Ez 36 - Kaqchiquel Bible

Ri Israel xtiyakatej chik q'anej roma rutzil ri Jehová

¹ Rat Ezequiel, taya' re jun rutzijol re' pa ruwi' ri juyu' richin ri ruwach'ulew Israel.

² Y jare' k'a ri rutzijol ri xuya': Ri e etzelanel qichin kan nikina-qa-ki' chi kan ja rije' e rajaw ri ruwach'ulew y ri ruwi' taq juyu'.

³ Xabakuchi k'a yixchap chi oyowal y yixkik'is, konojel tinamit richin ch'aqa' chik ruwach'ulew kan xkiben chi xok-qa kichin ri ruwach'ulew ri'. Y rije' kan yixkitze'ej k'a y yixketzelaj.

⁴ Roma ri' tak'axatej k'a ri nuch'abel pa ruwi' taq juyu', ri kokoj taq juyu', ri siwan, ri taq'aj kojol taq juyu', ri akuchi e wulatejineq kan y ri tinamit ri xe'ok kan tz'iran, chiri' ri akuchi xe'uk'uex-el ronojel ri ek'o chupan. Re ruwach'ulew re' xa kan xyojobex y roma ri' yin Jehová ninya' k'a nutzij chi

⁵ yakatajineq janila ruq'aq'arinen ri woyowal chikij rije' y chikij ri aj-Edom, roma rik'in janila kikoten xk'oje' kan pa kiq'a' ri ruwach'ulew ri' y rik'in janila ixowanik xekik'uaj-el ronojel ri ek'o kan pa taq juyu'.

⁶ Rat Ezequiel, taya' chik re jun rutzijol re' pa ruwi' ri taq juyu', ri kokoj juyu', ri siwan y ri taq'aj kojol juyu'. Re ruwach'ulew re' kan etzelan-wi koma ch'aqa' chik winaqi' y roma ri' yin janila woyowal chike rije'.

⁷ Roma ri' yin Jehová ninya' k'a nutzij chi rije' kan xkek'ixbitej k'a.

⁸ Jak'a ri juyu' richin ri ruwach'ulew Israel kan xkenoj chi che' ri yewachin. Y ri winaqi' israelita kan xtikitej ri ruwech toq xketzolin-pe pa ximonri'il.

⁹ Ja yin ri xkichajin ri ruwach'ulew ri', richin xtisamajix y k'o xtitik chuwech ri ruwi' taq juyu'.

¹⁰ Ri winaqi' israelita xkepe richin nikipaba' chik q'anej ri wulatejineq kan richin ye'ok'ase' chiri'. Y keri' kan xtikinojisaj chik ri tinamit.

¹¹ Chuqa' xtinben chi xkek'iyer chik q'anej ri winaqi' y ri chikopi', chuwech chijun ri ruwach'ulew achi'el rubanon ojer. Y kan xtinben k'a chi xtik'oje' más kibeyomel chuwech ri ojer kan. K'ari' xtiketamaj chi ja yin Jehová.

¹² Xtinben k'a chi ri nutinamit Israel xtok chik kichin re ruwach'ulew re', richin chi xkek'oje' kan chiri' y xtikichinaj kan. Y man jun bey chik xtinya' q'ij chi xkeken ta roma wayjal ri kalk'ual.

¹³ Ri ch'aqa' chik winaqi' nikibij chi re ruwach'ulew re' man niwachin ta, y roma ri' ri k'ulan taq winaqi' yeken y man ye'alex ta chik ak'uala'. Y roma ri' yin Jehová ninbij chi

¹⁴ man jun bey chik xtibanatej kere'. Yin Jehová ri ink'o pa ruwi' ronojel ninjikiba' nutzij pa ruwi' re'.

¹⁵ Yin man xtinya' ta q'ij richin nak'axatej chik ri itzel ch'abel kichin ch'aqa' chik winaqi' richin ri ch'aqa' chik ruwach'ulew y chuqa' man xtinya' ta q'ij chi maneq chik winaqi' chupan ri kiruwach'ulew, xcha'.

¹⁶ Ri Jehová xch'on chik wik'in y xubij chuwe:

¹⁷ Rat Ezequiel, toq ri awinaq israelita k'a ek'o na pan aruwach'ulew, xa kan xkiben chire chi ri ruwach'ulew ri' xok man ch'ajch'oj ta, achi'el toq jun ixoq k'o yabil richin chi ik' chire man ch'ajch'oj ta.

¹⁸ Chuqa' kan janila chi kamik ri xekibanala' y xekiya' kiq'ij wachibel. Roma ri' xtinwelesaj woyowal chikij rije'.

¹⁹ Y richin xinya' rutojbalil-mak pa kiwi', xentaluj chikiwech tzobaj taq winaqi' richin ch'aqa' chik ruwach'ulew. Y keri' xinq'et-tzij pa kiwi' achi'el ri kibanobal.

