Wuj Richin ri K'uxla'anik 1 - Kaqchiquel Bible

Ri Jerusalem xa xuyonij kan Ri q'alajirisey ruch'abel ri Dios nubij:

¹ Ri nimalej tinamit ri xek'oje' e k'iy ruwinaq ojer kan, wakami xa xuyonij kan. Ri tinamit ri kan nim rubanon chikikojol ri ch'aqa' chik ruwach'ulew, wakami xa xok kan achi'el jun malka'n ixoq. Ri ojer kan ri tinamit ri' ja rija' ri reina pa kiwi' ri ch'aqa' chik ruwach'ulew; jak'a re wakami xa xxime' pa samaj.

² Ri pa taq chaq'a' kan nuk'is-ri' chi oq'ej. Ri ruya'al runaq' taq ruwech kan nibiyin k'a qa chupalej. Man jun k'a chike ri xe'ajowan richin ri nikuquban ta juba' ruk'u'x. Konojel k'a ri e rachibil xa xepiskolin chirij y xe'ok etzelanel richin.

³ Ri winaqi' aj-Judá pa ruwi' ri kan janila xkitej poqon y janila kow xesamej. Chuqa' kan xbekiya' k'a ki' pa ximonri'il. Rije' xebek'oje' chikikojol ch'aqa' chik winaqi' kichin ri ruwach'ulew, kan man xkil ta uxlanen. Konojel ri xe'oqotan kichin xebekila' k'a akuchi kewan-wi-ki', kan xekiya' k'a pa latz'.

⁴ Ronojel ri bey richin Sión, kan bis, bis nitzu'un. Kan man jun chik wineq napon ta chiri' richin ninimaq'ijun. Ri pa taq ronojel okibel kan man jun chik nok-apo chupan. Ri e sacerdote kan yejilon janila, ri xtani' ri yebixan chiri' kan e poqonatajineq, ri ruk'aslen ri tinamit xa k'ey-k'ey rubanon.

⁵ Ri e etzelanel richin xa kan xe'ok-q'anej tata'al pa ruwi'. Ri itzel yetz'eton richin, wakami xa xebe pa jotol. Ronojel re tijoj-poqonal re' xuya' ri Jehová pa kiwi' ri winaqi', kere' xkik'uluwachij roma ri kimak kan pa ruk'iyal ri xkiben. Ri winaqi' kan xe'uk'uex-el pa ximonri'il koma ri e etzelanel kichin.

⁶ Ri jebelej rubanikil ri tinamit Sión xa xk'is ronojel. Ri e tata'al xa kan xebe achi'el nikiben ri masat ri man nikil ta kiway. Xa kan xk'is k'a kuchuq'a' chikiwech ri e tzeqelibeyon kichin.

⁷ Ri winaqi' aj-Jerusalem kan noqaqa k'a chikik'u'x ronojel ri beyomel ri xk'oje' kik'in ri ojer kan. Jak'a re wakami xa nikitej poqon juk'an chik ruwach'ulew. Toq xetzaq pa kiq'a' ri e etzelanel kichin, kan man jun xto'on kichin. Ri e etzelanel kichin xekitzu' y xetze'en chikij roma ri kiwululen.

⁸ Ri aj-Jerusalem kan janila nim ri kimak ri kibanon. Roma ri' xa xe'ok man ch'ajch'oj ta. Konojel ri xeya'on kiq'ij, wakami xa xeketzelaj kan, roma xkitz'et chi xa xqasex kiq'ij. Rije' kan yejiq'ijo'x, y kan xkewaj-ki' roma ri kik'ix.

⁹ Ri kitziaq kan xtz'ilobitej roma ri mak ri', rije' kan man xkich'ob ta k'a ri nuk'en-pe pa kiwi'. Kan nak'en rukiy toq xechapatej chupan ri kimak. Y re wakami kan man jun k'a achike ta nikuquban kik'u'x. Nikik'utuj k'a chire ri Jehová chi tutzu' ri kiq'axo'n. roma ri e etzelanel kichin kan xkinimirisaj-ki'.

¹⁰ Ri e etzelanel kichin ri aj-Jerusalem kan xkichop-qa ri kibeyomel. Rije' kan xekitz'et k'a toq ri winaqi' maneq Dios chikiwech xe'ok-apo chupan ri rachoch rija', ri rubin kan chi man xabachike ta wineq nok-apo chupan.

