Hebreos 3 - Kaqchiquel Bible

Ri Jesús más ruq'ij chuwech ri Moisés

¹ Roma ri', rix loq'olej wach'alal ri ix oyon chuqa' junan qik'in roj roma ri Dios, kan ja ri Cristo Jesús titzu'. Ja rija' ri qaniman, y niqaq'alajirisaj chi rija' kan ja ri Dios ri xtaqon-pe richin, y ja chuqa' rija' ri qanimalej sacerdote.

² Ri Cristo Jesús kan xuben-wi ri samaj ri xuya-pe ri Dios chire, achi'el xuben ri Moisés, ri man xerumalij ta kan ri e ruwinaq ri Dios.

³ Roma ri' ri Moisés k'o ruq'ij. Jak'a ri Jesús kan más ruk'amon chi k'o ruq'ij-ruk'ojlen roma ri Jesús kan achi'el jun achin banoy-jay. Y kan qetaman-wi chi ja ri banoy-jay ri más ruq'ij, ke chuwech ri jay.

⁴ Ronojel jay, wineq ri nibanon, jak'a ri nima'q taq banobel ri yeqatz'et, ja ri Dios ri banayon.

⁵ Ri Moisés jun utzilej rusamajel ri Dios, ri man xerumalij ta kan ri e ruwinaq ri Dios. Rija' xeruq'alajirisaj yan k'a ri man jani kerubij ri Dios ri xkebebanatej-apo.

⁶ Jak'a ri Cristo man choj ta samajel richin ri Dios, achi'el ri Moisés. Rija' kan Ruk'ajol-wi ri Dios. Y man xqojrumalij ta kan roj ri oj ruwinaq chik ri Dios, wi niqakuquba-apo qak'u'x rik'in, y rik'in kikoten niqoyobej-apo ri q'ij toq xtibeqila' ronojel ri utzil.

Ri uxlanen kichin ri e ralk'ual ri Dios

⁷ Chupan ri ruch'abel ri Dios ri tz'ibatel kan, ri Loq'olej Espíritu nubij:*f9* Wi niwak'axaj wakami ri nuch'abel yin Jehová;

⁸ man k'a tikowirisaj ri iwánima achi'el xkiben ri iwati't-imama' ojer kan, toq xeyakatej chuwij ri chiri' pa tz'iran ruwach'ulew.

⁹ Roma chiri' ri iwati't-imama' xinkitejtobej. Xinkitejtobej, stape' kan xkitz'et ri nima'q taq nubanobal kawineq juna'.

¹⁰ Roma ri' xpe woyowal chike ri jun sol winaqi' ri' ri xebanon keri'. Y yin xinbij: Rije' xa chaq kaka' kik'u'x. Y xa man kitaqen ta k'a ri nupixa'.

¹¹ Roma ri' chupan ri woyowal xinya' nutzij, y xinbij chi rije' man xke'ok ta chupan ri ruwach'ulew richin uxlanen, nicha'.

¹² Wach'alal, tichajij ri ik'aslen chi'ijujunal, richin chi beneq ta ruwech kuqul ik'u'x rik'in ri Dios, y chi man ta k'o itzel ri pa taq iwánima, richin keri' man ta xtiya' kan ri k'aslik Dios.

¹³ Nik'atzin chi q'ij-q'ij nikuqubala' ik'u'x chi'iwachibil-iwi', roma k'a ruq'ijul na. Tibana' keri', richin chi man jun chiwe ri tiq'olotej roma ri mak y nikowirisaj ri iwánima.

¹⁴ Roj jun qabanon rik'in ri Cristo, roma xqakuquba' qak'u'x rik'in toq xqanimaj. Jak'a nik'atzin chi man tiqaya' kan, y jantape' tiqakuquba-apo qak'u'x rik'in, achi'el ri qabanon-pe.

¹⁵ Roma chupan ri ruch'abel ri Dios nubij:*f10* Wi niwak'axaj ri ruch'abel yin Jehová wakami, man tikowirisaj ri iwánima achi'el xbanatej toq xeyakatej chuwij ri winaqi', nicha'.

¹⁶ ¿Achike ta k'a ri xebanon chi toq kan kak'axan chik ri ruch'abel ri Dios, xa xeyakatej chirij? Konojel ri xe'el-pe ri pa ruwach'ulew Egipto, ri xekol-pe roma ri Moisés.

¹⁷ ¿Achike ta k'a winaqi' ri kan kawineq juna' xpe royowal ri Dios chike? Konojel ri xemakun, ri xekamiyaj kan ri pa tz'iran ruwach'ulew.

¹⁸ ¿Achike ta k'a winaqi' ri xa kan xuya' rutzij ri Dios chike chi kan man xke'ok ta chupan ri uxlanen ri nuya'? Ja ri winaqi' ri xa man xeniman ta tzij.

¹⁹ Y rik'in ri', roj niqetamaj chi rije' man xetikir ta xe'ok akuchi k'o uxlanen, roma man xkikuquba' ta kik'u'x rik'in ri Dios.