Wuj Richin ri Rutikeribel 26 - Kaqchiquel Bible

Ri Isaac xbe k'a pa ruwach'ulew rubini'an Guerar

¹ Y chupan k'a ri ruwach'ulew ri' xpe k'a jun nimalej wayjal, achi'el ri nabey wayjal ri xq'ax toq k'a k'es na ri Abraham. Roma ri' ri Isaac xbe pa tinamit Guerar akuchi k'o-wi jun rey rubini'an Abimélec ri k'o pa kiwi' ri aj-Filistea.

² Xuk'ut k'a ri' ri Jehová chuwech ri Isaac y xubij chire: Man kabe pan Egipto. Kak'oje' kan chupan ri ruwach'ulew ri akuchi xtinbij-wi chawe yin.

³ Rokik ri' kak'oje' na juba' chupan re ruwach'ulew re'. Yin kan xkik'oje' awik'in y xtinya' urtisanik pan awi', roma chawe rat y chike ri awijatzul xtinya-wi kan re ruwach'ulew re', richin keri' xtinben achi'el toq xinya' nutzij chire ri atata' toq k'a k'es na.

⁴ Y yin xtinben chi xtik'iyer ri awijatzul achi'el ruk'iyal ri ch'umila' ri ek'o chikaj, y chike k'a ri awijatzul xtinya-wi kan ronojel re ruwach'ulew re'. Chuqa' konojel ri tzobaj winaqi' richin ri ruwach'ulew xtinbenya' urtisanik pa kiwi' koma ri awijatzul rat.

⁵ Roma ri Abraham xuben ri xinbij chire: Xunimaj nutzij, xutaqej ri jalajoj ruwech pixa', ronojel re' pa ruchojmilal xuben, xcha' ri Dios chire ri Isaac.

⁶ Ri Isaac xk'oje' k'a qa chiri' pa tinamit Guerar,

⁷ y ri achi'a' ri ek'o chiri' xkik'utuj chire: ¿Achike la peteneq awik'in?, xecha'. Rija' xubij: La' wana', xcha'. Roma rija' xuxibij-ri' richin xubij chi rixjayil, roma rik'in juba' ri achi'a' ri ek'o chiri' nikikamisaj rija', roma ri Rebeca kan jebejoj ok.

⁸ Toq rije' k'o yan juba' q'ij ek'o chiri', ri Isaac nuq'etela' ri rixjayil. Jak'a ri rey Abimélec e rutzuliben-pe chupan jun ventana.

⁹ K'ari' ri Abimélec xuteq royoxik ri Isaac y xubij chire: Ri Rebeca xa awixjayil ajk'a, ¿achike k'a roma xabij chi awana'?, xcha'. Y ri Isaac xubij: Keri' xinbij roma rik'in juba' yikamisex roma rija', xcha'.

¹⁰ Y ri Abimélec xubij chire: ¿Achike roma kere' xaben chiqe? Rik'in juba' k'o ta jun chike ri achi'a' richin re tinamit re' xwer ta rik'in ri awixjayil y awoma ta rat xojqaqa ta pa mak, xcha'.

¹¹ K'ari' ri Abimélec xuteq rubixik chike konojel ri ek'o chupan ri tinamit ri' y xubij chike: Wi k'o jun ri xtijelun ruq'a' chirij re achin re' o chirij ri rixjayil xtikamisex, xcha'.

¹² Y ri Isaac xuben-qa rutiko'n chupan ri ruwach'ulew ri' y ri rutiko'n chupan ri juna' ri' xuben chi ri jun ruwech xuya' wok'al ruwech, roma ri Jehová xuya' urtisanik pa ruwi'.

¹³ Rija' xbeyomer-q'anej y janila xk'iyer ri rubeyomel y kan janila xk'oje' ruq'ij.

¹⁴ Xek'oje' k'a k'iy tzobaj kokoj y nima'q taq rawej y xk'oje' chuqa' k'iy rutiko'n. Roma ri' ri aj-Filistea xch'upun-kik'u'x chirij.

¹⁵ Y roma ri koyowal xkimuq chi ulew ronojel ri pozo ri e k'oton kan koma ri rusamajela' ri Abraham.

¹⁶ Xubij k'a ri Abimélec chire ri Isaac: Tach'ara-el-awi' qik'in roj, roma rat janila xabeyomer-q'anej chiqawech roj.

