Ez 5 - Kaqchiquel Bible

¹ Ri Jehová xch'on chik wik'in y xubij chuwe: Rat Ezequiel, tabek'ama-pe jun qupibel ri jebel rey y k'ari' xtasokaj-el ri rusumal-awi' y ri rusumal-achi'. K'ari' xtabek'ama-pe jun etabel y xtawetaj ri rusumal-awi' pan oxi' chuyaj.

^2-3 Y toq xtak'is ri oyowal chirij ri ruwachibel ri tinamit Jerusalem, jari' toq xtaporoj ri jun nabey chuyaj chire ri rusumal-awi' pa ruwi' ri xan. Ri jun chik chuyaj xtaya' pa ruwi' ri xan y k'ari' xtatzak'ij rik'in espada. Y chire ri rox chuyaj xtak'en kan ka'i-oxi' raqen rusumal-awi' y xtaxim chutza'n-qa ri atziaq. Y ri xtik'oje' kan xtak'eq-el pa kaq'iq'. Y re' nuk'exewachuj chi kan keri' xtinben iwik'in rix y kan xkixintzeqelibej rik'in espada.

⁴ Y chire ri rusumal-awi' ri ayakon kan, xtak'en-pe ka'i-oxi' y re' xtaya-qa pa q'aq'. Y chiri' xtel-wi-pe ri q'aq' ri xtik'aton richin ri tinamit Israel.

⁵ Yin Jehová ri in rajaw ronojel ri xibin chawe ri k'o chi naben y kere' xinbij: Ri tinamit Jerusalem, ja yin ri xibanon chire richin xk'oje' pa kinik'ajal nima'q taq tzobaj winaqi' richin re ruwach'ulew.

⁶ Jak'a ri winaqi' xa xkipaba-ki' y man xkitaqej ta ronojel ruwech pixa' ri nuya'on chike. Rije' kan más k'a itzel xekiben chikiwech ri winaqi' ri ek'o chikinaqaj. Rije' kan xketzelaj ri nubin chike y kan man xkiben ta.

⁷ Roma ri' yin Jehová ri in rajaw ronojel, ninya' k'a re rutzijol re' chike ri awinaq ri ek'o pa Jerusalem, kere' k'a ninbij chike: Rix más ix yakatajineq chuwij, ke chikiwech ri ch'aqa' tzobaj winaqi' richin re ruwach'ulew ri ek'o chi'inaqaj. Chuqa' xa kan man ibanon ta ronojel ri nubij ri pixa' ri nuya'on chiwe, ni man itzeqeliben ta chuqa' ri kipixa' ri ch'aqa' chik ruwach'ulew.

⁸ Xa roma ri' yin Jehová ri in rajaw ronojel ninbij chi yin chuqa' xkiyakatej chiwij rix winaqi' aj-Jerusalem. Kan chikiwech k'a ri tinamit ri ek'o chi'inaqaj xtinben chiwe chi xtijoj ri imak.

⁹ Roma ri itzel taq wachibel ri xiya' kiq'ij, roma ri' xtinbenbana' k'a chiwe ri man jun bey nubanon y man jun bey chik xtinbenbana'.

¹⁰ Kan xtinben k'a chi jujun chiwe rix xtitej-qa ri iwalk'ual, y jujun chike ri ch'aqa' chik iwalk'ual xkixkitej-qa rix. Yin kan xtinya' k'a rutojbalil-mak pan iwi' y ri k'a xkek'ase' na kan xkentaluj chuwech re ruwach'ulew.

¹¹ Rix xitz'ilobisaj ri wachoch rik'in ri kiwachibel ri i-dios y ri itzel taq ibanobal ri kan nuben chuwe chi itzel nintz'et. Roma ri' yin Jehová ri in rajaw ronojel, kan ninya' nutzij y ninbij chi yin kan xkixinwixowaj chuqa'. Man xtinya' ta chik wutzil pan iwi' y man xtinjoyowaj ta chik iwech.

¹² Jun chire ri oxi' tzobaj chiwe rix xkeken roma yabil y roma wayjal. Y ri jun chik tzobaj xkekamisex chi espada y ri jun ruk'isibel tzobaj ri k'a xkek'oje' na kan, kan xkentaluj k'a el chuwech ri ruwach'ulew. Y rik'in ri espada ri eleneq pa ruk'ojelibal xkenwoqotaj-el.

¹³ Toq xinwelesaj yan k'a ri woyowal chiwij, k'ari' xtich'uch'u' ri wánima y xtiwetamaj k'a chi ja yin Jehová ri yibanon roma kan janila yakatajineq woyowal chiwij.

¹⁴ Yin kan xtinben k'a chire ri itinamit Jerusalem chi kan man jun chik rejqalen. Kan xtinqasaj k'a ruq'ij chikiwech konojel ruwach'ulew ri ek'o chunaqaj.

¹⁵ Kan konojel k'a ri winaqi' kichin ch'aqa' chik ruwach'ulew xtiketzelaj y xtikitze'ej. Chuqa' kan xtik'atzin richin k'ixbilal chike ri ch'aqa' chik ruwach'ulew ri ek'o chunaqaj, roma yin xtinq'et-tzij pa ruwi' rik'in oyowalen y rik'in ch'olinik.

¹⁶ Xtinben k'a chi xtipe jun nima-wayjal pan iwi', kan achi'el jun ch'ab ri nuwulaj ronojel. Y kan xtinimer ri wayjal, achi'el toq yek'aq k'iy ch'ab. Man jun k'a wineq ri xtik'oje' pa ruk'iyal q'utun rik'in richin chi ja ta ri' xtiloq' rik'in.

¹⁷ Kan xtinteq k'a pe nima'q taq wayjal y chuqa' k'uxunela' taq chikopi' chi'ikojol richin yekik'is ri iwalk'ual. Chuqa' xtinteq-pe nima'q taq yabil y labal chi'ikojol richin keri' e k'iy xkeken. Yin Jehová ri yibin ronojel re', xcha'.