Wuj Richin ri Rutikeribel 3 - Kaqchiquel Bible

Toq ri Adán y ri Eva xemakun

¹ Y chikikojol k'a ri chikopi' ri e richin pa k'echelaj ri xeruben ri Dios, k'o k'a jun kumetz ri más nowineq y kan man jun chik k'a ri achi'el rija'. Y rija' xubij chire ri ixoq: ¿Kan qitzij chi ri Dios xubij chiwe chi man titej kiwech re che' re ek'o wawe' pa qejoj?, xcha'.

² Y ri ixoq xubij chire ri kumetz ri': Ri kiwech ronojel che' ri ek'o wawe' kan jachon-wi pa qaq'a' richin niqatej.

³ Jak'a re ruwech re jun che' re k'o pa runik'ajal re qejoj, xubij kan ri Dios chiqe chi man tiqatej, ni man tiqachop, roma wi xtiqatej kan xqojken k'a, xcha'.

⁴ K'ari' ri kumetz ri' xubij chire: Ni, man yixken ta.

⁵ Roma ri Dios retaman chi ri q'ij toq xtitej, kan xtijaqatej k'a ri runaq'-iwech y kan xtiwetamaj k'a ri utz y ri itzel y kan xkixok k'a achi'el ri Dios, xcha' ri kumetz.

⁶ Y ri ixoq xutz'et k'a chi ri ruwech ri che' ri' kan jebel-wi richin nitij y kan rayixel-wi y kan nuya-wi etamabel. Roma ri' xuk'en k'a ri ruwech ri che' ri' y xutej. Y xberuya' chuqa' chire ri rachijil.

⁷ K'ari' xjaqatej kiwech chi e ka'i' y xketamaj chi e ch'anel, k'ari' xkitz'is ruxaq ri wíkix richin xkikuch ri kik'ix.

⁸ Y chupan k'a ri tiqaq'ij ri' ri Dios nibiyajilan chupan ri qejoj. Y rije' xkak'axaj y junanin xebe chukojol ri che' ri ek'o chiri' y xbekewaj-ki' chuwech rija'.

⁹ Jak'a ri Dios xroyoj ri Adán y xubij chire: ¿Akuchi atk'o-wi?, xcha'.

¹⁰ Y rija' xubij: Xinwak'axaj chi atk'o wawe' pa qejoj, y xinxibij-wi' roma in ch'anel y roma ri' xinwewaj-wi', xcha'.

¹¹ Y ri Dios xubij chire: ¿Achike xbin chawe chi at ch'anel? ¡Xa xatej ruwech ri che' ri xinbij chawe chi man tatej!, xcha'.

¹² Y ri Adán xubij: Ri ixoq ri xaya' chuwe rat richin wachibil, xuya' chuwe ri ruwech ri che' y yin xintej, xcha'.

¹³ Jari' ri Dios xubij chire ri ixoq: ¿Achike roma xaben kere'?, xcha'. Y ri ixoq xubij: Ri kumetz xiruq'ol y roma ri' xintej ri ruwech ri che' ri', xcha'.

Ri rutojbalil ri mak

¹⁴ Y ri Dios xubij chire ri kumetz ri': Roma kere' xaben, rat y konojel ri awijatzul ri xke'alex, kan xtiqaqa k'a itzel pan iwi' y re' kan xaxe k'a rix chikikojol konojel ri chikopi'; chikikojol ri aj-chuwa-jay y ri ek'o pa k'echelaj. Xtiqirirej k'a iwi' pan ulew y xtibeq' k'a poqolaj chijun ik'aslen.

¹⁵ Xtinben chiwe chi ri ixoq y rat xtik'oje' k'ululanik chi'ikojol, y keri' kik'in ri awijatzul rat; y jun chike ri ral-riy rija' xtupach'ij ri ajolon rat, y rat xtajich'aj ri ruxtuxil rija', xcha'.

¹⁶ Y ri Dios xubij chire ri ixoq: Yin xtinben chawe chi kan janila k'a xkaq'axon toq awoyoben richin nibe'alex awal y kan rik'in k'a rukiy xkatalan. Y man rik'in ri', rat kan k'a xtarayij na ruwech ri awachijil y kan xkak'oje' k'a chuxe' ri rutzij rija', xcha'.

¹⁷ Y ri Dios xubij chuqa' chire ri Adán: Roma kan xanimaj rutzij ri awixjayil y xatej ruwech ri che' ri xinbij chawe chi man tatej; awoma k'a rat xtiqaqa k'a itzel pa ruwi' re ruwach'ulew richin jantape'; y rik'in janila ruk'ayewal xtasamajij ri ulew richin xkawa' chijun ri ak'aslen.

¹⁸ Y jalajoj k'a ruwech taq q'ayis ri k'o kik'ixal xkebek'oje' chupan ri atiko'n y kan xtabetija' chuqa' ichaj.

¹⁹ Xkatz'oqpin na k'a chubanik ri asamaj richin xtach'ek ri achike ri xtik'atzin chawe, k'a toq xkatok chik jun bey ulew ri achoq ik'in xatinben-wi; roma kan at ulew-wi, y kan keri' xkatok chik jun bey, xcha'.

²⁰ Y ri Adán, Eva*f3* k'a xubij chire ri rixjayil, roma ja rija' ri nabey te'ej ri xya'on k'aslen chiqe qonojel winaqi'.

²¹ Y ri Dios xuben nima'q raqen rutziaq ri achin y ri ixoq, xuben rik'in sale'y kichin chikopi' richin xerukuch.

²² Y ri Dios xubij: Wakami rije' kan achi'el chik roj, roma kan retaman chik ri utz y ri itzel. Wakami, tiqabana' k'a chi man tuchop ri ruwech ri che' ri niya'on k'aslen richin jantape', xcha'.

Ri Adán y ri Eva xe'elesex-pe chupan ri qejoj

²³ Roma ri' ri Dios xerelesaj k'a pe chiri' chupan ri qejoj, richin chi ri Adán tusamajij na ri ulew ri achoq ik'in chuqa' banon-wi rija'.

²⁴ Y toq xerelesaj-pe chupan ri qejoj ri', ri pa relebel-q'ij chire ri qejoj xeruya' querubín*f4* y jun espada rik'in q'aq' nisutin chuchi' ri qejoj, richin nuchajij ri bey, akuchi k'o-wi ri che' ri nuya' k'aslen.