Wuj Richin ri K'uxla'anik 3 - Kaqchiquel Bible1 Ja yin ri' ri xiq'axan ronojel ri ruk'ayewal, roma ri royowal ri Dios. 2 Ri Dios xirelesaj k'a el pa saqil akuchi k'o-wi rija', y xiruk'uaj k'a akuchi kan janila q'equ'm. 3 Kan chuwij k'a yin xyakatej-wi. Kan jantape' k'a xuyek ri ruq'a' richin xuya' ruk'ayewal pa nuwi'. 4 Xuben k'a chuwe chi ri nuch'akul kan chi'anin xrijix-qa. Ri nubaqil kan xerupaq'aq'ej. 5 Kan xusutij-wij rik'in jun k'ayilej-q'axo'n, achi'el jun tz'aq. Kan man xitikir ta xinkol-wi' chuwech ri ruk'ayewal. 6 Xuben chuwe chi xik'oje' pa jun q'equ'm, kan achi'el rubanon ri kich'akul ri winaqi' ri ojer keken-el. 7 Xiruya' pa latz' y kan man yitikir ta yinel-el chupan. Ri ruk'ayewal kan janila ralal rubanon chuwij, achi'el xa ta ximil rik'in k'iy cadena. 8 Stape' yisik'in richin nink'utuj to'onik, jak'a ri Jehová kan man nrak'axaj ta ri nuch'abel. 9 Xerutz'apej k'a ronojel ri nubey, achi'el xa ta xuben-q'anej jun tz'aq ri banon rik'in abej. Y ri akuchi ninwajo' yibe-wi, ri Dios man nuya' ta q'ij chuwe. 10-11 Yin xinna' chi ri Dios xiruchop richin xiruwech', kan achi'el k'a jun oso o jun koj ri k'o kiq'eleben. Keri' xuben ri Jehová wik'in yin. 12 Yin xinna' chi rija' xuchojmirisaj k'a ri ruk'aqbal-ch'ab, jak'a yin ri xiruya' richin xiruq'ijuj. 13 Xuk'eq k'a ri ruch'ab y kan xirumej. Y kan xok k'a pa nupan ri ch'ab ri'. 14 Konojel k'a ri nuwinaq xetze'en chuwij xinok k'a yakol kitze'en ronojel q'ij. 15 Ri Dios xunojisaj ri nuk'aslen rik'in ruk'eyul. Kan achi'el k'a ri ruya'al ri k'ayilej-q'os ri xuya' chuwe richin xinqum. 16 Ri wey ri ek'o pa nuchi' kan xerupaxij chi abej xinna' yin, ri rukiy kan xiruq'ututej y xiruqasaj k'a pan ulew. 17 Yin xa kan xinmestaj yan ri uxlanibel-k'u'x. Man noqaqa ta chik chinuk'u'x achike ri' ri jebel yak'ase'. 18 Ri wuchuq'a' xa kan xk'is yan; keri' chuqa' ri nukuqubabel-k'u'x rik'in ri Jehová xa kan xk'is-qa. 19 Noqaqa chinuk'u'x ri q'axo'n ri nink'owisaj, chuqa' ri ruk'eyul ri nuk'aslen y ri nimalej ruk'ayewal ri ninq'axaj. 20 Toq ninch'ob-qa ronojel re q'axo'n re', ri wánima kan nimayamo-qa. 21 Jak'a kan k'o jun ri ninwajo' chi jantape' ta k'o chinuk'u'x. Y kan rik'in re' kuqul-wi nuk'u'x. 22 Chi ri rajowabal ri Jehová kan man jun bey xtik'is. Ri rutzil rija' kan richin tibe-q'ij tibe-seq. 23 Kan ronojel k'a nimaq'a' nuya' k'ak'a' taq urtisanik pa qawi'. Kan man jun bey k'a yojrumalij kan, ronojel ri nusuj kan nuya'. 24 Ri qánima kan nubij k'a chi ja ri Jehová niya'on ronojel ri nik'atzin chiqe. Roma ri' rik'in rija' niqakuquba-wi qak'u'x. 25 Ri Jehová kan utz k'a qik'in wi niqakuquba' qak'u'x rik'in. Kan utz nuben qik'in ri yojkanon richin. 26 Kan más utz niqoyobej ri rutzil ri Jehová, Kan tiqoyobej k'a richin yojruto'. 27 Kan utz k'a niqaben chi kan ja yan ri pa qak'ajolil niqetamaj yojniman tzij. 28 Toq ri Dios nuya' jun ruk'ayewal pa qawi', más utz niqakuquba' qak'u'x y man jun niqabij. 29 Más utz tiqaqasaj-qi' k'a pan ulew, roma xa kan k'a k'o na to'onik xtiqil. 30 Wi ta niya'ox jun q'a' chiqapalej, kan tiqaya' q'ij richin niya'ox jun chik, y tiqakoch'o' ronojel ri yebix chiqij. 31 Ri Jehová kan man oj rumalin ta kan jumul. 