Ez 41 - Kaqchiquel Bible

^1-2 Toq oj q'axineq chik chupan ri jay ri', xojapon chuchi' ri rachoch ri Dios. Ri ruchi-jay oxi' jaj ruwech y k'o jujun pilar pa taq ruxikin. Ri kiwech ri pilar ri' jun jaj rik'in nik'aj y ri kipimil jun jaj rik'in nik'aj. Y toq xqaq'axaj chik ri ruchi' ri jay ri', ri achin xretaj. Y kablajuj jaj raqen y waqi' jaj ruwech.

³ Xeri' xojapon chuchi' jun chik jay y xojpa'e-qa chiri'. Y k'o k'a jun ruchi-jay ri k'o jun jaj rik'in nik'aj ruwech. Y k'o jujun pilar pa taq ruxikin y ri pilar ri' k'o wo'o' q'a'aj kiwech. Y ri kipimil jun jaj rik'in nik'aj.

⁴ Xeri' rija' xretaj rupan ri jay y waqi' jaj ruwech y waqi' jaj raqen. Y ri jay ri' jari' ri akuchi kan man jun wineq nok-apo, kan xaxe ri Dios.

⁵ Chirij ri' xretaj ri rupan ri tz'aq richin ri jay y k'o jun jaj rik'in nik'aj. Pa taq ruxikin ri rachoch ri Dios e banon k'iy jay. Y ri ketabal ri jay ri' jun jaj rik'in jun q'a'aj.

⁶ Re jay re' kik'uan-ki', ri jun k'o pa ruwi' ri jun chik y keri' nikiben oxi' wiq. Y chikijujunal wiq k'o juwineq lajuj jay. Ri tz'aq richin ri jay kan choj beneq-q'anej niq'alajin ri chuwech. Jak'a chupan ri tz'aq richin ri nabey wiq kan más pim rubanon. Y ri ruka'n wiq más chik juba' xax. Y ri tz'aq richin ri ruk'isibel wiq más ti xax. Keri' xban chire richin chi ri che' ri yeq'e'e', yeli'e-qa pa ruwi' ri wiq tz'aq ri e banon kan.

⁷ Roma ri' ri jay ri ek'o más pa jotol más e nima'q. Y chuqa' ek'o grada richin napon-q'anej k'a pa jotol.

⁸ Y xintz'et chi chijun ri rachoch ri Dios ya'on ruxe' ri nej jotol chikaj y pa ruwi' chuqa' ri' e paban-q'anej ch'aqa' chik jay y re kixe' re jay re' jun jaj rik'in nik'aj rujotolen.

^9-10 Ri tz'aq kichin ri juwineq lajuj jay jun jaj rik'in nik'aj ri kipimil. Y k'o k'a ruwa-jay pa taq ruxikin. Y ri ketabal ri ruwa-jay ri' waqi' jaj. Y chirij-apo ri', ek'o kachoch ri e sacerdote.

¹¹ Ri juwineq lajuj jay ri' k'o kaka' ki okibel, jun nitzu'un pa xaman y ri jun chik pa xokon. Y chirij ri tz'aq ri' xk'oje' kan jun rukojol y ri rukojol ri', ri ruwech jun jaj rik'in nik'aj.

Ri jay ri k'o pa qajbel-q'ij chire ri rachoch ri Dios

¹² Chirij-el ri rachoch ri Dios, k'o jun ruwa-jay. Y pa ruxikin-apo ri ruwa-jay ri', k'o jun chik jay. Y juwineq wuqu' jaj ruwech y juwineq jun jaj raqen. Y ri tz'aq richin ri jay ri' jun jaj rik'in nik'aj rupimil.

Chijun ri retabal ri rachoch ri Dios

¹³ Ri achin ri' xretaj ri rachoch ri Dios y chijun juwineq lajuj jaj raqen. Chuqa' xretaj ri ruwa-jay ri k'o pa ruxikin chire ri rachoch ri Dios, ri jay ri ek'o pa taq ruxikin y ri jun chik ruwa-jay y ri ruwech juwineq lajuj jaj.

