Wuj Richin ri Chojmirisabelri'il 12 - Kaqchiquel Bible

Ri ruchojmilal toq jun ixoq nralaj jun ak'ual

¹ Ri Jehová xch'on chik rik'in ri Moisés y xubij chire:

² Kere' tabij chike ri awinaq: Jare' ri ruchojmilal toq jun ixoq niyawej kan chirij jun ak'ual, y toq napon ri q'ij nralaj jun ti ral ala'. Ri q'ij toq nalex ri ak'ual, ri ixoq wuqu' k'a q'ij xtok man ch'ajch'oj ta, achi'el toq k'o ri ruyabil richin chi ik', kan man ch'ajch'oj ta.

³ Y toq ri ak'ual k'o waqxaqi' ruq'ij, nik'atzin chi niban ri retal chi rija' kan jun israelita-wi.*f3*

⁴ Jak'a ri te'ej k'o chi nuchajij chik juwineq oxlajuj q'ij richin chi nich'ajch'ojir chire ri ruyabil. Kan man utz ta k'a chi nuchop ri ch'aron chik richin nok wichin yin, y man utz ta chuqa' nipe pa wachoch, k'a toq xtapon na ri q'ij toq nitz'aqet ri ch'ajch'ojirisanik ri'.

⁵ Jak'a wi ri nalex jun ti xten, ri te'ej ka'i' k'a semana xtok man ch'ajch'oj ta, achi'el toq k'o ri ruyabil richin chi ik', kan man ch'ajch'oj ta. Y pa ruwi' k'a ri', k'o k'a chi nuchajij chik oxk'al waqi' q'ij richin chi nich'ajch'ojir chire ri ruyabil.

⁶ Toq nik'is ri q'ij richin nich'ajch'ojir roma xalex ri ti ral, stape' ti xten o ti ala', k'o chi nuk'uaj-apo jun ti alaj achij karne'l richin jun kamelabel richin niporox chijun, y k'o chuqa' chi nuk'uaj-apo jun paloma nim o ti ko'ol ri niporox richin kuyubel-mak. Re' yeruya' pa ruq'a' ri sacerdote chuchi' ri wachoch.

⁷ Y ri sacerdote xkerusuj ri chikopi', richin chi ri ixoq nich'ajch'ojir chire ri ruyabil, richin chi nink'en chik ruwech. Jare' ri ruchojmilal chire jun ixoq toq nalex jun ti ral, stape' jun ti ala' o jun ti xten.

⁸ Y wi re ixoq re' xa man jun achike ta k'o rik'in, maneq akuchi niberuk'ama-pe jun ti alaj achij karne'l, utz chi nuk'uaj-apo ka'i' paloma e nima'q o e kokoj, ri jun richin niporox chinuwech yin y ri jun chik richin kuyubel-mak, y ja ri sacerdote nibanon ri kamelabel richin nich'ajch'ojir ri ixoq, richin chi nink'en chik ruwech, xcha' ri Jehová.