Wuj Richin ri Rutikeribel 49 - Kaqchiquel Bible

Ri ruk'isibel taq ruch'abel ri Jacob chike ri ruk'ajol

¹ Ri Jacob xeroyoj k'a apo rik'in, konojel ri ruk'ajol y k'ari' xubij chike: Kixjel-pe wik'in richin xtinbij kan chiwe ri achike xtik'uluwachila' ri chiwech-apo.

² Kixjel-pe y tiwak'axaj rix ruk'ajol ri Jacob, tiwak'axaj rix ruk'ajol ri Israel.

³ Rat Rubén, ri nabey nuk'ajol, rat ri xaq'alajirisan ri wuchuq'a' y ri nabey walk'ual pa nuk'ajolil; rat kan k'o-wi aq'ij, rat kan k'o-wi awuchuq'a' chikiwech ri ch'aqa' chik nuk'ajol.

⁴ Jak'a roma xa at achi'el kape raqen-ya' ri nibusku'l, man ja ta chik rat ri xtik'oje' aq'ij; rat xa xaben chire ri ruch'at re atata' chi man jun rejqalen, rat xa xak'oje' rik'in ri Bilhá ri jun chik rixjayil re atata', xcha' chire ri Rubén.

⁵ Ri Simeón y ri Leví kan kach'alal-ki'; ri ki-espada xa chubanik ch'a'oj xkikusala-wi.

⁶ Man xtinya' ta wánima kik'in roma ri yekinojila', man xkinapon ta kik'in toq nikiben kimolojri'il, roma toq rije' k'o koyowal xekikamisaj winaqi', xekitzak'ila' ri paten-iboch' richin kaqen ri achija' taq wákix.

⁷ Kan tiqaqa-wi k'a itzel pa kiwi' roma ri koyowal, roma ri koyowal kan nik'uxun, ri etzelal ri k'o pa kánima, kan maneq juba' joyowanik chupan; roma ri' kan xkenwelesaj k'a el chikikojol ri walk'ual yin, Jacob, kan xkentaluj k'a el chikiwech ri walk'ual yin, Israel, xcha'.

⁸ Y rat Judá, chi achaq' chi animal xtikiya' aq'ij; xke'achop k'a chikiqul ri ye'etzelan awichin; kan xtikixuk xtikimej-ki' ri awach'alal chawech.

⁹ Rat Judá, at achi'el kape jun alaj koj, nuk'ajol yin, at achi'el jun alaj koj ri peteneq pa kanonik, niwune' y nikotz'e-qa pan ulew achi'el jun nimalej achij koj, achi'el chuqa' jun nimalej ixoq koj, ri man jun nitikir nijel-apo rik'in richin nuk'asoj.

¹⁰ Ri q'atbel-tzij*f32* kan man jun k'a xtitikir xtelesan pa ruq'a' ri Judá, ri cetro richin ri q'atbel-tzij kan man jun xtelesan chire, k'a ja toq xtoqaqa na ri rajaw, k'ari' xtujech chire, y konojel ri winaqi' chuwech ri ruwach'ulew xtikinimaj rutzij.

¹¹ Ri rubur xtuyuquba' chuwech ruche'el ri uva, kan chuwech k'a ri ruche'el ri jebelej uva xtuyuquba-wi, rija' kan pa vino chik xtuch'ej-wi ri rutziaq, ri ko'ol raqen rutziaq chupan ri kik'-kik' ruya'al uva xtuch'ej-wi.

¹² Ri runaq' taq ruwech kan e kaqarineq k'a roma ri vino; y e saqirineq ronojel ruwech ri rey roma ri leche, xcha'.

¹³ Ri Zabulón xtik'ase' k'a pa taq ulew ri chuchi' ri palou, xtok k'a k'ojelibel ri akuchi ye'el-ye'ok-wi ri barco; y ri ruk'ulba't xtapon k'a chuxikin ri ruwach'ulew Sidón, xcha'.

¹⁴ Ri Isacar achi'el tipe jun kowilej-kiej, ri man nibusbu' ta ri rubaqil, ri stape' chuxe' ri rejqa'n k'o-wi, kan man nuna' ta.

¹⁵ Y toq xutz'et chi kan utz ri ruwach'ulew ri richin uxlanen, y toq xutz'et chi ri ulew ri' kan janila jebel, xa ruyon xluke-qa richin nuk'uaj ri ejqa'n, kan ruyon xuya-apo-ri' richin chi nisamej-nipatanin, xcha'.

¹⁶ Ri Dan kan xtiq'aton k'a tzij pa kiwi' ri ruwinaq, kan xtiq'alajin chi jun nimalej tzobaj winaqi', achi'el ri ch'aqa' tzobaj richin ri Israel.