¹⁷ Xel k'a el ri Isaac chiri', xbek'oje' k'a chuwa-taq'aj richin Guerar.

¹⁸ Xeruk'ot chik jun bey ri pozo ri e rubanon kan ri rutata' ri xemuq koma ri aj-Filistea chirij ri rukamik ri Abraham, y ri kibi' ri pozo ri ruya'on kan ri rutata' kan keri' chuqa' xuya' rija'.

¹⁹ K'o jun q'ij ri samajela' ri e ximil pa samaj xkik'ot-qa jun pozo pa taq'aj y xkil jun tz'ukubel-ya'.

²⁰ Ri yuq'unela' richin Guerar xkiben oyowal kik'in ri yuq'unela' richin ri Isaac y xkibij: La ya' la' qichin roj, xecha'. Roma ri' ri Isaac xubij Pozo Richin Oyowal chire.

²¹ Y xkik'ot chik jun pozo y chuqa' xkiben oyowal chirij, y ri Isaac xubij chire ri pozo ri' K'ulel.

²² Xujech'ej k'a el ri' chiri' y xkik'ot chik qa jun ki-pozo. Y chirij ri' man xkiben ta chik oyowal, roma ri' xubini'aj: Pozo ri man jun xoch'inik chirij y xubij: Wakami ja ri Jehová xya'on q'ij chiqe richin yojk'oje' y yojbeyomer-q'anej wawe', xcha'.

²³ K'ari' xjote-el chupan ri tinamit Beerseba.

²⁴ Chupan ri aq'a' ri' ri Jehová xuk'ut-ri' chuwech y xubij chire: Ja yin ri in ru-Dios ri atata' Abraham. Man taxibij-awi' roma yin kan ink'o awik'in y xtinya' urtisanik pan awi' y kan xtik'iyer ri awijatzul roma janila xinwajo' ri Abraham ri nusamajel.

²⁵ Y chiri' ri Isaac xuben-q'anej jun porobel richin xuya' ruq'ij ri Jehová, y chiri' chuqa' xupaba-q'anej ri rachoch ri banon rik'in tzieq y ri samajela' ri e ximil pa samaj xkik'ot-qa jun chik pozo richin ya'.

Ri Isaac y ri Abimélec xkiben jun jikibel-tzij

²⁶ Y ri Abimélec rachibilan-el ri Ahuzat ri rupixabanel y ri Ficol ri aj-raqen kichin ri aj-labal, xe'el-pe pa tinamit Guerar richin chi xebetzijon rik'in ri Isaac.

²⁷ Y rija' xubij chike: ¿Achike roma xixpe wik'in? Rix in iwetzelan-pe y xiniwelesaj-pe chi'ikojol, xcha'.

²⁸ Y rije' xkibij: Xqatz'et yan chi ri Jehová kan k'o-wi awik'in y qach'obon-pe chi tijunamatej-qawech y tiqabana' jun jikibel-tzij.

²⁹ Y achi'el roj man jun itzel xqaben-pe chawe, y rik'in k'a uxlanibel-k'u'x xatqelesaj-pe chiqakojol, keri' k'a rat kan man jun k'a itzel xtaben qik'in. Keri' k'a ri Jehová xtuya' k'a urtisanik pan awi' beneq ruwech, xecha'.

³⁰ K'ari' ri Isaac xuben jun nima-wa'in; y k'ari' xewa-xe'uk'ya' y xkiq'axaj k'a ri aq'a' chiri'.

³¹ Xeyakatej k'a nimaq'a' yan richin xkijikiba-kitzij chikijujunal. K'ari' ri Isaac xerujech-el y rije' xetzolin rik'in uxlanibel-k'u'x.

³² Y chupan ri q'ij ri' xe'apon ri rusamajela' ri Isaac y xbekibij chire chi xkil ri ya' chupan ri pozo ri ye'ajin chuk'otik.

³³ Y ri pozo ri' xubini'aj Sebá,*f25* y roma ri' ri ruwach'ulew ri' rubini'an Beerseba k'a re wakami.

Ri e rixjayil ri Esaú

³⁴ Toq ri Esaú k'o chik kawineq rujuna' xk'ule' rik'in ri Judit rumi'al ri Beerí ri hitita. Chuqa' xk'ule' rik'in ri Basemat rumi'al chuqa' jun hitita rubini'an Elón.

³⁵ Chike k'a ri Isaac y ri Rebeca kan maneq chik k'aslen koma ri e ka'i' ixoqi' ri'.