Ez 6 - Kaqchiquel Bible

Ch'owen chikij ri wachibel ri xekiben ri winaqi'

¹ Ri Jehová k'o chik k'a ri xuq'alajirisaj chinuwech y xubij chik chuwe:

² Rat Ezequiel, ke'atzu' la nima'q taq juyu' ri ek'o pa ruwach'ulew Israel y kere' tabij pa kiwi':

³ Kan xtipe jun labal pa kiwi' ri juyu', ri taq'aj ruwi' taq juyu', ri ch'uti'n raqen taq ya' y ri taq'aj. Chuqa' kan xkewulatej k'a ri akuchi niya'ox-wi kiq'ij ri wachibel.

⁴ Xkenwulaj k'a jumul ri porobel ri akuchi nisuj ri kamelabel y ri akuchi niporox-wi ri pom. Chuqa' xtinben chi ri winaqi' chaq k'ate' xkeken-qa chikiwech ri wachibel ri e kibanon-q'anej.

⁵ Kan xtink'eq k'a ri kich'akul chikiwech ri wachibel ri e kibanon y ri kibaqil xtintaluj chuwech ri porobel.

⁶ Y xabakuchi k'a xkek'oje-wi chire ri ruwach'ulew, xa kan xkenwulaj ri kitinamit. Chuqa' kan xtink'is ri akuchi niya-wi kiq'ij ri wachibel, ri porobel y konojel ri wachibel. Keri', xkek'is ri e kibanon-qa rije'.

⁷ K'a toq xtikitz'et na chi janila winaqi' israelita xkeken, k'ari' xtiketamaj chi ja yin Jehová.

⁸ Jak'a yin xtinben chi man xkeken ta konojel ri winaqi' chi espada, xa k'a xkek'ase' na kan jujun chike rije' y ri xkek'ase' na kan xa xkentaluj-el chuwech re ruwach'ulew.

⁹ Y rije' kan xkinoqaqa k'a chikik'u'x toq juk'an chik chire re ruwach'ulew ek'o-wi. Kan xtoqaqa k'a chikik'u'x chi janila kisokon ri wánima roma man xkiben ta ri xinbij chike y chuqa' roma xkich'er kan ki' wik'in y xekitzeqelibej ch'aqa' chik dios. Y k'ari' itzel xtikina-qa roma ri itzel taq kibanobal ri xekibanala'.

¹⁰ K'ari' xtiketamaj chi ja yin Jehová. Toq xinbij chi ninbenya-pe ri rutojbalil-mak pa kiwi', kan xinben ri xinbij, xcha'.

¹¹ K'ari' ri Jehová xubij chuwe: Tapaq'apa' k'a ri aq'a' y tatinita' ri awaqen roma bis y kasik'in k'a roma q'axo'n, roma ri janila itzel taq kibanobal ri xekibanala' ri awinaq israelita. Xa kan xkeken pan oyowal, wayjal y yabil.

¹² Jujun chike rije' xkeken roma yabil, ch'aqa' chik xkeken pa labal y ri winaqi' ri xketotej kan, xkeken roma wayjal; richin keri' xtik'is ri woyowal chikij rije'.

¹³ Xtiketamaj chi ja yin ri' ri in Jehová, toq xtikitz'et ri kaminaqi' ri e li'an chikiwech ri wachibel y chuchi' ri porobel y toq xkek'oje' kaminaqi' ri akuchi nikiya' kiq'ij ri wachibel y xkisuj-wi ri jubulej taq aq'om ri chiri' pa ruwi' taq juyu', pa taq'aj, chikixe' che' ri e jebel rex-rex.

¹⁴ Chupan ri q'ij ri', xtintzeqej k'a nuq'a' pa kiwi' ri awinaq israelita richin ninya' rutojbalil-mak pa kiwi'. Y kan k'a kela' pa xokon chire ri tz'iran ruwach'ulew, k'a kela' pa xaman chire ri tinamit Riblá, kan xtinben k'a tz'iran chire chijun ri ruwach'ulew. Y kan xtiketamaj chi ja yin Jehová, xcha' chuwe.