Ez 4 - Kaqchiquel Bible

Ri xtibebanatej rik'in ri Jerusalem

¹ Ri Jehová xubij k'a chuwe: Rat Ezequiel, kan chikiwech k'a ri winaqi' tabek'ama-pe jun xan y rik'in ri xan ri' tabana' jun ruwachibel ri tinamit Jerusalem.

² Y naben chire chi nasutij-rij chi tz'aq rik'in ulew. Chuqa' naben-q'anej jun bey pa jotol ri nusutij-rij chijun ri ruwachibel ri tinamit. Xtaben chuqa' kiwachibel aj-labal ri nikisutij-rij ri tinamit y xtiq'alajin ri tinamit chi ya'on pa nik'aj koma ri e etzelanel richin.

³ Xeri' nabek'ama-pe jun xot ri banon rik'in q'eqapueq y jari' xtok achi'el jun tz'aq rat y ri ruwachibel ri tinamit ri'. Y k'ari' xkak'oje' chuwech re tinamit achi'el xa ta nachop chi oyowal. Y re' xtok jun retal chikiwech ri awinaq israelita.

^4-5 Y chirij re', kakotz'e' y katzale' pan awajxokon 390 q'ij. Y re tijoj-poqonal re naq'axaj rat wakami, re' nuk'exewachuj ri 390 juna' ruk'ayewal ri xtikiq'axaj ri awinaq ri ek'o pa xaman roma ri kimak.

⁶ Y toq xtitz'aqet ri 390 q'ij, k'o chi yatzale' pan awijkiq'a' kawineq q'ij. Y re' nuk'exewachuj ri kawineq juna' ruk'ayewal ri xtikiq'axaj ri awinaq judío roma ri kimak.

⁷ Y keri' k'o chi xtak'ut ri tinamit Jerusalem ri sutin-rij koma ri aj-labal y xeri' naq'alajirisaj ri tijoj-poqonal ri xtikik'owisaj.

⁸ Jak'a toq xkakotz'e' pan ach'at, yin kan xkatinxim richin chi man yatzale' ta kela', man yatzale' ta kela' ri naben. K'a toq xtitz'aqet na ri 430 q'ij, k'ari' xkatotej-el y kan man xtatej ta chik poqon.

⁹ Chuqa' xtabek'ama-pe juba' jalajoj ruwech ixin achi'el ri trigo, ri cebada, ri aus, ri lenteja, ri mijo y ri avena. Ronojel re' tajok'o' y taxolo' pa jun k'ojelibel y ja ri' xtok away. Y re' jare' ri xtatej ri 390 q'ij toq xkatzale' ri pan awajxokon.

¹⁰ K'o chi yawa' ri hora ri ruk'amon, y ri natej q'ij-q'ij xa nik'aj libra.

¹¹ Y chuqa' kan k'o hora richin naqum aya' y ri xtaqum xaxe k'a ka'i' taq qumbel q'ij-q'ij.

¹² Ri rubanik ri away, ponon y k'o chi nachaq'arisaj pa q'aq', q'aq' ri banon rik'in chaqi'j pamaj richin wineq y kan chikiwech k'a konojel ri winaqi' xtaben-wi ri wey ri'.

¹³ Keri' ri awinaq ri ek'o kan chupan ri Jerusalem, kan xtikitej k'a ri man ch'ajch'oj ta y chuqa' ri chiri' pa ruwach'ulew ri akuchi ri xkentaluj-wi-el, xcha'.

¹⁴ Y jak'a yin xinbij chire chi yin man jun bey nuchapon ta ri xa man ch'ajch'oj ta. Chuqa' man jun bey nutijon ruch'akul jun chikop ri choj xken, o ruch'akul jun chikop ri xwech' koma k'uxunela' taq chikopi', ni man jun bey nutijon ta ti'ij ri man e ch'ajch'oj ta.

¹⁵ K'ari' ri Jehová xubij chik chuwe: Wakami k'a, ninya' q'ij chawe richin nachaq'arisaj ri akaxlan-way pa q'aq' ri banon rik'in chaqi'j pamaj richin bóyix, pa ruk'exel pamaj richin wineq.

¹⁶ Yin xtinben chi man xtik'oje' ta chik wey ri chiri' pa Jerusalem y ri winaqi' kan xtikitej k'a ri juba' ti kiway, jak'a man jun bey xtik'oje' uxlanibel-k'u'x kik'in. Y kan xtikiqum k'a ri juba' ti kiya' y man jun oyobenri'il kik'in.

¹⁷ Xaxe chik k'a juba' kiway y kiya' ri xtinya' y xtikitzula' k'a ki' rik'in jun nimalej xibinri'il y roma ri kimak eqal-eqal xkenk'is, xcha'.