Gálatas 6 - Kaqchiquel Bible

K'atzinel niqatola-qi'

¹ Wach'alal, yich'on k'a iwik'in rix ri kan ik'uan jun k'aslen achi'el ri nrajo' ri Loq'olej Espíritu. Wi k'o ta jun qach'alal ri chaq k'ate' niqaqa pa mak, rik'in ch'uch'ujil tiyaka-pe, richin keri' nichojmirisaj ri ruk'aslen. Jak'a rix tichajij-iwi', richin man nik'uluwachij chuqa' keri'.

² Kan titola' k'a iwi' chiwech rix. Y rik'in ri', kan niben-wi k'a ri nubij ri pixa' richin ri Cristo.

³ Jak'a wi k'o jun ri nuch'ob chi k'o ruq'ij roma man qajineq ta pa mak, xa kan ruyon k'a rija' nuq'ol-qa-ri'.

⁴ chiqajujunal tiqatzu-qa ri qabanobal, wi utz o xa man utz ta. Y wi ri qabanobal kan utz, ruk'amon k'a chi nikikot ri qánima. Y man ruk'amon ta chi niqajunamaj na qi' rik'in jun chik,

⁵ roma xa kan chiqajujunal k'o chi niqejqalej ri yeqabanala'.

⁶ Y rix ri yixtijox chire ri ruch'abel ri Dios, kan ke'ito' k'a ri yetijon iwichin. Ronojel ri utz ri k'o iwik'in rix kan tiya' chuqa' juba' chike rije'.

⁷ Man k'a tiq'ol-iwi', roma chuwech ri Dios man jun ewatel. Kan achi'el k'a ri tiko'n ri niben-qa, kan jari' chuqa' ri niberuya-pe chiwe.

⁸ Roma wi xa ja ri nirayij rix ri ye'ibanala', xa xtiwachij k'a ruk'ayewal chupan ri ik'aslen. Jak'a wi nik'uaj ri k'aslen ri nrajo' ri Loq'olej Espíritu, xtiwachij k'a ri k'aslen ri man jun bey xtik'is.

⁹ Roma ri' man k'a qojkos chubanik ri utz, y man niqaya' kan rubanik. Wi keri' xtiqaben-apo, kan xtiqak'ul rajel-ruk'exel toq xtapon ri q'ij.

¹⁰ Y toq niqatz'et xabachike wineq ri k'o nik'atzin chire, kan tiqato' k'a. Jak'a kan nik'atzin chi yeqato' más ri e qach'alal chik.

Ri ruk'isibel taq ch'abel

¹¹ Wach'alal, re ruk'isibel chire re wuj re' kan ja yin k'a ri yitz'iban-el. Y titz'eta' k'a chi kan nima'q ninben el chire ri tz'ibanik.

¹² Ri winaqi' ri yebanon chiwe chi kan tiqupix ri kich'akul ri achi'a' richin jun etal, kan xaxe richin ketz'et y kenimex chi kan nikiben-wi ri nubij ri pixa'. Rije' man nikajo' ta chi ye'etzelex. Roma ri' man nikiq'alajirisaj ta chi ri kolotajik nibanatej kan xaxe roma ri rukamik ri Jesucristo.

¹³ Man rik'in ri', ri winaqi' ri kan e qupin richin jun retal, man nikiben ta ri ch'aqa' chik ri nubij chupan ri pixa'. Rije' nikajo' chi rix niya'ox ta ri etal ri' chiwe, xaxe richin titz'et chi rix kan ninimaj-wi kitzij, y keri' rije' tiya'ox q'anej kiq'ij.

¹⁴ Y nej k'a k'o-wi chuwe yin, chi ninben ta achi'el ri nikiben rije', roma yin man ninkanoj ta nuq'ij. Yin xa kan xaxe-wi ri qajaw Jesucristo ri xken ri ninya' ruq'ij. Y jak'a chuqa' rija' ri banayon chuwe chi xiken yan chikiwech ri ch'obonik aj-ruwach'ulew. Y re ch'obonik re' xeken yan chuqa' chinuwech yin.

¹⁵ Y roj ri jun qabanon rik'in ri Cristo Jesús, man jun k'a nuben wi oj qupin richin jun retal o man oj qupin ta. Ri nik'atzin y kan k'o-wi rejqalen, jak'a ri k'ak'a' qak'aslen.

¹⁶ Rix ri yixbiyin achi'el nubij re ch'abel re', kan xtik'oje' ta k'a uxlanibel-k'u'x pa taq iwánima. Y kan xtijoyowex k'a chuqa' iwech roma ri Dios, roma rix kan ix rutinamit-wi ri Dios.

¹⁷ Y re xtibe-apo, man jun chik k'a tibin más ch'abel chuwij, roma yin kan ek'o-wi retal ri e nuk'uan roma ri tijoj-poqonal ri xink'owisaj, y ronojel re' roma kan in rusamajel ri Jesucristo.

¹⁸ Kan ja ta k'a ri rutzil ri qajaw Jesucristo xtik'oje' pa taq iwánima rix wach'alal. Kan keri' ta k'a.