Wuj Richin ri Chojmirisabelri'il 11 - Kaqchiquel Bible

Ri chikopi' ri utz richin yetij

¹ Ri Jehová xch'on chik rik'in ri Moisés y rik'in ri Aarón richin chi rije' xtikiya' ch'aqa' chik ruchojmilal chike ri winaqi'. Y xubij chike:

² Jare' ri ruchojmilal pa kiwi' ri chikopi' ri e utz richin yetij chikikojol konojel ri chikopi' ri ek'o chuwach'ulew.

³ Ri chikopi' ri nikikamuluj ri kiway y chuqa' ri ruch'aron ri' ri kipi'ch, utz ye'itej.

^4-6 Xaxe k'a man ke'itej ri chikopi' achi'el, ri camello, ri tejón y ri umul, roma stape' nikikamuluj ri kiway, jak'a xa man ruch'aron ta ri' ri kipi'ch. Re chikopi' re' man e ch'ajch'oj ta, y man ke'itej.

⁷ Ri aq ruch'aron ri' ri kipi'ch, jak'a man yekamulun ta. Re chikopi' re' man e ch'ajch'oj ta chuqa' y man ke'itej.

⁸ Roma ri' ri chikopi' ri man e ch'ajch'oj ta, kan man tichop ri kich'akul, toq e kaminaqi' chik.

⁹ Y chike ri chikopi' ri e richin pa ya' ri utz ye'itej, ja ri k'o taq kixik' y ri k'o kisolotal.

¹⁰ Jak'a ri maneq taq kixik' y maneq kisolotal, k'o chi ye'iwixowaj, stape' kan e richin pa ya'; man titej.

¹¹ Chuqa' kan man tichop ri kich'akul ri chikopi' ri' toq e kaminaqi' chik, roma xa man e ch'ajch'oj ta.

¹² Kan konojel k'a ri chikopi' ri e richin pa ya' ri maneq taq kixik' y maneq kisolotal, man ke'itej, xa kan ke'iwixowaj.

^13-19 Ri jalajoj kiwech aj-xik' taq chikopi'*f2* ri nikitej ti'ij, achi'el ri aj-ch'ak. Ri' man ke'itej, xa k'o chi ye'iwixowaj. Keri' chuqa' ri aj-xik' taq chikopi' ri yewa' akuchi nitorix-wi q'ayis, achi'el ri k'uch.

²⁰ Ronojel ri taq kokoj taq chikopi' ri k'o kixik' y ri yebiyin, re' kan man xke'itej ta, xa k'o chi xke'iwixowaj.

²¹ Jak'a kan utz richin ye'itej ri taq chikopi' ri k'o kixik' y yetzopiyaj ri yebiyin.

²² Y chike re taq chikopi' re' utz ye'itej ronojel ruwech taq sak', y ri nima'q taq sak', ri xi'l y ri taq saltamonte.

²³ Ronojel k'a ri taq chikopi' ri xa yebiyin y ri k'o kixik' k'o chi man ye'itej ta, xa kan k'o chi ke'iwixowaj.

^24-28 Xabachike k'a chikop ri man ruch'aron ta ri' ri rupi'ch y man nikamulun ta, kan man ch'ajch'oj ta. Chuqa' chikikojol ri chikopi' ri k'o ruwi-kaqen y kixk'eq, ri' man e ch'ajch'oj ta. Xabachike k'a ri chaq k'ate' nuneq kan ri ruch'akul ri chikop kamineq, o xtuk'uaj-el juba' chire ri ruch'akul; ri wineq ri' kan xtok man ch'ajch'oj ta chijun q'ij k'a toq xtiq'equmer-qa, y chuqa' k'o chi nuch'ej ri rutziaq.

^29-30 Ri chikopi' ri yejepejot yebiyin, ri man e ch'ajch'oj ta, ja ri saqbin, ri ch'oy, ri jalajoj kiwech spa'ch, ri ayin, ri ski't y ri xwa'r.

³¹ Konojel re' kan man e ch'ajch'oj ta chikikojol ri chikopi' ri e jepejeq, y achike k'a xtichapo ruch'akul jun chike re chikopi' re' toq kamineq chik kan, xtok man ch'ajch'oj ta chijun q'ij k'a toq xtiq'equmer-qa.

