Ez 45 - Kaqchiquel Bible

Ri juba' ulew ri nich'ar kan chire ri Jehová

¹ Toq xtitaluj rik'in sakinik ri ruwach'ulew ri xtikik'ulumaj kan chikijujunal ri tzobaj, k'o chi nich'er kan juba' ulew ri nok wichin yin. Ri raqen ri ulew ri' 7,485 jaj y 5,947 jaj ri ruwech. Ri ulew ri' kan xtijach chuwe yin Jehová.

² Chupan k'a ri ulew ri' xtiban-wi ri wachoch yin y xtik'atzin 150 jaj ri pa taq kaji' ruxikin. Y chirij chijun re wachoch xtik'oje' kan jun soq'olbel ri wolajuj jaj ruwech.

³ Y pa nik'aj chire ri ulew ri jachon chik chuwe, niwetaj 7,485 jaj ri raqen y 2,973 jaj ri ruwech. Y chiri' xtik'oje-wi ri wachoch.

⁴ Ri juba' chik chire re ulew re', jari' ri xtok kichin ri sacerdote ri yesamajin ri wachoch, roma rije' kan xkejel-apo wik'in richin yinkisamajij y kan chiri' chuqa' xtik'oje-wi ri kachoch rije'. Y re ulew re' kan xtik'oje' k'a janila rejqalen.

⁵ Y ri nik'aj chik chire chijun ri ulew ri' ri k'o 7,485 jaj raqen y 2,973 jaj ruwech, jari' ri nok kichin ri levita ri yesamej chupan ri wachoch, richin chi k'o akuchi yek'oje-wi y nikiben-q'anej ri kitinamit.

⁶ Y pa ruk'isibel nich'ar chik kan juba' ulew ri k'o 7,485 jaj ri raqen y 1,487 jaj ri ruwech. Y xtik'oje' chunaqaj ri akuchi k'o-wi ri ulew ri akuchi k'o-wi ri wachoch. Re ulew re' kan xtok k'a richin ri tinamit.

Nich'ar kan juba' ulew chire ri q'atoy-tzij

⁷ Chuqa' xtich'er kan juba' ulew kichin ri e tata'al y re ulew re' xtusutij-rij ri ulew ri wichin yin Jehová, y ri ulew ri richin ri tinamit. Nuchop-pe ri pa ruxikin, ri k'o pa qajbel-q'ij, niq'ax chuchi' ri ulew ri richin ri tinamit, k'ari' niq'ax pa ruxikin ri ulew ri k'o pa relebel-q'ij; kan chi oxi' k'a ruxikin xtiq'ax-wi.

⁸ Re jun ulew re' xtok kichin ri e tata'al ri ek'o pa kiwi' ri iwinaq israelita, richin keri' man jun bey chik xkekiya' pa tijoj-poqonal ri nutinamit. Richin keri' man xkekichapala' ta ulew ri xtijach chikiwech richin nok kichin chikijujunal ri tzobaj.

Ri ruchojmilal rik'in ri q'atoy-tzij

⁹ Yin Jehová ninbij: Rix ri ix q'atoy taq tzij richin ri Israel, man chik ke'iben ch'a'oj ni man chik tiben chike richin nikitej poqon ri nuwinaq. Xa kan tibana' ronojel pa ruchojmilal y rik'in ruch'ajch'ojil. Man chik timej kulew ri nutinamit.

¹⁰ Tikusaj ri etabel y pajbel ri kan e tz'aqet.

¹¹ Ri etabel*f14* richin jalajoj ruwech ixin k'o chi junan rik'in ri etabel ri k'o ruya'al.

¹² Y keri' chuqa' k'o chi nik'oje' jun marco ri kan tz'aqet.*f15*

¹³ Rix israelita k'o chi niya' jun sipanik y jare': Chupan oxk'al libra jalajoj ruwech ixin, rix k'o chi niya' jun libra chuwe.

¹⁴ Chupan wok'al litro aceite richin olivo, k'o chi niya' jun litro chuwe.

