Ez 43 - Kaqchiquel Bible

Ri ruk'ojlemal ri Dios nitzolej chik pa rachoch rija'

¹ Y ri achin xiruk'uaj chik k'a pan okibel richin ri tz'aq ri nitzu'un pa relebel-q'ij.

² Y jari' toq ri ruk'ojlemal ri Dios kichin ri winaqi' israelita peteneq kere' pa relebel-q'ij. Kan niwajin peteneq achi'el toq niwajin jun nimalej raqen-ya' y ri ruwach'ulew kan xnoj rik'in rusaqil richin ri ruk'ojlemal.

³ Y ri rubanik ri xintz'et, achi'el ri xk'utumej chinuwech toq xpe richin xoruwulaj kan ri Jerusalem y chuqa' achi'el rubanik ri xk'utumej chinuwech ri chuchi' ri raqen-ya' Quebar. Y roma ri' yin kixukuk xiqaqa pan ulew.

⁴ Y ri ruk'ojlemal ri Jehová xok k'a apo pan okibel ri nitzu'un pa relebel-q'ij.

⁵ K'ari' ri ruchuq'a' ri Jehová xiruyek-q'anej y xiruk'uaj-el pa ruwa-jay ri k'o chunaqaj ri rachoch y xintz'et ri ruk'ojlemal ri Jehová xunojisaj ri rachoch.

⁶ Rokik k'o wik'in ri achin, jari' toq xinwak'axaj chi ri Jehová kan k'a pa rachoch nich'on-pe wik'in.

⁷ Y xubij k'a chuwe: Rat Ezequiel, jare' ri ruk'ojelibal ri nutz'uyubal y ri akuchi xkipa'e-wi. Kan wawe' k'a xkik'oje-wi q'asen chikikojol ri awinaq israelita. Rije' y ri ki-rey man jun bey chik xtikiqasaj nuq'ij. Kan man jun bey chik xtikiya' kiq'ij ch'aqa' chik dios y man xkekilij ta chik. Chuqa' man xtikiben ta chik q'anej kiwachibel ri ki-rey akuchi yekiya-wi kiq'ij ri wachibel toq xeken yan el.

⁸ Rije' xkiben-q'anej kachoch chunaqaj ri ruchi' ri wachoch yin y xaxe jun tz'aq ri xk'oje' chiqakojol. K'ari' rije' xkiqasaj ruq'ij ri loq'olej nubi' rik'in ri itzel taq kibanobal ri kan man utz ta nintz'et yin. Y roma ri' xinoyower kik'in y xek'is.

⁹ Wakami k'a, wi xtikimalij kan ri itzel taq banobel ri man niqa' ta chinuwech yin y wi man xtikiben ta chik ri wachibel ri kan nikiya' kiq'ij, k'ari' yin xkik'oje' chikikojol richin q'asen.

¹⁰ Rat Ezequiel, tatzijoj chike ri awinaq chi xatz'et ri wachoch, keri' xkek'ixbitej roma ri kimak.

¹¹ Y wi xkek'ixbitej roma ri kibanobal k'ari' xtabij ronojel chike ri achike rubanik ri wachoch y ri achike ek'o chupan, ri akuchi niban-wi oken y elen y chijun k'a rubanik ri jay y ri achike rubanik ri pixa' ri k'o chi nikitaqej. Tatz'ibaj ronojel re' chikiwech richin chi nikitz'et ri achike rubanik y kan xtikiben. Tatz'ibaj chuqa' ronojel ruwech pixa' richin kan nikiben ri nubij.

¹² Jak'a pixa' re' ri k'o janila rejqalen. Chijun ri ulew ri akuchi k'o-wi ri wachoch, re pa ruwi' re juyu' re', kan xtich'ar chuwe yin.

Ri porobel

¹³ Jare' ri retabal ri porobel y ri etabel ri nakusaj, ja ri nukusaj ri rey. Y ri porobel ri' k'o jun jul ri xk'oje' kan chuxe' ri rusutin-ri' chirij y ri rupan ri jul ri' ka'i' q'a'aj rik'in nik'aj y ri ruwech chuqa' ka'i' q'a'aj rik'in nik'aj. Y ri jul ri' k'o jun ruchi' ri k'o qa chuwech ri ulew y chuwech-pe ri jul. Y ri rujotolen k'o jun q'a'aj rik'in ka'i' ruwi' q'a'aj. Jare' ri ruxe' ri porobel.

