Hebreos 13 - Kaqchiquel Bible

Ri niqa' chuwech ri Dios chi niqaben

¹ Wach'alal, kan jantape' k'a tiwajo-iwi'.

² Toq ek'o ye'apon chi'iwachoch, man k'a tipoqonaj ye'ik'ul. Roma banatajineq chi roma ri samaj ri' ek'o ángel ri e apowineq pa taq jay, y ri xek'ulun kichin man xkinabej ta.

³ Y man ke'imestaj ri ek'o pa taq cárcel. Tina' k'a ri q'axo'n pan iwánima, achi'el ta kan ja rix ri ix tz'apen. Y chuqa' man ke'imestaj ri ek'o pa tijoj-poqonal. Xa kan tina' chi achi'el kan ja rix ri ixk'o chupan ri q'axo'n ri'.

⁴ Tiya' ruq'ij ri k'ulubik. Roma ri achijlonel y ri ixjayilonel man yemakun ta toq nikik'uaj-ki' chupan ri k'ulubik. Jak'a wi nikikanoj jun chik richin yek'oje' kik'in kan yemakun. Chuqa' ri man e k'ulan ta y nikikanoj jun richin yek'oje' rik'in, xa yemakun. Y ri Dios kan xtuq'et k'a tzij pa kiwi' ri keri' nikiben.

⁵ Man tibe iwánima chirij ri méro, xa kan kixkikot rik'in ri k'o iwik'in. Roma ri Dios rubin: Kan beneq-ruwech ink'o iwik'in y man jun bey xkixinmalij kan, nicha'.

⁶ Y roma ri' kan rik'in k'a ronojel ik'u'x yixtikir nibij:*f28* Yin ja ri ajaw ri nito'on wichin. Roma ri' man xtinxibij ta wi' chuwech ri itzel ri xtuben ri wineq chuwe.

⁷ Ke'oqaqa k'a chi'ik'u'x ri uk'uey iwichin, ri xeq'axan ri ruch'abel ri Dios chiwe. Tich'obo' ri kik'aslen, roma kan xkuqer-wi kik'u'x rik'in ri Dios. Y kan tibana' ri achike xkiben rije'.

⁸ Ri Jesucristo man nujel ta ri'. Kan achi'el ri iwir, keri' wakami, y keri' chuqa' xtibe-q'ij xtibe-seq.

⁹ Man tiya' q'ij chi ja ri tijonik man e qitzij ta ri ye'uk'uan iwichin. Más ta utz chi rix nikuquba' ik'u'x rik'in ri tijonik ri nich'on chirij ri rutzil ri Dios, y man rik'in ta ri tijonik ri nich'on chirij ri yetij y xa man jun utz ruk'amon-pe chike.

¹⁰ Roj kan k'o chik jun qaporobal, jak'a ri nisuj pa ruwi' kan man ruk'amon ta chi nikitej ri xa k'a nikisamajij na ri ojer porobel.

¹¹ Chuqa' ri pixa' nubij chi ri nimalej sacerdote nuk'uaj k'a ri kikik'el ri chikopi' y nok-apo ri akuchi janila loq'olej, richin nusuj. Y ri kich'akul ri chikopi' ye'elesex el chirij-el ri tinamit richin yeporox.

¹² Y roma ri' ri Jesús xuk'uex k'a chirij-el ri tinamit richin chi xuben loq'olej chike ri winaqi' rik'in ri rukik'el.

¹³ Roma ri' qojel-el chupan ri tinamit richin niqatzeqelibej ri Jesucristo, y tiqaq'axaj chuqa' roj ri k'ix ri xuq'axaj rija'.

¹⁴ Chuwech re ruwach'ulew xa man richin ta jantape' qilon-qa jun qatinamit. Jak'a kan qachapon bey richin nibeqila' ri qatinamit ri peteneq chiqawech.

¹⁵ Roma ri' jantape' k'a tiqaya' ruq'ij ri Dios pa rubi' ri Jesucristo. Kan tiqaq'alajirisaj rik'in ri qachi' chi ja rija' ri qaniman.

¹⁶ Y man k'a tiqamestaj niqaben ri utz y man tiqamalij kito'ik ri k'o nik'atzin chike. Roma jari' ri sipanik ri niqa' chuwech ri Dios.

¹⁷ Kan tiqanimaj k'a kitzij ri qach'alal ri e uk'uey qichin richin niqaya' kikoten pa taq kánima, roma ja rije' ri yechajin ri qánima, y k'o chi nibekiq'alajirisaj chuwech ri Dios ri samaj ri nikiben. Roma wi xa man niqanimaj ta kitzij, rije' xtikiben ri kisamaj rik'in bis. Y re' xa man jun utz ruk'amon-pe.

¹⁸ Qach'alal, kixch'on rik'in ri Dios pa qawi', roma roj kan qetaman chi kan ch'ajch'oj ri qánima, y niqarayij chi ja ri utz ri niqaben ronojel bey.

¹⁹ Y jak'a ri ch'owen rik'in ri Dios woma yin ri más ninchilabej chiwe, richin chi yitikir yinapon yan ta iwik'in.

Ri ruk'isibel taq ch'abel

²⁰ Ri Dios, ri niya'on uxlanen pa taq qánima, ri xk'ason-pe ri nimalej Yuq'unel ri qajaw Jesús; ri Jesús ri xken y xbiyin ri rukik'el richin xk'achoj ri jikibel-tzij richin jantape',

²¹ xtuya' ta k'a ronojel rutzil chiwe, y xkixtikir ta xtiben ri utzilej taq banobel richin niben ri rurayibel rija'. Y nuben ta qik'in roj ri niqa' chuwech rija' rik'in ri rusamaj ri Jesucristo ri ruk'amon chi nuk'ul ruq'ij-ruk'ojlen richin jantape'. Keri' ta k'a.

²² Wach'alal, yin nink'utuj utzil chiwe chi kan tik'ulu' k'a chi utzil re ch'abel richin pixabanik re xinteq-el rubixik chiwe chupan re wuj re'. Roma xa man nim ta rubanik xinben-el chire.

²³ Yin ninya' rutzijol chiwe chi ri qach'alal Timoteo totajineq chik; y wi xtipe chi'anin, nink'uaj-el toq xkibe chi'itz'etik.

²⁴ Tiya' rutzil-kiwech konojel ri e uk'uey iwichin y ri loq'olej taq qach'alal. Chuqa' ri qach'alal aj-Italia nikiteq-el rutzil-iwech.

²⁵ Ri rutzil ri Dios xtik'oje' ta k'a iwik'in chi'iwonojel. Kan keri' ta k'a.