Wuj Richin ri Rutikeribel 21 - Kaqchiquel Bible

Ri ralaxbal ri Isaac

¹ Ri Jehová kan janila k'a jebel xuben rik'in ri Sara y kan xuben-wi achi'el ri rusujun kan chire.

² Ri Sara xyawej k'a chirij ak'ual y kan k'a pa rurijixinen k'a xuya' jun ralk'ual ri Abraham; y re ak'ual re' kan xalex k'a chupan ri q'ij ri rubin kan ri Dios.

³ Y ri Abraham, Isaac k'a ri bi'aj ri xuya' chire ri ti ruk'ajol, ri xalex rik'in ri Sara.

⁴ Y rija' xuqupij k'a ri Isaac richin jun retal, toq k'o waqxaqi' ruq'ij achi'el rubin kan ri Dios chire.

⁵ Ri Abraham k'o yan chik wok'al rujuna' toq xalex ri Isaac, ri ti ruk'ajol.

⁶ Y ri Sara xubij k'a: Ja ri Dios xbanon richin yin xitze'en roma kikoten y konojel k'a ri xtiketamaj chi yin xk'oje' jun ti wal xketze'en chuqa' wik'in.

⁷ Y ri Sara xubij chuqa': ¿Achike ta k'a xbin chi ri Abraham kan xtik'oje' ta jun ralk'ual wik'in? Roma stape' pa qarijixinen, xk'oje' na jun qalk'ual, xcha'.

Ri Agar y ri Ismael xe'elesex-el pa rachoch ri Abraham

⁸ Y xapon k'a ri q'ij chi ri Isaac k'o chi nel rutz'um y roma ri' ri Abraham xuben jun nimalej wa'in chupan ri q'ij ri'.

⁹ Y ri Sara xutz'et k'a chi ri jun chik ralk'ual ri Abraham ri xk'oje' rik'in ri Agar ri aj-Egipto janila nitze'en chirij ri Isaac.

¹⁰ Y ri Sara xberubij k'a chire ri Abraham: Tawoqotaj-el la Agar la ixoq la yuqul pa samaj qik'in y keri' chuqa' la ral, roma la ral rija' man xtichinan ta rik'in ri wal yin, xcha'.

¹¹ Y toq ri Abraham xrak'axaj ri xubij ri Sara chire, kan xq'axomer k'a ri ránima, roma kan janila nrajo' ri Ismael, ri ruk'ajol.

¹² K'ari' ri Dios xubij chire: Man tiq'axomer ri awánima roma ri ak'ajol, ni ta roma ri Agar. Xa tanimaj ronojel ri nubij ri Sara chawe. Roma ri awijatzul xa rik'in ri Isaac xtel-wi-pe.

¹³ Y chuqa' rik'in ri ral ri Agar xtinben k'a jun nimalej tzobaj winaqi', roma re ala' re' kan awalk'ual chuqa' rat, xcha' ri Dios chire.

¹⁴ Y nimaq'a' yan ri ruka'n q'ij ri Abraham xyakatej, xberuk'ama-pe kaxlan-wey, y jun tz'um nojineq rik'in ya' y xuya-el chuwi-rutele'n ri Agar, y chuqa' xujech-el ri ala' chire richin tel-el. K'ari' rije' xkichop-el bey y xebe-kela' xebe-kela' xkiben chupan ri tz'iran ruwach'ulew richin Beerseba.

¹⁵ Y toq xk'is k'a ri kiya' ri kik'uan-el chupan ri tz'um, jari' toq ri te'ej xberuya' kan ri ral pa rumujal jun q'ayis.

¹⁶ K'ari' rija' xbek'oje-pe pa jun la'eq oxi' raqen k'an, roma man nrajo' ta nutz'et toq niken ri ral. Y k'ari' ri Agar xsik'in-q'anej chi oq'ej.

¹⁷ Y ri Dios kan xrak'axaj k'a chuqa' ri roq'ej ri ala' y jari' toq ri ángel richin ri Dios xch'on-pe rik'in ri Agar k'a chila' chikaj y xubij chire: ¿Achike xak'uluwachij Agar? Man taxibij-awi' roma ri Dios xrak'axaj ri ruch'owen la ala', la akuchi k'o-wi.