¹⁵ Y chike e 200 karne'l k'o chi niya' jun chuwe. Kere' k'a ri rubanik ri sipanik richin jalajoj ruwech ixin, ri chikop ri niporox chijun y ri sipanik richin niq'alajirisan chi junan iwech wik'in, richin nink'en chik iwech.

¹⁶ Chi'iwonojel rix israelita k'o chi niya' re sipanik re' chire ri q'atoy-tzij.

¹⁷ Y ri q'atoy-tzij ri' ja rija' ri nijachon ri chikopi' richin yeporox y ri k'atzinel ri nuk'uaj ri sipanik richin jalajoj ruwech ixin y ri vino ri nikusex pa nimaq'ij richin k'ak'a' ik', pa taq q'ij richin uxlanen y ri k'atzinel pa taq jalajoj ruwech nimaq'ij ri niban pa ruwach'ulew Israel. K'o chi nujech-apo ri kamelabel richin kuyubel-mak, ri sipanik richin jalajoj ruwech ixin, ri chikop ri niporox jumul y ri sipanik ri niq'alajirisan chi junan iwech wik'in. Y keri' nink'en chik iwech.

Ri jalajoj kiwech nimaq'ij

¹⁸ Yin Jehová ninbij: Chupan ri nabey q'ij chire ri nabey ik' chire ri juna', rix xtisuj k'a jun kamelabel richin xtich'ajch'ojir ri wachoch. Y ri chikop ri nik'en-pe; jun alaj achij wákix ri kan tz'aqet.

¹⁹ Ri sacerdote xtuchop juba' chire ri rukik'el ri wákix ri' richin nusuj richin jun kamelabel richin kuyubel-mak. Ri kik' ri' xtuchop nusu' chikij ri che' ri e chapayon ri ruchi' ri wachoch, pa taq ruxikin richin ri porobel y chikij ri che' ri e chapayon ruchi' ri okibel ri k'o chuwa-jay.

²⁰ Y wi k'o jun wineq ri nimakun ri xa man ruch'obon ta richin nuben, o man xuna' ta xmakun, wi keri' ri sacerdote k'o chi xtuben chik jun bey pa ruwuq q'ij chire ri ik'. Richin keri' xtich'ajch'ojir ri wachoch.

²¹ Ri q'ij kajlajuj chire ri nabey ik' chire ri juna', xtinimaq'ijuj ri q'ij toq yin xinya' chiwe ri Solbelri'il y re' xtiben wuqu' q'ij. Y chupan ri wuqu' q'ij ri' xtitej kaxlan-wey ri maneq ch'amilej-q'or rik'in.

²² Chupan k'a ri q'ij ri' ri q'atoy-tzij xtuk'en-pe jun nima-alaj achij wákix richin jun kamelabel richin kuyubel-mak richin rija' y konojel ri winaqi' israelita.

²³ Y chikijujunal ri wuqu' q'ij, xtuk'en-pe wuqu' nima-alaji' achija' taq wákix y wuqu' achija' karne'l ri kan e tz'aqet. Y xtisuj re' richin jun sipanik ri yeporox jumul. Y chuqa' ronojel q'ij chire ri nimaq'ij xtisuj jun tzuntzun richin kamelabel richin kuyubel-mak.

²⁴ Rik'in chikijujunal ri wákix y chikijujunal ri karne'l, ri q'atoy-tzij k'o chi xtuya' chuqa' jun sipanik rik'in juwineq libra jalajoj ruwech ixin y oxi' litro rik'in nik'aj aceite richin olivo.

²⁵ Chuqa' chupan ri q'ij wolajuj chire ri ruwuq ik' k'o chi ninimaq'ijuj wuqu' q'ij toq yeban jay rik'in ruq'a-che'. Y ja ri q'atoy-tzij k'o chi xtik'amon-pe chikopi' ri achi'el rajlabal ri xuk'en-pe pa nabey, richin kamelabel richin kuyubel-mak y junan rajlabal ri xuk'en-pe pa nabey richin sipanik richin ri jalajoj ruwech ixin y ri sipanik richin aceite.