Ez 37 - Kaqchiquel Bible

Ri chaqi'j taq baq

¹ Ri Jehová xuya' ri ruq'a' pa nuwi' richin xiruk'uaj-el pa jun achi'el achik' pa jun taq'aj kojol juyu' ri akuchi nojineq rik'in baq kichin winaqi'.

² Y ri baq kan janila k'iy, kan kinojisan k'a ri taq'aj kojol juyu' y kan e chaqi'j e chaqi'j chik. Y ri Dios xuben k'a chuwe richin xiq'axlan chikikojol ri baq ri'.

³ K'ari' xuk'utuj chuwe wi ri chaqi'j taq baq ri' nik'oje' chik kik'aslen. Y yin xinbij k'a chire: Wajaw, kan xaxe rat at etamayon ronojel re', xicha'.

⁴ K'ari' ri Jehová xubij chuwe: Kach'on kik'in re baq re' y taya' re jun rutzijol re' chike: Rix ri ix chaqi'j taq baq, tiwak'axaj ri nuch'abel yin Jehová.

⁵ Xtinben k'a chiwe richin xtik'oje' chik ik'aslen richin chi xkixk'ase' chik q'anej.

⁶ Kan xtinya' k'a paten-iboch' chiwe y xtinben k'a chi xtik'oje' chik ich'akul y ri itz'umal. K'ari' xtinya' chik jun bey ik'aslen richin xkixk'ase'. K'ari' k'a xtiwetamaj chi ja yin Jehová, xcha'.

⁷ Yin xinbij k'a chike ri baq ri' achi'el xubij-pe ri Jehová chuwe. Y rokik k'a yich'on kik'in, jari' toq xinwak'axaj chi ri baq yeq'ajan richin xkitunula-ki'.

⁸ Y xintz'et k'a chi xek'oje' paten-iboch' chikij, kich'akul y kitz'umal, jak'a xa man jani k'o kik'aslen.

⁹ Xeri' ri Jehová xubij chuwe chi yich'on rik'in ri kaq'iq' pa rubi' rija'. Y jare' k'a ri xubij chuwe: Yin Jehová ri yibin. Tipe kaq'iq' richin k'aslen chi e kaji' kajtz'uk richin nuya' kik'aslen re kaminaqi' re', richin xkek'ase' chik jun bey, xcha'.

¹⁰ Yin xich'on k'a pa rubi' rija' achi'el xubij chuwe. Xpe k'a ri kaq'iq' y ri k'aslen xok kik'in ri kaminaqi' ri'. Y rije' kan xek'ase' chik jun bey y xepa'e-q'anej. Kan janila k'a e k'iy y xa kan xkiben k'a jun tzobaj, achi'el jun tzobaj aj-labal.

¹¹ K'ari' ri Jehová xubij chuwe: Ri tinamit Israel xa achi'el k'a re baq re', roma rije' nikibila' chi ri kibaqil xa e chaqi'j chik, xa kan man jun chik oyobenri'il ri k'o kik'in y xa konojel rije' yek'is yan.

¹² Roma ri' pa nubi' k'a yin kach'on kik'in y tabij re jun rutzijol re' chike: Yin xtinben chiwe chi xkixinwelesaj-pe akuchi ix muqun-wi y xtinben chiwe richin xkixtzolej chik pan iruwach'ulew.

¹³ Y toq xkixinwelesaj-pe ri chiri', k'ari' xtiwetamaj chi ja yin Jehová ri ink'o pa ruwi' ronojel.

¹⁴ Chuqa' kan xtinya' k'a ri ik'aslen richin kan xkixk'ase' chik jun bey y toq xkixink'uaj chik pan iruwach'ulew k'ari' xtiwetamaj chi ja yin Jehová ri xibin y kan xinben, xcha'.

