Hebreos 12 - Kaqchiquel Bible

Tiqaya' ri qatzubal rik'in ri Jesús

¹ Kan janila k'a e k'iy ri yek'utu chiqawech chi xkikuquba' kik'u'x rik'in ri Dios. Roma ri' roj kan tiqelesaj k'a kan ronojel ri niya'on ejqa'n chiqij y ri mak ri sutiyon qichin, kan rik'in koch'onik tiqatija' qaq'ij yojbiyin chupan ri bey ri k'o chiqawech.

² Kan rik'in ri Jesús tiqaya-wi ri qatzubal, roma ja rija' ri xbanon chiqe chi xqanimaj ri Dios y chi kuqurineq chik qak'u'x. Rija' man xupoqonaj ta xken chuwech ri cruz, stape' ri kamik ri' nik'ixbisan, roma retaman chi chirij ri kamik xtipe jun nimalej kikoten. Y kan xbetz'uye' k'a chila' chikaj pa rijkiq'a' ri Dios.

³ Kan tich'obo' k'a rij ri xuk'ut kan ri Jesús toq janila xyoq' koma ri aj-maki'. Rija' xukoch' ronojel. Keri' k'a tibana' rix y man kixkos, ni man timalij ik'u'x.

⁴ Rix kan itijon k'a iq'ij chirij ri mak, y roma ri' itijon poqon, jak'a man jani ix apowineq ta pa kamik.

⁵ Rix kan imestan chik ri pixabanik ri ruya'on ri Dios, achi'el jun tata'aj chire ri ruk'ajol, ri nunataj chupan ri ruch'abel ri Dios:*f27* Rix walk'ual alaboni', ri ruk'ayewal ri nuya' ri Jehová chiwe, man tiben chi xa man nik'atzin ta, man itzel tina' toq ri Jehová rik'in ruk'ayewal yixruchojmirisaj.

⁶ Roma ri Jehová kan yerupixabaj ri yerajo'; y kan nuxik'ayuj ri kan ralk'ual chik.

⁷ Toq rix nikoch' ri tijoj-poqonal richin yixpixabex, ri Dios kan nuben chiwe chi ix ralk'ual. ¿Roma k'o ta kami jun alk'ualaxel ri man nipixabex ta roma ri rutata'?

⁸ Roma wi ri Dios man yixrupixabaj ta achi'el nuben kik'in ri ralk'ual, k'ayew, roma ri keri' nel chi tzij chi xa ix achi'el sik'on taq ak'uala'.

⁹ Toq roj k'a oj kokoj na, ri qatata' xojkipixabaj, y man xeqetzelaj ta roma ri'. Xa kan xqaya' kiq'ij. ¿Y man más ta kami ruk'amon chi niqanimaj rutzij ri qatata' Dios, richin niqil ri k'aslen?

¹⁰ Stape' ri qate-qatata' xojkipixabaj richin jun ka'i-oxi' ok q'ij, y kan jak'a ri más xkajo' rije' jari' ri xkiben chiqe. Jak'a ri qatata' Dios yojrupixabaj, richin chi k'o utzil nuk'en-pe pa qak'aslen; richin chi yojch'ajch'ojir ta, y yojok ta achi'el rija', ri kan ch'ajch'oj wi.

¹¹ Kan qitzij wi chi toq ojk'o pa tijoj-poqonal, stape' richin yojtijox, xa man nuya' ta kikoten chiqe, xa oq'ej nuk'en-pe chiqe. Jak'a chirij ri' kan k'o-wi ri uxlanen nuk'en-pe y nuben más choj chire ri nik'ulu richin.

Tiqabana' k'a ri nrajo' ri Dios

¹² Roma ri' kan tik'oje' chik k'a el kuchuq'a' ri iq'a-iwaqen ri xa elawaleq chik,

¹³ kan nik'atzin chi tik'uaj jun choj bey, richin chi ri jetz' nichojmir-el ri raqen y man ninimatej ta.

¹⁴ Titija' iq'ij chi nik'oje' uxlanibel-k'u'x chi'ikojol kik'in konojel winaqi', y tik'uaj jun k'aslen ri kan loq'olej. Roma wi man keri' ta, man xkixtikir ta xtitz'et ruwech ri Dios.

