Filipenses 1 - Kaqchiquel Bible

Ri Pablo nuteq rutzil kiwech ri nimanela'

¹ Yin Pablo, wachibilan ri qach'alal Timoteo ri oj rusamajela' ri Jesucristo, nintz'ibaj k'a el re wuj re' chiwe rix qach'alal ri ixk'o pa tinamit Filipos, rix ri xa jun ibanon rik'in ri Cristo Jesús. Keri' chuqa' chiwe rix qach'alal ri ix uk'uey kichin ri qach'alal, y ri ch'aqa' chik to'onela'.

² Kan ja ta k'a ri utzil y ri uxlanen ri peteneq rik'in ri qatata' Dios y ri qajaw Jesucristo xtik'oje' pa taq iwánima chi'iwonojel.

Ri Pablo nich'on rik'in ri Dios pa kiwi' ri qach'alal aj-Filipos

³ Kan yixoqaqa-wi chinuk'u'x, y yimatioxin chire ri Dios iwoma.

⁴ Y jantape' k'a yixinnataj toq yich'on rik'in ri Dios, y rik'in kikoten nink'utuj ri rutzil pan iwi'.

⁵ Roma noqaqa chinuk'u'x ri to'onik ri niben rix richin chi nitzijotej ri utzilej ch'abel richin kolotajik. Kan chupan k'a ri q'ij toq xikuquba' ik'u'x rik'in ri Jesucristo, ja ri' toq ichapon-pe ri to'onik ri'.

⁶ Ri Dios ruchapon k'a jun utzilej samaj pa taq iwánima, y kan jujik chi xtuk'is-wi pa ruwi', toq xtapon ri q'ij richin nipe chik ri Jesucristo.

⁷ Kan pa ruchojmilal ninben chi kan janila yixinwajo', stape' ink'o pa cárcel o nintzijoj ri utzilej ch'abel richin kolotajik roma kan ibanon-wi utzil chuwe richin in ito'on chupan ri nusamaj.

⁸ Kan retaman k'a ri Dios chi yin kan janila yixinwajo' chi'iwonojel, kan achi'el ri ajowabel ri k'o rik'in ri Jesucristo.

⁹ Kan nink'utuj k'a chire ri Dios chi ri ajowabel ri k'o iwik'in kan más ta xtinimer, y xtik'oje' ta más etamabel y más na'oj iwik'in,

¹⁰ richin chi niq'ax ta jebel chiwech ri achike ri kan k'o kejqalen. Keri' rix beneq ta ruwech nik'uaj jun k'aslen ch'ajch'oj, y man ta jun itzel nilitej pan ik'aslen toq xtoqaqa ri q'ij richin xtipe ri Cristo.

¹¹ Y richin niq'i' re', ri Jesucristo kan xkixruto' k'a richin chi kan choj ri ik'aslen xtik'uaj, y niwachin ta jebel. Y keri', ri Dios xtuk'ul ta ruq'ij-ruk'ojlen.

Ri Cristo jari' ri qak'aslen

¹² Wach'alal, yin ninwajo' chi rix niwetamaj ta chi rik'in ri nuk'uluwachin man pa'el ta ruq'alajirisaxik ri utzilej ch'abel richin kolotajik. Pa ruk'exel chi keri', xa kan ek'o más winaqi' ri ye'ak'axan.

¹³ Roma konojel winaqi' ri ek'o chiri' kak'axan chik chi yin xinok pa cárcel roma nintzijoj ri Jesucristo. Y chuqa' ri e chajiy ri rachoch ri rey ketaman.

¹⁴ Y roma ri' jubama k'a konojel ri qach'alal xk'oje-el más kuchuq'a' richin chi nikitzijoj ri ruch'abel ri Dios chike ri winaqi', y man nikixibij ta ki'.

¹⁵ Jak'a kan ek'o ri nikitzijoj rubi' ri Cristo xaxe roma ch'upun k'u'x y kan ek'o-wi ri kan rik'in ajowabel y rik'in ch'ajch'oj kánima nikiben ri samaj.

