Hebreos 2 - Kaqchiquel Bible

Ri nimalej kolotajik

¹ Roma ronojel re', k'o chi niqatzeqelibej ri ruch'abel ri Dios ri qak'axan, richin chi man niqach'er ta kan qi'.

² Wi ri ruch'abel ri Dios ri xya'ox chike ri winaqi' koma ri ángel kan qitzij, y wi ri ruk'ayewal xqaqa pa kiwi' roma man xkinimaj ta,

³ ¿achike k'a rubanik xtiqato-qi' roj chuwech ri royowal ri Dios wi xa xtiqamalij ri nimalej kolotajik? Roma re kolotajik re' kan ja ri ajaw Jesús ri xtzijon nabey. Y ri xe'ak'axan-pe rik'in rija', jari' ri xeq'alajirisan chiqawech roj.

⁴ Ri Dios chuqa' kan xujikiba' ri kich'abel rije' rik'in nima'q taq banobel y rik'in jalajoj ruwech meyel taq banobel, y rik'in ri sipanik ri xya'ox chike roma ri Loq'olej Espíritu, achi'el ri xrajo' rija'.

Ri xkolon qichin

⁵ Ri Dios man rubin ta chi re ruwach'ulew chiqawech-apo, pa kiq'a' ta ángel nuya-wi richin nikiq'et tzij pa ruwi'.

⁶ Jak'a chupan ri ruch'abel ri tz'ibatel kan, k'o k'a jun ri biyon kan:*f6* Ajaw Dios, ¿achike ta k'a ri wineq richin chi naquqa-pe rij y richin chi nachajij?

⁷ Xaben chire chi más juba' xqaqa ruq'ij chikiwech ri ángel; jak'a kan xaya' ruq'ij ruk'ojlen.

⁸ Xaben chire chi xok q'atoy tzij pa ruwi' ronojel ri xaben. Ronojel k'a ri xaben xaya' pa ruq'a'. Y toq nubij chi ri Dios ruya'on chik ronojel pa ruq'a', kan man jun k'a ri man ta k'o pa ruq'a'. Jak'a man jani tiqatz'et.

⁹ Chuqa' ri Jesús maneq más ruq'ij xban chire chikiwech ri ángel jak'a xaxe richin ka'i-oxi' q'ij. Y ri' roma ri Dios xrajo' chi ri Jesús xutej-poqon y xken richin xuya' ri rutzil pa qawi'. Y wakami ya'on chik ruq'ij-ruk'ojlen.

¹⁰ Richin chi konojel ri ralk'ual ri Dios nik'oje' kiq'ij-kik'ojlen, ruk'amon chi ri ajaw Dios, ri xtz'ukun ronojel, xuben chire ri Jesús chi xutej poqon richin chi xok jun kolonel ri kan ruk'amon.

¹¹ Konojel xa jun kitata'. Ri Jesús kan loq'olej-wi, y nuben chike ri ralk'ual ri Dios chi ye'ok loq'olej; roma ri' man nik'ix ta nubij rach'alal chike.

¹² Kan achi'el nubij chupan ri ruch'abel ri Dios ri tz'ibatel kan:*f7* Yin kan xtintzijoj k'a ri abi' chike ri wach'alal. Xtinya' k'a aq'ij pa taq qamolojri'il.

¹³ Chuqa' nubij:*f8* Yin kuqul nuk'u'x rik'in ri Dios. Y chuqa' nubij: Jare' ink'o kik'in ri walk'ual ri e ruya'on ri Jehová chuwe, nicha'.

¹⁴ Roj ri oj ralk'ual chik ri Dios xa oj winaqi', xa qak'uan ri kik' y ri ti'ij. Y roma ri' ri Jesús xok chuqa' achi'el roj winaqi'. Rija' xken richin xch'akon chirij ri k'o kamik pa ruq'a'. Y ri k'o ri kamik pa ruq'a', ja ri Itzel-Wineq.

¹⁵ Qonojel roj, kan jantape' k'a xqaxibij-qi' chuwech ri kamik. Y roma ri' kan xojxime'. Jak'a ri Jesús xken richin chi xojrelesaj chupan ri ximonri'il ri'.

¹⁶ Y kan qitzij wi chi ri Jesús man xpe ta chikikolik ri ángel. Rija' xpe chiqakolik roj ri oj rijatzul kan ri Abraham.

¹⁷ Roma ri' xok wineq achi'el roj, richin chi xuben achi'el jun nimalej sacerdote ri nijoyowan qawech. Kan jantape' wi nuben ri samaj ri' rik'in ri Dios y roma ri' nikuyutej ri qamak roj winaqi'.

¹⁸ Rija' kan qitzij xutej-poqon, y xban chire chi xmakun ta, jak'a man xch'akatej ta. Roma ri' rija' kan nitikir-wi yojruto' toq niban chiqe roj chi yojmakun ta chuqa'.