Hebreos 11 - Kaqchiquel Bible

Ri ojer taq winaqi' ri xkikuquba' kik'u'x rik'in ri Dios

¹ Ri kuqubabel-k'u'x jari' ri nibanon chiqe chi kan niqanimaj chi xtiqak'ul ri qoyoben, jari' ri nibanon chiqe chi niqanimaj ri man niqatz'et ta.

² Y roma ri kuqubabel-k'u'x, ri qati't-qamama' kan utz xetz'et roma ri Dios.

³ Y roj chuqa' roma ri kuqubabel-k'u'x, niq'ax chiqawech chi kan ja wi ri Dios ri xbanon ronojel ri k'o, xaxe rik'in ri ruch'abel. Keri' ronojel ri niqatz'et wakami xban rik'in ri xa man tz'etel ta.

⁴ Roma ri kuqubabel-k'u'x, ri Abel xusuj jun kamelabel más utz chire ri Dios ke chuwech ri xusuj ri Caín. Roma ri' man jun rumak xk'ulun chuwech ri Dios y kan xuk'awomaj ri rusipanik. Y stape' ri Abel xken yan, roma ri rukuqubabel-k'u'x ri xk'oje', k'a nich'on na wakami.

⁵ Roma ri kuqubabel-k'u'x, ri Enoc xuk'uex-el chila' chikaj keri' k'es, richin chi man xutz'et ta el ri kamik y stape' janila xkanox, man xilitej ta roma kan ja ri Dios ri xuk'uan-el. Y roma ri' tz'ibatel kan chi ri Dios janila xkikot ránima rik'in.

⁶ Jak'a wi maneq ri kuqubabel-k'u'x qik'in, ri Dios man xtikikot ta ri ránima qik'in. Y richin yojjel-apo rik'in ri Dios, k'o chi niqanimaj chi rija' kan k'o-wi, y chi k'o utzil rik'in richin nuya' chike ri yekanon richin.

⁷ Chuqa' ri Noé xk'oje' kuqubabel-k'u'x rik'in. Roma ri' toq ri Dios xch'on rik'in pa ruwi' ri man jani nibebanatej, rik'in rukiy ri Dios xuben jun nimalej barco richin xerukol ri e aj pa rachoch. Y rik'in ri' xbeq'alajin-pe chi ri ch'aqa' chik winaqi' man utz ta xkiben, y xq'at-tzij pa kiwi'. Jak'a ri Noé roma kan xukuquba' ruk'u'x, ri Dios xuben chire chi man jun rumak xk'ulun chuwech.

⁸ Ri Abraham xk'oje' kuqubabel-k'u'x rik'in, roma ri' toq xoyox roma ri Dios richin chi nibe k'a pa jun chik ruwach'ulew ri xtuk'ul richin nrichinaj kan, rija' xunimaj tzij y xbe, stape' man retaman ta achike ruwach'ulew xtapon-wi.

⁹ Kan rukuquban-wi ruk'u'x rik'in ri Dios, y roma ri' xk'oje' achi'el jun q'axel chupan ri ruwach'ulew ri sujun chire. Y roma ri' xa chupan jay e banon rik'in tzieq xk'oje-wi. Achi'el chuqa' xkiben ri Isaac y ri Jacob, roma rije' sujun chuqa' chike ri ruwach'ulew ri'.

¹⁰ Ri Abraham xuben keri', roma kan royoben ri jun chik tinamit ri kan jebel jikil ri ruxe' y kan ja ri Dios ri xch'obo y xbanon richin.

¹¹ Roma ri kuqubabel-k'u'x, chuqa' ri Sara ri man alanel ta xuk'ul uchuq'a' richin nalex jun ral. Kan xalex na wi ri ral stape' k'a pa rurijixinen, roma rija' kan xukuquba' ruk'u'x chi ri Dios kan nuben wi ri nusuj.

¹² Y roma ri' xaxe roma ri Abraham ri kan achi'el chik kamineq xek'oje' janila chi winaqi', kan achi'el ri ch'umila' ri ek'o chikaj, ri kan man jun ri nitikir najlan kichin, y achi'el chuqa' ri sanayi' ri k'o chuchi' ri palou.

