Hebreos 10 - Kaqchiquel Bible

¹ Ri pixa' ri xya'ox chire ri Moisés, xaxe ok rumujal ri utzil ri nuk'en-pe ri Cristo y man ja ta ri' ri qitzij. Roma ri' xa man jun bey xtikir xuben ch'ajch'oj chike ri ronojel juna' xekisuj chikopi' chire ri Dios.

² Wi ta kan xch'ajch'ojir ri kánima koma ri chikopi' ri xekisuj, man ta chik yekisuj jun bey, roma nikina' chi man jun chik kimak.

³ Jak'a xa ronojel juna' yekisuj, y rik'in ri', noqaqa k'a chikik'u'x chi ri mak man eleneq ta el kik'in.

⁴ Roma ri kikik'el ri achija' taq wákix y ri tzuntzun kan man yetikir ta nikelesaj ri kimak.

⁵ Roma ri', ri Cristo toq k'o chi nipe yan wawe' chuwech re ruwach'ulew, xubij chire ri Dios:*f23* Rat man nawajo' ta ri jalajoj kiwech sipanik. Jak'a rat xaya' nuch'akul achi'el richin ri wineq.

⁶ Man niqa' ta chawech ri chikop ri niporox jumul, ni ta ri kamelabel richin kuyubel-mak.

⁷ Roma ri' xinbij: Jare' ink'o nu-Dios richin yatinsamajij, kan achi'el ri tz'ibatel chuwij chupan ri wuj. Keri' xubij ri Cristo.

⁸ Ri Cristo xubij chuqa' chire ri Dios: Rat kan man chik k'a nawajo' ta chi yesuj poron chikopi' y ch'aqa' chik sipanik chawe richin nikuyutej mak. Ri chikopi' ri yeporox chawech, man jun kikoten nikiya' chawe, xcha'. Keri' xubij stape' yesuj achi'el nubij ri pixa' ri aya'on chire ri Moisés.

⁹ Y chuqa' kan jari' toq ri Cristo xubij: Wajaw Dios, yin xipe richin ninben ri arayibel, xcha'. Y rik'in ri' xtane' ri nabey jikibel-tzij. Y xuchop nisamej ri k'ak'a' jikibel-tzij.

¹⁰ Ri Dios xuben loq'olej chiqe roma ri Jesucristo xuben ri rurayibel rija' toq xusuj-ri' richin jun kamelabel. Re' xuben xaxe jun bey y richin jantape'.

¹¹ Ri sacerdote beneq-ruwech yesamej. Q'ij-q'ij yekisuj chikopi' roma kimak ri winaqi'. Jak'a xa man nitikir ta nrelesaj-el jumul ri mak.

¹² Jak'a ri Cristo xaxe jun bey xusuj-ri' richin xok jun kamelabel, y rik'in ri' xkuyutej ri qamak jumul. Y chirij ri' xbetz'uye' pa rijkiq'a' ri Dios chila' chikaj.

¹³ Y chila' k'o-wi, royoben ri q'ij richin yejach pa ruq'a', konojel ri ye'etzelan richin.

¹⁴ Xaxe jun bey xken, y rik'in ri' xuben chiqe chi kan oj loq'olej, roj ri xojjel-apo rik'in richin nich'ajch'ojir ri qánima.

¹⁵ Keri' chuqa' nuq'alajirisaj ri Loq'olej Espíritu chiqe toq nubij:*f24*

¹⁶ Kan jare' k'a ri k'ak'a' jikibel-tzij ri xtinben yin Jehová kik'in rije' chupan ri q'ij ri': Kan xtinben richin xtibek'oje' ri nupixa' pa taq kánima. Y chuqa' xtinya' pa taq kinojibal.

¹⁷ Xtinkuy kimak y man xtoqaqa ta chik chinuk'u'x ri itzel taq kibanobal.

¹⁸ Y roma ri' kan niq'alajin chi toq nikuyutej ri mak rik'in ri banobel ri', man nik'atzin ta chik chi yesuj chikopi' chire ri Dios.

Kuqul qak'u'x qojjel-apo k'a rik'in ri Dios

¹⁹ Qach'alal, ri Jesús kan xken y xbiyin rukik'el qoma roj, y roma ri' toq kuqul qak'u'x yojjel-apo ri akuchi janila loq'olej rik'in ri Dios.

²⁰ Kan xujeq-wi k'a jun k'ak'a' bey chiqawech ri richin k'aslen, chirij apo ri tasbel rupan ri rachoch ri Dios, ri oj ruch'aron rik'in rija' ri ojer kan. Re' xuben rik'in ri ruch'akul ri xutej poqon chuwech ri cruz.

²¹ Ri Jesús kan jari' ri nimalej sacerdote ri k'o pa ruwi' ri rachoch ri Dios.

²² Roma ri' qojjel k'a apo rik'in ri Dios, rik'in ch'ajch'oj qánima y kan kuqul-qak'u'x. Ch'ajch'ojirisan ta ri qánima chire ri etzelal, y ri qak'aslen ch'ajon ta chik rik'in ch'ajch'ojilej ya'.

