Hechos 5 - Kaqchiquel Bible

Ri xkimakuj ri Ananías y ri Safira

¹ Y chikikojol k'a rije' k'o k'a jun achin rubini'an Ananías rachibilan ri rixjayil rubini'an Safira. Rije' chuqa' xkik'ayij k'a jun kulew.

² Y chi e ka'i' pan ewel k'a xkiya' chikiwech chi nikik'en kan ch'aqa' chire ri rajel ri ulew, y ri ch'aqa' chik xuk'uaj-el ri Ananías richin xberuya' pa kiq'a' ri e taqon roma ri Cristo y xuben chi jari' chijun ri rajel ri ulew.

³ Jari' toq ri Pedro xubij chire: ¿Achike k'a roma toq xaya' q'ij chi ri Satanás xunojisaj ri awánima, richin chi xatz'uk-tzij chuwech ri Loq'olej Espíritu, y xak'en kan ch'aqa' chire ri rajel ri ulew ri xak'ayij?

⁴ ¿Man awichin ta kami rat ri ulew? Y toq xak'ayij, ¿man awichin ta kami rat chijun ri rajel ri awulew? ¿Achike k'a roma toq xpe ri jun itzel ch'obonik awik'in? Rat man chikiwech ta k'a winaqi' xatz'uk-wi-tzij; rat kan chuwech k'a ri Dios xatz'uk-tzij, xcha' ri Pedro.

⁵ Y ri Ananías kan xaxe k'a xrak'axaj ri ch'abel ri xerubij ri Pedro, xken y xtzaq-qa. Y konojel k'a ri xe'ak'axan ri xbanatej, xpe k'a janila xibinri'il chike.

⁶ Y ek'o k'a ka'i-oxi' ri k'a e k'ajola' na ri xe'ok-apo richin xbekibana-pe rutzil ri kamineq, y k'ari' xkik'uaj-el richin xbekimuqu' kan.

⁷ Y k'a jun la'eq oxi' hora tik'uluwachitej-qa ri rukamik ri Ananías, toq xapon ri rixjayil. Rija' man runaben ta k'a ri xk'uluwachitej chiri'.

⁸ Y ri Pedro xuk'utuj chire ri ixoq ri': Ri méro ri ruk'amon-pe ri Ananías, ¿jari' ri rajel ri ulew ri xik'ayij?, xcha'. Y ri ixoq xubij chi keri'.

⁹ Jak'a ri Pedro xubij chire: ¿Achike roma rix kan xiben chi achi'el xa ta man yixrutz'et ta pe ri Loq'olej Espíritu richin ri Dios? Roma ri' ri awachijil jari' xbemuq kan. Y ri e beneq muquy richin, jari' ye'ok yan pe, richin keri' yatokik'ama' chik el rat, richin yatbekimuqu' kan chuqa', xcha'.

¹⁰ Kan jari' xtzaq-qa ri ixoq ri chiri' chuwech ri Pedro, y xken-qa. Toq xe'oqaqa k'a ri k'ajola' ri xebemuqu kan ri Ananías, jari' toq xkitz'et chi kamineq chuqa' ri rixjayil. Xkik'uaj k'a y xbekimuqu' kan rik'in ri rachijil.

¹¹ Ri molaj qach'alal kan janila k'a xkixibij-ki' roma ri xbanatej. Y kan keri' chuqa' xkiben ri ch'aqa' chik ri xe'ak'axan ri xbanatej.

Ri e taqon roma ri Cristo k'iy meyel taq banobel yekibanala'

¹² Ri e taqon roma ri Cristo janila k'a k'iy meyel taq banobel y retal ri yekibanala' chikiwech ri winaqi'. Y ri kan kikuquban kik'u'x rik'in ri Dios, junan k'a kiwech nikimol-ki' chiri' chuwa-jay richin ri rachoch ri Dios, ri rubini'an Ruwa-jay richin Salomón.

¹³ Kan ek'o-wi k'a winaqi' ri man yejel ta apo kik'in roma nikixibij-ki' man rik'in ri' kan nikiya' kejqalen.

