Wuj Richin ri Rutikeribel 24 - Kaqchiquel Bible

Ri Abraham xuteq rukanoxik rixjayil ri Isaac

¹ Ri Abraham xa xrijix yan k'a chiri', kan janila chik k'iy rujuna'. Jak'a ri Jehová kan rurtisan rik'in ronojel.

² Y jari' toq xch'on rik'in jun rusamajel ri k'o pa rachoch ri k'o más ruq'ij y ri k'o pa ruwi' ri rubeyomel y xubij chire: Taya-pe la aq'a' chuxe' re wa',

³ richin chi naya' atzij chuwe yin y chuwech ri Jehová ri Dios, ri rajaw ri kaj, y ri rajaw re ruwach'ulew, richin chi man taya' q'ij chi ri nuk'ajol Isaac nik'ule' ta rik'in jun xten aj wawe' pa Canaán.

⁴ Kabiyin chupan ri nutinamit kik'in ri wach'alal y chiri' tak'ama-pe jun xten richin nok rixjayil ri nuk'ajol, xcha' ri Abraham.

⁵ Ri rusamajel xubij chire: Rik'in ta juba' chi ri xten man ta nrajo' nipe chuwij k'a chupan re ruwach'ulew re'. ¿Achike k'a xtinben yin? ¿Nintzolij-el ri ak'ajol k'a ri akuchi at eleneq-wi-pe rat?, xcha'.

⁶ Y ri Abraham xubij chire: Ni, man ninya' ta q'ij richin nak'uaj-el ri nuk'ajol k'a kela'.

⁷ Roma ri Jehová Dios, ri rajaw ri kaj, ri xinelesan-pe chupan ri rachoch ri nata', y ri xinelesan-pe chiri' chupan ri ruwach'ulew kichin ri wach'alal, rija' kan rujikiban rutzij chuwe chi chike ri wijatzul yin xtuya-wi re ruwach'ulew Canaán. Y rija' kan xtuteq-pe jun ángel richin chi xkaruto', richin chi k'a chila' xtak'en-pe ri xten ri xtok rixjayil ri nuk'ajol,

⁸ y wi ri xten ri' xa man xtrajo' ta xtipe chawij, rat xkatotej chuwech re ya'on-tzij re xtabebana'; jak'a ri nuk'ajol man jun bey tak'uaj-el k'a kela', xcha' ri Abraham.

⁹ K'ari' ri rusamajel xuya-ok ruq'a' chuxe' ri ra' ri rajaw y xujikiba-rutzij richin nuben re jun taqikil re'.

¹⁰ Y ri samajel xeberuk'ama' k'a pe e lajuj camello y xerucha' k'a el ri sipanik ri más e jebel chukojol ri rubeyomel ri Abraham; y xyakatej na wi el y xbe k'a pa rutinamit kan ri Nacor ri k'o pa ruwach'ulew Mesopotamia.

¹¹ Y toq xapon chiri', xeruxukuba' k'a ri camello chuchi' ri tinamit chunaqaj jun pozo y xqaq'ij yan k'a qa, y jari' toq ri xtani' ye'eran ya'.

¹² Y xubij k'a ri samajel: Jehová Dios richin ri Abraham y wichin yin, tabana' utzil chi ronojel ri nutaqikil kan ta utz xtel chinuwech, y taya' joyowanik pa ruwi' ri wajaw.

¹³ Wakami, rokik re ink'o chuchi' re pozo re', ri xtani' richin re tinamit re' xkepe k'a chi relesaxik kiya'.

¹⁴ y ja ta k'a ri xten ri achoq chire xtinbij-wi: Taqasaj la kuku'*f21* y tabana' utzil taya' juba' nuya' richin ninqum, y wi rija' xtubij chuwe: Taqumu' ri aya', y chuqa' xtinya' kiya' ri a-camello, xticha' ta chuwe, ja ta k'a xten ri' ri akanon rat, richin chi xtok rixjayil ri Isaac; y rik'in ri' xtinwetamaj k'a yin chi kan xaya' wi ri ajoyowanik pa ruwi' ri wajaw, xcha' ri samajel.

¹⁵ Y kan k'a man jani tuk'is-qa rubixik re ch'abel re' chire ri Dios, toq ri Rebeca rumi'al ri Betuel xapon chuchi' ri pozo, y ruya'on-el ri kuku' chuwi-rutele'n. Y ri Betuel ri' kalk'ual ri Milcá y ri Nacor, ri runimal ri Abraham.

