Wuj Richin ri Chojmirisabelri'il 20 - Kaqchiquel Bible

Rutojbalil ri itzel banobel

¹ Ri Jehová xch'on chik rik'in ri Moisés y xubij chire chi

^2-3 tubij chike ri winaqi': Xabachike k'a iwinaq o man iwinaq ta ri ek'o chi'ikojol, wi k'o ta jun yerusuj ri ralk'ual chire ri dios rubini'an Moloc, yin kan xkitzu'un pa ruwi' rija', y xtinwetzelaj roma kan nuben chire ri wachoch man ch'ajch'oj ta. Roma rija' niyoq'otej ri nubi', roma ri' xtikamisex chi abej koma ri iwinaq.

⁴ Jak'a wi jun wineq nusuj ri ralk'ual chire ri dios Moloc y ri iwinaq xkiben chi achi'el man xkitz'et ta, y man nikikamisaj ta ri wineq ri',

⁵ yin kan xkiyakatej k'a chirij rija', chikij ri aj pa rachoch y chuqa' chikij ri e rachibil ri nikiya' ruq'ij ri dios Moloc, y kan xkenwelesaj k'a el chuwech re ruwach'ulew.

⁶ Wi k'o ta jun wineq ri xtibe rik'in ri yeruk'ulubej ri kaminaqi' y kik'in ri nikibananej chi ketaman ri peteneq chiqawech-apo y kan yerutzeqelibej, yin kan xkiyakatej chirij ri wineq ri' y kan xtinwelesaj ri ruk'aslen.

⁷ Kan tich'ajch'ojirisaj k'a ri ik'aslen y tich'ara-iwi' rik'in ri mak roma kan ix wichin yin Jehová ri i-Dios.

⁸ Kan tibana' achi'el nubij ri pixa' ri nuya'on chiwe; kan titaqej k'a, roma yin Jehová xinben chiwe chi rix kan ix wichin chik.

⁹ Wi k'o ta jun wineq nroyoj itzel pa ruwi' rute' o pa ruwi' rutata', kan tikamisex k'a, roma kan rute' o rutata', y xroyoj itzel pa ruwi' roma ruyon k'a rija' xukanoj rukamik.

¹⁰ Wi k'o ta jun achin ri nik'oje-qa rik'in ri rixjayil ri rachpochel, ri achin y ri ixoq kan xemakun, y chi e ka'i' k'a xkekamisex.

¹¹ Wi k'o ta jun achin ri nik'oje' rik'in ri rixjayil ri rutata', rija' kan nuqasaj-ruq'ij ri rutata': Roma ri' kan xtikamisex k'a ri achin y ri ixoq, roma kiyon rije' xkikanoj kikamik.

¹² Wi k'o ta jun achin nik'oje' rik'in rali' chi e ka'i' k'o chi yekamisex roma kiyon rije' xkikanoj kikamik, roma re' kan nimalej mak ri xkiben pa kachoch.

¹³ Wi k'o ta jun achin nik'oje' rik'in jun chik achin achi'el xa ta rik'in ixoq nik'oje-wi, re' kan ninwixowaj yin, y roma ri' xkekamisex k'a chi e ka'i', roma kiyon rije' xkikanoj kikamik.

¹⁴ Wi k'o ta jun ala' nik'ule' rik'in jun xten y chuqa' kan nik'oje-qa rik'in ri rujite', re' kan itzel banobel, y roma ri' ri achin y ri ixoqi' k'o chi yeporox. Richin keri' man chik tibanatej keri' chi'ikojol.

¹⁵ Wi k'o ta jun achin nik'oje-qa rik'in jun chikop achi'el xa ta nik'oje' rik'in jun ixoq, rija' kan xtikamisex, y chuqa' xtikamisex ri chikop.

¹⁶ Wi k'o ta jun ixoq nuya' q'ij richin nik'oje' jun chikop rik'in, kan xkekamisex k'a chi e ka'i', roma ri ixoq y ri chikop kiyon xkikanoj kikamik.

¹⁷ Wi k'o ta jun achin nuchop-qa ri rana' o yijrana' richin nik'oje-qa rik'in, chi e ka'i' k'a xke'elesex-el chi'ikojol rix, roma re' kan jun nimalej mak y chuqa' jun nimalej k'ix, roma xuben chire rija' chi man jun rejqalen, y ri nibanon keri' kan xtrejqalej k'a ri rumak.

¹⁸ Wi k'o ta jun achin nik'oje' rik'in ri rixjayil ri k'o yabil richin chi ik' chire, ri achin ri' nuben chire chi man jun rejqalen ri jun ixoq, y ri ixoq ri' nuben qa chi maneq rejqalen, y roma ri' chi e ka'i' k'a xke'elesex-el chi'ikojol rix.

¹⁹ Man jun tik'oje' rik'in ri ruch'utite': Ri rach'alal ri rute' o rana' ri rutata', ri achin nuben chire chi maneq rejqalen. Ri xkebanon keri' kan xtikejqalej ri itzel kibanobal roma kan pa kachoch-qa rije' xk'uluwachitej keri'.

²⁰ Wi k'o ta jun achin nik'oje' rik'in ri rixjayil ri ruch'utitata', re' kan nuben chire ri ruch'utitata' chi man jun rejqalen: rije' kan xtikejqalej k'a ri kimak, y toq xkeken, man jun kalk'ual xtik'oje' kan.

²¹ Wi k'o ta jun achin nik'oje-qa rik'in ri rixnan, re' kan jun itzel banobel, roma ri' toq xkeken kan man jun k'a kalk'ual xtik'oje' kan.

²² Kan tiyaka' k'a pan iwánima ronojel ri nubij ri pixa' ri nuya'on chiwe y kan tibana' k'a richin keri' man xkixk'is ta el chuwech ri ruwach'ulew ri akuchi xkixinya-wi richin xkixbek'oje' chupan.

²³ Man k'a tiben achi'el ri kibanobal ri winaqi' e richin ri ruwach'ulew ri' ri xkenjech pan iq'a'. Roma ri itzel taq kibanobal roma ri' kan xkenwetzelaj.

²⁴ Yin kan nujikiban nutzij chiwe richin kan xtok kan iwichin ri kiruwach'ulew rije'. Kan ja yin ri xkiya'on chiwe ri ruwach'ulew ri akuchi niwachin ronojel ruwech tiko'n, richin xtok iwichin. Ja yin Jehová ri i-Dios ri yibin, y ri xcha'on iwichin chikikojol konojel ruwach'ulew.

²⁵ Roma ri', rix kan xtiya' k'a kikojolil ri chikopi' ri e ch'ajch'oj y ri man e ch'ajch'oj ta: Ri aj-xik' taq chikopi', ri e jepejeq, y ri ch'aqa' chik chikopi' ri nubin chi man e ch'ajch'oj ta. Man tiben chi yin yixinwixowaj roma ye'itej ri chikopi' ri'.

²⁶ Yin Jehová kan in ch'ajch'oj-wi, y roma ri' rix k'o chi yixok ch'ajch'oj chuqa' y kan xixincha' k'a chikikojol konojel ri ruwach'ulew richin xixok wichin yin.

²⁷ Wi k'o ta jun wineq ri nich'on kik'in ri kaminaqi' o wi xa nubananej ri nubij, kan xtikamisex k'a chi abej roma ruyon xukanoj rukamik, xcha' ri Jehová chire.