²³ Y roj ri qoyoben ri nimalej utzil ri xtuya' ri Dios pa qawi', kan kow k'a qojk'oje' y man kaka' ta qak'u'x chupan ri oyobenri'il ri' ri k'o qik'in, roma ja ri Dios ri xbin chi xtuya' ri nimalej utzil pa qawi', y rija' kan xtuben-wi.

²⁴ Y tiqakanoj k'a achike rubanik niqaben richin niqatola-qi' qonojel, richin niqetamaj yojajowan, y más ta niqarayij niqaben ri utzilej taq banobel.

²⁵ Roma ek'o ri man nikirayij ta chik ye'apon chupan ri molojri'il richin niqaya' ruq'ij ri Dios. Jak'a roj man tiqaben keri'. Xa kan nik'atzin chi niqamol-qi', richin niqakuqubala' qak'u'x chiqachibil-qi'. Y jari' ri más nik'atzin richin niqaben roma qetaman chi napon yan ri q'ij toq xtipe chik jun bey ri ajaw.

²⁶ Roma ri ketaman chik ri achike rubanik ri qitzij, y man rik'in ri' k'a nikiben chi yemakun stape' ketaman chi man utz ta, wi keri' kan man jun chik k'a xtiken richin yerukol-pe chupan ri kimak.

²⁷ Y xaxe chik k'a koyoben-apo ri nimalej q'atoj-tzij ri peteneq y chuqa' kan koyoben chik apo toq xke'apon chupan ri nimalej q'aq' ri akuchi xkebeqaqa-wi ri ye'etzelan richin ri Dios.

²⁸ Ri ojer kan, ri winaqi' ri kan man nikinimaj ta ri pixa' ri ya'on chire ri Moisés, y wi ek'o ka'i-oxi' ri xetz'eton y xebin chi xemakun, kan yeken-wi k'a ri', man nijoyowex ta kiwech.

²⁹ Y wi keri', ¿man nich'ob ta kami rix chi xa más ruk'ayewal niqaqa pa ruwi' ri wineq ri nuxolq'otij ri rubi' ri Ruk'ajol ri Dios, y nuben chi man jun rejqalen ri rukik'el ri xya'on rejqalen ri jikibel-tzij?, roma ja kik' ri' ri xch'ajch'ojirisan ri ruk'aslen. Chuqa' ri wineq ri nixolq'otin richin, kan nretzelaj chuqa' ri Loq'olej Espíritu ri niya'on utzil pa qawi'.

³⁰ Y roj qetaman k'a achike ri biyon chi pa ruq'a' rija' k'o-wi ri ruk'ayewal, y nuya' rutojbalil chike ri yemakun. Chuqa' chupan ri ruch'abel ri Dios nubij: Ri ajaw xtuq'et-tzij pa ruwi' ri rutinamit, nicha'.

³¹ ¡Kan nimalej ruk'ayewal chire ri wineq wi niqaqa pa ruq'a' ri k'aslik Dios!

³² Toqaqa k'a chi'ik'u'x toq xitej janila poqon, toq k'a juba' tisaqirisex ri ik'aslen. Jak'a rix kan xikoch' ri ruk'ayewal ri'.

³³ Jujun chiwe rix kan k'o chi xikoch' ronojel ri itzel ri xban y ri xbix chiwe, chikiwech ri winaqi'. Chuqa' xitej-poqon roma xijoyowaj kiwech ri ch'aqa' chik iwachibil ri yek'owisan tijoj-poqonal.

³⁴ Xijoyowala' kiwech ri ek'o pa cárcel. Y toq xelesex kan ronojel ri ek'o iwik'in man xipoqonaj ta xiya-el. Xa kan rik'in kikoten xiya-el roma iwetaman chi chila' chikaj k'o ri kan iwichin rix, y ri' más utz chuwech ri beyomel richin re ruwach'ulew, roma re' kan richin jantape'.

³⁵ Roma ri' kan utz chi ikuquban ik'u'x rik'in ri Dios. Man k'a tiya' kan. Roma kan nuk'en-wi-pe jun nimalej rajel-ruk'exel chiwe.

³⁶ Kan nik'atzin k'a chi yixkoch'on, y rik'in ri', rix niben ri rurayibel ri Dios, y nik'ul ri utzil ri rusujun chiwe.

³⁷ Roma chupan ri ruch'abel ri Dios nubij:*f25* Ri jun ri xtipe, chi'anin xtoqaqa. Naqaj chik ri rupetebal.

³⁸ Ri winaqi' ri choj kik'aslen kan xkek'ase' rik'in ri kikuqubabel-k'u'x. Jak'a wi xkinkimalij kan, man xtikikot ta ri wánima kik'in.

³⁹ Jak'a roj man niqaben ta achi'el ri winaqi' ri kiya'on kan ri Dios y xa k'a pa tojbel-mak xkebeqaqa-wi. Roj kan oj junan kik'in ri kikuquban kik'u'x rik'in ri Dios richin yekolotej.