^14-17 Ri porobel k'o pa ruwi' jun ch'okolibel. Y pa ruwi' ri' k'o oxi' wiq. Ri nabey wiq, ri ruwech y ri raqen wo'o' jaj rik'in ka'i' q'a'aj y ri rujotolen wo'o' q'a'aj. Y ri ruka'n wiq, ri ruwech y ri raqen kaji' jaj rik'in jun q'a'aj y ri rujotolen jun jaj rik'in jun q'a'aj. Y ri rox wiq, ri ruwech y ri raqen oxi' jaj rik'in oxi' q'a'aj y ri rujotolen jun jaj rik'in jun q'a'aj. Y chuchi' ri ruka'n wiq k'o jun ti che' q'eban y ri retabal jun q'a'aj rik'in ka'i' ruwi' q'a'aj. Y pa ruwi-q'anej chi oxi' wiq ek'o kaji' achi'el taq uk'a' pa taq ruxikin ri porobel. Y richin yajote-q'anej rik'in ri porobel ek'o grada ri nitzu'un pa relebel-q'ij.

¹⁸ Rat Ezequiel, yin Jehová ninya' chawe ri ruchojmilal richin xtijach chuwe ri porobel ri' toq xtapon ri q'ij richin nik'achoj. Ri pa nabey q'ij k'o chi xtisuj jun awej ri niporox jumul y k'ari' xtichikex ri rukik'el ri awej pa ruwi' ri porobel.

¹⁹ Y ri xkesamej-apo wik'in ja ri e levita e rijatzul kan ri Sadoc. Xtaya' k'a chike jun nima-alaj achij wákix richin chi xtikisuj kamelabel richin kuyubel-mak. Ja yin Jehová ri yibin.

²⁰ Xeri' xtak'en-el juba' ri rukik'el ri wákix ri' y xtachikaj chikij ri kaji' uk'a' ri pa taq ruxikin ri ti che' ri rusutin ri ruchi' ri porobel y k'ari' xtachikaj chirij ronojel. Y keri' xtich'ajch'ojir ri porobel chire ri mak, richin xtijach chuwe.

²¹ Xeri' xtak'uaj-el ri ruch'akul ri wákix ri richin kuyubel-mak chuwa-jay richin ri wachoch akuchi ch'aron-wi richin niporox.

²² Y ri ruka'n chik q'ij xtasuj chik jun kamelabel richin kuyubel-mak y xtasuj jun ti alaj achij tzuntzun ri kan tz'aqet. Y ri sacerdote xtikich'ajch'ojirisaj chik ri porobel achi'el xiben rik'in ri wákix pa nabey.

²³ Toq xkak'achoj chire re', kan k'o chi xtasuj jun nima-alaj wákix y jun achij karne'l y re chikopi' re' kan k'o chi e tz'aqet.

²⁴ K'ari' xtasuj chinuwech y ri sacerdote xtikiya' atz'an chikij ri kich'akul y xkekiporoj jumul chinuwech yin richin nikiya' nuq'ij.

²⁵ Ronojel k'a q'ij chi wuqu' q'ij k'o chi nasuj chinuwech jun achij tzuntzun richin jun kamelabel richin kuyubel-mak. Chuqa' xtasuj jun nima-alaj achij wákix y jun achij karne'l y konojel re' k'o chi e tz'aqet.

²⁶ Kere' xtiben q'ij-q'ij chi wuqu' q'ij y ri sacerdote k'o chi nikich'ajch'ojirisaj ri porobel richin keri' nich'ar chuwe yin y yin kan xtink'awomaj.

²⁷ Keri' xtiben chi wuqu' q'ij y ri ruwaqxaq q'ij, ri sacerdote xtikichop nikisuj ri chikop richin niporox jumul y ri kamelabel richin niq'alajirisan chi junan iwech wik'in. K'ari' xkixink'awomaj chik pe y kan xkixqa' chinuwech. Yin Jehová ri yibin, xcha' chuwe.