¹⁷ Rija' kan achi'el k'a jun kumetz ri xtik'oje' chuchi' ri bey, jun itzel kumetz ri xtik'oje' chuchi' ri ramon-bey, ri nupurij chi kaqen ri kiej, richin nuben chi yejaq'ajo' kan ri e ch'okolibeyon.

¹⁸ Yin kan ninwoyobej k'a ri akolotajik rat Jehová, xcha'.

¹⁹ Ri Gad xkeqaqa k'a eleq'oma' pa ruwi', jak'a rija' chi'anin xtupiskolij-ri' y ja chik rija' xke'oqotan-el, xcha'.

²⁰ Ri Aser, kan janila k'a jebel ronojel ri nutik y nuk'ol, ri kan ruk'amon chi yetzuq rey rik'in, xcha'.

²¹ Ri Neftalí achi'el tipe jun masat ri man tz'apel ta, ri e ruk'uan jebejoj ok taq masati', xcha'.

²² Ri José achi'el tipe jun tikilik che', rija' tikil chuchi' jun ralaxbel-ya' y jebel niwachin, ri ruq'a' kan yejote' k'a chuwech ri tz'aq.

²³ Ri ch'abnela' ri e etzelanel richin, kan xkiya' pa q'axo'n, kan man nikiya' ta kan ruk'aqik ch'ab chirij.

²⁴ Jak'a rija' kan kow xk'oje' y kan k'o ri ruk'aqbal-ch'ab pa ruq'a', kan xketamaj-wi xkikusaj jebel ri kiq'a', roma ri nu-Dios yin Jacob, ri k'o ronojel uchuq'a' pa ruq'a'; roma ja ri wajyuq' y ri nuto'onel yin Israel, ri k'o rik'in.

²⁵ Jak'a ri nu-Dios yin ri in atata' ri xtito'on awichin; ja ri Dios ri k'o ronojel uchuq'a' pa ruq'a' ri xturtisan awichin, kan xkarurtisaj-pe rik'in ri job ri niqaqa-pe chila' chikaj, kan xkarurtisaj k'a rik'in ri ya' ri k'o pa ruk'u'x re ruwach'ulew. Ri ak'uala' kan k'o k'a ri xtikitz'umaj y kan k'o chuqa' ak'uala' xke'alex.

²⁶ Re urtisanik re ninya' chawe yin ri in atata', kan más k'a nim, chuwech ri urtisanik ri xink'ul kan yin chuwi-ruq'a' ri nata'. re urtisanik re' xtapon k'a más k'a kela' ke chikiwech ri q'asen taq juyu'. Kan ja rat ri xacha'ox chikikojol ri awach'alal, richin chi nak'ul kan re urtisanik re', xcha'.

²⁷ Ri Benjamín achi'el tipe jun nimalej utiw ri ronojel nuk'uaj-el, nimaq'a' nutej ri ruk'uan-el, tiqaq'ij nutaluj-el ri man nutej ta chik, xcha' ri Jacob.

²⁸ Jak'a kablajuj tzobaj winaqi' re' richin ri Israel. Y ja ch'abel re' ri xubij kan ri Jacob, ri kitata', pa kiwi' konojel, toq xuya' kan ri urtisanik pa kiwi', kan achi'el ri urtisanik ri ruk'amon niqaqa pa kiwi' chikijujunal ri ruk'ajol.

Ri rukamibal ri Jacob

²⁹ Y jun q'ij ri Jacob xubij k'a chike ri ruk'ajol: Yin xa juba' chik ok ri in k'es. Toq xkiken kinibemuqu' k'a ri akuchi e muqun-wi ri nuwinaq, kik'in ri nte-nata', chiri' pa ruwach'ulew richin ri Efrón hitita,

³⁰ ri k'o chiri' pa ruwach'ulew Canaán, ri jul ri k'o pa Macpelá, ri k'o chuwech ri Mamré, ri xuloq' kan ri numama' Abraham, junan rik'in ri ulew ri' y re' qichin qonojel ri qach'alal-qi', richin yojmuq.

³¹ Chiri' xemuq-wi ri Abraham y ri Sara, ri Isaac y ri Rebeca y chiri' chuqa' numuqun-wi kan ri Lea.

³² Ri ulew y ri jul ri' xloq' k'a kan chuwi-kiq'a' ri winaqi' hitita.

³³ Toq ri Jacob xtane-qa chire ri rupixabanik chike ri ruk'ajol, jari' toq xuya-q'anej ri ka'i' raqen pa ch'at, xkotz'e-qa y xken.