32 Stape' xuben chiqe chi xqaq'axaj tijoj-poqonal, xa kan nujoyowaj chik k'a qawech, roma ri rajowabal man jun bey xtik'is. 33 Roma ri Jehová man yojruya' ta pa tijoj-poqonal, y chuqa' man chaq k'ate' ta yojruya' pa bis. 34 Ri Jehová kan nutz'et ronojel banobel ri kan man e utz ta: Achi'el toq niqasex kiq'ij winaqi' ri ek'o pa cárcel; 35 Toq man pa ruchojmilal ta niq'at-tzij pa ruwi' jun chik, ri nimalej Dios kan nutz'et ronojel; 36 toq nijal rubanik ri qitzij toq k'o jun ch'ojikil, ronojel re banobel re' kan man utz ta nutz'et ri Jehová. 37 Man jun yojtikir niqaben wi ri Jehová man nuya' ta q'ij chiqe. 38 Kan ja ri Jehová ri niya'on ri ruk'ayewal pa qawi'. Chuqa' ja rija' ri niya'on ri urtisanik pa qawi'. 39 ¿Achike k'a roma roj chaq yojwolol y ri Dios kan k'a ruya'on na qak'aslen stape' xa oj aj-maki'? 40 Tiqach'obo-qa rij ri bey ri qak'uan; y titzolej k'a pe qak'u'x rik'in ri Jehová. 41 Qojch'on-q'anej rik'in ri Dios, tiqayaka-q'anej ri qaq'a' chuwech; kan tiqajacha' chuqa' ri qánima chire, 42 richin niqabij chi roj kan xojmakun-wi. Kan xqapaba-qi' chuwech rija', y roma ri' rija' man xukuy ta ri qamak. 43 Jehová kan xik'o chik ruwi' ri awoyowal chiqij y roma ri' xojatzeqelibej. Rat kan janila k'a e k'iy ri xe'akamisaj, y kan man xajoyowaj ta qawech. 44 Xapis k'a awi' chupan jun sutz' richin chi man xapon ta q'anej ri qach'owen awik'in. 45 Xaya' q'ij chike ri ch'aqa' chik tinamit richin xojkitze'ej y kan itzel xojkitz'et. 46 Roma ri' konojel ri e etzelanel qichin nikijeq pa kichi' chiqij. 47 Xqaqa k'a pa qawi' nimalej xibinri'il, k'iy pikbel, nima'q taq wululen y tijoj-poqonal. Ronojel re q'axo'n re' qajineq pa qawi'. 48 Kan nibiyin k'a ruya'al runaq'-nuwech, toq nintz'et chi ri nuwinaq xa kan xek'is. 49 Kan man yitane' ta chi oq'ej, roma man jani ninwil uxlanibel-k'u'x. 50 K'a ja toq ri Jehová, k'a chila' chikaj xirutz'et-pe, y jari' toq xiruto'. 51 Ronojel ri nintz'et nuk'en-pe q'axo'n pa wánima, roma ri xkik'uluwachij ri xtani' richin ri nutinamit. 52 Man jun achike roma toq ri e etzelanel wichin xinkichop; y kan xinkichop achi'el nichap jun ti aj-xik' chikop. 53 Rije' kan xinkiya' pa jun jul richin ta xiken. Kan xinkik'eq k'a qa chi abej. 54 Ri ya' ri k'o chupan ri jul kan xapon k'a pa nujolon. Roma ri' kan xinch'ob-qa chi yiken. 55 Jari' k'a toq xinnataj ri abi' nimalej Jehová. Kan k'a chupan ri jul ri' k'a chiri' xatinwoyoj-wi. 56 Roma ri' rat kan xawak'axaj k'a ri nuch'abel. Toq xink'utuj utzil chawe, rat kan xinato'. 57 Kan xape k'a wik'in ri q'ij toq xatinwoyoj. Xabij k'a chuwe chi man tinxibij-wi'. 58 Rat Jehová kan xinato' chupan ri ruk'ayewal. Kan xakol k'a ri nuk'aslen. 59 Jehová, rat xatzu' k'a ri itzel ri kibanon chuwe. Tabana' k'a ri ruchojmilal wik'in yin. 60 Rat kan xatzu' k'a ri k'o pa kánima ri e etzelanel wichin. Xatz'et k'a ronojel ri kich'obon chuwij yin. 61 Rat Jehová kan xawak'axaj yan k'a chi kan janila yinkiyoq'. Atzuliben k'a ronojel ri itzel taq kich'obonik ri yekiben chuwij. 62 Xawak'axaj yan k'a ri ch'abel ri yekibila' ri e yakatajineq chuwij. Rat kan atz'eton chik k'a ronojel ri ch'obonik ri jantape' yekibanala' chuwij, 63 Kan atzuliben k'a ronojel ri nikiben ri e yakatajineq chuwij. Pa ruwi' ronojel re', kan xaxe chik k'a yin ri yinkitzijoj. 64 Nimalej Jehová, taya' chike ri rutojbalil ri kibanobal. Taya' chike ri kan ruk'amon roma ri kimak. 65 Takowirisaj k'a ri kánima, Taya' q'ij chi niqaqa ri etzelanik pa kiwi'. 66 Rik'in ri awoyowal kan ke'atzeqelibej. Kan ke'ak'isa' k'a el chuwech re ruwach'ulew, nimalej Jehová. |
Kaqchikel Bible © Bible Society in Guatemala, 2003.
Bible Society in Guatemala