju-qa ri ruwi-ruq'a' chupan ri rukik'el ri chikop richin kamelabel richin kuyubel-mak, y nusu' chikij ri uk'a' ri ek'o pa ruwi' ri porobel y ri ch'aqa' chik kik' nukaq'uj chuxe' ri porobel,

²⁶ y nuporoj ronojel ri q'en pa ruwi' ri porobel achi'el niban chire ri q'en richin ri kamelabel richin nuq'alajirisaj chi nijunamatej-ruwech wik'in. Keri' k'a nuben ri sacerdote richin nikuyutej rumak ri aj-raqen, y nink'en chik ruwech.

²⁷ Wi k'o jun chike ri winaqi' nuq'ej ruwi' jun chike ri nupixa', y man xunabej ta chi man utz ta ri xuben,

²⁸ toq xunabej chi kan makuwineq k'o chi nuk'uaj-apo chinuwech jun ixoq tzuntzun, ri kan tz'aqet.

²⁹ Nuya' ri ruq'a' pa ruwi' ri rujolon ri tzuntzun richin kuyubel-mak y nikamisex akuchi yekamisex-wi ri chikopi' ri yeporox richin kuyubel-mak.

³⁰ K'ari' ri sacerdote nuju-qa ri ruwi-ruq'a' chupan ri rukik'el ri chikop richin kuyubel-mak y nusu' chikij ri uk'a' ri ek'o pa ruwi' ri porobel, y ri ch'aqa' chik kik' nukaq'uj chuxe' ri porobel.

³¹ Chuqa' nrelesaj ronojel ri ruq'anal richin ri chikop achi'el niban chire ri chikop ri nisuj richin nijunamatej-ruwech wik'in, y xtuporoj pa ruwi' ri porobel ri kan nijubulin chinuwech yin. Keri' ri sacerdote xtusuj ri kamelabel richin nikuyutej rumak ri wineq ri', y k'ari' nink'en chik ruwech.

³² Wi ri wineq ri' nuk'en-pe jun karne'l richin kuyubel-mak, k'o chi nuk'en-pe jun ixoq karne'l ri kan tz'aqet.

³³ Nuya' ri ruq'a' pa ruwi' ri rujolon ri karne'l y nikamisex akuchi yekamisex-wi ri chikopi' ri yeporox richin kuyubel-mak.

³⁴ K'ari' ri sacerdote nuju-qa ri ruwi-ruq'a' chupan ri rukik'el ri chikop richin kamelabel richin kuyubel-mak, y nusu' chikij ri uk'a' ri ek'o pa ruwi' ri porobel, y ri ch'aqa' chik kik' nukaq'uj chuxe' ri porobel.

³⁵ Chuqa' nrelesaj ronojel ri ruq'anal ri karne'l achi'el niban chire ri karne'l ri nisuj richin nuq'alajirisaj chi nijunamatej-ruwech wik'in, y xtuporoj pa ruwi' ri porobel. Keri' ri sacerdote xtusuj ri kamelabel richin nikuyutej rumak ri wineq ri', y kan xtikuyutej k'a; y k'ari' nink'en chik ruwech.