¹⁴ Jak'a kan janila e k'iy ri winaqi' ri kikuquban kik'u'x rik'in ri Jesús. Roma ri' ri e nimanela' q'ij-q'ij más e k'iy; chi achi'a' chi ixoqi'.

¹⁵ Roma ri kisamaj ri e taqon roma ri Cristo, ri yawa'i' ye'elesalox k'a pe ri pa taq bey y yeyolox pa taq ch'at y pa taq warabel, richin keri' toq ri Pedro niq'ax-el, ri rumujal niq'ax ta k'a pa kiwi' jun ka'i' chike ri yawa'i' ri', richin xek'achoj ta.

¹⁶ E k'iy k'a chuqa' winaqi' ri ek'o pa taq tinamit ri ek'o-pe chunaqaj ri Jerusalem; xe'oqaqa ri chiri' pa tinamit, y e kik'amalon-pe ri yawa'i' ri ek'o kik'in. Chuqa' yekik'amala-pe ri nikitej-poqon pa kiq'a' itzel taq espíritu. Y konojel k'a yek'achojirisex-el.

Toq xechap ri Pedro y ri Juan

¹⁷ Jak'a ri nimalej sacerdote y jujun chike ri saduceo itzel k'a nikina' chike roma ri nikiben.

¹⁸ Roma ri' xebekichapa-pe y xebekiya' kan pa cárcel.

¹⁹ Jak'a ri chi'aq'a', ri Dios xuteq k'a pe jun ángel ri pa cárcel kik'in rije'. Y re ángel re' xujeq-el ri ruchi' ri cárcel chikiwech, richin xerelesaj-el. Y xubij k'a chike:

²⁰ Kixbiyin k'a. Toq xkixapon chik k'a pa rachoch ri Dios, titzijoj chike ri winaqi' ronojel ri ch'abel ri richin ri k'ak'a' k'aslen, xcha' ri ángel.

²¹ Roma ri' nimaq'a' yan ruka'n q'ij xebe ri pa rachoch ri Dios, y yekitijoj k'a ri winaqi'. Rokik ri', juk'an chik, ri nimalej sacerdote y ri rachibil xekiteq k'a koyoxik ri achi'a' ri k'o kiq'ij. Y konojel rije' xkimol-ki'. K'ari' xkiteq kik'amik ri e taqon roma ri Cristo ri ek'o pa cárcel.

²² Ri achi'a' chajinela' xe'apon chuchi' ri cárcel, xe'ok-apo richin yebekik'ama-pe. Jak'a xa xkitz'et chi xa man jun k'o ri chiri'. Kan jari' k'a xetzolej, y xbekiya' rutzijol.

²³ Y xbekibij k'a: Toq roj xojapon chuchi' ri cárcel jebel tz'apel, y ri chajinela' ek'o ri chiri'. Jak'a toq xqajeq, xa man jun ri k'o chupan, xecha'.

²⁴ Ri nimalej sacerdote, ri achin uk'uey kichin ri chajinela' ri richin pa rachoch ri Dios, y ri aj-raqen pa kiwi' ri sacerdote, toq xkak'axaj ri xbekibij ri chajinela' chike, man nikil ta k'a achike nikich'ob.

²⁵ Jari' k'a toq k'o jun ri xapon chiri' kik'in ri kimolon-ki', y xberubij chike: Ri achi'a' ri xe'iya' pa cárcel, ye'ajin chikitijoxik ri winaqi' chiri' pa rachoch ri Dios, xcha'.

²⁶ Kan jari' k'a toq ri chajinela' y ri uk'uey kibey xebe chikik'amik ri e taqon roma ri Cristo, jak'a chi utzil k'a xekik'en-pe, roma rije' nikixibij-ki' chi yek'aq chi abej koma ri winaqi'.

²⁷ Toq xe'apon, kan choj k'a xebekipaba' chikiwech ri achi'a' ri yeq'aton-tzij. Y ri nimalej sacerdote xubij k'a chike rije':

²⁸ Roj qabin-el chiwe chi man chik tiya' ri tijonik chirij ri achin ri' chike ri winaqi'. Jak'a wakami re tinamit Jerusalem nojineq chik rik'in ri itijonik, y niq'alajin k'a jebel chi chiqij roj niwajo' niya-wi ri rukamik, xcha'.

