Hebreos 6 - Kaqchiquel Bible

¹ Nik'atzin k'a chi yojk'iy y niqaya' kan runataxik ri etamabel chirij ri Cristo ri xek'ut-pe chiqawech pa nabey toq man jani tiqanimaj. Xa kan tiqatija' k'a qaq'ij richin niqetamaj ri más e nima'q taq tijonik y man yojtzolin ta chik chi retamaxik ri tijonik chirij ri mak ri nik'amon-pe kamik y ri k'o chi xtzolej-pe qak'u'x rik'in ri Dios,

² ri tijonik pa ruwi' ri qasan-ya', ri nik'atzin-wi toq ri e uk'uey kichin ri qach'alal nikiya' kiq'a' pa qawi' richin jun samaj, ri q'ij toq konojel ri kaminaqi' xkek'astej-el y ri ruk'ayewal richin jantape' ri xtuya' ri Dios pa kiwi' ri winaqi' ri man kiniman ta.

³ Jare' ri k'o chi niqaben rik'in ri ruto'onik ri Dios.

^4-6 Man tikirel ta k'a niban chire jun chi nitzolej chik pe ruk'u'x rik'in ri Dios; ri saqirisan chik ruk'aslen, ri ruk'ulun chik ri utzil ri richin chila' chikaj y k'o chik ri Loq'olej Espíritu rik'in, retaman chik chi janila utz ri ruch'abel ri Dios, y retaman chik ri rubanik ri k'aslen richin ri q'ij ri peteneq chiqawech-apo y k'ari' nitzolin chik kan chuwech ri ruwach'ulew. Ri nibanon keri' rik'in ri rubanobal xa kan najin chik jun bey chukamisaxik ri Ruk'ajol ri Dios chuwech ri cruz, y nuk'ixbisaj chikiwech ri winaqi'.

⁷ Kan achi'el k'a jun ulew ri k'iy job qajineq pa ruwi' y nel-pe jun utzilej tiko'n chuwech, ri tikonel kan yalan nikikot ri ránima rik'in, y ri ulew ri' nuk'ul urtisanik roma ri Dios.

⁸ Jak'a jun ulew ri xaxe itzel taq q'ayis y k'ix ri yeruya', man jun nik'atzin-wi y xa itzel nitz'et y ri ulew ri' xa xtiporox kan ruwech.

⁹ Qach'alal ri yalan yixqajo', stape' k'o yan ch'abel ri xqabij-qa, roj qakuquban qak'u'x iwik'in chi rix man xtiben ta keri', xa kan qakuquban qak'u'x iwik'in chi ri ik'aslen niwachin chuwech ri Dios ri ruk'amon-pe ri kolotajik.

¹⁰ Ri Dios kan choj wi, y roma ri' man xtumestaj ta ri samaj ri ibanon-pe, y ri ajowabel ri k'o iwik'in, roma e ito'on-pe ri ch'aqa' chik ralk'ual ri Dios, y k'a ye'ito' na.

¹¹ Y niqarayij chi kan ta achi'el ri ajowabel ri k'o iwik'in wakami, keri' ta xtuben apo, richin chi ri iwoyoben kan qitzij ta xtibanatej.

¹² Nik'atzin chi rix niben keri' richin man tipe iq'oral. Xa kan ke'itzeqelibej ri ch'aqa' chik ri rik'in ri kikuqubabel-k'u'x y ri koch'onik nikichinaj ri rusujun kan ri Dios.

Ri rusujun ri Dios ri k'o chi nuya'

¹³ Ri ojer kan, toq ri Dios xubij chire ri Abraham chi xtuya' ri rutzil chire, kan pa rubi-qa rija' xuya-wi rutzij chi qitzij xtuya' ri xusuj chire, roma man jun ri más ta nim chuwech ri rubi' rija' richin ninatex.

¹⁴ Y xubij k'a chire:*f17* Xkatinwurtisaj pa ruk'iyal y xkek'iyer janila ri awijatzul, xcha' chire.

¹⁵ Y ri Abraham kan xroyobej k'a rik'in janila koch'onik, y xuk'ul na wi ri xusuj ri Dios chire.

¹⁶ Ri winaqi', nikiya' kitzij pa rubi' jun ri más nim chikiwech rije' y rik'in ri' kenimex y man jun chik tibix chike.

¹⁷ Roma ri' ri Dios xuya' k'a rutzij chire ri Abraham chi nuya' ri rutzil chire, richin nuk'ut chikiwech ri rijatzul chi rija' man nujel ta ri achike ri ruch'obon-pe y kan nuben-wi ri nusuj.

¹⁸ Ri Dios, kan qitzij wi ri nubij y man nitikir ta nutz'uk-tzij chirij ri rusujun y ri ya'on-tzij ri rubanon. Roma ri' k'o oyobenri'il qik'in roj pa ruwi' ri peteneq chiqawech.

¹⁹ Ri kuqubabel-k'u'x ri' rubanon chiqe chi achi'el xa ta oj yuqul rik'in ri Dios rik'in jun kolo' ri janila ruchuq'a'. Ri qoyoben-apo ja ri Jesús ri xuq'axaj yan ri tasbel rupan ri rachoch ri Dios ri k'o chila' chikaj.

²⁰ Ri Jesús xnabeyej-el chiqawech roj y xok chiri' roma ja rija' ri nimalej sacerdote richin jantape', achi'el ri sacerdote Melquisedec.