¹⁸ Kayakatej-el y tabeyaka' la awal y takuquba-ruk'u'x, roma ri Dios kan rubin chik chi rik'in rija' xtel-pe jun nimalej tzobaj winaqi', keri' xubij ri Dios, xcha' ri ángel.

¹⁹ K'ari' ri Dios xuben chire richin xujeq ri runaq'-ruwech ri Agar, y xutz'et jun pozo. K'ari' xbe y xberunojisaj-pe ri tz'um richin ya' y xuya' ruya' ri ala'.

²⁰ Y ri Dios kan xk'oje-wi rik'in ri ala' y xk'iy-q'anej y chiri' chupan ri tz'iran ruwach'ulew ri rubini'an Parán xk'oje-wi, y rija' xretamaj xok jun kanonel.

²¹ Y ri Ismael chupan k'a ri tz'iran ruwach'ulew ri' xk'oje-wi. Y ri Agar xukanoj k'a rixjayil ri ral y ri xten ri' aj-Egipto.

Ri jikibel-tzij ri xkiben ri Abraham y ri Abimélec

²² Y rokik ri' chuqa' kere' ri xk'uluwachitej: Ri Abimélec y ri Ficol ri tata'al kichin ri aj-labal xkibij chire ri Abraham: Rik'in ronojel ri ye'aben, kan q'alaj-wi chi ri Dios kan k'o-wi awik'in.

²³ Wakami k'a tajikiba' ri atzij chinuwech yin y chuwech ri Dios richin man ta jun xtach'ob chi naben ta chuwe yin, ni ta chike ri walk'ual y ni ta chike ri wiy-mam. Kan ta achi'el ri utzil ri xinben chawe yin, kan ta keri' ri rajel ruk'exel ri naben wik'in yin y kik'in konojel re winaqi' re e richin re ruwach'ulew re', re akuchi xatoqaqa-wi, xcha' ri Abimélec chire ri Abraham.

²⁴ Y ri Abraham xubij: Ja', ninya' nutzij, xcha'.

²⁵ Jak'a ri Abraham xa xubij-apo chire ri Abimélec chirij ri jun pozo ri kimajon kan ri rusamajela'.

²⁶ K'ari' ri Abimélec xubij chire: Yin man wetaman ta achike xbanon re'. Rat man jun abin chuwe, ni man wak'axan ta, xa k'a wakami xinwetamaj, xcha'.

²⁷ K'ari' ri Abraham xeberuk'ama-pe kokoj y nima'q taq rawej richin xkiben ri jikibel-tzij chikikojol chi e ka'i'.

²⁸ Y chuqa' ri Abraham xeruch'er kan wuqu' ixoq taq karne'l chikikojol ri ch'aqa' chik rukarne'l.

²⁹ Y ri Abimélec xubij chire ri Abraham: ¿Achike nuq'ajuj-wi la wuqu' ixoq taq karne'l la xe'ach'er kan?, xcha'.

³⁰ Y ri Abraham xubij: Re wuqu' karne'l re' ri xtak'en chinuq'a' xtik'atzin ta richin jun q'alajirisabel richin ri tununri'il richin chi yin xibanon ri pozo ri', xcha'.

³¹ Y roma ri' xbix Beerseba*f19* chire ri tinamit ri' roma chiri' xkijikiba-wi ri kitzij chi e ka'i'.

³² Chiri' k'a pa Beerseba xkiben-wi ri jikibel-tzij y k'ari' xebe ri Abimélec y ri Ficol tata'al kichin ri aj-labal, richin xetzolej-el chupan ri kitinamit ri k'o pa ruwach'ulew Filistea roma rije' kan e aj chiri'.

³³ Y jak'a ri Abraham xutik k'a qa jun che' rubini'an tamarisco chiri' pa Beerseba, y chiri' k'a xuya' ruq'ij ri Jehová ri Dios richin q'asen.

³⁴ Y rija' xk'oje' chiri' pa ruwach'ulew Filistea k'iy juba' juna'.