²⁹ Jak'a ri Pedro y ri ch'aqa' chik e taqon roma ri Cristo xkibij k'a apo chike: Nik'atzin chi ja ri nubij ri Dios ri niqanimaj, y man ja ta ri nikajo' ri winaqi'.

³⁰ Roma ri xbanon chire ri Jesús richin xk'astej-el, ja ri Dios, ri Dios qichin roj y kichin chuqa' ri qati't-qamama'. Jak'a rix xa xikamisaj ri achin ri' toq xibij chi tibajix chuwa ri cruz.

³¹ Y ri Dios chuqa' xunimirisaj k'a ruq'ij ri Jesús, rik'in ri xutz'uyuba-apo pa rijkiq'a', y xuben chire chi ja rija' ri nuk'uan qichin y ri nikolon qichin chuqa'. Xuben ronojel re' richin nitzolin qak'u'x rik'in ri Dios roj ri oj judío, y nikuyutej qamak.

³² Y ronojel re' qitzij, y kan ja roj xojtz'eto. Ri Loq'olej Espíritu chuqa' ruchapon k'a ruq'alajirisaxik chi kan qitzij wi, roma qonojel k'a ri yojniman rutzij ri Dios, kan ruya'on k'a ri Loq'olej Espíritu chiqe, xecha'.

³³ Toq ri kimolon-ki' chiri' xkak'axaj ri xkibij ri e taqon roma ri Cristo, xyakatej k'a koyowal y xkich'ob chi yekikamisaj.

³⁴ Jak'a chikikojol rije', k'o k'a jun achin ri kachibil ri fariseo, rubini'an Gamaliel. Rija' jun tijonel richin ri pixa' richin ri Moisés, y janila k'a chuqa' ruq'ij chikiwech ri winaqi'. Rija' xpa'e' k'a, y xubij chi ke'elesex-el juba' ri e taqon roma ri Cristo ri chiri'.

³⁵ K'ari' xch'on k'a chike ri rachibil: Nuwinaq, tich'obo' k'a jebel achike ri xtiqaben chike re achi'a' re'.

³⁶ Roma toqaqa chi'ik'u'x toq xbek'ulun-pe ri Teudas. Re Teudas re' xubij chi rija' jun achin janila ruq'ij, y ek'o la'eq jun 400 achi'a' ri xe'achibilan richin. Jak'a toq xkamisex, konojel ri xeniman rutzij xetalutej y xek'is.

³⁷ chirij re', toq xbanatej ri tz'iban bi'aj, xbek'ulun-pe chuqa' ri Judas aj-Galilea. Rija' chuqa' xtikir k'a xuben chi e janila e k'iy winaqi' ri xetzeqeliben richin. Jak'a toq xkamisex k'a chuqa' re Judas re', konojel ri xeniman rutzij, xetalutej.

³⁸ Roma ri' ninbij chiwe chi ke'iya' kan re achi'a' re'. Roma wi xa kich'obonik winaqi' ri ye'ajin chubanik, rije' xkek'is.

³⁹ Jak'a wi richin ri Dios, man jun k'a xkixtikir xtiben richin nichup. Tichajij-iwi' jebel; man xa tibek'ulun-pe chi rix yixtajin chi oyowal rik'in ri Dios, xcha'.

⁴⁰ Konojel xqa' chikiwech ri xubij. Y k'ari' xkibij chi ye'uk'uex chik apo ri e taqon roma ri Cristo. Toq rije' ek'o chik chiri', xech'ay y xbix chik el chike chi man chik tikitzijoj ri Jesús chike ri winaqi'. Y k'ari' xkiya-el q'ij chike richin xebe.

⁴¹ Toq ri e taqon roma ri Cristo xe'el-el ri chiri', nikikot k'a ri kánima xebe, roma ri Dios ruya'on q'ij chike richin chi nikik'owisaj tijoj-poqonal roma ri rubi' ri Jesús.

⁴² Rije' kan man k'a nikiya' ta kan rutzijoxik ri Jesús. Kan ronojel q'ij nikik'ut y nikitzijoj ri pa rachoch ri Dios y chi taq jay.