Wuj Richin ri Chojmirisabelri'il 23 - Kaqchiquel Bible

Ri nimaq'ij richin nikiya' ruq'ij ri Dios

¹ Ri Jehová xch'on chik rik'in ri Moisés y xubij chire chi

² kere' tubij chike ri ruwinaq: Ja ruchojmilal re' pa ruwi' ri nimaq'ij ri niben chuwe yin, toq rix nimol-iwi' richin niya' nuq'ij yin, y ri q'ij ri' kan nuch'aron yin.

³ Waqi' q'ij k'a xtiben isamaj rix, jak'a ri pa ruwuq q'ij kan man jun samaj ri niben, roma re' kan q'ij richin uxlanen y kan xtiben jun molojri'il richin niya' nuq'ij yin; y xabakuchi k'a ixk'o-wi kan xtichajij k'a.

Ri nimaq'ij richin ri Solberi'il y ri kaxlan-wey ri maneq ch'amilej-q'or rik'in

⁴ Jare' ri rucholajen ri q'ij ri nuch'aron yin, richin yixnimaq'ijun richin niya' nuq'ij yin:

⁵ Chupan ri q'ij kajlajuj chire ri nabey ik' toq niqaq'ij-qa, jari' toq nitiker-qa ri nimaq'ij richin ri Solbelri'il. Y ri nimaq'ij ri' niben richin niya' nuq'ij.

⁶ Y chupan ri q'ij wolajuj, xtichop-el richin ninimaq'ijuj ri kaxlan-wey ri maneq ch'amilej-q'or rik'in, richin niya' nuq'ij yin. Y wuqu' k'a q'ij nitej ri kaxlan-wey ri'.

⁷ Ri nabey q'ij richin ri nimaq'ij ri', xtiben k'a jun molojri'il richin niya' nuq'ij yin, y kan man jun samaj tiben.

⁸ Chupan ri wuqu' q'ij ri' xtiporoj sipanik chinuwech yin, y ri ruk'isibel q'ij kan xtiben jun molojri'il richin niya' nuq'ij yin. Y kan man tiben isamaj, xcha'.

Ri sipanik richin nabey ruwech tiko'n

⁹ Ri Jehová xch'on chik rik'in ri Moisés y xubij chire:

¹⁰ Kere' k'a tabij chike ri awinaq: Toq rix xixok yan chupan ri ruwach'ulew ri xtinya' chiwe richin niwichinaj kan, y toq xtiq'et k'a ri jalajoj ruwech ixin, k'o chi nik'en-pe ri nabey q'etaj chire ri sacerdote.

¹¹ Y ri sacerdote xtusiloj k'a ri q'etaj ri' chinuwech yin, richin chi nink'ul chiwech. Y re' niben chupan ri q'ij chirij ri q'ij richin uxlanenri'il.

¹² Chupan ri q'ij ri', toq nisiloj ri q'etaj, ja chuqa' ri' nisuj jun achij karne'l ri k'o jun rujuna', y kan tz'aqet, richin niporox chinuwech.

¹³ Chuqa' k'o chi nik'en-pe k'ej chayun ri más jebel, ri más juba' kaji' libra, y ri xolon aceite rik'in, richin niporox chinuwech. Y re sipanik re', jun sipanik poron richin janila nijubulin chinuwech yin. Y rik'in ri sipanik ri' nik'en-pe jun litro vino.

¹⁴ Pa nabey, k'o chi nisuj ri sipanik ri', y k'ari' utz niben kaxlan-wey chire o niwotz'otz'ij pa q'aq' richin nitej. Chuqa' utz nitej choj keri' toq isujun chik ri q'etaj. Re ruchojmilal re' kan jun pixa' richin jantape' ri nuya'on chiwe rix, y xabakuchi ta ixk'o-wi.

Ri nimaq'ij richin Pentecostés

¹⁵ Chupan ri q'ij domingo toq nik'uaj ri q'etaj ri', richin jun sipanik richin nisilox chinuwech, jak'a q'ij ri' toq xtichop-el rajlaxik wuqu' semana ri nel chi tzij kawineq lajuj q'ij.

