Wuj Richin ri Rutikeribel 37 - Kaqchiquel Bible

Ri rachik' ri José

¹ Jak'a ri Jacob chupan ri ruwach'ulew Canaán xk'oje-wi kan, akuchi xk'oje-wi ri rutata'.

² Ja tzijonik re' chirij ri kik'aslen ri Jacob y ri ralk'ual. Jun k'a chike ri ruk'ajol ri Jacob rubini'an José, toq rija' k'o k'a wuqlajuj rujuna', jari' toq niyuq'un kik'in ri runimal e ral ri Bilhá y ri e ral ri Zilpá, re ixoqi' re' chuqa' e rixjayil ri rutata', y ri José yerusujuj chire ri rutata' ronojel ri itzel ri yekiben ri rach'alal.

³ Y ri Jacob más nrajo' ri José chikiwech konojel ruk'ajol, roma rija' xalex toq ri Jacob ri'j chik. Xuben k'a jun rutziaq nim raqen ri xilon rupan ri kan janila jebejoj ok.

⁴ Toq xkitz'et ri rach'alal chi ja rija' ri janila najowex roma ri kitata', kan janila k'a xketzelaj, kan man yech'on ta chik chire rik'in ajowabel.

⁵ Ri José xuben k'a jun achik', y toq xutzijoj chike ri rach'alal, rije' kan más k'a xketzelaj,

⁶ roma xubij chike: Tiwak'axaj re achik' re xinben.

⁷ K'o jun q'ij yojq'aton trigo pa juyu', y ri boraj wichin yin xpa'e-el, y ri boraj iwichin rix ri ek'o chuchi' ri wichin yin, nikiqasaj-ki' chuwech ri wichin yin, xcha'.

⁸ Jak'a ri rach'alal xkibij chire: ¿Xtaq'et ta k'a tzij rat pa qawi' roj? ¿Kan xkatok ta k'a aj-raqen chiqakojol?, xecha'. Xketzelaj k'a más roma ri rachik' roma kan xutzijoj chike.

⁹ Y xuben chik k'a jun achik', y kan xutzijoj chuqa' chike ri rach'alal, y xubij: Yin kan xinben chik k'a jun achik', kan xinwachik'aj chi ri q'ij, ri ik', y julajuj ch'umila' nikiqasaj-ki' chinuwech, xcha'.

¹⁰ Y chuqa' xutzijoj k'a chire ri rutata' stape' xutzijoj yan chike ri rach'alal, jak'a ri rutata' xuch'olij y xubij chire: ¿Achike k'a chi achik' ri xawachik'aj rat? ¿Chij ri ate' y yin y konojel ri awach'alal xtiqaqasaj ta k'a qi' k'a pan ulew chawech rat?, xcha' chire.

¹¹ Ri rach'alal nich'upun kik'u'x chirij, jak'a ri rutata' janila nuch'ob rij re achik' re'.

Toq ri José xk'ayix-el koma ri rach'alal.

¹² Chirij re', ri rach'alal xebe richin xebekiyuq'uj ri rawej ri kitata' k'a pa Siquem.

¹³ Xeri' ri Israel xubij chire ri José, ri ruk'ajol: Ri awach'alal yeyuq'un k'a pa Siquem. Ninwajo' chi ye'abetz'eta' kan, xcha'. Y rija' xubij: Utz, k'ari' táta yibe, xcha'.

¹⁴ Y rija' xubij chire: Kabiyin wakami, ja ke'abetz'eta' kan achike kibanon ri animal, y achike kibanon ri karne'l. Nak'en-pe ri rutzijol chuwe, xcha'. Xel k'a el ri José pa ruwa-taq'aj richin Hebrón, y xapon k'a pa Siquem,

¹⁵ y rija' nixule-nijote' chikikanoxik ri rach'alal, y jari' toq xuk'ul jun achin, y re achin re' xuk'utuj chire: ¿Achike nakanoj?, xcha' chire.

¹⁶ Y ri José xubij: Yenkanoj ri wach'alal. Takuyu' juba', ¿man awetaman ta kami akuchi yeyuq'un-wi?, xcha'.

¹⁷ Ri achin ri' xubij chire: Xe'el yan el wawe'. Yin xinwak'axaj chi nikibij: Jo' pa Dotán, yecha', xcha' ri achin. K'ari' rija' xeberukanoj y chiri' xeril-wi.

¹⁸ Toq ri rach'alal xkitz'et-pe nej, rije' xkinojij richin nikikamisaj.

¹⁹ Y rije' xkibila-qa chikiwech: Jare' peteneq ri achik'anel.

