Ez 38 - Kaqchiquel Bible

Ri xtibanatej pa ruwi' ri rey Gog

¹ Ri Jehová xch'on chik wik'in y xubij chuwe:

² Rat Ezequiel, kach'on pa nubi' yin rik'in ri Gog rey richin ri tinamit Mésec y ri Tubal chupan ri ruwach'ulew Magog.

³ Y taya' k'a re jun rutzijol re' chire: Yin Jehová in yakatajineq chawij.

⁴ Y roma ri' xtinya-el jun chapbel-ti'ij pan akaxtate' richin xkatuk'uex-el xabakuchi. Y k'ari' xkatinwelesaj-el rat y konojel ri awinaq ri yech'oke' chirij kiej y ri achi'a' ri yebe chi kaqen, stape' k'o rutobal ruwa-kik'u'x, ki-espada y jalajoj ruwech kitobal.

⁵ Kan xkekachibilaj k'a pe aj-labal aj-Persia, aj-Etiopía y aj-Libia; konojel rije' kik'ualon kitobal y rutobal-kijolon.

⁶ Chuqa' yekachibilaj-pe ri aj-labal aj-Gómer y aj-Bet-togarmá, ri k'o pa xaman. Y ri e aj-labal re' xkek'iyer janila, koma re winaqi' re'.

⁷ Tabana' achojmil rat y konojel ri ek'o awik'in y chi'iwonojel rix xkixk'oje' chuxe' nutzij yin.

⁸ Y toq q'axineq chik k'iy juna' xtak'ul jun rutzijol richin namej ri ruwach'ulew Israel, ri chaq xaxe labal xban rik'in ojer kan, jak'a xa kan xtitikir chik xtiyakatej-q'anej. Y ri ruwinaq xa xketzolej chik richin xkek'ase' chik pa taq juyu' richin ri kiruwach'ulew, ri wulatejineq kan. Y konojel re winaqi' re' xkek'ase' rik'in uxlanibel-k'u'x.

⁹ Jak'a rat Gog, ri aj-labal y ri ch'aqa' chik winaqi' xkixapon kik'in ri israelita richin yixyakatej chikij, achi'el nibiyin jun kaq'iq'-job y achi'el nibiyin jun q'eqelej-sutz'.

¹⁰ Yin Jehová ri yibin ronojel re'. Chupan k'a ri q'ij ri', rat kan xke'ach'obola' k'a janila itzel taq banobel.

¹¹ Y xtich'ob richin yixok chupan ri kitinamit ri winaqi' israelita ri kikuquban kik'u'x y man jun nikimey. Man jun tz'aq kiya'on chikij ri kitinamit, ni man kiya'on ta nima'q taq ch'ich' chirij ri ruchi' ri kachoch.

¹² Rije' xtikiyek chik q'anej ri kitinamit y xa xtikimol chik ki' pa taq jalajoj ruwach'ulew. Xkek'oje' chuqa' kawej y kibeyomel, y xkek'oje' pa ruk'u'x ri ruwach'ulew. Jak'a rat xtach'ob chi xkayakatej chikij richin xtak'uaj k'a el ronojel re'.

¹³ Chuqa' xkepe ri winaqi' richin ri ruwach'ulew Sabá y ri Dedán y ri k'ayinela' richin ri ruwach'ulew Tarsis y konojel ri ruwinaq, richin xtikimej chuwi-kiq'a' ri k'o rejqalen: Ri q'anapueq, ri saqipueq, ri awej y ri ch'aqa' chik ri kichin rije'.

¹⁴ Roma ri' kach'on pa nubi' yin rik'in ri Gog y kere' k'a tabij chire: Toq ri nutinamit Israel jebel rukuquban ruk'u'x, jari' toq xkayakatej k'a pe rat chirij.

¹⁵ Kan xkatel k'a pe pan aruwach'ulew ri k'o pa xaman, kan e awachibilan-pe ri e nima'q taq tzobaj achi'a' yech'oke' chirij kiej.

¹⁶ Rat Gog y ri aj-labal kan anineq k'a xkixpe y man jun xtipaban iwichin, achi'el toq man jun nipaban richin jun sutz'. Re' xtibanatej pa ruk'isibel taq q'ij toq xtinben k'a chawe richin xkayakatej chirij ri nutinamit. Y chupan ri q'ij ri' ri ch'aqa' chik ruwach'ulew xtiketamaj chi ja yin ri in Loq'olej Jehová.

Ri rutojbalil rumak ri rey Gog

¹⁷ Yin Jehová ninbij: Chawij k'a rat in ch'owineq-pe ri ojer kan toq yech'on pa nubi' ri e q'alajirisey nuch'abel ri ek'o chiri' pan Israel. Rije' kan xkiya' k'a rutzijol ri ojer kan chi xtinben chawe richin no'achapa-el ri nutinamit Israel.

¹⁸ Toq rat xtak'en kan ri ruwach'ulew Israel, kan xtiyakatej k'a janila woyowal chawij. Yin Jehová ri ink'o pa ruwi' ronojel ri yijikiban.

¹⁹ Rik'in ri ruq'aq'arinen ri woyowal kan ninya' nutzij chi chupan ri q'ij ri' xtinbenbana' jun nimalej silonel ri chiri' pa ruwach'ulew Israel.

²⁰ Ri ker ri ek'o chupan ri palou, ri aj-xik' taq chikopi', ri k'uxunela' taq chikopi', ri yejepejot yebiyin; konojel k'a re' kan xkebaybot chinuwech. Chuqa' konojel winaqi' ri e richin ri ruwach'ulew keri' xtikiben. Ronojel juyu' xkewuluwu', ri nimalej taq abej xketzaq y ronojel tz'aq xkewulatej.

²¹ Chupan ri q'ij ri' xtinteq k'a pe chawij rat Gog, kamik rik'in espada chupan chijun ruwach'ulew. Chuqa' xtinben chi xtisach kik'u'x ri aj-labal richin xtikikamisaj-qa-ki' chikiwech rije'.

²² Kan xtinya' k'a rutojbalil-mak pan awi' y xtinteq-pe nimalej taq yabil chiwij rix y ri ch'aqa' chik winaqi'. Chuqa' kan e k'iy chiwe rix ri xkixinkamisaj. Xtinben k'a chi xtipe jun nimalej kamik job, saqboch rik'in q'aq' y chuwilej-abej ri xtiqaqa-pe chila' chikaj.

²³ Keri' xtink'ut k'a chikiwech ri ch'aqa' chik ruwach'ulew chi yin kan in loq'olej y kan nimalej nuq'ij. K'ari' k'a xtiketamaj konojel chi ja yin Jehová ri ink'o pa ruwi' ronojel.