Wuj Richin ri Chojmirisabelri'il 15 - Kaqchiquel Bible

Ri ruchojmilal pa ruwi' jun achin

¹ Ri Jehová xch'on chik k'a rik'in ri Moisés y rik'in ri Aarón y xubij chike chi

² ja ruchojmilal re' pa ruwi' jun achin ri nel ta pe achi'el ya' chupan ri rukowil, ri nuben chire chi man ch'ajch'oj ta.

³ Ri achin kan man ch'ajch'oj ta k'a roma ri achi'el ya' ri chaq k'ate' nel-pe chupan ri rukowil o ri man nel ta pe.

^4-5 Ri ch'at ri akuchi xtikotz'e-wi ri achin ri', kan xtitz'ilobitej kan, y xabachike k'a ri xtichapo ri ch'at ri' k'o chi nuch'ej ri rutziaq y k'o chi natin. Y kan xtok man ch'ajch'oj ta chijun ri q'ij ri' k'a toq nok-pe ri aq'a'. Y ri akuchi k'a xtitz'uye-wi ri achin ri', kan xtitz'ilobitej chuqa'.

⁶ Y xabachike k'a ri xtitz'uye' pa ruwi' ri tz'uyubel ri', k'o chi natin y k'o chi nuch'ej ri rutziaq. Y kan xtok man ch'ajch'oj ta chijun ri q'ij ri', k'a toq nok-pe ri aq'a'.

⁷ Y keri' chuqa' xabachike wineq ri xtichapo ri achin ri', k'o chi natin y nuch'ej rutziaq. Y kan xtok man ch'ajch'oj ta chijun ri q'ij ri' k'a toq nok-pe ri aq'a'.

⁸ Wi ta ri achin ri' nichuban y niqaqa ta chirij jun chik wineq ri ch'ajch'oj, ri wineq ri' k'o chi natin y nuch'ej ri rutziaq. Y kan xtok man ch'ajch'oj ta chijun ri q'ij ri' k'a toq nok-pe ri aq'a'.

⁹ Wi ta ri achin ri' nich'oke' ta pa ruwi' jun xalma richin kiej, re xalma re' xtok man ch'ajch'oj ta.

¹⁰ Roma ri' xabachike k'a ri xtichapo ri xalma ri' o nuchop o nuk'uaj-el ch'aqa' chik ri xa ch'okoliben chik roma ri achin ri', ri xtibanon keri' xtok man ch'ajch'oj ta chijun ri q'ij ri' k'a toq nok-pe ri aq'a', y kan k'o chi natin y nuch'ej ri rutziaq.

¹¹ Y wi ta ri achin ri' xtuchop ta jun chik wineq y man ruch'ajon ta ruq'a', ri wineq ri' xtok man ch'ajch'oj ta, y k'o chi natin y nuch'ej ri rutziaq. Y kan man ch'ajch'oj ta chijun ri q'ij ri' k'a toq nok-pe ri aq'a'.

¹² Xabachike k'ojelibel banon rik'in ulew ri nichap ta roma ri achin ri', kan xtipaxix k'a; jak'a wi rik'in che' banon-wi kan tich'aj k'a kan jebel rik'in k'iy ya'.

¹³ Y toq ri achin ri', nik'achoj-el chire ri achi'el ya' nel chupan ri rukowil, k'o chi nroyobej na wuqu' q'ij y k'ari' natin chupan ri ya' ri k'a juba' telesex-pe chupan jun ralaxbel-ya'. Y chuqa' k'o chi nuch'ej ri rutziaq. Y keri' ri achin kan xtiq'alajin chi ch'ajch'oj chik.

¹⁴ Y pa ruka'n q'ij chire ri', ri achin ri' xtuk'en-pe ka'i' paloma e nima'q o e ka'i' taq kokoj, y nipe k'a chuchi' re wachoch chinuwech yin. Y ri taq chikopi' xkerujech pa ruq'a' ri sacerdote,

¹⁵ rija' xtusuj k'a jun chike ri taq aj-xik' chikopi' richin jun kamelabel richin kuyubel-mak, y ri jun chik xtuporoj chijun. Y keri' ri sacerdote nuben chi xtink'en chik ruwech ri achin ri'.

¹⁶ Ri achin ri nel-pe ri achi'el ya' chupan ri rukowil, k'o k'a chi natin y nuch'ej ri rutziaq. Y kan xtok man ch'ajch'oj ta chijun ri q'ij ri' k'a toq nok-pe ri aq'a'.