¹³ Konojel k'a rije' xkikuquba-el kik'u'x rik'in ri Dios y keri' xeken-el. Y stape' man xkik'ul ta el ri rusujun ri Dios chike, jak'a roma ri kikuqubabel-k'u'x k'anej xkitzu-wi-apo y xekikot rik'in; rije' kan xkiq'alajirisaj k'a chi xa e q'axel chuwech re ruwach'ulew.

¹⁴ Y rik'in ri xkibij, xq'alajin chi koyoben ri kan qitzij kiruwach'ulew.

¹⁵ Rije' man xkich'ob ta chik ri akuchi e eleneq-wi-pe. Roma wi ta keri' xetikir ta xetzolin chik kan jun bey chupan ri kiruwach'ulew.

¹⁶ Jak'a koyoben jun ruwach'ulew ri más utz, ri' ja ri chila' chikaj, y roma ri' ri Dios man nik'ix ta nubij chi ja rija' ri ki-Dios; y kan runaban chik ri kitinamit.

¹⁷ Roma ri kuqubabel-k'u'x, ri Abraham xusuj ri Isaac richin kamelabel toq xtejtobex roma ri Dios, kan xusuj-wi ri juney ruk'ajol ri', stape' kan k'o sujun chire roma ri Dios pa ruwi' ri rijatzul.

¹⁸ Roma ri Dios kan rubin k'a chire ri Abraham,*f26* chi ri rijatzul kan rik'in ri Isaac xtel-wi-pe.

¹⁹ Ri Abraham kan retaman k'a chi ri Dios k'o uchuq'a' rik'in richin nuk'asoj-pe ri ruk'ajol stape' chikikojol chik ri kaminaqi'. Roma ri' kan xuk'ul chik ri ruk'ajol y keri' ri banobel ri' k'o ri xuk'exewachuj.

²⁰ Roma ri kuqubabel-k'u'x, ri Isaac xerurtisaj kan ri Jacob y ri Esaú, y xubij kan chike ri utzil ri peteneq chikiwech-apo.

²¹ Y ri Jacob chuqa' xukuquba' ruk'u'x rik'in ri Dios, y roma ri', toq niken yan, xerurtisaj ri e ruk'ajol ri José. Roma ri' xluke' pa ruwi' ri ruch'ame'y y xuya' ruq'ij ri Dios.

²² Ri José xukuquba' chuqa' ruk'u'x rik'in ri Dios. Y roma ri', toq niken yan, xunataj kan chike ri e ruwinaq judío chi xtapon ri q'ij toq ri kiy-kimam xke'el-el chiri' pan Egipto. Y xuchilabej kan chike chi xtikik'uaj-el ri rubaqil.

²³ Ri rute-rutata' ri Moisés xkikuquba' chuqa' kik'u'x rik'in ri Dios. Y roma ri' toq xalex ri Moisés man xkiya' ta q'ij chi xkamisex, xa xkewaj oxi' ik' roma kan ti jebel-ok. Y man xkixibij ta ki' chuwech ri pixa' ri ruya'on ri rey.

²⁴ Roma ri kuqubabel-k'u'x, ri Moisés toq kan achin chik man xrajo' ta xubini'aj ral ri rumi'al ri rey.

²⁵ Xa kan más xqa chuwech chi junan nutej poqon kik'in ri ruwinaq, ri e rutinamit ri Dios, ke chuwech xa jun ramaj ok nikikot chupan ri kikoten ri xa richin mak.

²⁶ Rija' nuch'ob chi más rejqalen nutej poqon, roma xcha'ox roma ri Dios, ke chuwech nuk'ul ta ronojel ri beyomel ri k'o chiri' pa ruwach'ulew Egipto, roma kan royoben chik apo ri rajel ruk'exel ri xtuya' ri Dios chire.

²⁷ Kan kuqul-wi k'a ruk'u'x rik'in ri Dios toq xel-pe pan Egipto. Y roma kan achi'el rutzuliben ri Dios ri man tz'etel ta, roma ri' man xuxibij ta ri' chuwech ri royowal ri rey.

