Wuj Richin ri Rutikeribel 4 - Kaqchiquel Bible

Ri Caín y ri Abel

¹ Ri Adán xk'oje' k'a rik'in ri Eva ri rixjayil, y ri Eva xk'oje' k'a jun ti ral ri xubini'aj Caín,*f5* kere' ri bi'aj xuya' chire ri ak'ual roma xubij k'a: Rik'in ri ruto'onik ri Jehová xink'ul jun ti wal ala', xcha'.

² Chirij re ak'ual re' xk'oje' chik jun ti ral y xubini'aj Abel y ri rusamaj ri xuben ja ri xerutik karne'l, y ri rusamaj ri Caín ja ri xusamajij ri ulew y xok jun tikonel.

³ Y q'axineq chik k'a k'iy juna', ri Caín xuk'en-pe juba' chire ri ruwech ri rutiko'n richin jun sipanik chire ri Jehová.

⁴ Y keri' chuqa' xuben ri Abel, xuk'en-pe jun sipanik: Xuk'en-pe kiq'anal jujun chike ri awej ri e rutikon, ri e nabey taq al. Y ri Jehová xqa' chuwech ri Abel y kan janila xuk'awomaj ri rusipanik.

⁵ Jak'a ri Jehová man xqa' ta chuwech ri Caín y man xuk'awomaj ta ri rusipanik. Y ri Caín kan janila k'a xpe royowal y kan xjalatej-qa ri ruwech.

⁶ K'ari' ri Jehová xubij chire ri Caín: ¿Achike roma janila xpe awoyowal y kan xjalatej la awech?

⁷ Roma toq ja ri utz ri naben, nak'ul ri aq'ij; ja wi xa ja ri itzel ri naben, ri mak kan at ruq'eleben k'a y nrajo' yaruchop. Jak'a rat k'o chi yach'akon chirij, xcha'.

Ri rukamik ri Abel

⁸ Y xapon k'a jun q'ij ri Caín xubij chire ri Abel ri ruchaq': Jo' pa juyu', xcha' chire. Y toq ek'o chik chiri' pa juyu', ri Caín xyakatej chirij ri rach'alal y xukamisaj.

⁹ Y ri Jehová xubij chire ri Caín: ¿Akuchi k'o-wi ri achaq' Abel?, xcha'. Y rija' xubij: Man wetaman ta. ¿Yin kami in chajiy richin ri nuchaq'?, xcha'.

¹⁰ Y ri Jehová xubij chire: ¿Achike xaben? Roma ri rukik'el ri achaq' ri xbiyin chuwech re ruwach'ulew, achi'el xa ta nich'on-pe wik'in richin nuk'utuj rutojbalil pan awi'.

¹¹ Wakami k'a xtinben chawe chi kan xtiqaqa ri itzel pan awi', roma xaben chire ri ruwach'ulew chi xuk'ul ri rukik'el ri achaq' ri xakamisaj. Y man jun bey chik xtasamajij ri ulew.

¹² Roma wi xtasamajij chik ri ulew, xa kan man xtik'ase' ta chik ri atiko'n y kan xaxe k'a xkabe-kela' xkabe-kela' xtaben pa ruwi' re ruwach'ulew y kan man jun k'a akuchi xkak'oje-wi-qa, xcha'.

¹³ K'ari' ri Caín xubij chire ri Jehová: Kan janila nim ri rutojbalil-mak ri naya' pa nuwi' richin chi yitikir ta ninkoch'.

¹⁴ Wakami xa nawelesaj ri uchuq'a' pa nuq'a' pa ruwi' ri ulew y yin k'o chi ninwewaj-el-wi' chawech y akuchi na xkibe-wi pa ruwi' ri ruwach'ulew, y xabachike k'a xkik'ulun xkirukamisaj kan, xcha'.

¹⁵ Y ri Jehová xubij chire: Kan qitzij ninbij chawe: Wi k'o ta jun ri achike xkakamisan kan, kan wuqu' k'a mul xtinya' rutojbalil pa ruwi', xcha'. K'ari' ri Jehová xuya' jun retal ri Caín richin chi achike xtik'ulun man nukamisaj ta kan.

¹⁶ Xel k'a el ri Caín rachibilan ri rixjayil chiri' chuwech ri Jehová y ja ri pa taq ruwach'ulew rubini'an Nod*f6* xebek'oje-wi, y ri ruwach'ulew ri' k'o pa relebel-q'ij chire ri qejoj ri kan nik'ases.

Ri e rijatzul kan ri Caín

¹⁷ Y ri Caín xk'oje' rik'in ri rixjayil, y re ixoq re' xyawej kan y xk'oje' jun ti ral y re ak'ual re' xubini'aj Henoc. Y ri Caín xuyek-q'anej jun tinamit ri xubini'aj chuqa' Henoc, achi'el rubi' ri ruk'ajol.

¹⁸ Y ri Henoc xralk'ualaj ri Irad y ri Irad xralk'ualaj ri Mehujael, ri Mehujael xralk'ualaj ri Metusael, ri Metusael xralk'ualaj ri Lámec.

¹⁹ Y ri Lámec xerukanoj e ka'i' rixjayil, ri jun rubini'an Adá, y ri jun chik rubini'an Silá.

²⁰ Ri Adá xalex jun ti ral ri xubini'aj Jabal, y rija' jari' ri kitata' ri ojer taq winaqi' ri xek'oje' pa taq jay banon rik'in tzieq roma nikikanoj q'os richin ri kawej.

²¹ Y ri Jabal xk'oje' chik k'a jun ruchaq' ri xubini'aj Jubal. Y rija' jari' ri kitata' ri ojer taq winaqi' ri yeq'ojoman ri arpa y ri xul.

²² Y ri Silá xek'oje' chuqa' e ka'i' ral, jun xten y jun ala' y ri xten xubini'aj Naamá y ri ruxibal xubini'aj Tubal-Caín y ri rusamaj ja ri banoy samajibel rik'in ri ch'ich' y ri q'enq'oj-pueq.

²³ Y ri Lámec xch'on k'a kik'in ri rixjayil y xubij chike: Adá y Silá, tiwak'axaj k'a re xtinbenbij chiwe: Yin xinchoy jun wineq roma xirusok, kan xinkamisaj k'a kan re ala' re' roma xiruch'ey.

²⁴ Wi wuqu' mul xtiya'ox rutojbalil roma ri Caín, Yin ninbij chi oxk'al wuqlajuj mul xtiya'ox rutojbalil woma yin, xcha'.

Ri ralaxik ri Set

²⁵ Y ri Adán xk'oje' k'a rik'in ri Eva. Keri' ri Eva xyawej chik chirij jun ak'ual. Y xk'oje' chik k'a jun ti ral ti ala' y re' xubini'aj Set. Y xubij: Kere' xtubini'aj roma ri Dios xuya' chik pe jun wal pa ruk'exel ri Abel ri xkamisex roma ri Caín.

²⁶ Y ri Set chuqa' xek'oje' ralk'ual, y jun chike rije' xubini'aj Enós. Y jari' toq rije' xkichop nikiya' ruq'ij ri Jehová.