Wuj Richin ri Chojmirisabelri'il 21 - Kaqchiquel Bible

Ri k'atzinel chi nikiben ri sacerdote

¹ Ri Jehová xubij chire ri Moisés: Kach'on kik'in ri e rijatzul ri Aarón ri e sacerdote, y tabij chike: Man kixbe rik'in jun kamineq, stape' jun iwinaq rijatzul ri Leví; roma wi xkixbe, xkixok man ix ch'ajch'oj ta chinuwech.

² Xaxe ninya' q'ij chiwe chi yixbe kik'in ri ite', ri itata', ri iwalk'ual, ri inimal, ri ichaq',

³ o jun iwana' ri k'a xten ri k'a k'o na iwik'in; xaxe kik'in re winaqi' re' ninya' q'ij chiwe chi yixok man ix ch'ajch'oj ta.

⁴ Jak'a wi k'o jun kamineq aj pa rachoch ri iwixjayil, man kixbe richin man yixok man ix ch'ajch'oj ta.

⁵ Man tisokaj ri rusumal-iwi' pan isut, y man k'a tisokaj ri rutza'n ri rusumal-ichi', y chuqa' man ke'iyala-qa iwetal roma bis.

⁶ Kan tich'ara-iwi' rik'in ronojel re' richin yixok wichin yin richin man tiyoq'otej ri nubi'; roma ja rix ri yixsuju ri sipanik richin jalajoj ruwech ixin ri niporox chinuwech yin Jehová.

⁷ Man k'a kixk'ule' rik'in jun ixoq ri itzel ruk'aslen, o rik'in jun ixoq ri qasan ruq'ij roma jun achin, o rik'in ta jun ixoq ri rujachon-ri' rik'in ri rachijil, roma rix kan ix sacerdote ix ch'aron chuwe, xcha' ri Dios.

⁸ Y ri Dios xubij chik chire ri Moisés chi tubij chike ri ruwinaq: Wakami k'a kan ke'ich'ara' ri e sacerdote roma ja rije' ri yesuju ri sipanik richin jalajoj ruwech ixin chuwe yin. Roma yin Jehová kan nuch'aron-wi' rik'in ronojel etzelal, y roma ri' ninwajo' yixinch'er rix rik'in ronojel etzelal: Keri' tabij chike, xcha' ri Jehová.

⁹ Y chike ri e sacerdote tabij, chi wi k'o ta jun chike rije', ri k'o ta jun rumi'al ri niqasex ta ruq'ij y nuchop ta itzel k'aslen, ri' kan nuqasaj-ruq'ij ri rutata', y ri ixoq ri' kan xtiporox.

¹⁰ Ri nimalej sacerdote, xaxe rija' ruk'amon nukusaj ri tzieq ri ch'aron richin ri nusamaj, roma xya'ox aceite richin cha'onri'il pa ruwi'. Man tuya' q'ij chi nich'ixch'o-qa ri rusumal-ruwi' y man turetz ri rutziaq chirij retal richin bis.

¹¹ Y man tok-apo ri akuchi k'o jun kamineq, stape' rute' o rutata', y wi xtuben keri' man ch'ajch'oj ta chik chinuwech yin.

¹² Man xa roma ri kamineq xtel-el chupan ri wachoch, y rik'in ri' nuqasaj ruq'ij ri wachoch, roma xa kan pa ruwi' rija' ya'on-wi ri aceite richin cha'onri'il, yin Jehová ri yibin.

¹³ Wi jun sacerdote nrajo' ta nik'ule', kan xtik'ule' k'a rik'in jun ri k'a xten na.

¹⁴ Kan man ruk'amon ta nik'ule' rik'in jun malka'n o jun rujachon-ri' rik'in ri rachijil, o ri qasan ruq'ij, o rik'in jun ixoq itzel ruk'aslen; xa kan xaxe rik'in jun k'a xten na nik'ule-wi y junan kijatzul rik'in.

¹⁵ Richin keri' ri kiwinaq man yech'on ta itzel chirij ri rijatzul rija'. Roma yin Jehová kan nucha'on rija' chi xok wichin yin, xcha' chire ri Moisés.

¹⁶ Ri Jehová xch'on chik rik'in ri Moisés y xubij chire chi

¹⁷ tubij chire ri Aarón: Man jun chike ri ak'ajol ni ta ri awijatzul ri man tz'aqet ta ri xkejel-apo richin xtikisuj ri sipanik richin ri jalajoj ruwech ixin.

¹⁸ Kan man utz ta nok-apo jun ri man tz'aqet ta chinuwech yin: jun moy, jun jetz', jun xotoxik ri rupalej, ruq'a' o raqen,

¹⁹ o jun q'ajineq ruq'a' o raqen,

²⁰ chuqa' ri jun wuq'uwik, jun ixin wineq, jun tzor runaq'-ruwech, jun ri k'o sal chirij, jun ri k'o puj chirij ri ruch'akul, o jun achin ri man tz'aqet ta ri rukowil.

²¹ Man jun k'a chike ri awijatzul ri man e tz'aqet ta xkejel-apo richin xtikisuj jun sipanik ri yeporox, roma ri man e tz'aqet ta, kan man xtikisuj ta chinuwech yin jun sipanik ri nitij.

²² Jak'a rije' utz nikitej ronojel sipanik ri e poron: ri sipanik ri nalex-pe pan iwánima ri nisuj chuwe yin, y ri kamelabel richin mak ri kan xaxe chuwe yin ch'aron-wi.

²³ Jak'a chirij-apo ri tzieq ri nich'aron rupan ri jay kan man ke'ok-apo, ni man kejel-apo rik'in ri porobel, richin keri' man nikiben ta chire ri wachoch chi maneq rejqalen, roma ja yin Jehová ri in ch'arayon richin ri sacerdote, xcha' ri Dios chire ri Moisés.

²⁴ Y ri Moisés kan xubij k'a ronojel re' chire ri Aarón, chike ri ruk'ajol y chike konojel ri ruwinaq.