Wuj Richin ri Rutikeribel 46 - Kaqchiquel Bible

Toq ri Jacob y konojel ri aj pa rachoch xebe pan Egipto

¹ Y ri Israel, ri rubini'an chuqa' Jacob, xuchop k'a el bey y xuk'uaj-el ronojel ri k'o rik'in. Y toq xapon k'a pa Beerseba, chiri' toq rija' xusuj jun kamelabel chuwech ri Dios ri ru-Dios chuqa' ri Isaac, ri rutata'.

² Y ri Dios xuq'alajirisaj-ri' chuwech chupan ri aq'a' ri' y xubij chire: Jacob, Jacob, xcha'. Y ri Jacob xubij chire: Jare' ink'o wawe', xcha'.

³ Y ri Dios xubij chire: Ja yin ri in Dios, ri ru-Dios chuqa' ri atata' Isaac. Man taxibij-awi' richin yabe pan Egipto, roma ri chiri', yin kan xtinben k'a chike ri awijatzul chi xke'ok jun nimalej tzobaj winaqi'.

⁴ Y xkibe k'a awik'in pan Egipto y toq xkaken, ja ri José xtik'oje' chi'anaqaj, y chirij re' xtinben chike ri e awijatzul chi xketzolin chik pe pa Canaán, xcha' ri Dios chire.

⁵ Y ri Jacob xuya' k'a kan ri ruwach'ulew Beerseba. Ri ralk'ual xkiya' k'a el ri kitata' pa carruaje ri ya'on-pe chike roma ri rey, y xekiya' k'a el chuqa' ri kixjayilal y ri kalk'ual.

⁶ Xekik'uaj k'a el ronojel ri kawej y ronojel ri kibeyomel ri kibanon chik ri chiri' pa ruwach'ulew Canaán, richin chi xebe k'a pa ruwach'ulew Egipto, y keri' ri Jacob y konojel ri e rijatzul xebe pan Egipto.

⁷ Konojel k'a xebe, ri ruk'ajol, ri rumi'al, y konojel rumam chi xten chi ala'.

⁸ Y ri kibi' ri e rijatzul ri Jacob ri xebe-qa pan Egipto, ja re': Ri Rubén ri nabey ruk'ajol;

⁹ Ri e ralk'ual k'a ri Rubén, je ri Janóc, ri Falú, ri Hezrón y ri Carmí.

¹⁰ Ri e ralk'ual k'a ri Simeón, je ri Jemuel, ri Jamín, ri Ohad, ri Jaquín, ri Shoar y ri Saúl, ri ral ri jun ixoq aj-Canaán.

¹¹ Ri e ralk'ual ri Leví, je ri Guersón, ri Quehat y ri Merarí.

¹² Y ri e ralk'ual ri Judá, je ri Er, ri Onán, ri Selá, ri Fares y ri Zérah; ri Er y ri Onán xeken k'a kan chupan ri ruwach'ulew Canaán. Y ri ralk'ual ri Fares ja ri Jezrón y Jamul.

¹³ Ri e ralk'ual ri Isacar, je ri Tolá, ri Puvá, ri Job y ri Simrón.

¹⁴ Ri e ralk'ual ri Zabulón, je ri Sered, ri Elón y ri Jajleel.

¹⁵ E waqxaqi' ruk'ajol ri Jacob ri xek'oje' rik'in ri Lea pa Padán-aram y ri ch'aqa' chik ri e riy y ri e ruxikin riy ri Lea e juwineq oxlajuj konojel. Y ri Dina ral chuqa' ri Lea.

¹⁶ Ri e ralk'ual ri Gad, je ri Sefón, ri Jaguí, ri Suní, ri Ezbón, ri Erí, ri Arodí y ri Arelí.

¹⁷ Ri e ralk'ual ri Aser, je ri Imná, ri Isuá, ri Isuí, ri Beriá y ri jun kana' rubini'an Sérah. Y ri e ralk'ual ri Beriá ja ri Jeber y ri Malquiel.

¹⁸ Ri e ral-riy ri Zilpá, ri rusamajel ri Labán ri xusipaj-pe chire ri Lea, e waqlajuj k'a konojel.

¹⁹ Ri e ral ri Raquel ri rixjayil ri Jacob, je ri José y ri Benjamín.

²⁰ Y ri e ralk'ual ri José ri xe'alex rik'in ri Asenat ri rumi'al ri Potifera, ja ri Manasés y ri Efraín. Rije' xe'alex pa ruwach'ulew Egipto.

²¹ Y ri e ralk'ual ri Benjamín, je ri Bela, ri Béquer, ri Asbel, ri Guerá, ri Naamán, ri Ehi, ri Ros, ri Mupim, ri Hupim y ri Ard.

²² Ri e kalk'ual ri Jacob y ri Raquel e kajlajuj konojel.

²³ Ri Dan xaxe jun ralk'ual xk'oje' y xubini'aj Jusim.

²⁴ Ri e ralk'ual ri Neftalí, je ri Jazeel, ri Guní, ri Jezer y ri Silém.

²⁵ Ri e ralk'ual ri Jacob, ri xek'oje' rik'in ri Bilhá, ri rusamajel ri Raquel e wuqu' konojel.

²⁶ Konojel k'a ri' ri e ruk'uan-el ri Jacob toq xbe pan Egipto, ri kan e rijatzul rija' e oxk'al waqi' konojel. Y man xe'ajlex ta ri e kixjayilal ri e ruk'ajol.

²⁷ Y ri e ralk'ual ri José ri xe'alex pan Egipto e ka'i'. Ri Jacob y konojel k'a ri aj pa rachoch ri xe'apon-qa chiri' e oxk'al lajuj konojel.

Toq ri Jacob y konojel ri aj pa rachoch xe'apon pan Egipto

²⁸ Toq xe'apon yan, xuteq-el ri ruk'ajol Judá richin xberubij chire ri José, richin keberuk'ulu' chupan ri ruwach'ulew Gosen.

²⁹ Y ri José kan xuben-wi ruchojmil ri carruaje richin chi niberuk'ulu' ri rutata' ri chiri' pa Gosen. Y toq xkik'ul-ki' rik'in, xuq'etej y janila xoq' chuwa-ruk'u'x.

³⁰ K'ari' ri Jacob xubij k'a chire ri José: Stape' xkiken k'a, wakami xatintz'et yan kan y xinwetamaj chi k'a at k'es na, xcha'.

³¹ Y ri José xubij chike konojel ri rach'alal y chike ri aj pa rachoch ri rutata': Wakami kibe na richin ninbenya' rutzijol chire ri rey y xtinbij chire: Ri wach'alal y konojel ri aj pa rachoch ri nata' ri xek'oje' chupan ri ruwach'ulew Canaán, wakami xe'oqaqa wik'in re wawe';

³² xekik'en-pe ri kawej y ronojel ri k'o kik'in, roma ri kisamaj rije' ja ri yeyuq'un y yekik'iytisaj ri kawej, keri' xtinbij chire ri rey.

³³ Y toq xkixroyoj-pe ri rey y xtuk'utuj chiwe achike ri isamaj, rix xtibij k'a:

³⁴ Roj ri asamajela' kan oj yuq'unela' kichin karne'l pa qach'utinal-pe, achi'el ri samaj ri xkiben ri qati't-qamama', keri' xtibij chire, richin keri' xtuya' q'ij chiwe chi yixk'oje' kan wawe' pa Gosen, roma ri winaqi' aj-Egipto kan nimulun-kik'u'x yek'ase' kik'in yuq'unela' kichin karne'l, xcha' ri José.