Ez 44 - Kaqchiquel Bible

Ri rukusaxik ri okibel ri k'o pa relebel-q'ij

¹ Chirij ri' ri achin xiruk'uaj chik el pan okibel ri k'o chirij el ri rachoch ri Dios ri nitzu'un pa relebel-q'ij y ri' tz'apen kan.

² Y ri Jehová xubij k'a chuwe: Re jun okibel re' xtitz'ape' kan y man jun xtijaqon richin ni man jun xtok-apo ri chiri', roma chiri' xkinok-wi yin ri in i-Dios. Y roma ri' kan jantape' k'a xtitz'ape'.

³ Xa kan xaxe ri q'atoy-tzij ri xtok-apo chiri', richin chi niberutija-pe ri xtisuj chuwe. Y toq xtok-apo pa wachoch, rija' k'o chi nok-apo chupan ri okibel ri'. Y chuqa' toq xtel-pe, k'o chi nel-pe ri chiri', xcha'.

Ri ruk'amon ri ye'ok pa rachoch ri Dios.

⁴ Chirij k'a ri' ri achin xiruk'uaj-el pan okibel ri k'o pa xaman chuwech-apo ri rachoch ri Dios. Y toq xojok-apo, xintz'et k'a chi ri ruk'ojlemal ri Jehová runojisan chijun ri rachoch rija'. Y yin kixukuk xiqaqa pan ulew chuwech.

⁵ K'ari' ri Jehová xubij chuwe: Rat Ezequiel, kan tajaqa' jebel ri runaq' taq awech y tawak'axaj jebel ronojel ri xtinbij chawe chirij ri ruchojmilal richin ri wachoch. Kan tatz'eta' k'a jebel ri achike ruk'amon ri ye'el-ye'ok chupan ri wachoch.

⁶ Taya' re rutzijol re' chike ri awinaq israelita roma rije' e yakatajineq chuwij. Y jare' k'a ri rutzijol: Kixtane' chubanik ri itzel taq ibanobal rix winaqi' israelita.

⁷ Rix niben chire ri wachoch chi maneq rejqalen. Chuqa' niya' q'ij chike ri man e iwinaq ta richin ye'ok-apo chupan ri wachoch, winaqi' ri maneq ketal richin ri nujikibel-tzij ri nubanon iwik'in y ni ta k'o ketal pa taq kánima richin niq'alajin chi e wichin yin. Xiben chire chi maneq rejqalen ri wachoch, roma xisuj q'en y kik' kichin ri kamelabel chiri'. Chuqa' xixolq'otij ruwi' ri nujikibel-tzij ri nubanon iwik'in, roma xiben itzel taq banobel ri kan man utz ta nintz'et yin.

⁸ Y xa man itaqen ta ronojel ri k'o chi niban pa wachoch, roma xa pa kiq'a' winaqi' ri man e iwinaq ta iya'on-wi kan ri kisamaj ri sacerdote.

⁹ Roma ri' yin Jehová ninbij chi man jun wineq ri xtok-apo pa wachoch ri man iwinaq ta, ri xa man ruk'uan ta retal pa ránima y chuqa' man ruk'uan ta retal chirij ri ruch'akul richin ri nujikibel-tzij ri nubanon iwik'in.

¹⁰ Ek'o k'a levita ri xkich'er kan ki' wik'in toq ri iwinaq xkijech'ej kan ki' wik'in y xinkimalij kan richin xkiya' kiq'ij wachibel. Y roma ri' xtikejqalej ri kimak.

¹¹ Man rik'in ri' ri levita ri' nuya'on q'ij chike richin nikiben ch'aqa' chik samaj pa wachoch. Ja rije' ri xkechajin ri ruchi' ri wachoch y xkekikamisaj ri chikopi' ri yeporox jumul y ch'aqa' chik kamelabel. Chuqa' rije' xtikinaba-ki' richin yekisamajij ri iwinaq.

¹² Keri' xtikiben roma rije' xa xek'oje' chiri' richin xekisamajij ri ch'aqa' chik israelita richin xekiya' kiq'ij ri wachibel y keri' xkiben chike richin xemakun, roma ri' k'o chi xtikejqalej ri kimak.

¹³ Re winaqi' re' kan man e utz ta richin yesamej richin ye'ok sacerdote y chuqa' man e utz ta richin yekichop ri samajibel; k'atala' chik yekichop ri kan ch'aron chuwe yin. Kan k'o chi xtikejqalej ri ruk'ixbilal ri itzel taq kibanobal ri xekibanala'.

¹⁴ Xa roma ri' xtinben chike richin xkesamej q'ij-q'ij ri chiri' pa wachoch richin jantape' xtikiben ri kisamaj.

