Ez 3 - Kaqchiquel Bible

¹ Ri Jehová xubij chuqa' chuwe chi yin nintej-qa re jun boton wuj re' y k'ari' xkibe richin yibech'on kik'in ri nuwinaq israelita.

² Yin xinjeq k'a ri nuchi' y rija' xuju' ri boton wuj pa nuchi'.

³ Y xeri' xubij chuwe chi tinbeq'a-qa ri wuj ri' richin nunojisaj nupan. Xintej k'a qa ri wuj ri' y ri ruki'il ri xinna' kan achi'el kab ri nikiya' taq chikopi'.

⁴ Xubij chuqa' chuwe: Rat Ezequiel, kabiyin y kabech'on kik'in ri awinaq y xtabij chike ri achike ri ninbij chawe.

⁵ Yin man yatinteq ta el chupan jun tinamit ri akuchi ri winaqi' yech'on jun chik ch'abel, ri k'ayew richin niq'ax chikiwech. Yin xa yatinteq-el chikikojolil ri awinaq israelita.

⁶ Man xatinteq ta el chikikojol ri nima'q taq ruwach'ulew ri akuchi ek'o janila winaqi' ri yech'on ch'aqa' chik ch'abel y rije' man niq'ax ta chikiwech. Stape' keri', rije' xa kan xkatkak'axaj.

⁷ Jak'a ri awinaq israelita xa man xkeniman ta chawe, roma xa kan man nikajo' ta yinkak'axaj. Konojel rije' xkikowirisaj-ki' richin man yeniman ta chuwe y man jun niq'ax chikiwech.

⁸ Jak'a yin xtinben chawe richin xkakowir richin ye'akoch'.

⁹ Yin xtinben chawe chi kan kow k'a xkak'oje' achi'el rukowil ri abej diamante. Man tak'en kikiy ri winaqi' ri' y man taxibij-awi' chikiwech, roma rije' xa kan e jun ijatzul richin yakatajinenri'il.

¹⁰ Kan taya' k'a ri axikin y tik'oje' pan awánima ronojel ri xinbij chawe.

¹¹ Y k'ari' kabiyin kik'in ri awinaq ri e k'amon-pe wawe' pa Babilonia y xkach'on k'a kik'in y xtabij k'a chike re rutzijol re', stape' xkatkak'axaj o ni, xcha'.

¹² Kan janila nim ruq'ij ri rajawaren ri Jehová ri akuchi k'o-wi. Y chirij ri' ri ru-Espíritu rija' xiruyek k'a q'anej. Y xinwak'axaj k'a jun ch'abel ri peteneq chuwij ri kan nijinin k'a achi'el jun nimalej silonel.

¹³ Y re ch'abel re' ja ri kixik' ri e kaji' ri k'o kik'aslen, toq nutun-ri' ri kixik' y toq niq'ajan ri ki-rueda.

¹⁴ Y toq ri ru-Espíritu ri Jehová xiruyek-q'anej, jari' toq xiruk'uaj-el ri chiri'. Y yin kan k'ayirineq pa nuchi' y xyakatej janila woyowal, roma ri ruq'a' ri Jehová kan qajineq k'a ri ralal chuwij yin.

¹⁵ Y keri' xitzolin kik'in ri nuwinaq ri ek'o pa ximonri'il chiri' pa tinamit Tel-abib ri k'o chunaqaj ri raqen-ya' Quebar. Y wuqu' k'a q'ij xik'oje' chiri' chikikojol rije' y kan sachineq nuk'u'x y kan man xinwil ta k'a achike xinben y xinbij.

Ri Ezequiel xok jun chajinel

¹⁶ Toq xtz'aqet k'a ri wuqu' q'ij ri', ri Jehová xch'on chik wik'in y xubij chuwe:

¹⁷ Rat Ezequiel, yin xinben chawe richin xatok achi'el jun chajinel pa kiwi' ri awinaq israelita. Tawak'axaj k'a ri xtinbij yin y rat k'o chi xtabebij chike ri awinaq.

¹⁸ Toq yin ninwajo' ninbij chire jun awinaq aj-mak chi niqaqa kamik pa ruwi', rat k'o chi xtabij chire. Y wi man xtabij ta chire y rija' man nuya' ta kan ri mak richin chi nik'ase' chik juba', re wineq re' kan xtiken k'a roma ri rumak y yin xtink'utuj k'a ri ruk'aslen chawe rat.

¹⁹ Jak'a wi rat xtabij chire chi tuya' kan ri itzel rubanobal y wi rija' man xtuya' ta kan, rija' kan xtiken y xtrejqalej k'a ri rumak. Jak'a rat kan man jun k'a amak chire ronojel re'.

²⁰ Y chuqa' toq k'o jun awinaq ri choj ruk'aslen ri rubanon-pe y k'ate' nuya' kan re jun utzilej k'aslen re' y nuchop rubanik etzelal, rat xtabij chire. Jak'a wi rat man jun xtabij chire y yin xtinya-pe ruk'ayewal pa ruwi' richin niken, yin man xtinya' ta ri rejqalen ri utz ri xeruben y chawe k'a rat ri xtink'utuj-wi ri ruk'aslen roma man xabij ta chire ri ruk'amon richin ta xuben.

²¹ Jak'a wi ta rat xtabij chire chi man chik timakun y rija' xq'ax chuwech chi man utz ta ri xuben, rija' man xtiken ta k'a, roma kan xunimaj ri xabij chire y rat chuqa' xkakolotej, xcha'.

Toq ri Ezequiel xmemur

²² Y chirij re' ri ruchuq'a' ri Jehová xpe chik jun bey wik'in y xubij chuwe chi kibiyin pa taq'aj y chiri' xtich'on wik'in.

²³ Xiyakatej k'a el y xibe pa taq'aj ri akuchi xubij-wi ri Jehová chuwe y xintz'et k'a ri ruk'ojlemal ri chiri', kan junan rik'in ri ruk'ojlemal ri xintz'et ri chuchi' raqen-ya' Quebar. Y roma ri' yin kan xinlukuba-qa-wi' k'a pan ulew chuwech.

²⁴ Kan jari' ri ruchuq'a' ri Jehová xqaqa pa nuwi' y xuben chuwe richin xipa'e-q'anej y k'ari' xch'on wik'in y xubij chuwe: Kabiyin chupan ri awachoch y tatz'apej-awi' chiri'.

²⁵ Kan xkaxim kan ri chiri' chupan ri awachoch, richin keri' man xkatikir ta xkatel-pe richin xkatok'oje' chikikojol ri awinaq.

²⁶ Y man xaxe ta ri', yin kan xtinben chire ri awaq' chi niq'ate' kan pan achi' y xkamemur, richin keri' man xkatikir ta xke'ach'olij ri awinaq, stape' rije' kan e jun ijatzul ri kan nikipaba-ki'.

²⁷ Jak'a toq yin k'o ninwajo' ninbij chawe, xtinya' chik ri ach'abel y k'ari' xtabebij chike ri rutzijol. Y ri nrajo' nrak'axaj kan trak'axaj k'a. Y ri man nrajo' ta nrak'axaj kan man k'a trak'axaj, roma rije' kan e jun tinamit ri yalan itzel, xcha'.