¹¹ Konojel ri winaqi' ye'oq' rokik nikikanoj ri k'atzinel richin nikitej. Rije' nikijel ri kibeyomel chuwech juba' kiway. Kere' xkiben xaxe richin man yeken ta. Tabana' utzil, Jehová, qojatzu' chi kan ojk'o pa jun k'ixbilal.

Ri winaqi' aj-Jerusalem nikibij:

¹² Y rix ri janipe' yixq'ax chupan ri bey, kixpa'e' y titz'eta'. Tich'obo-qa wi k'o ta chik jun q'axo'n, achi'el re q'axo'n re qajineq pa qawi' roj. Ri Jehová kan xuya' k'a pe re tijoj-poqonal re' pa qawi' toq xyakatej janila royowal chiqij.

¹³ K'a chila' chikaj xuteq-pe q'aq' pa qawi' y ri q'aq' ri' kan yeruk'et ri qabaqil. Xuya' k'a pikbel pa qabey, y re' kan xojrujaq'mayij kan chiqij. Xojrumalij kan, y xojruya' kan rik'in q'axo'n ronojel q'ij.

¹⁴ Ri ralal ri qamak kan jak'a ri' ri xuya' ri Dios pa qawi'. achi'el ri che' ri niya'ox pa kiwi' ri bóyix. Y ri' kan xuk'is k'a chijun quchuq'a'. Ri qajaw xojrujech pa kiq'a' ri winaqi' ri man xojtikir ta chikij.

¹⁵ Ri qajaw kan xeruk'is k'a el ri aj-labal ri e qichin roj. Y xeroyoj k'a winaqi' chiqij richin chi yojkik'is. Xepe richin xekikamisaj kan ri k'ajola'. Ri Jehová kan xuben k'a chiqe achi'el toq nipitz' ri uva.

¹⁶ Roma ri' kan janila yojoq'; kan nibiyin k'a ri ruya'al runaq' taq qawech. Roma xa maneq chik ri nikuquban qak'u'x, ri niya'on uxlanen pa qánima. Ri qalk'ual kan xek'is k'a konojel, roma ri e etzelanel kan xech'akon chiqij.

¹⁷ Ri tinamit Sión kan xuk'utuj to'onik, jak'a kan man jun xto'on richin. Ri Jehová kan jare' k'a ri ruchojmilal ri ruya'on kan pa ruwi'; chi ri tinamit ri ek'o chunaqaj xke'ok etzelanel richin. Roma ri' ri Jerusalem kan itzel k'a xtz'et koma rije'.

Ri winaqi' aj-Jerusalem nikibij:

¹⁸ Rat Jehová kan pa ruchojmilal ri xaben. Roj kan xqapaba-qi' chuwech ri ach'abel. Y rix winaqi' tiwak'axaj k'a, chi qonojel roj niqatej poqon. Konojel k'a ri qalk'ual, chi xtani', chi alaboni' xe'uk'uex-el pa ximonri'il.

¹⁹ Xeqoyoj k'a ri xe'ajowan qichin richin yojkito', jak'a rije' xa xojkiq'ol. Ri qa-sacerdote y ri e tata'al, rokik e beneq chukanoxik ri k'atzinel richin nikiq'axbej-ki', xa xeken kan pa tinamit.

²⁰ Nimalej Jehová, tabana' utzil qojatzu-pe chi janila oj k'ayewatajineq; kan janila k'a rukiy ri qaq'axo'n. Kan nich'ujer ri qánima, roma kan janila xojmakun chawech. Ri qawinaq ri e eleneq-el chuchi' re tinamit kan xekamisex, y ri ek'o kan chupan, chuqa' kan xoqaqa k'a ri kamik kik'in.

²¹ Ri winaqi' kan nikak'axaj ri qajiloj, jak'a kan man jun xkuquban ta juba' qak'u'x. Konojel ri e etzelanel qichin xkak'axaj k'a re qatijoj-poqonal, kan xekikot k'a roma re xaben chiqe. Jak'a kan xtapon na k'a ri q'ij ri abin-pe richin ruk'ayewal pa kiwi' rije', richin xtikik'uluwachij achi'el re qak'uluwachin roj re wakami.

²² Kan xtapon yan ta k'a chawech rat ronojel ri kimak. Kan tabana' k'a chike rije' achi'el re abanon chiqe roj roma ri qamak. Ri qaq'axo'n kan janila nim, y ri qánima kan janila k'a poqonatajineq.