¹⁶ Y ri Rebeca kan jun xten ri jebel ok, y kan man jun bey k'o ta pe achin rik'in. Rija' xapon-qa chuchi' ri pozo, xunojisaj-pe ri rukuku' y kan jari' k'a nitzolin-el.

¹⁷ K'ari' ri rusamajel ri Abraham junanin xbe richin xch'on rik'in y xubij chire: Yin janila chaqi'j nuchi', tabana' jun utzil chuwe, tasipaj juba' nuya' la ak'uan chupan la akuku', richin ninqum, xcha' chire.

¹⁸ Y ri xten kan jari' chi'anin xuqasaj-qa ri rukuku' xuch'elej pa ruq'a' y xubij: Táta, taqumu' k'a aya', xcha' chire.

¹⁹ Y toq xuya' yan ruya' ri achin, chuqa' xubij chire: Xtinwelesaj chuqa' kiya' la a-camello k'a toq xketane' na richin ye'uk'ya', xcha'.

²⁰ Rija' kan jari' xujem kan chi'anin ri ya' ri k'o chupan ri rukuku' chiri' chupan ri qumbel-ya', y kan xupararej-ri' chi relesaxik ya' y keri' xrelesaj k'a ya' kichin konojel ri camello ri'.

²¹ Y ri rusamajel ri Abraham xaxe k'a rutzuliben ri najin chubanik ri xten ri' y man jun k'a ch'abel xubij, roma najin nuch'ob rij, wi ri Jehová jari' najin chik chuto'ik chupan re jun taqikil re' o ni.

²² Y toq ri xten xtane' yan k'a richin nuya' kiya' ri camello, jari' toq ri achin xuya' k'a jun retz'aba'l-rutza'n ri banon rik'in q'anapueq y ri ralal jubama nik'aj onza. Y xuya' chuqa' ka'i' retz'aba'l ruq'a' ri e banon rik'in q'anapueq, y chikijujunal kalal jubama oxi' onza rik'in nik'aj.

²³ Y k'ari' xuk'utuj k'a chire: ¿Achoq at mi'al k'a rat? Y chuqa' tabana' utzil tabij chuwe, ¿man jun kami akuchi yojuxlan-wi kan juba' chirachoch ri atata'?, xcha'.

²⁴ Y ri xten xubij: Yin in rumi'al kan ri achin ri xubini'aj Betuel ri kalk'ual kan ri Milcá y ri Nacor.

²⁵ Pa qachoch kan k'o akuchi yixk'oje-wi kan richin yixuxlan y chuqa' k'o páxa y k'iy q'os kichin ri a-camello, xcha' rija' chire.

²⁶ K'ari' ri achin xulukuba-qa-ri' richin xuya' ruq'ij ri Jehová,

²⁷ y xubij: Nim aq'ij-ak'ojlen rat Jehová ru-Dios ri wajaw Abraham y at nu-Dios chuqa' yin, rat janila xajoyowaj ruwech ri wajaw y xaben ri xasuj chire y chuqa' xak'ut ri bey chinuwech yin chi choj xinoqaqa-el pa kachoch ri rach'alal ri wajaw, xcha'.

²⁸ K'ari' ri xten xbe junanin chirachoch richin xberutzijoj ronojel re' chike ri rusamajela' ri rute'.

²⁹ Y ri Rebeca k'o k'a jun ruxibal rubini'an Labán y re ruxibal re' toq xrak'axaj, kan jari' xuben-el richin nibe k'a rik'in ri rusamajel ri Abraham ri k'o kan chuchi' ri pozo.

³⁰ Y toq ri Labán xutz'et ri retz'aba'l-rutza'n ri rana' y ri retz'aba'l-ruq'a' y chuqa' xrak'axaj ri bin el chire ri Rebeca roma ri rusamajel ri Abraham, rija' junanin xbe, k'a rik'in ri samajel ri', ri k'o kan chunaqaj ri pozo kik'in ri ru-camello.

³¹ Y ri Labán xberubij k'a chire ri samajel ri': Jo', qojok-apo, rat ri at urtisan-pe roma ri Jehová ¿Achike roma k'a atk'o na wawe'? Yin xinchojmirisaj yan kan ri jay akuchi yabek'oje-wi y chuqa' ri kik'ojelibal ri a-camello, xcha' ri Labán.

³² K'ari' ri rusamajel ri Abraham xapon k'a pa rachoch ri Labán, y ri Labán xuqasaj kan ronojel ri ejqa'n chikij ri camello y xuya' kan kiq'os. Y k'ari' xuya' ruya' ri rusamajel ri Abraham y ri e beneq rik'in richin nikich'ej kaqen.

