Wuj Richin ri K'uxla'anik 4 - Kaqchiquel Bible

¹ Ri q'anapueq xa kan janila k'a xq'eqer. Ri jebelej q'anapueq xa man nitz'intz'ot ta chik. Ri jebelej taq abej richin ri rachoch ri Dios xa kan e talutajineq k'a kan pa taq krusin-bey.

² Ri nuwinaq richin ri tinamit Sión kan janila xya'ox kejqalen. Xk'oje' kejqalen achi'el rejqalen ri q'anapueq. Jak'a re wakami xa maneq chik kejqalen, achi'el niban chire jun bojo'y ri xa banon rik'in xeq-ulew roma jun wineq.

³ Ri ixoqi' taq utiwa' kan nikiya' q'ij chi yetz'uman ri taq kal, jak'a ri nuwinaq xa yekimalij kan ri kalk'ual, achi'el nikiben ri avestruz pa tz'iran ruwach'ulew.

⁴ Ri taq ak'uala' kan janila chaqi'j kichi', y roma ri' ri kaq' kan nutz'om-ri' pa taq kichi'. Rije' kan janila yenum, jak'a kan man jun niya'on juba' kiway.

⁵ Ri kan pa ruk'iyal ri k'o kik'in ojer kan, wakami xa yeken roma wayjal pa taq bey. Ri xek'iy-q'anej chupan ri beyomel, wakami xa pa toribel q'ayis ek'o-wi.

⁶ Ri nuwinaq kan xeya'ox pa tijoj-poqonal. Kan xik'o k'a ruwi' chuwech ri ruk'ayewal ri xya'ox pa kiwi' ri aj-Sodoma, roma ri aj-Sodoma kan pa jun ramaj xeruk'is ri Dios.

⁷ Ri e tata'al ri xek'oje' pa Jerusalem kan janila k'a e ch'ajch'oj. Kan más k'a kiloxil chuwech ri leche. Jebel k'a xtzu'un ri kibanikil. Rije' kan xeyok'olin achi'el yeyok'olin ri jebelej taq abej.

⁸ Jak'a re wakami xa xaq-xaq ri yetzu'un. Xa man netamex ta chik kiwech toq yebe pa taq bey. Wakami xa kan e baq-baq chik. E chaqi'j-chaqi'j chik, xa kan e achi'el chik jun si' chaqi'j.

⁹ Kan más wi k'a utz ruwa-kiq'ij ri xeken chi espada chuwech ri xeken roma wayjal. Rije' xa kan eqal-eqal na k'a xpe ri kikamik, roma man jun chik k'o kik'in richin nikitej.

¹⁰ Ri ojer kan, ri ixoqi' janila joyowanik k'o kik'in, jak'a re wakami xa xekichaq'arisaj-qa ri taq kal. Kan ja ri taq kal ri xk'atzin-qa chike richin xok-qa kiway chupan ri q'ij richin ruk'ayewal kichin ri nuwinaq.

¹¹ Ri Jehová kan xuteq-pe ronojel ri royowal pa qawi'. Kan xuq'ej k'a pe pa qawi' ri nimalej royowal achi'el niq'ej ri ya'. Xutzij k'a jun q'aq' pa ruwi' ri tinamit Sión, y ri q'aq' ri' kan xuk'is ronojel.

¹² Ri e etzelanel qichin man xketikir ta xke'ok-apo chupan ri qatinamit: Keri' xkich'ob ri e rey y konojel ri winaqi' richin ri ruwach'ulew.

¹³ Jak'a ronojel re' xk'uluwachitej roma ri kimak ri e q'alajirisey ruch'abel ri Dios. Re' xbanatej k'a roma ri e sacerdote xa xexotoxo'. Rije' xkiben chi xbiyin kik' pa taq bey chiri' pa Jerusalem. Rije' kan xekikamisaj ri choj kik'aslen.

¹⁴ Ri e sacerdote xa xemaqmo'x k'a pa taq bey. Y ri e q'alajirisanela' ri xa man qitzij ta ri nikibij, xa xebiyin achi'el nikiben ri moyi'. Xe'ok man e ch'ajch'oj ta roma ri kik'. Y roma ri' man jun chik xajowan xjel-apo kik'in.

¹⁵ Ri e kiwinaq xa kan nikibij k'a chike ri ch'aqa' chik winaqi' chi tikich'ara-el-ki' kik'in. Nikibij k'a chike chi kebiyin juk'an chik roma rije' xa man e ch'ajch'oj ta. Toq rije' xkitaluj-el-ki' y xe'animej-el pa taq ch'aqa' chik ruwach'ulew, ri winaqi' man xkajo' ta chi rije' xek'oje-qa chikikojol.

¹⁶ Ja ri Jehová xetalun-el ri e sacerdote. Kan man xkeruchajij ta k'a chik ri e q'alajirisey ruch'abel. Ri winaqi' kan man chik nikiya' ta kejqalen ri sacerdote, y man xkijoyowaj ta k'a kiwech ri e aj-raqen.

¹⁷ Kan xqakanoj k'a to'onik, jak'a man xqil ta. Roma ri' ri runaq' taq qawech xa kan xk'is yan k'a ruchuq'a'. Ri e chajinela' yetzu'un k'a nej koyoben to'onik jak'a man jun chike ri ruwach'ulew ri xpe ta richin xojkikol

¹⁸ Ri e etzelanel qichin kan kitzuliben k'a ri qaxaka'l, k'a toq man xojtikir ta chik xojbiyin chupan ri qatinamit. Xa kan xapon k'a ri q'ij richin yojk'is. Wakami xqil k'a qaq'ij.

¹⁹ Ri e etzelanel qichin kan xojkitzeqelibej. Kan anineq xepe chiqij achi'el nikiben ri kot. Xojkitzeqelibej k'a pa ruwi' taq juyu', y xekiyala' k'a pikbel pa qabey pa tz'iran ruwach'ulew.

²⁰ Ri ojer, xqakuquba' qak'u'x rik'in ri rey Sedequías, jak'a rija' xa xuya-ri' pa pikbel. Xqach'ob chi rik'in rija' niqato-wi-qi' chikiwech ri ch'aqa' chik winaqi'.

²¹ Wakami kixkikot rix winaqi' aj-Edom. Kixnimaq'ijun k'a rix ri ixk'o pa ruwach'ulew Us, roma xa kan xtapon na k'a ri iq'ij. Xtiqaqa k'a ri ruk'ayewal pan iwi' rix, y xkixbiyin k'a achi'el nuben jun q'abarel. Y ri e etzelanel iwichin xtikelesaj k'a ri itziaq richin niya' ik'ix.

²² Jak'a roj ri oj aj-Sión xtik'is ri ruk'ayewal pa qawi'. Ri Jehová kan xqojruk'en-pe jun bey chik chupan ri qaruwach'ulew. Jak'a pa kiwi' ri winaqi' edomita kan xtuya' k'a ri rutojbalil. Ri mak ri xekiben xa kan xtuq'alajirisaj k'a ronojel.