²⁸ Ri Moisés roma kan kuqul ruk'u'x, xuben ri nimaq'ij richin ri solbelri'il y xubij chike ri ruwinaq chi tikichikaj ri kikik'el ri taq ka'rnel chirij ri ruchi' taq kachoch, richin chi man yekamisex ri nimalaxela' taq alaboni' roma ri kamisanel.

²⁹ Y ri winaqi' judío roma kan kikuquban kik'u'x rik'in ri Dios, xkiq'axaj ri Kaqa-Palou y kan pa chaqi'j ulew xebiyin-wi. Jak'a toq ri winaqi' aj-Egipto xkajo' chuqa' xkiben keri', xa xejiq' kan.

³⁰ Toq rije' xe'apon pa tinamit Jericó, kan kuqul kik'u'x xesutin wuqu' q'ij chirij ri nimalej tz'aq ri tz'apeyon richin ri tinamit roma ri' ri tz'aq ri' xtzaq.

³¹ Chuqa' ri Rahab ri ixoq itzel ruk'aslen, kan xukuquba' ruk'u'x rik'in ri Dios. Roma ri' man xken ta kik'in ri ruwinaq toq xtzaq ri rutinamit, roma xeruk'ul ri nachanela' judío chi utzil.

³² ¿Yitikir kami yennataj konojel ri winaqi' ri xek'oje' ojer, ri kan xkikuquba' kik'u'x rik'in ri Dios? Xa man xkitikir ta k'a xtinchol ronojel chikij, achi'el chirij ri Gedeón, ri Barac, ri Sansón, ri Jefté, ri David, ri Samuel y ri ch'aqa' chik ri xeq'alajirisan ruch'abel ri Dios.

³³ Konojel rije' xkikuquba' kik'u'x rik'in ri Dios, roma ri' xech'akon chikij ch'aqa' chik ruwach'ulew, pa ruchojmilal xeq'aton-tzij, xkik'ul ri xesuj chike roma ri Dios, xetikir xekikamisaj koj,

³⁴ man xek'at ta toq xek'aq pa nimalej taq q'aq', xekolotej chuwech ri espada. Toq maneq chik kuchuq'a', ri Dios xuya' kuchuq'a'. Xech'akon chikij ch'aqa' chik tinamit ri xebanon labal kik'in.

³⁵ Ek'o chuqa' ixoqi' ri xekik'ul chik ri aj pa kachoch rik'in kik'aslen stape' e kamineq chik el. Jak'a ek'o ch'aqa' chik winaqi', ri man xkipoqonaj ta xe'apon chuwech ri kamik y man xkajo' ta richin xekol; roma kan ketaman chi chirij ri kamik xtibekila' jun k'aslen más utz.

³⁶ Ek'o ch'aqa' chik ri xetze'ex y xech'ay, ek'o xexim rik'in cadena, y xetz'apex pa taq cárcel.

³⁷ Ek'o ch'aqa' xekamisex chi abej, xequpix pa ka'i' rik'in ch'ich', xekamisex chi espada, xebe-kela' xebe-kela' xkiben y xaxe kisale'y karne'l y tzuntzun ri xkikusaj richin kitziaq. Xkiq'axaj tijoj-poqonal y janila k'iy itzel ri xban chike.

³⁸ Ri winaqi' ri' kan k'owineq k'a ruwi' e utz richin xek'oje' chikikojol ri man ketaman ta ruwech ri Dios, k'o chi xebe-kela' xebe-kela' xkiben, ri pa taq tz'iran ruwach'ulew, xkewaj-ki' pa taq juyu', pa taq jul, roma ri ruk'ayewal ri xkil.

³⁹ Jak'a man jun chike rije' ri xuk'ul yan ta el ri rusujun ri Dios chike, stape' kan xkikuquba' kik'u'x rik'in.

⁴⁰ Roma ri Dios ruch'obon chi nuya' ri utzil ri más utz, chupan re qaq'ijul roj. Y keri' junan xtiqak'ul ri utzil ri' kik'in rije' ri kan xkikuquba' kik'u'x rik'in ri Dios.