¹⁴ Rija' xretaj ri ruwa-jay ri k'o chirij-el ri rachoch ri Dios y ri raqen beleje' jaj. Y keri' nitiker-el rik'in ri rachoch ri Dios y napon k'a rik'in ri tz'aq, k'o juwineq lajuj jaj raqen.

¹⁵ Ri jay ri k'o chirij ri rachoch ri Dios k'o chik jujun taq jay pa ruxikin. Y ri ruwech ri oxi' jay ri' juwineq lajuj jaj. Ronojel ri tz'aq ri ek'o chupan ri ka'i' jay ri ek'o chupan ri rachoch ri Dios y ri akuchi yatok-wi-apo

Ri rubanik ri rachoch ri Dios

^16-17 e tz'apen kiwech rik'in che'. Chuqa' ri ventana ya'on k'arak'ik taq che' chikiwech. Ronojel ri marco richin ri ruchi-jay tz'apen-kij rik'in che'. Chuqa' ri tz'aq ri k'o chupan ri jay ri' e tz'apen-kij rik'in che', nitiker-pe k'a chuxe-qa y napon-q'anej k'a rik'in ri ventana. Y chuqa' pa ruwi-q'anej ri ruchi' tz'apen rik'in che'. Re' xya'ox chupan ri oxi' jay ri richin ri rachoch ri Dios.

¹⁸ Y chuwech ri che' ri' e toch'on kiwachibel querubín y che' palma. Y chikikojol ri palma ek'o-wi ri querubín. Y ri querubín ri' k'o ka'i' kipalej.

¹⁹ Ri jun nitzu'un achi'el nitzu'un jun wineq y nitzu'un-apo rik'in ri palma ri k'o pa rajxokon. Y ri jun chik nitzu'un achi'el jun koj y nitzu'un-apo rik'in ri palma ri k'o pa rijkiq'a'. Y keri' rubanik rubanon chuwech chijun ri tz'aq.

²⁰ Kan keri' rubanon chijun ruwech ri tz'aq y keri' rubanon-q'anej pa ruwi' ri ruchi-jay.

²¹ Chikijujunal ri marco ri chapayon ri ruchi' ri rachoch ri Dios kan e tz'ajtz'eq. Y ri chiri' k'o jun porobel banon rik'in che',

Ri porobel ri banon rik'in che'

²² wo'o' q'a'aj raqen, wo'o' q'a'aj ruwech y jun jaj ri rujotolen. Ri pa taq ruxikin, ri rutz'uyubal y ri chi kaji' ruwech ri porobel ri' e tz'apen-kij rik'in che'. Y ri achin ri' xubij chuwe chi re mesa re' richin ri Jehová.

Ri ruchi' taq jay

²³ Ri ka'i' ruchi' taq jay richin ri rachoch ri Dios nijaq pa rajxokon y pa rijkiq'a'.

²⁴ Y chikijujunal k'o ka'i' ruxaq y toq yejaq kan nikibus-ki'.

²⁵ Chuwech ri ruchi' ri rachoch ri Dios chuqa' ek'o kiwachibel querubín y palma. Y kan junan kibanik kik'in ri ch'aqa' chik wachibel ri ek'o chuwech ri tz'aq. Chuqa' pa ruwi' ri okibel richin ri rachoch ri Dios e tz'apen rik'in che'.

²⁶ Y pa taq ruxikin ri okibel ri' ek'o ventana y ya'on k'arak'ik taq che' chikiwech. Y pa taq ruxikin ri ventana ri' ya'on kiwachibel palma. Ri ventana richin ri jay, ri kan kitunun-ki' rik'in ri rachoch ri Dios, chuqa' ya'on k'arak'ik che' chikiwech.