³³ Y xya'ox k'a apo chikiwech ri k'o chi nikitej, jak'a ri rusamajel ri Abraham xubij: Nabey chire richin nintej nuway k'o chi ninbij-apo ri nutaqikil, xcha'. Y ri Labán xubij chire: Tatzijoj k'a chiqe achike roma toq xatoqaqa wawe', xcha'.

³⁴ K'ari' xubij: Yin in rusamajel ri Abraham.

³⁵ Ri Jehová janila ruya'on urtisanik pa ruwi' ri wajaw, rubanon chire chi xok nimalej beyom, e ruya'on k'iy rukarne'l y wákix, chuqa' ruya'on saqipueq y q'anapueq chire, e k'iy rusamajela' ek'o chi achi'a' chi ixoqi', chuqa' k'iy ru-camello y rubur.

³⁶ Y ri Sara ixjayilonel richin ri wajaw, rija' pa rurijixinen xk'oje' jun ral y chire re ala' re' niya'ox-wi kan ronojel ri k'o rik'in ri wajaw.

³⁷ Y ri wajaw xuben chuwe chi xinjikiba-nutzij chuwech y xubij chuwe: Man takanoj rixjayil ri nuk'ajol chikikojol ri kimi'al ri aj-Canaán re akuchi ojk'o-wi.

³⁸ Xa kan kabiyin pa kachoch ri nte-nata' kik'in ri nuwinaq, chiri' takanoj-pe jun rixjayil ri nuk'ajol, xcha' pe ri wajaw.

³⁹ Jak'a yin xinbij chire: Rik'in juba' ri xten man xtrajo' ta xtipe chuwij. ¿Achike k'a xtinben yin?, xicha' chire.

⁴⁰ Y rija' xubij chuwe: Ri Jehová ri kan nuben ri nubij chuwe, rija' xtuteq-pe ri ru-ángel ri xtibe awik'in richin utz xtel ronojel chawech y keri' xtak'en-pe jun rixjayil ri nuk'ajol chikikojol ri alk'ualaxela' ri e aj pa rachoch kan ri nata'.

⁴¹ Toq xkatapon kik'in ri wach'alal, wi rije' man xtikiya' ta pe ri xten chawe, xkatotej k'a kan rat chuwech re ya'on-tzij re', xcha' ri Abraham chuwe.

⁴² Keri' k'a toq xinoqaqa-el k'a re wawe' rik'in ri pozo. Xich'on k'a rik'in ri Jehová y xinbij: Jehová, Dios wichin yin y richin ri wajaw, tabana' utzil kinato' k'a chupan re jun taqikil re',

⁴³ yin ink'o wawe' chunaqaj ri pozo y ri xten ri xtipe richin noruk'ama' ruya' y xtinbij chire: Tabana' utzil taya' juba' nuya' richin ninqum, xkicha' chire,

⁴⁴ y wi rija' xtubij chuwe: Taqumu' ri aya' nabey rat, chirij re' ninweraj kiya' ri a-camello, xticha', ja k'a xten re' ri acha'on-pe rat Jehová richin xtok rixjayil ri ruk'ajol ri wajaw, xicha' chire ri Dios.

⁴⁵ Toq yinajin chubixik re ch'abel re' pa wánima, jari' toq xbek'ulun-pe ri Rebeca rik'in ri rukuku' chuwi-rutele'n richin xberuk'ama-qa ruya' chuchi' ri pozo y jari' toq xinbij chire: Tabana' jun utzil chuwe, tasipaj juba' nuya', xicha' chire.

⁴⁶ Chi'anin xuqasaj-pe ri rukuku' ri chuwi-rutele'n y xubij chuwe: Taqumu' ri aya', táta y chuqa' xtinya' kiya' ri a-camello, xcha' chuwe. Y yin xinqum k'a ri ya' y xuya' chuqa' ri kiya' ri nu-camello.

⁴⁷ K'ari' xink'utuj chire: ¿At achoq mi'al k'a rat?, xicha' chire. Y rija' xubij chuwe: In rumi'al ri Betuel y ri wati't-numama' ja ri Milcá y ri Nacor, xcha' chuwe. K'ari' xinya' jun retz'aba'l-rutza'n, y ka'i' retz'aba'l-ruq'a'.

⁴⁸ K'ari' xinlukuba-wi' richin xinya' ruq'ij-ruk'ojlen ri Jehová Dios, ri ru-Dios chuqa' ri wajaw Abraham, roma xiruto' richin xiruk'en-pe chupan ri qitzij bey y xinoqaqa-el kik'in ri rach'alal ri wajaw richin ninkanoj-el ri rixjayil ri Isaac.