¹⁶ Toq xtz'aqet yan ri wuqu' semana chire ri q'ij domingo, k'o chi nisuj chik jun bey ri k'ak'a' jalajoj ruwech ixin richin sipanik chinuwech yin.

¹⁷ Rix y ri aj pan iwachoch, k'o chi nik'uaj-el ri sipanik ri' richin nisuj chinuwech; ka'i' kaxlan-wey nima'q, y chikijujunal nikusaj kaji' libra k'ej chayun ri más jebel, y ri kaxlan-wey ri' banon rik'in ch'amilej-q'or.

¹⁸ Junan k'a rik'in ri kaxlan-wey ye'ik'uaj-el chuqa' wuqu' nima-alaj achija' taq karne'l ri k'o jun kijuna' y kan e tz'aqet, jun alaj achij wákix y ka'i' alaj taq karne'l richin yeporox achi'el ri yeqa' chinuwech yin; pa ruwi' chik re sipanik re' niya' chik ri sipanik richin trigo y ri vino.

¹⁹ Chuqa' nisuj jun tzuntzun richin kuyubel-mak, y ka'i' nima-alaji' achija' karne'l ri k'o jun kijuna' richin jun sipanik richin uxlanibel.

²⁰ Ri sacerdote xkesuju ri chikopi' richin jun sipanik silon chinuwech yin, junan kik'in ri kaxlan-wey richin ri nabey taq ruwech tiko'n y ri ka'i' achija' taq karne'l. Re' kan xtijach k'a chinuwech yin y nok richin ri sacerdote.

²¹ Chupan k'a ri q'ij ri', rix kan xtiben k'a jun nimaq'ij richin niya' nuq'ij y kan man xtiben ta k'a samaj achi'el nikiben ri samajela' ri e yuqul pa samaj, re' kan jun pixa' ri nuya'on chiwe richin q'asen, kan xtikiben ri iwijatzul xabakuchi ek'o-wi.

²² Toq napon ri q'ij richin nik'ol ri tiko'n man k'a tikanoj-pe ronojel y man k'a tipich'olij-pe ri xk'oje' kan, roma re' kan tiya' kan chike ri man jun k'o kik'in y chike ri man e iwinaq ta, yin Jehová, ri Dios iwichin rix ri yibin, xcha'.

Ri nimaq'ij richin trompeta

²³ Xch'on chik ri Jehová rik'in ri Moisés y xubij chire chi

²⁴ tubij chike ri ruwinaq: Ri nabey q'ij richin ri ruwuq ik' k'o chi yixuxlan y kan xkixnimaq'ijun richin natabel wichin, y toq xtixupux ri trompeta, jari' toq xtimol-iwi' richin niya' nuq'ij.

²⁵ Kan man jun isamaj tiben chupan ri q'ij ri', y kan xtisujula' k'a sipanik poron chinuwech yin, xcha'.

Ri q'ij richin nink'en chik kiwech

²⁶ Xch'on chik ri Jehová rik'in ri Moisés y xubij chire:

²⁷ Ri lajuj q'ij chire ri ruwuq ik', ja q'ij ri' richin nink'en chik iwech, y k'o k'a chi niben jun molojri'il richin niya' nuq'ij y niporoj jun sipanik chinuwech. Nichajij k'a iwi' y man yixwa' ta chupan ri q'ij ri'.

²⁸ Chuqa' man jun isamaj tiben, roma ri' kan jun q'ij richin nink'en chik iwech.

²⁹ Wi k'o ta jun wineq ri man nuchajij ta ri' y niwa' chupan ri q'ij ri' kan xtelesex k'a el chi'ikojol.

³⁰ Xabachike k'a wineq ri nuben ri rusamaj chupan ri q'ij ri' kan xtinwelesaj k'a el ri ruk'aslen.

³¹ Kan man jun k'a isamaj xtiben chupan ri q'ij ri': Y re' kan jun pixa' ri nuya'on richin q'asen chiwe rix y chike ri iwijatzul, y kan xtichajij k'a xabakuchi ta ixk'o-wi.

