Wuj Richin ri Rutikeribel 11 - Kaqchiquel Bible

Toq xetalutej ri winaqi'

¹ Chupan ri q'ij ri' toq xq'ax yan ri ya' ri xmuqun re ruwach'ulew, konojel ri winaqi' xa jun k'a kich'abel.

² Toq xe'el-pe pa relebel-q'ij, xkil jun taq'aj chiri' pa ruwach'ulew rubini'an Sinar. Y chiri' xek'oje-wi-qa.

³ Y k'o k'a jun q'ij xkich'ob y xkitzijola' chikiwech: Tiqabana' taq xan y tiqaporoj pa q'aq', richin niqaben ladrillo, xecha'. Y keri', rije' ladrillo k'a ri xkikusaj pa ruk'exel abej y petróleo k'a xkikusaj richin xok rulo' ri xabachike kisamaj.

⁴ Chirij re' xkibij chik: Tiqapaba' jun tinamit y jun torre y re torre re' xtapon k'a chila' chikaj, richin keri' xtel qatzijol y man xqojtalutej ta chuwech re ruwach'ulew, xecha'.

⁵ Jak'a ri Jehová xqaqa-pe richin xorutz'eta-qa ri tinamit ri yetajin chubanik ri winaqi' y chuqa' ri torre ri xkik'is yan rubanik.

⁶ Y ri Jehová xubij: Ri winaqi' xa jun tinamit kibanon y xa jun ri kich'abel; y k'a nabey kisamaj re' ri nikiben. Y kan man jun k'a xkeq'aton richin nikiben ri nikirayij.

⁷ Wakami k'a, jo-qa y tiqasacha' ri kich'abel, richin chi man niq'ax ta chikiwech ri nikibij, xcha'.

⁸ Keri' k'a xuben ri Jehová chike; roma ri' xkitalula-el-ki' chuwech re ruwach'ulew y xkitanaba' kan rubanik ri tinamit ri ye'ajin chubanik.

⁹ Roma chiri' ri Jehová xujel kich'abel konojel ri winaqi', roma ri' ri tinamit ri' xubini'aj kan Babel.*f11* Y jari' k'a ri xbanon chike ri winaqi' ri' chi xkitalula-el-ki' chuwech chijun ruwach'ulew.

Ri e rati't-rumama' ri Abram

¹⁰ Wawe' k'a e tz'ibatel-wi kan ri kibi' ri e rijatzul ri Sem. K'a ka'i' k'a juna' tiq'ax ri ya' ri xmuqun ri ruwach'ulew, toq xralk'ualaj ri Arfaxad y ri Sem k'o wok'al rujuna' chiri'.

¹¹ Y toq xalex yan ri Arfaxad, ri Sem xk'ase' chik na 500 juna', y xek'oje' ch'aqa' chik ralk'ual.

¹² Y toq ri Arfaxad k'o juwineq wolajuj rujuna', jari' toq xralk'ualaj ri ruk'ajol rubini'an Sélah.

¹³ Chirij ri ralaxik rija', ri Arfaxad k'a xk'ase' na chik 403 juna', y xek'oje' ch'aqa' chik ralk'ual.

¹⁴ Y toq ri Sélah k'o juwineq lajuj rujuna' jari' toq xralk'ualaj ri ruk'ajol ri xubini'aj Éber.

¹⁵ Chirij ri ralaxik rija', ri Sélah xk'ase' na chik 403 juna', y xek'oje' chik ch'aqa' ralk'ual.

¹⁶ Y toq ri Éber k'o juwineq kajlajuj rujuna' jari' toq xralk'ualaj ri ruk'ajol ri xubini'aj Péleg.

¹⁷ Chirij ri ralaxik rija', ri Éber xk'ase' na chik 430 juna', y xek'oje' ch'aqa' chik ralk'ual.

¹⁸ Y toq ri Péleg k'o juwineq lajuj rujuna' jari' toq xralk'ualaj ri ruk'ajol rubini'an Reú.

¹⁹ Y chirij ri ralaxik rija', ri Péleg xk'ase' na chik 209 juna', y xek'oje' ch'aqa' chik ralk'ual.

²⁰ Y toq ri Reú k'o juwineq kablajuj rujuna' jari' toq xralk'ualaj ri ruk'ajol ri xubini'aj Serug.

²¹ Y chirij ri ralaxik rija', ri Reú xk'ase' na chik 207 juna', y xek'oje' ch'aqa' chik ralk'ual.

²² Y toq ri Serug k'o juwineq lajuj rujuna' jari' toq xralk'ualaj ri ruk'ajol ri xubini'aj Nacor.

²³ Chirij ri ralaxik rija', ri Serug xk'ase' na kan 200 juna', y xek'oje' ch'aqa' chik ralk'ual.

²⁴ Y toq ri Nacor k'o juwineq beleje' rujuna' jari' toq xralk'ualaj ri ruk'ajol ri xubini'aj Taré.

²⁵ Chirij ri ralaxik rija', ri Nacor xk'ase' na chik 119 juna', y xek'oje' ch'aqa' chik ralk'ual.

²⁶ Y toq ri Taré k'o oxk'al lajuj rujuna', jari' toq xeralk'ualaj e oxi' ruk'ajol ri xkibini'aj, Abram, Nacor y Harán.

Ri e rijatzul ri Taré

²⁷ Wawe' e tz'ibatel-wi kan ri kibi' ri e rijatzul ri Taré: Ri Abram, ri Nacor y ri Harán; y ri Harán xralk'ualaj ri Lot.

²⁸ Ri Harán xken pa tinamit Ur, jun tinamit richin Caldea y nabey rija' xken chuwech ri rutata'. Y xken chiri' ri akuchi xalex-wi.

²⁹ Y ri Abram xk'ule' rik'in ri xten rubini'an Sarai, y chuqa' ri Nacor xk'ule' rik'in ri xten rubini'an Milcá, rumi'al kan ri Harán, rana' ri Iscá.

³⁰ Ri Sarai man xek'oje' ta ral, roma rija' kan keri' banon chire roma ri Dios.

³¹ Ri Taré xel-el chiri' pan Ur kichin ri winaqi' caldeo richin xbe pa ruwach'ulew Canaán y xeruk'uaj-el ri Abram ri ruk'ajol, ri Sarai ri rali' y chuqa' xuk'uaj-el ri Lot ri ruk'ajol kan ri Harán, ri ruk'ajol rija'; y toq xe'apon chupan ri tinamit rubini'an Harán, chiri' xek'oje-wi-qa.

³² Y chiri' k'a pan Harán xken-wi ri Taré toq k'o 205 rujuna'.