³² Y chuqa' achoq pa ruwi' xtitzaq-wi ri ruch'akul jun chike re chikopi' re' xtok man ch'ajch'oj ta; wi ta xtitzaq-qa pa ruwi' jun samajibel ri banon rik'in che', o chirij jun tzieq, o chirij jun tz'um, o chirij jun costal o chirij xabachike k'ojelibel o samajibel, re' xtiya' k'a pa ya' richin nich'ajch'ojirisaj. Y man rik'in ri' man ch'ajch'oj ta chijun q'ij k'a toq xtiq'equmer-qa.

³³ Y wi ta jun chike re chikopi' re' nitzaq ta pa jun xabachike leq ri banon rik'in ulew, k'o chi nipaxix. Y chuqa' ri k'o chupan kan xtok man ch'ajch'oj ta.

³⁴ Y xabachike k'a ri utz richin niqum ri k'o chupan ri leq ri', kan xtok man ch'ajch'oj ta. Y chuqa' wi k'o ya' chupan ri leq ri', y wi niqaqa pa ruwi' xabachike ri nitij, re' kan xtok k'a man ch'ajch'oj ta.

³⁵ Y achoq pa ruwi' xtitzaq-wi ri ruch'akul ri chikop xtok man ch'ajch'oj ta. Y wi xtitzaq ta pa ruwi' jun horno o pa ruwi' jun k'ojelibel richin boxbel q'aq', kan xtiwulex k'a.

³⁶ Jak'a wi ta nitzaq ri ruch'akul jun chike ri chikopi' ri' chupan jun yakbel-ya' o akuchi nalex-wi-pe ya', ri ya' ri' kan ch'ajch'oj. Jak'a xabachike ri ninaqo o ri nichapo ri ruch'akul ri chikop ri', xtok man ch'ajch'oj ta.

³⁷ Wi xa ta nitzaq jun chikop kamineq chirij ri ija'tz ri nibetik yan, ri ija'tz ri' kan k'a ch'ajch'oj na.

³⁸ Jak'a wi ri ija'tz ri' k'o ta kan pa ya' y nitzaq-qa ri chikop rik'in, re' kan xtok man ch'ajch'oj ta.

³⁹ Wi ta niken jun chikop ri utz nitij, achike xtichapo ri ruch'akul ri chikop ri', xtok man ch'ajch'oj ta chijun q'ij k'a toq xtiq'equmer-qa.

⁴⁰ Ri nitijo ri ruch'akul ri chikop ri', k'o chi nuch'ej ri rutziaq y xtok man ch'ajch'oj ta chijun q'ij k'a toq xtiq'equmer-qa. Y ri nelesan-el ri ruch'akul ri chikop ri' chuqa' k'o chi nuch'ej ri rutziaq y xtok man ch'ajch'oj ta chijun q'ij k'a toq xtiq'equmer-qa.

^41-42 Ri chikopi' ri nikiqirirej-ki' man ke'itej, xa kan ke'iwixowaj, y chuqa' ri chikopi' ri xenatex yan ri yebiyin rik'in kaji' kaqen, o ri yebiyin rik'in k'iy kaqen; konojel re chikopi' re' man e ch'ajch'oj ta, y kan ke'iwixowaj.

⁴³ Man k'a tiben chi yin yixinwetzelaj, roma ye'itej ri chikopi' ri' y nuben chiwe chi yixok man ch'ajch'oj ta.

⁴⁴ Ja yin Jehová ri i-Dios, y man jun chik ri achi'el ta yin. Y roma rix ijachon chik iwi' chuwe yin, roma ri' rix k'o chi man yixmakun achi'el nikiben ri ch'aqa' chik winaqi'; rix xa kan ix ch'ajch'oj-wi y roma ri' man tiben chi yixok man ch'ajch'oj ta koma ri chikopi' ri'.

⁴⁵ Yin Jehová ri xinelesan-pe iwichin ri chiri' pan Egipto richin chi xinok i-Dios. Roma ri' man ix junan ta kik'in ri ch'aqa' chik winaqi', kan ruk'amon chi rix ix ch'ajch'oj, roma yin kan in ch'ajch'oj-wi, xcha' ri Jehová chike.

⁴⁶ Jare' ri ruchojmilal pa kiwi' ri chikopi' ri yebiyin pa ruwi' ulew, ri aj-xik' taq chikopi', konojel ri e richin pa ya' y konojel ri chikopi' ri nikiqirirej-ki' pa ruwi' ulew,

⁴⁷ richin niya' rukojolil ri ch'ajch'oj rik'in ri man ch'ajch'oj ta y niya' kikojolil ri chikopi' ri e tijel kik'in ri man e tijel ta.