³² Re' kan q'ij richin uxlanen chiwe rix: Xtichajij k'a iwi' y man yixwa' ta toq nik'is-qa ri q'ij beleje' y nibetane' tiqaq'ij chire ri lajuj q'ij, xcha' ri Jehová.

Ri nimaq'ij richin taq jay e banon rik'in ruq'a-che'

³³ Xch'on chik ri Jehová rik'in ri Moisés y xubij chire chi

³⁴ tubij chike ri ruwinaq: Ri q'ij wolajuj chire ri ik' wuqu' ja q'ij ri' richin yixuxlan y niya' nuq'ij yin, y niben jun nimaq'ij kichin ri taq jay e banon rik'in ruq'a-che'. Wuqu' k'a q'ij xtinimaq'ijuj chinuwech yin.

³⁵ Ri nabey q'ij richin ri nimaq'ij ri' kan xtimol-iwi' richin niya' nuq'ij y kan man jun k'a isamaj xtiben.

³⁶ Chi wuqu' k'a q'ij richin ri nimaq'ij ri' xtiporoj k'a sipanik chinuwech yin. Y chupan k'a ri ruk'isibel q'ij, xtimol chik iwi' y xtiporoj jun chik sipanik chinuwech yin. Re' kan jun molojri'il richin niya' nuq'ij y roma ri' kan man jun isamaj xtiben chupan ri q'ij ri'.

³⁷ Jare' k'a ri rucholajen ri nimaq'ij ri' toq niya' nuq'ij yin. Kan k'o chi ye'iben molojri'il richin yesuj ri sipanik ri yeporox: Ri kamelabel ri niporox, ri sipanik ri jalajoj ruwech ixin, ri ch'aqa' chik kamelabel y ri sipanik richin vino. Ronojel re' xtisuj pa ruq'ijul.

³⁸ Pa ruwi' ronojel ri sipanik ri' k'o chi nisuj ri sipanik richin ri q'ij richin uxlanibel, ri sipanik roma ri ibin chi niben y ri sipanik richin matioxinik ri nalex-pe pan iwánima richin niya' chuwe.

³⁹ Toq ninimaq'ijuj ri taq jay e banon rik'in ruq'a-che' chire ri q'ij wolajuj chire ri ik' wuqu', toq xik'ol yan ri itiko'n, kan xkixnimaq'ijun k'a wuqu' q'ij richin niya' nuq'ij. Ri nabey q'ij y ri ruk'isibel q'ij, re' q'ij richin uxlanen.

⁴⁰ Ri nabey q'ij richin ri nimaq'ij ri' xtik'uaj ruq'a' taq che' ri ek'o ruwech, y chuqa' xtik'uaj ruq'a' palma, ruq'a' ri che' ri k'o kixaq, y ri ruq'a' ri skab ri nik'oje' chuchi' raqen-ya'. Y xkixnimaq'ijun k'a wuqu' q'ij chinuwech yin.

⁴¹ Ronojel k'a juna' chupan ri ruwuq ik' xkixnimaq'ijun wuqu' q'ij richin niya' nuq'ij. Y kan jare' ri pixa' ri nuya'on chiwe rix y chike ri iwijatzul richin q'asen.

⁴² Chi wuqu' k'a q'ij ri' chi'iwonojel rix xkixk'oje' chupan ri taq jay ri xke'iben rik'in ri ruq'a-che'. Y ri iwijatzul chuqa' xkek'oje' wuqu' q'ij pa taq jay ri e banon rik'in ruq'a-che',

⁴³ richin xtoqaqa chikik'u'x chi rix xixk'oje' pa taq jay ri e banon rik'in ruq'a-che' toq xixinwelesaj-pe pan Egipto. Yin Jehová ri i-Dios ri yibin, xcha'.

⁴⁴ Kan keri' xubij ri Moisés chike ri ruwinaq israelita pa ruwi' ri nimaq'ij richin nikiya' ruq'ij ri Jehová.