¹⁷ Y xabachike tzieq, o xabachike sale'y ri achoq chuwech nitzaq kan juba' ri achi'el ya' ri', kan xkech'aj y xke'ok kan man ch'ajch'oj ta chijun ri q'ij ri' k'a toq nok-pe ri aq'a'.

¹⁸ Toq jun achin xk'oje' yan rik'in ri rixjayil, k'o chi ye'atin chi e ka'i'. Y chi e ka'i' xke'ok man ch'ajch'oj ta chijun ri q'ij ri' k'a toq nok-pe ri aq'a'.

Ri ruchojmilal pa ruwi' jun ixoq

¹⁹ Toq jun ixoq ri k'o yabil richin chi ik' chire, re' kan xtok man ch'ajch'oj ta wuqu' q'ij. Y xabachike wineq ri xtichapo ri ixoq ri' xtok man ch'ajch'oj ta chijun ri q'ij ri' k'a toq nok-pe ri aq'a'.

²⁰ Xabachoq pa ruwi' k'a nikotz'e' o nitz'uye-wi ri ixoq ri', chupan ri wuqu' q'ij ri', kan xke'ok man e ch'ajch'oj ta.

^21-23 Y xabachike k'a wineq ri xtichapo ri akuchi nikotz'e-wi ri ixoq ri', o xabachike k'a wineq ri xtichapo ri akuchi nitz'uye-wi chuqa', k'o chi natin y k'o chi nuch'ej ri rutziaq. Y ri wineq ri' xtok man ch'ajch'oj ta chijun ri q'ij ri' k'a toq nok-pe ri aq'a'.

²⁴ Y wi k'o ta jun achin nik'oje' rik'in ri ixoq ri', ri achin kan xtok man ch'ajch'oj ta richin wuqu' q'ij. Y ri ch'at ri akuchi nikotz'e-wi ri achin, chuqa' xtok man ch'ajch'oj ta.

²⁵ Wi k'o ta jun ixoq ri nipe yan ri yabil richin chi ik' chire y xa man jani tapon ri q'ij, o xa niq'ax ta pa ruwi' ri q'ij ri k'o chi nipe, ri ixoq ri' kan xtok man ch'ajch'oj ta, ri janipe' k'a q'ij nuben ri yabil chire. Kan xtuchajij k'a ri q'ij ri niyaloj, kan achi'el ruchajixik nuben chire toq k'o ri choj ri yabil richin chi ik' chire.

²⁶ Y xabachike k'a ch'at y xabachike tz'uyubel ri nik'oje-wi ri ixoq ri', kan xke'ok k'a man e ch'ajch'oj ta.

²⁷ Xabachike k'a wineq ri xtichapo ronojel re', chuqa' ri wineq ri' xtok man ch'ajch'oj ta, y k'o chi natin y k'o chi nuch'ej ri rutziaq. Y ri wineq ri' kan xtok man ch'ajch'oj ta chijun ri q'ij ri' k'a toq nok-pe ri aq'a'.

²⁸ Toq xtiq'ax kan ri ruyabil, ri ixoq k'o chi nroyobej na wuqu' q'ij, y chirij ri' xtich'ajch'ojir.

²⁹ Y ri ruka'n q'ij chire ri', ri ixoq k'o chi nuk'uaj ka'i' paloma e nima'q o e ka'i' taq kokoj, y nipe k'a chuchi' re wachoch chinuwech yin y xkerujech pa ruq'a' ri sacerdote.

³⁰ K'ari' rija' nukamisaj jun chike ri aj-xik' chikopi' richin kamelabel richin kuyubel-mak, y ri jun chik richin niporox chijun. Y keri' ri sacerdote nuben chi xtink'en chik ruwech ri ixoq ri' roma ch'ajch'oj chik.

³¹ Keri' xtiben k'a chi ri iwinaq ri man e ch'ajch'oj ta, man xke'ok ta apo chupan ri wachoch ri k'o chi'ikojol. Jak'a wi xke'ok-apo, kan xkeken roma nikitz'ilobisaj ri akuchi ink'o-wi yin, xcha' ri Jehová chire ri Moisés y ri Aarón.

³² Ja ronojel re' ri ruchojmilal ri niban rik'in ri achin ri nel-pe achi'el ya' chupan ri rukowil, ri nibanon chire chi man ch'ajch'oj ta,

³³ chuqa' keri' ri niban rik'in ri ixoq toq k'o ri yabil richin chi ik' chire, y chuqa' pa ruwi' ri achin ri nik'oje' rik'in ri ixoq ri man ch'ajch'oj ta.