Ri e sacerdote

¹⁵ Jak'a ek'o levita ri e rijatzul kan ri Sadoc ri kan xkiben ronojel pa ruchojmilal toq ri ch'aqa' chik israelita xkijech'ej kan ki' chire ri nubey. Re sacerdote re' utz k'a xkejel-apo chinuwech richin nikisuj ri q'en y ri kik' richin ri kamelabel pa ruwi' ri porobel.

¹⁶ Xaxe k'a rije' ri xke'ok-apo pa wachoch y xkejel-apo rik'in ri nu-mesa richin yinkisamajij. Jak'a rije' ri xkek'oje' pa ruwi' ri nusamaj.

¹⁷ Toq ye'ok-apo richin yinkisamajij pa ruwa-jay o pa wachoch, man tikikusaj tzieq ri banon rik'in lana.

¹⁸ K'o chi nikikusaj jun kuchubel-kijolon retal kisamaj y re kuchubel re' k'o chi banon rik'in lino. Chuqa' k'o chi nikikusaj ri rupan ri kitziaq banon rik'in lino y man jun chik tzieq nikikusaj ri nuben chike chi yetz'oqpin.

¹⁹ Y toq ye'el-el chuwa-jay ri k'o chirij el ri akuchi ek'o-wi kan ri winaqi', k'o chi nikelesaj kan ri tzieq ri xkikusaj chupan ri samaj richin ri wachoch y nikikusaj chik el jun kitziaq richin chi man nipe ta jun ruk'ayewal pa kiwi' ri winaqi' ri'.

²⁰ Man tikijos-el ri rusumal-kiwi', chuqa' man tikiya' q'ij richin nik'iy-qa. Xa kan xaxe choj tikisokaj-el.

²¹ Man jun chike rije' ri nuqum ta vino toq nok-apo pa ruwa-jay ri k'o chunaqaj ri wachoch.

²² Man jun chike ri sacerdote ri' ri xtik'ule' rik'in jun ixoq malka'n o rik'in jun rujachon-ri' rik'in rachijil. Xa kan xaxe utz nik'ule' rik'in jun xten o rik'in jun malka'n rixjayil kan jun sacerdote.

²³ Rik'in ri' nikik'ut chikiwech ri winaqi' ri rukojolil ri k'o rejqalen y ri maneq rejqalen, rukojol ri ch'ajch'oj y ri man ch'ajch'oj ta.

²⁴ Toq k'o jun ch'ojikil chi'ikojol, rije' xke'ok to'onela' y xtikiq'et-tzij achi'el nubij chupan ri nupixa'. Chuqa' rije' kan k'o chi xtikitzeqelibej ri ruchojmilal, k'o chi nikinimaq'ijuj ronojel nimaq'ij y xtikiya' rejqalen ronojel q'ij richin uxlanen.

²⁵ Man jun bey tikichajij o tikichop jun kamineq y rik'in ri' ye'ok man e ch'ajch'oj ta. Jak'a wi niken ri rutata', ri rute', jun ruk'ajol, jun rumi'al, jun runimal, ruchaq' o jun rana' ri man k'ulan ta, kan utz nik'oje' chiri'.

²⁶ Ri sacerdote ri nibanon keri' kan k'o chi nuch'ajch'ojirisaj-ri' y chirij ri' k'o chi nroyobej chik wuqu' q'ij.

²⁷ Y ri q'ij toq nok chik apo ri pa ruwa-jay ri k'o chunaqaj ri wachoch richin chi nuben chik ri nusamaj, pa nabey k'o chi nusuj jun kamelabel richin kuyubel-mak.

²⁸ Rije' man jun ulew ri xkichinaj ta kan roma ja yin ri yiya'on ri nik'atzin chike. Kan man jun k'a xkichinaj chire ri iruwach'ulew Israel. Roma ja yin ri xinkichinaj.

²⁹ Utz nikitej ri jalajoj ruwech ixin ri nisuj chuwe y chuqa' ri chikop richin ri kamelabel richin kuyubel-mak. Y ronojel ri nijech chuwe kan xtok k'a kichin rije'.

³⁰ Ri sacerdote kan xtikik'ul chuqa' ri nabey jebelej ruwech tiko'n y xtikik'ul chuqa' ronojel sipanik. Ri nabey taq q'or*f13* richin ri ikaxlan-way xtiya' k'a chike rije'. Wi keri' xtiben, kan xtik'ul k'a urtisanik pa taq iwachoch.

³¹ Jak'a ri sacerdote man tikitej man jun ruwech aj-xik' chikop o chikop ri ruyon xken o chikop ri xwech' ta kan roma jun k'uxunel chikop.