Filemón 1 - Kaqchiquel Bible

Ri Pablo nuya' rutzil ruwech ri Filemón

¹ Yin Pablo, ink'o k'a wawe' pa cárcel roma ri Jesucristo. Wachibilan k'a ri qach'alal Timoteo toq ninben-el re wuj re' chawe rat qachibil Filemón, ri yalan yatqajo' y achoq ik'in yojsamej-wi.

² Niqateq-el rutzil-kiwech ri qach'alal Apia y ri Arquipo, ri chuqa' e qachibil chupan ri samaj, y chuqa' ri molaj qach'alal ri nikimol-ki' pan awachoch.

³ Ja ta k'a ri utzil y ri uxlanen ri peteneq rik'in ri qatata' Dios y ri ajaw Jesucristo xtik'oje' pa taq iwánima chi'iwonojel.

Ri ajowabel y ri kuqubabel-k'u'x richin ri Filemón

⁴ Yin jantape' k'a yich'on rik'in ri Dios, y jantape' yimatioxin chire awoma rat,

⁵ roma yin kan ninwak'axaj-wi chi rat jantape' nak'ut ri ajowabel kik'in ri qach'alal, y kan jebel akuquban ak'u'x rik'in ri ajaw Jesús.

⁶ Yin nink'utuj k'a chire ri Dios chi rokik rat natzijoj ri akolotajik, chuqa' xtetamex ri urtisanik ri k'o qik'in qonojel ri k'o ri Cristo Jesús pa taq qánima.

⁷ Wach'alal Filemón, wak'axan chi janila ye'awajo' ri qach'alal y k'iy kikoten aya'on pa taq kánima. Y roma ri' yin chuqa' janila kikoten k'o pa wánima, y rik'in ri' xaben chuwe richin xinkuquba' nuk'u'x.

Ri Pablo xch'on pa ruwi' ri Onésimo

⁸ Roma ri', stape' kan k'o uchuq'a' ya'on pa nuq'a' roma ri Cristo, richin ta ninbij chawe ri ruk'amon chi naben,

⁹ man rik'in ri', roma ri ajowabel ri k'o chiqakojol, nink'utuj jun utzil chawe, stape' kan ja yin Pablo y kan xirijix yan y wakami ink'o pa cárcel roma ri rubi' ri Jesucristo.

¹⁰ Nink'utuj utzil chawe pa ruwi' ri Onésimo, ri achi'el nuk'ajol, roma rija' xukuquba' ruk'u'x rik'in ri Jesucristo re wawe' pa cárcel toq yin xintzijoj ri kolotajik chire.

¹¹ Rubanon kan ri Onésimo*f1* man jun xk'atzin-wi chawe rat, jak'a re wakami yalan nik'atzin chuwe yin, y chuqa' chawe rat

¹² Wakami ninteq k'a el awik'in, stape' kan janila q'axo'n nuna' ri wánima, roma rija' kan achi'el xa ta xuk'uaj ri wánima.

¹³ Yin ninwajo' chi ri Onésimo nik'oje' ta wik'in wawe' pa cárcel richin yirilij, pan ak'exel rat, roma rat man yatikir ta yak'oje-pe wik'in re akuchi in tz'apel-wi roma ri utzilej ch'abel richin kolotajik.

¹⁴ Jak'a man ninwajo' ta ninben nuyon yin wi rat man naya' ta q'ij. Chuqa' man ninwajo' ta yatinya' pa k'ayew; xa kan talex na k'a pe pan awánima rat ri k'atzinel chi naben.

¹⁵ Rik'in juba' man ruyon ta itzel xuk'en-pe chawe chi ri Onésimo xel-pe awik'in jun ka'i-oxi' q'ij, roma wakami xtitzolej chik jun bey awik'in, richin jantape'.

¹⁶ Toq rija' xel-pe awik'in, xa choj jun loq'on samajel. Jak'a re wakami man xaxe ta asamajel, xa kan qach'alal chik roma xunimaj yan ri Jesucristo. Stape' yin kan janila ninwajo' ri Onésimo, rat kan más ta k'a xtawajo'.

¹⁷ Wi junan qawech awik'in, kan tak'ulu' k'a jebel ri Onésimo, kan achi'el xa ta yin ri yinak'ul.

¹⁸ Y wi k'o jun banobel ri man utz ta rubanon kan chawe, o wi k'o ruk'as awik'in, tabij-pe chuwe, y yin xtintoj.

¹⁹ Roma yin, Pablo, kan ninya' nutzij chawe chi kan xtintoj-wi ri ruk'as, stape' wetaman chi rat k'o jun nimalej ak'as wik'in.

²⁰ Roma ri' ninwajo' chi naben ri utzil ri xink'utuj yan chawe, chi tak'ulu' jebel ri Onésimo. Y rik'in ri' xtaya' kikoten pa wánima.

²¹ Yin xintz'ibaj re wuj re' chawe roma kan kuqul-wi nuk'u'x awik'in chi kan xtaben ri xink'utuj chawe. Man xaxe ta ri utzil ri' xtaben, xa kan wetaman-wi chi xtaben más.

²² Kan tachojmirisaj yan k'a jun wachoch, roma yin kan woyoben chik chi ri Dios xtuben achi'el ri ik'utun chire pa nuwi' chi yinel-el re wawe' pa cárcel y yinapon iwik'in.

Ri ruk'isibel taq ch'abel

²³ Ri qach'alal Epafras ri k'o wik'in wawe' pa cárcel roma ri Cristo Jesús, nuteq-el rutzil-awech.

²⁴ Y keri' chuqa' ri qach'alal Marcos, ri Aristarco, ri Demas y ri Lucas, ri e wachibil pa samaj, nikiteq chuqa' el rutzil-iwech.

²⁵ Ja ta ri rutzil ri qajaw Jesucristo xtik'oje' pa taq iwánima chi'iwonojel. Kan keri' ta k'a.