Ri ajawaren richin ri Judá y ri Israel xa jun xtikiben

¹⁵ Ri Jehová xch'on chik wik'in y xubij chuwe:

¹⁶ Rat Ezequiel, takanoj-pe ri tz'alem richin chi natz'ibaj re jun rutzijol re' chuwech: Richin ri rajawaren ri Judá y ri israelita ri ek'o rik'in. Chirij ri' takanoj jun chik ti tz'alem y tatz'ibaj chuqa' re rutzijol re' chuwech: Richin ri rajawaren ri José, ri q'atbel-tzij richin ri Efraín y ri ch'aqa' chik winaqi' israelita.

¹⁷ Xeri' tatunu' ri ka'i' tz'alem ri', richin xa jun nikiben.

¹⁸ Toq ri awinaq xtikik'utuj ri achike nel chi tzij re',

¹⁹ jari' toq rat xtabij chike re rutzijol re'. Yin Jehová xtinchop k'a el ri cetro richin ri José ri k'o pa ruq'a' ri Efraín, y xtintun rik'in ri cetro richin ri Judá, richin keri' xa jun k'a ri xtinben chike, xkacha'.

²⁰ Y chikiwech k'a ri awinaq xtachop ri ka'i' taq tz'alem ri achoq chuwech xatz'iban-wi,

²¹ y xtabij chike re jun chik rutzijol re': Yin Jehová ri ink'o pa ruwi' ronojel ninjikiba' chi kan xkenwelesaj k'a pe ri iwinaq israelita chikikojol ri ch'aqa' chik ruwach'ulew ri akuchi xentaluj-wi-el. Kan xkenmol k'a ri akuchi ek'o-wi y xkenk'en chik pe pan iruwach'ulew Israel.

²² Chuqa' xtinben k'a chike chi xa jun ajawaren xtikiben y chi xkek'ase' junan chijun ri ruwach'ulew y ri pa taq juyu'. Xaxe k'a jun ki-rey ri xtik'oje' y man xtikich'er ta chik ki' pa taq ka'i' tzobaj, ni man jun bey chik xtikich'er ri kajawaren.

²³ Y chuqa' man xke'ok ta chik man ch'ajch'oj ta richin nikiya' kiq'ij wachibel ri kan yenwixowaj yin, ni man xkeyakatej ta chik chuwij. Yin kan xkenkol k'a pe ri akuchi ek'o-wi y xtinch'ajch'ojirisaj ri kimak. Y keri' rije' xke'ok nutinamit y yin xkinok ki-Dios.

²⁴ Xtipe k'a jun rey achi'el ri q'asen David, ri nusamajel ri xtiq'aton-tzij pa kiwi' y rija' xtichajin kichin achi'el nuben jun yuq'unel. Y rije' kan jebel xtikinimaj ri nupixa'.

²⁵ Xkek'ase' k'a chupan chijun ri ruwach'ulew ri xinya' chire ri ánima Jacob, ri nusamajel y ri akuchi chuqa' xek'ase-wi ri iwati't-imama'. Kan chiri' k'a xkek'ase-wi richin jantape' ri winaqi' ri xtinmol kichi', ri kalk'ual y ri kijatzul. Keri' xtikiben toq ri rey ri achi'el ri David ri nusamajel xtok aj-raqen pa kiwi' richin jantape'.

²⁶ Kan xtinben k'a kik'in rije' jun tununri'il richin uxlanibel-k'u'x richin jantape'. Chuqa' xtinben k'a chi xkejike' richin q'asen y xkewinaqir. Ri wachoch kan xtik'oje' k'a chikikojol rije',

²⁷ richin kan xkik'ase' k'a chikikojol. Yin xkinok k'a ki-Dios y rije' xke'ok nutinamit.

²⁸ Toq ri wachoch xtik'oje' chikikojol richin q'asen, jari' toq ri ch'aqa' chik tzobaj winaqi' richin re ruwach'ulew kan xtiketamaj k'a chi ja yin ri xicha'on ri tinamit Israel richin xke'ok jun ruwach'ulew ch'ajch'oj, xcha'.