²⁰ Jak'a toq xe'apon pa taq ch'aqa' chik ruwach'ulew, xa xkiben chuwe chi maneq wejqalen y roma ri' ri winaqi' ri ek'o chiri' nikibij chi stape' kan e nuwinaq, k'o chi xe'el-el chiri' pa kiruwach'ulew.

²¹ Roma ri' janila xinch'ob rij ri nubi', roma ri aj-Israel xkiben chire chi maneq rejqalen ri chiri' pa taq ruwach'ulew ri akuchi xe'apon-wi.

²² Roma ri' tabij k'a chike ri awinaq israelita chi ri xtinbenbana' wakami, man iwoma ta rix; xa kan roma ri nimalej nubi' ri iqasan ruq'ij ri pa taq ruwach'ulew ri akuchi ix apowineq-wi.

²³ Y chikiwech konojel ri tzobaj winaqi' richin ri ruwach'ulew xtink'ut ri loq'olej nubi', ri iqasan ruq'ij rix chikikojol rije'. Y toq yin xtinben re', jari' xtiketamaj chi ja yin Jehová.

²⁴ Yin kan xkixinwelesaj k'a pe chikikojol ri tzobaj taq winaqi' ri e richin ri ch'aqa' chik ruwach'ulew y kan xkixinmol k'a y xkixink'uaj chik pan iruwach'ulew.

²⁵ Kan xtinchikaj k'a ch'ajch'oj ya' pan iwi' richin xkixinch'ajch'ojirisaj chire ri imak. Y keri' xkixinkuy roma rix man ix ch'ajch'oj ta y roma xiya' kiq'ij ri wachibel.

²⁶ Kan xtinwelesaj-el ri kow iwánima ri achi'el abej rubanon y xtinya' jun iwánima ri kan k'es, richin nimey-tzij. Kan keri' k'a xtinya' jun k'ak'a' iwánima ri más ch'uch'uj.

²⁷ Y kan xtik'oje' k'a ri nu-espíritu iwik'in richin niwajo' xtitaqej ronojel ri nupixa'.

²⁸ Kan xkixk'ase' k'a chupan ri ruwach'ulew ri xinya' chike ri ite-itata' y rix kan xkixok k'a nutinamit y yin xkinok k'a i-Dios.

²⁹ Kan xkixinkol k'a chuwech banobel ri nibanon chiwe chi yixok man ch'ajch'oj ta. Y chuqa' xtinya' pa ruk'iyal ri jalajoj ruwech ixin chiwe richin man jun bey chik xtitej wayjal.

³⁰ Kan xtinben k'a chi janila xkewachin ri jalajoj ruwech che' y kan xtiwachin k'a ri ulew, richin man jun bey chik xtiqasex iq'ij chikikojol ri ch'aqa' chik winaqi' roma wayjal.

³¹ K'ari' k'a xtoqaqa chi'ik'u'x ronojel ri xe'iben y kan itzel xtina-qa, roma ri itzel taq banobel ri xe'ibanala' y ri yalan xixetzelan.

³² Y ninwajo' chi niwetamaj chi ronojel re' man xtinben ta roma ri ajowabel iwichin rix. Yin Jehová ri ink'o pa ruwi' ronojel ri yibin. Ronojel re itzel taq banobel re' ruk'amon-pe k'ixbilal chiwe rix.

³³ Jari' toq yin xkixinch'ajch'ojirisaj chire ronojel ri imak, kan xtinben k'a chiwe richin xkixk'oje' chik pa taq itinamit y xtipaba' chik q'anej ronojel ri e wulatejineq.

³⁴ Ri ojer kan ri winaqi' xeq'ax y xkitz'et chi ri ruwach'ulew xok kan tz'iran. Jak'a re wakami, xa xtiwachin chik jun bey.

³⁵ Y xtibitej k'a: Re ruwach'ulew re tolan-tolan rubanon kan, re wakami kan xok k'a achi'el ri qejoj ri kan nik'ases rupan. Ri tinamit ri e wulatejineq y e maneq winaqi' chupan ri rubanon kan, re wakami ek'o chik jay, sutin chik kij chi tz'aq y ek'o chik winaqi' chuqa'.

³⁶ K'ari' ri juba' winaqi' ri xkek'oje' kan chi'inaqaj xtiketamaj chi ja yin Jehová ri xipaban chik q'anej ri wulatejineq kan y xintik chik qa ri ulew ri malin kan. Yin Jehová ri yibin.

³⁷ Yin Jehová ri ink'o pa ruwi' ronojel ninbij chi xtinben ri achike ri xtikik'utuj ri nuwinaq israelita. Kan xtinben chike chi xkewinaqir achi'el ri kajlabal ri karne'l

³⁸ ri e ch'aron richin ri nimaq'ij pa Jerusalem richin ninatex toq xenkol-pe chiri' pan Egipto. Keri' ri tinamit ri e wulatejineq kan ojer kan xkenoj chik chi winaqi'. Y k'ari' k'a xtiketamaj chi ja yin Jehová, xcha'.