⁴⁹ Wakami k'a tibij ri qitzij chuwe, wi nijoyowaj ruwech ri wajaw richin niya-el ri xten chuwe. Y wi man niya' ta, tibij chuqa' chuwe, richin keri' yin xtinkanoj akuchi xkibe-wi, xcha' ri rusamajel ri Abraham.

⁵⁰ K'ari' ri Labán pa rubi' ri Betuel, ri rutata', xubij: Rik'in ri Jehová peteneq-wi ronojel re'; roj man jun yojtikir niqabij chawe wi ja' o ni.

⁵¹ Ja Rebeca re' ninjech-el chawe, tak'uaj k'a el y katzolin k'a; xtok ta k'a rixjayil ri ruk'ajol ri awajaw, achi'el xubij ri Jehová, xcha'.

⁵² Toq ri samajel xrak'axaj re ch'abel re', xulukuba-qa-ri' pan ulew richin xuya' ruq'ij ri Jehová.

⁵³ Y ri samajel xuya-apo jalajoj ruwech sipanik ri banon rik'in saqipueq y q'anapueq, y tzieq, richin xusipaj chire ri Rebeca y chuqa' xeruyala' sipanik chire ri ruxibal y ri rute'.

⁵⁴ Xeri' xewa' y xe'uk'ya', rija' y konojel ri e beneq chirij y chiri' xewer-wi kan. K'a ri ruka'n q'ij nimaq'a' yan xeyakatej y ri achin xubij chike: Tikuyu' juba', tiya' q'ij chuwe richin yitzolin rik'in ri wajaw, xcha' chike.

⁵⁵ K'ari' ri ruxibal y ri rute' xkibij: Tik'oje' na chik juba' ri Rebeca qik'in y k'a pa jun lajuj q'ij k'ari' k'a xtibe, xecha'.

⁵⁶ Y ri samajel xubij: Tibana' utzil man yiniq'et-qa roma kan ja ri Jehová xbanon richin utz xel ri nutaqikil. Tikuyu' juba', tiya' q'ij chuwe richin yitzolin yan pa rachoch ri wajaw, xcha'.

⁵⁷ Y rije' xkibij: Tiqoyoj na k'a ri xten y achike na k'a xtubij rija', xecha'.

⁵⁸ K'ari' xkoyoj y xkik'utuj chire: ¿Nawajo' richin yabe yan chirij re achin re'?, xecha' chire. Y rija' xubij: Ja', ninwajo' yibe, xcha'.

⁵⁹ K'ari' xkijech k'a el ri Rebeca y ri ixoq ri xk'iytisan richin, ri rusamajel ri Abraham y konojel ri e peteneq chirij.

⁶⁰ Xkiya' k'a urtisanik pa ruwi' ri Rebeca y xkibij chire: Qach'alal roj, xkatok ta k'a te'ej kichin e 1,000 winaqi' y ri awal-awiy xke'ichinan kan ri tinamit ri ye'etzelan kichin, xecha'.

⁶¹ K'ari' ri Rebeca y ri xtani' ri e raj-ik' xech'oke-el chikij ri camello y xekitzeqelibej-el ri e rusamajela' ri Abraham. Keri' k'a xbanatej toq ri rusamajel ri Abraham xuk'uaj-el ri Rebeca, y xuchop bey.

⁶² Y ri Isaac tzolejineq k'a el akuchi k'o-wi ri pozo ri rubini'an Pozo Richin ri kan K'es y Yirutz'et, roma rija' k'o pa ruwach'ulew Négueb.

⁶³ Toq xqaq'ij yan qa, rija' xbebiyaj juba' pa juyu', jari' toq xerutz'et ri camello e peteneq.

^64-65 Chuqa' ri Rebeca xutz'et-pe ri Isaac y xuk'utuj chire ri samajel: ¿Achike k'a ala' la tzalan-pe pa juyu' y peteneq kere'?, xcha'. Y ri samajel xubij chire: Ja wajaw la', xcha'. K'ari' ri Rebeca xqaqa-qa chirij ri ru-camello y xutz'apej rupalej rik'in ri rutziaq ri ruq'un.

⁶⁶ Keri' k'a xkik'ul-ki' ri samajel rik'in ri Isaac y ri samajel xutzijoj chire ri Isaac ronojel ri xuben.

⁶⁷ K'ari' ri Isaac xuk'en-pe ri Rebeca pa rachoch kan ri rute', richin xok rixjayil y kan janila xrajo' y xumestaj-el ri rubis roma k'a juba' tiken-el ri rute'.