²⁰ Wakami k'a tiqakamisaj, y niqaya' chupan la jul la', y xtiqabebij chi jun itzel chikop xukamisaj y xutej, y xtiqatz'et achike xtibanatej rik'in ri rachik', xecha'.

²¹ Toq ri Rubén xrak'axaj re', xrajo' xukol kan pa kiq'a', y xubij: Man tiqakamisaj.

²² Man tiqakamisaj roj. Tiqaya' kan chupan re jul re k'o wawe' chupan re tz'iran ruwach'ulew. Man tiqajeluj ri qaq'a' chirij, xcha' ri Rubén. Keri' xubij richin nukol-el pa kiq'a' ri rach'alal richin nutzolij-el rik'in ri rutata'.

²³ Y toq xapon kik'in ri rach'alal, xkelesaj-el ri rutziaq ri nim raqen y xilon rupan.

²⁴ K'ari' xkichop ri José y xkik'eq-qa chupan ri jul, jak'a ri jul ri' xa maneq ya' chupan.

²⁵ K'ari' xebetz'uye' richin xkitej kiway. Y jari' toq xekitz'et jun tzobaj winaqi' ri e rijatzul kan ri Ismael ri e peteneq, ri yepe k'a kela' pa ruwach'ulew Galaad, y kik'amon-pe jubulej taq aq'om, bálsamo, y mirra chikij ri ki-camello y kik'uan-el richin chi nikik'uaj k'a kela' pa ruwach'ulew Egipto.

²⁶ Y jari' toq ri Judá xubij chike ri rach'alal: ¿Achike nuk'en-pe chiqe richin niqakamisaj ri qachaq' y niqewaj ri rubanik ri rukamik?

²⁷ ¿Achike roma man niqak'ayij-el ri qachaq' José chike la achi'a' la e rijatzul kan ri Ismael?, richin chi man niqajeluj ta ri qaq'a' chirij, roma rija' kan qach'alal-wi, y junan qakik'el rik'in, xcha' ri Judá. Y konojel utz xkak'axaj ri xubij.

²⁸ Y toq yeq'ax yan el ri chiri' ri k'ayinela', ri e rijatzul kan ri Ismael, ri aj kela' pa Madián, jari' toq ri rach'alal ri José xbekelesaj-pe ri pa jul, y xkik'uaj-q'anej richin nikik'ayij-el chike ri winaqi' ri'. Keri' toq xkik'ayij-el ri José, chi juwineq raqen saqipueq, y xuk'uex el k'a pan Egipto.

²⁹ Y ri Rubén toq xtzolin-pe akuchi beneq-wi y xbe akuchi k'o-wi ri jul, xutz'et chi xa maneq chik ri José chiri', xpe bis rik'in y roma ri' xuretz ri rutziaq chirij.

³⁰ K'ari' xbe kik'in ri rach'alal y xubij chike: Ri ala' maneq chik chupan ri jul. ¿Wakami achike ninben yin?, xcha'.

³¹ K'ari' rije' xkikamisaj jun ti alaj tzuntzun y xbekik'ama-pe ri nim raqen rutziaq ri José y xkiju' chupan ri rukik'el ri ti chikop ri'.

³² Y xeri' xkik'uaj ri rutziaq chire ri kitata' y xkibij chire: Re tzieq re' xqil pa juyu'; tatz'eta' na k'a wi jare' o man jare' ta ri tzieq aya'on chire ri ak'ajol, xecha'.

³³ Y rija' xretamaj k'a ruwech ri tzieq y xubij: Ja', jare' ri rutziaq ri nuk'ajol. Y xubij chuqa': Rik'in juba' jun itzel laj chikop xwech'on richin y xuk'ux, xcha' ri Jacob.

³⁴ K'ari' rija' xuretz ri rutziaq chirij, xukusaj ri tzieq ri richin bis y janila k'iy q'ij xubisoj ri rukamik ri ruk'ajol.

³⁵ Konojel k'a ri ralk'ual, chi achi'a' chi ixoqi' ye'apon k'a rik'in richin chi nikikuquba' k'a ruk'u'x; jak'a rija' man nik'o ta ri rubis y nubij k'a: Kan qitzij ninbij chi k'a toq xkiken na xtinya' kan re bis re', xcha'. Y kan xroq'ej k'a ri José.

³⁶ Jak'a ri aj-Madián xbekik'ayij kan ri José pan Egipto, chire jun achin rubini'an Potifar, jun aj samaj richin ri rey y aj-raqen pa kiwi' ri chajinela'.