¹⁵ Titz'eta' jebel chi man jun ta ri man ta nuqi' ri rutzil ri Dios. Richin chi man jun tok achi'el jun q'ayis ri k'ey-k'ey ruxe', ri xa nuben ch'aoj y nusech kik'u'x e k'iy.

¹⁶ Man jun tujech-ri' chupan ri itzel k'aslen y nuq'ej ruwi' ri ruch'abel ri Dios; achi'el xuben ri Esaú ri xa roma jun q'utun xuk'ayij ri kan k'o chi nuk'ul rija' roma nimalaxel,

¹⁷ jak'a toq xrajo' chik xuk'ul ta ri utzil ri', xa xbix chire chi man jun chik richin rija'. Y stape' kan rik'in oq'ej xuk'utuj, kan man jun chik xuk'ul.

¹⁸ Roj ri qaniman chik ri Jesucristo, man chuxe' ta k'a ri juyu' Sinaí oj apowineq-apo, ni man niqachop ta, achi'el xkiben ri qati't-qamama' ojer kan. Rije' xek'oje' chuxe' ri juyu' ri' nijino pa q'aq', kan q'equmatajineq y k'o jun nimalej kaq'iq' rachibilan koqolajay.

¹⁹ Xkak'axaj xq'ajan ri trompeta, y xkak'axaj chuqa' toq xch'on-pe ri Dios kik'in. Jak'a rije' xkik'utuj utzil chi man chik tich'on-pe kik'in,

²⁰ roma kan janila xkixbij-ki', roma bin chike chi ri xtijel-apo rik'in ri juyu', xtikamisex chi abej; stape' wineq o chikop.

²¹ Ri xtz'etetej k'a pa ruwi' ri juyu', kan nuya-wi xibinri'il. Roma ri' ri Moisés xubij: Yibaybot roma xibinri'il, xcha'.

²² Jak'a roj ri qaniman chik ri Jesucristo, chuxe' ri juyu' Sión oj apowineq-wi-apo; ojk'o chik naqaj chire ri tinamit richin ri k'aslik Dios, ri nibix Jerusalem aj-chikajil chire, akuchi ek'o-wi e k'iy ángel ri kan man e ajlatel ta.

²³ Roj ojk'o chik apo pa nimaq'ij kik'in ri nabey taq ralk'ual ri Dios ri tz'iban kibi' chila' chikaj. Ojk'o chik apo rik'in ri Dios ri xtuq'et-tzij pa kiwi' konojel. Y kik'in ri winaqi' ri kan tz'aqet ri kik'aslen, ri xeken-el yan el.

²⁴ Ojk'o apo rik'in ri Jesús ri nisamajin ri k'ak'a' jikibel-tzij y rik'in ri rukik'el ri xbiyin ri xuch'ajch'ojirisaj ri qánima, roma ri rukik'el rija' más rejqalen chuwech ri rukik'el ri Abel.

²⁵ Tiqachajij-qi' richin chi man ta niqetzelaj ri nubij ri Dios chiqe, roma wi ri qati't-qamama' ri xketzelaj ri xbix chike y roma ri' xqaqa ri ruk'ayewal pa kiwi'. Kan keri' chuqa' roj kan xtiqa-wi ruk'ayewal pa qawi', wi man xtiqak'axaj ta ri ch'abel ri nipe chila' chikaj.

²⁶ Ri ojer kan toq ri Dios xch'on pa ruwi' ri juyu', ri juyu' ri' xsilon. Jak'a re wakami nubij: Xtapon k'a jun q'ij toq man xaxe ta chik ri ruwach'ulew xtinsiloj, xa kan xtinyikiya' chuqa' ri kaj, xcha'.

²⁷ Y toq nubij chi k'o chik jun q'ij, ri' kan niq'ax-wi k'a chi xkejalatej k'a el ronojel, roma xa e banon. Richin keri' xa kan xaxe xkeq'alajin kan ri man jun bey xkejalatej ta.

²⁸ Y roma ri' tiqamatioxij chire ri Dios chi qichin chik roj ri ajawaren ri man jun nisilon richin. Y rik'in ri matioxinik ri niqaya' chire ri Dios, niqasamajij k'a, kan achi'el ri niqa' chuwech rija'. Y tiqaya' chuqa' ruq'ij.

²⁹ Roma ri qa-Dios kan achi'el q'aq' ri kan nuk'is ronojel.