¹⁶ Ri yesamej rik'in ajowabel, nikiben roma ketaman chi yin ink'o wawe' pa cárcel richin ninq'alajirisaj ri utzilej ch'abel richin kolotajik.*f1*

¹⁷ Jak'a ri ch'aqa' chik nikiben keri', xaxe roma nikajo' chi yin más ta niq'axo ri wánima re wawe'.

¹⁸ Chuwe yin ri más nik'atzin, kan ja ri nitzijox ri rubi' ri Cristo; y man nik'atzin ta k'a chi ninwetamaj wi ch'ajch'oj kánima toq nikitzijoj o xa man ch'ajch'oj ta. Jak'a toq kan ja ri rubi' ri Cristo ri nitzijox, kan janila kikoten ri nuya' pa wánima, y kan jantape' xkikikot.

¹⁹ Y rik'in ri ich'owen rik'in ri Dios pa nuwi' yin, y chuqa' ri ruto'onik ri Loq'olej Espíritu ri peteneq roma ri Jesucristo, kan kuqul k'a nuk'u'x chi yin xkinel-el re wawe' re akuchi in tz'apel-wi.

²⁰ Kan nurayibel wi k'a chi ninya' ruq'ij ri Cristo, nik'oje' ta wuchuq'a' richin nik'is ri rusamaj y man ta yik'ixbitej roma man nink'is ta y rik'in ri' ninya' ruq'ij ri Cristo, rik'in ri nuk'aslen o rik'in ri nukamik.

²¹ Roma, ri k'aslen chuwe yin, kan ja ri Cristo. Y ri kamik xa kan k'o más utz nuk'en-pe chuwe.

²² Roma ri' wi xkik'ase-el más chuwech re ruwach'ulew, ri samaj ri xtinben, kan k'o utz ri xtuk'en-pe. Y roma ri' yin man yitikir ta nincha' wi k'a yik'ase' na o wi yiken yan el.

²³ Kan man ninwil ta k'a achike ninben, roma pa nik'aj ink'o-wi, roma chuqa' ninch'ob chi wi ninya' kan re ruwach'ulew y yibek'oje' rik'in ri Cristo, ri' kan más utz chuwe yin.

²⁴ Jak'a chuqa' kan wetaman chi kan más nik'atzin chi k'a yik'oje' na chuwech re ruwach'ulew iwoma rix.

²⁵ Y roma ri' wetaman chi k'a man jani xkinel-el chuwech re ruwach'ulew. Xa kan k'a xkik'oje' k'a iwik'in, richin yixk'iy y yixkikot chi'iwonojel ri ikuquban ik'u'x rik'in ri Cristo.

²⁶ Y keri', rix kan janila xkixkikot, y kan xtiya' k'a ruq'ij-ruk'ojlen ri Cristo Jesús toq xtitz'et chi yinapon chik jun bey iwik'in.

²⁷ Wakami k'a, ruk'amon chi rix tik'uaj jun k'aslen utz achi'el nubij ri ruch'abel ri Cristo. Wi xkinapon chik iwik'in, kan keri' ta ri ik'aslen xtinbenwila', y wi man xkinapon ta, xtinwak'axaj ta k'a chiwij, chi kan kuqul ik'u'x rik'in ri Cristo, chi xa jun ta iwech ibanon, y kan ta ito'on-iwi' richin itzeqeliben ri utzilej ch'abel richin kolotajik.

²⁸ Chuqa' man k'a tixibij-iwi' chikiwech ri ye'etzelan iwichin, keri' xtibeq'alajin-pe chi rix iwilon chik ri kolotajik. Y rije' xa e richin chik ri tojbel-mak. Y re' kan ja ri Dios ri banayon-pe richin kan keri' xtibanatej.

²⁹ Rix man xaxe ta k'a ya'on q'ij chiwe richin nikuquba' ik'u'x rik'in ri Cristo, xa kan ya'on chuqa' q'ij chiwe richin chi nitej poqon roma ri rubi' rija'.

³⁰ Wakami kan junan k'a ibanon wik'in yin chupan ri tijoj-poqonal, roma xitz'et toq xik'oje' iwik'in chi k'iy poqonal ri xink'owisaj roma ri rubi' ri Cristo. Y wakami chuqa' kan k'a k'o na tijoj-poqonal nink'owisaj re wawe'.